1. Mbuti mbomukonzya kuba acilongwe amuntu umwi?

KUTEGWA mube acilongwe cibotu amuntu umwi, mweelede kuba aciindi cakubandika anguwe. Ciindi nomubandika kujatikizya nzyomuyeeya alimwi ambomulimvwa, cilongwe cilayuma. Nokuba boobo, caboola kukuba acilongwe a Jesu, tulajana buyumu-yumu. Ino mbuyumu-yumu nzi oobo?

2. Mbuyumu-yumu nzi bwakusaanguna mbotujisi?

² Buyumu-yumu bwakusaanguna mbwakuti kunyina notwakamubona kale Jesu cantongola meso. Abalo Banakristo bamumwaanda wamyaka wakusaanguna bakajana buyumu-yumu bukozyenye. Nokuba boobo, mwaapostolo Petro wakaamba kuti: “Nokuba kuti kunyina nomwakamubona, mulamuyanda. Nokuba kuti kwaciindi cino tamumubwene, pele mulamusyoma.” (1Pet. 1:8) Aboobo cilakonzyeka kuba acilongwe ciyumu a Jesu nokuba kuti kunyina notwakabonana anguwe cacigaminina.

3. Mbuyumu-yumu nzi bwabili mbotujisi?

³ Buyumu-yumu bwabili mbwakuti tatukonzyi kubandika a Jesu. Ciindi notupaila tubandika aa Jehova. Masimpe kuti tulapaila kwiinda muzina lya Jesu, pele tatubandiki anguwe cacigaminina. Alimwi buya, Jesu tayandi kuti katupaila kulinguwe. Ino nkaambo nzi? Nkaambo mupailo ncibeela cabukombi bwesu, alimwi Jehova alikke ngoweelede kukombwa. (Mt. 4:10) Nokuba boobo, tulakonzya kutondezya kuti tulamuyanda Jesu.

4. Mbuyumu-yumu nzi bwatatu mbotujisi, alimwi ncinzi ncotutiibandike mucibalo eeci?

⁴ Buyumu-yumu bwatatu mbwakuti Jesu uli kujulu, aboobo tatukonzyi kuba anguwe. Pele tulakonzya kumuzyiba kabotu  nokuba kuti tatuli anguwe. Tulabandika zintu zyone nzyotukonzya kucita kutegwa tuyumye cilongwe cesu anguwe. Aboobo cakusaanguna, atulange-lange ncociyandika kapati kuba acilongwe ciyumu a Kristo.

5. Nkaambo nzi ncotweelede kuba acilongwe a Jesu? (Amubone akabbokesi kakuti, “ Kuba Acilongwe a Jesu Kusololela Kukuba Acilongwe a Jehova” alimwi akakuti, “ Kuubona Munzila Yeelede Mulimo Ngwajisi Jesu.”)

⁵ Tweelede kuba balongwe ba Jesu ikuti katuyanda kuba acilongwe a Jehova. Nkaambo nzi ncocili boobo? Atulange-lange twaambo tobilo buyo. Kakusaanguna, Jesu wakaambila basikwiiya bakwe kuti: “Nkaambo Taata mwini ulamuyanda akaambo kakuti mwali kundiyanda mebo.” (Joh. 16:27) Wakayungizya kwaamba kuti: “Kunyina uuboola kuli Taata ccita kuti wainda mulindime.” (Joh. 14:6) Kusola kuba acilongwe a Jehova kakunyina kuba acilongwe ciyumu a Jesu cili mbuli kusola kunjila muŋanda kakunyina kwiinda amulyango. Jesu wakabelesya cikozyanyo cikozyenye aceeci ciindi naakalyaamba kuti “mulyango wambelele.” (Joh. 10:7) Kaambo kabili nkakuti Jesu wakabwiiya bube bwa Bausyi munzila iilondokede. Wakaambila basikwiiya bakwe kuti: “Kufwumbwa ooyo wandibona wamubona awalo Taata.” (Joh. 14:9) Aboobo nzila iiyandika kapati mbotukonzya kumuzyiba Jehova kwiinda mukwiiya buumi bwa Jesu. Mbotunooyaabwiiya kujatikizya Jesu, luyando lwesu kulinguwe luyookomena. Alimwi ciindi luyando lwesu kuli Jesu nolukomena, alwalo luyando lwesu kuli Bausyi lulakomena.

6. Nkaambo nzi akambi ikeelede kutupa kuba acilongwe a Jesu? Amupandulule.

⁶ Tweelede kuba acilongwe a Jesu kutegwa mipailo yesu kayiingulwa. Eeci caamba kuti tatweelede kwaamba buyo majwi aakuti  “kwiinda muzina lya Jesu” cakwiinzya buyo mulawo. Tweelede kuzyiba Jehova mbwamubelesya Jesu kutegwa mipailo yesu yiingulwe. Jesu wakaambila basikwiiya bakwe kuti: “Kufwumbwa ncomulomba muzina lyangu, ndiyoocicita cintu eeco.” (Joh. 14:13) Nokuba kuti Jehova ngonguwe uuswiilila akwiingula mipailo yesu, wakapa Jesu nguzu kutegwa azuzikizye kuyanda kwakwe. (Mt. 28:18) Aboobo Leza katanayiingula mipailo yesu, ulabona naa twakalutobela lulayo ndwaakapa Jesu. Mucikozyanyo, Jesu wakaamba kuti: “Nkaambo kuti kamulekelela bantu milandu yabo, awalo Uso uuli kujulu uyoomulekelela; pele kuti kamutalekeleli bantu milandu yabo, awalo Uso takamulekeleli milandu yanu.” (Mt. 6:14, 15) Eelo kaka cilayandika kapati kuti katweendelezya bamwi mbubwenya Jehova alimwi a Jesu mbobatweendelezya!

7. Ino mbaani bagwasyigwa acipaizyo cacinunuzyo ca Jesu?

⁷ Balikke aabo ibajisi cilongwe ciyumu a Jesu mbobagwasyigwa acipaizyo cacinunuzyo cakwe. Ino tuzyi buti oobo? Jesu wakaamba kuti, ‘uyootuulila beenzinyina buumi bwakwe.’ (Joh. 15:13) Bantu basyomeka ibakapona Jesu katanaboola anyika bayooyandika kwiiya kujatikizya nguwe akuba balongwe bakwe. Bamaalumi alimwi abamakaintu aaba mbuli Abrahamu, Sara, Musa alimwi a Rahabu bayoobusyigwa, pele nokuba kuti bakali babelesi ba Jehova basyomeka bayooyandika kuba acilongwe a Jesu kutegwa bakabe abuumi butamani.—Joh. 17:3; Mil. 24:15; Heb. 11:8-12, 24-26, 31.

8-9. Kweelana alugwalo lwa Johane 15:4, 5, ino cilongwe cesu a Jesu citugwasya kucita nzi, alimwi nkaambo nzi eeco ncociyandika kapati?

⁸ Tulakkomana kapati kubeleka antoomwe a Jesu mumulimo wakukambauka alimwi akuyiisya bantu makani mabotu aa Bwami. Ciindi Jesu naakali anyika, wakali mwiiyi. Aboobo mbwaanga Jesu wakajokela kujulu kali mutwe wambungano, wazumanana kusololela mulimo wakukambauka alimwi akuyiisya. Ulabona alimwi akulumba akaambo kakusolekesya kwanu kugwasya bantu banji kumuzyiba Jesu alimwi a Bausyi. Aboobo nzila ilikke iikonzya kutugwasya kutegwa tuuzuzikizye mulimo ooyu nkwiinda mukugwasyigwa a Jehova alimwi a Jesu.—Amubale Johane 15:4, 5.

⁹ Cakusalazya, Ijwi lya Leza liyiisya kuti tweelede kuzumanana kumuyanda Jesu kutegwa tumukkomanisye Jehova. Aboobo atubone zintu zyone nzyotweelede kucita kutegwa tube balongwe ba Jesu.

10. Nintaamu nzi yakusaanguna njotweelede kubweza kutegwa tube acilongwe a Jesu?

¹⁰ (1) Amumuzyibe Jesu. Tulakonzya kumuzyiba Jesu kwiinda mukubala mabbuku aamu Bbaibbele aa Matayo, Marko, Luka alimwi a Johane. Ciindi notuzinzibala kuyeeya zibalo zyamu Bbaibbele eezyi izyaamba buumi bwa Jesu, tuyoomuyanda alimwi akumulemeka Jesu akaambo kakuti wakabeendelezya caluzyalo bantu. Mucikozyanyo, nokuba kuti wakali Simalelo wabo, kunyina naakabeendelezya mbuli bazike basikwiiya bakwe. Muciindi caboobo, wakabaambila kujatikizya mbwaakali kuyeeya alimwi ambwaakali kulimvwa. (Joh. 15:15) Wakali kuusa alimwi akulila ambabo. (Joh. 11:32-36) Nobaba basikondonyina a Jesu bakali kukonzya kubona kuti aabo ibakali kuutambula mulumbe wakwe bakaba balongwe bakwe. (Mt. 11:19) Kuti twamwiiya Jesu kweelana ambwaakali kubeendelezya basikwiiya bakwe, zilongwe zyesu abamwi ziyooyuma, tunoolimvwa kukkutila akukkomana alimwi tuyoomuyanda akumulemeka kapati Kristo.

11. Nintaamu nzi yabili njotweelede kubweza kutegwa tube acilongwe a Jesu, alimwi nkaambo nzi ntaamu eeyo ncoiyandika kapati?

 ¹¹ (2) Amuyeeye alimwi akucita zintu mbuli Jesu. Kuti twaizyiba mizeezo ya Jesu alimwi akuyeeya mbuli nguwe, cilongwe cesu anguwe ciyooyuma. (1Kor. 2:16) Mbuti mbotukonzya kumwiiya Jesu? Atubone cikozyanyo comwe buyo. Jesu wakali kubikkila maano kapati kuyeeya mbwaakali kukonzya kugwasya bamwi, muciindi cakulikkomanisya lwakwe mwini. (Mt. 20:28; Rom. 15:1-3) Akaambo kakuti wakali kuyeeya munzila iili boobu, wakali kulisungula kugwasya bamwi alimwi akubalekelela. Kunyina naakali kufwambaana kunyema akaambo kazintu nzyobakali kwaamba bantu kujatikizya nguwe. (Joh. 1:46, 47) Alimwi kunyina naakali kubijilwa kujatikizya muntu umwi akaambo kakulubizya nkwaakacitide muntu ooyo kaindi. (1Tim. 1:12-14) Jesu wakaamba kuti: “Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.” (Joh. 13:35) Aboobo atulibuzye kuti, “Sena ndilacitobela cikozyanyo ca Jesu kwiinda mukucita zyoonse nzyondikonzya kutegwa ndizumanane kubamba luumuno abakwesu alimwi abacizyi?”

12. Nintaamu nzi yabili njotweelede kubweza kutegwa tube acilongwe a Jesu, alimwi mbuti mbotukonzya kwiibweza ntaamu eeyo?

¹² (3) Amubagwasyilizye banabokwabo Kristo. Milimo njotucitila banabokwabo bananike, Jesu wiibona mbuli kuti tucitila nguwe. (Mt. 25:34-40) Nzila iyandika kapati mbotukonzya kugwasyilizya bananike nkwiinda mukutola lubazu cakumaninina mumulimo wakukambauka makani mabotu aa Bwami alimwi akugwasya bantu kuba basikwiiya kweelana ambwaakatulailila Jesu. (Mt. 28:19, 20; Mil. 10:42) Banabokwabo Kristo balakonzya kuuzuzikizya mulimo wakukambauka uuli mukucitwa nyika yoonse lino, lilikke buyo kuti bagwasyigwa ‘abambelele zimbi.’ (Joh. 10:16) Ikuti naa muli bambelele zimbi, lyoonse nomutola lubazu mumulimo ooyu, mutondezya kuti mulabayanda bananike alimwi a Jesu.

13. Mbuti mbotukonzya kutobela lulayo lwa Jesu iluli kulugwalo lwa Luka 16:9?

¹³ Kuyungizya waawo, tulakonzya kuba balongwe ba Jehova alimwi a Jesu kwiinda mukubelesya lubono lwesu kutegwa tugwasyilizye mulimo ooyo ngobasololela. (Amubale Luka 16:9.) Mucikozyanyo, tulakonzya kusanga kumulimo wanyika yoonse, nkaambo zyakusanga eezyo zilabelesyegwa mukugwasyilizya mulimo wakukambauka makani mabotu mumasena aali kulamfwu kapati, mumulimo wakuyaka alimwi akubambulula masena aakukombela, alimwi akugwasyilizya baabo ibayandika lugwasyo akaambo kantenda zilicitikila naa mapenzi aamwi buyo. Alimwi tulakonzya kusanga mali aabelesyegwa kuzintu ziyandika mumbungano yesu alimwi akugwasya baabo mbotuzyi kuti bayandika lugwasyo. (Tus. 19:17) Eezyi nenzila mbotukonzya kubagwasya banabokwabo Kristo.

14. Kweelana alugwalo lwa Baefeso 4:15, 16, nintaamu nzi yane njotweelede kubweza kutegwa tube acilongwe a Jesu?

¹⁴ (4) Amugwasyilizye kububambe bwambungano ya Bunakristo. Tulaciyumya cilongwe cesu a Jesu mbwali mutwe wambungano ciindi notubelekela antoomwe abaabo ibasalidwe kutulanganya. (Amubale Baefeso 4:15, 16.) Mucikozyanyo, tuli mukusolekesya lino kubona kuti Maanda aa Bwami oonse alabelesyegwa kabotu. Kutegwa eeci cikonzyeke, mbungano zimwi zyakaswaanganizyigwa antoomwe alimwi azilawo zyakabambululwa. Bubambe oobu bwapa kuti kuyobolwe mali manji aasangwa mumbunga ya Jehova. Pele  aciindi nciconya, bwapa kuti basikumwaya bamwi bacince kweelana abukkale oobu bupya. Basikumwaya basyomeka aabo ambweni bali kuyanzana ambungano imwi kwamyaka minji alimwi ambweni balijisi cilongwe ciyumu abakwesu alimwi abacizyi mumbungano eeyo. Pele lino balombwa kuti balongele kumbungano iimbi. Eelo kaka Jesu weelede kuti ulikkomene kapati kubona basikwiiya basyomeka aaba kabatobela bubambe oobu!

15. Mbuti cilongwe cesu a Jesu mbociyooyuma kumbele?

¹⁵ Aabo bananikidwe amuuya uusalala bayoolela a Jesu mu Bwami bwa Leza. Bajisi bulangizi bwakuyooba antoomwe a Kristo, kumubona, kubandika anguwe alimwi akuyanzana anguwe mane kukabe kutamani. (Joh. 14:2, 3) Aabo ibajisi bulangizi bwakuyoopona anyika abalo banooyandwa alimwi akubikkilwa maano a Jesu. Nokuba kuti kunyina nobayakumubona Jesu, cilongwe cabo anguwe ciyooyuma kapati ciindi nobanookkomana abuumi Jehova alimwi a Jesu mbobakapa kuti bukonzyeke.—Is. 9:6, 7.

16. Nzilongezyo nzi nzyotujana kwiinda mukuba balongwe ba Jesu?

¹⁶ Ciindi notukuzumina kutamba kwa Jesu kwakuba balongwe bakwe, tulajana zilongezyo zinji. Mucikozyanyo, tulagwasyigwa kuluyando alimwi alugwasyo lwakwe lino. Tulijisi coolwe cakuyoopona mane kukabe kutamani. Alimwi kwiinda zyoonse, cilongwe cesu a Jesu ciyootupa kuba acilongwe ciinda kubota, nkokuti cilongwe a Jehova. Eelo kaka tujisi coolwe cilibedelede cakuba balongwe ba Jesu!