Nkaambo nzi Jesu kalaafwaafwi kufwa ncaakazubulula majwi aa Davida aali ku Intembauzyo 22:1?

Katanafwa Jesu wakaamba majwi aali kulugwalo lwa Matayo 27:46 aakuti: “Leza wangu, Leza wangu, ino wandilekelezyela nzi?” Kwiinda mukwaamba majwi aaya, Jesu wakazuzikizya majwi aasintembauzyo Davida aali mu Intembauzyo 22:1. (Mk. 15:34) Inga tiicaba camaano kutalika kuyeeya kuti Jesu wakazubulula majwi aaya akaambo kakuti kwakaindi kasyoonto wakalityompedwe alimwi akubula lusyomo. Jesu wakalizyi kabotu-kabotu kaambo ncaakeelede kufwa, alimwi wakalilyaabide kucita oobo. (Mt. 16:21; 20:28) Kuyungizya waawo, wakalizyi kuti ciindi naakali kufwa, Jehova kunyina naakali ‘kunoomuyakila lukwakwa lwakumukwabilila.’ (Job. 1:10) Jehova wakazumizya Jesu kuti atondezye kuti wakali kuyoozumanana kusyomeka kufwumbwa bukkale mwaakali kuyoolijana ciindi naakali kufwa.—Mk. 14:35, 36.

Aboobo nkaambo nzi Jesu ncaakaambila majwi aali muntembauzyo eeyi? Nokuba kuti tatusinizyide kujatikizya makani aaya, amuleke tubandike twaambo tumwi ntotuyeeyela. *

Kwiinda mukwaamba majwi aaya, sena Jesu wakali kukankaizya kuti Jehova kunyina naakali kukonzya kumugwasya ciindi naakali kufwa? Jesu wakeelede kupa cinunuzyo kakunyina kugwasyigwa a Jehova. Wakali muntu wanyama aboobo wakeelede kuti “afwide muntu uuli woonse.”—Heb. 2:9.

 Kwiinda mukuzubulula majwi aali kuntembauzyo, sena Jesu wakali kuyanda kuti bamwi batalike kuyeeya majwi aali muntembauzyo eeyo yoonse? Mumazuba aayo tiicakali ceenzu kuba Juba kuswata majwi aamu ntembauzyo zinji. Aboobo kwiinda mukuyeezyegwa kapango komwe buyo kamuntembauzyo, eeci cakali kupa kuti batalike kwaayeeya majwi oonse aali muntembauzyo eeyo. Kuti naa Jesu eeci ncaakajisi mumizeezo, nkokuti naakabagwasya basikwiiya bakwe kuyeeya businsimi bunji bulembedwe muntembauzyo eeyi alimwi azintu zyoonse zyakacitika ciindi naakali kufwa. (Int. 22:7, 8, 15, 16, 18, 24) Alimwi buya, tupango twamamanino muntembauzyo eeyi tutembaula Jehova akumupandulula kuti Mwami waboonse.—Int. 22:27-31.

Kwiinda mukuzubulula majwi aa Davida, sena Jesu wakali kupandulula kuti tajisi mulandu? Katanajaigwa Jesu, Nkuta Mpati Yaba Juda yakamutamikizya kaambo akumujanina mulandu wakusampaula Leza. (Mt. 26:65, 66) Bamunkuta mpati bakalibunga-bunga cakufwambaana, kumane masiku ngoonya aayo bakamubeteka akumujanina mulandu kakunyina kutobela milawo. (Mt. 26:59; Mk. 14:56-59) Aboobo ciindi Jesu naakabuzya mubuzyo wakuti, “Leza wangu, Leza wangu, ino wandilekelezyela nzi?” wakali kupandulula kuti kunyina mulandu ngwaakacita akuti kunyina kaambo kakeelede kumupa kujaigwa.

Sena Jesu munzila imwi wakali kuyeezya bamwi kuti nokuba kuti Davida imulembi wantembauzyo eeyi awalo wakapenga, eeci tacaambi kuti Davida tanaakacili kukkomaninwa a Jehova? Mubuzyo wa Davida kunyina noutondezya kuti wakanyina lusyomo. Naakamana kubuzya mubuzyo ooyu, wakatondezya kuti wakali kusyoma kuti Jehova ulakonzya kumufwutula, akuti wakazumanana kumulongezya. (Int. 22:23, 24, 27) Mbubwenya buyo, nokuba kuti Jesu “Mwana wa Davida,” wakali kupenga acisamu cakupenzezya, eeci tacaambi kuti Jehova kunyina naakacili kumukkomanina Jesu.—Mt. 21:9.

Sena Jesu wakali kutondezya mbwaakauside kapati akaambo kuti Jehova tanaakali kukonzya kumukwabilila kutegwa atondezye kuti wakali kusyomeka cakumaninina kuli Jehova? Kuzwa kumatalikilo tanaakali makanze aa Jehova kuti Mwanaakwe apenge akufwa. Eeci cakalibonya kuti cilayandika kuzwa buyo ba Adamu a Eva nobakazanga. Jesu kunyina ncaakalubizya, pele wakeelede kupenga kutegwa ape bwiinguzi kumibuzyo njaakabusya Saatani alimwi akupa cinunuzyo kubbadelela ceeco cakasweeka. (Mk. 8:31; 1Pet. 2:21-24) Eeci cakali kukonzyeka buyo iciindi Jehova naatakamukwabilila Mwanaakwe kwakaindi kasyoonto buyo mubuumi bwakwe.

Sena Jesu wakali kuyanda kupa basikwiiya bakwe kutalika kuyeeya kaambo Jehova ncaakamuzumizya kufwida acisamu cakupenzezya? * Jesu wakalizyi kuti kufwa boobu mbuli cigwebenga acisamu cakupenzezya kwakali kuyooba cilebyo kubantu banji. (1Kor. 1:23) Kuti basikwiiya bakwe nobakabikkila maano kakaambo keni kakapa kuti ajaigwe, nibakazyiba lufwu lwakwe mbolwakali kuyandika. (Gal. 3:13, 14) Alimwi buya nobakamubona kuti Mufwutuli ikutali cigwebenga.

Kufwumbwa naa nkaambo nzi kakapa Jesu kuzubulula majwi aaya, wakazyiba kuti zintu izyakamucitikila cakali cibeela cakuyanda kwa Jehova. Ciindi cisyoonto buyo kuzwa naakamana kuzubulula majwi aazwa muntembauzyo eeyi, Jesu wakati: “Zyazuzikizyigwa!” (Joh. 19:30; Lk. 22:37) Inzya, akaambo kakuti Jehova tanaakamugwasya Jesu kwakaindi kasyoonto, cakapa kuti Jesu acikonzye kuzuzikizya mulimo ngwaakatuminwa ansi aano. Alimwi cakapa kuti zizuzikizyigwe zintu zyoonse zilembedwe mu “Mulawo wa Musa amu Basinsimi amu Intembauzyo.”—Lk. 24:44.