1-2. Ncinzi cakacitika Jesu katanaamba majwi aamamanino?

LYAKALI syikati, mu Nisani 14, 33 C.E. Naakamana kubetekwa akupegwa mulandu ngwaatakacita, Jesu wakafwubaazyigwa, kupenzyegwa calunya, alimwi akugagailwa acisamu cakupenzezya. Wakagagailwa mpikili kumaanza akumaulu. Kuyoya alimwi akwaamba jwi lili lyoonse cakali kucisa. Pele wakeelede kwaambaula, nkaambo wakajisi majwi aayandika aayandika ngaakeelede kwaamba.

² Lino atubandike majwi Jesu ngaakaamba ciindi naakali afwaafwi kufwa acisamu cakupenzezya, alimwi aziiyo nzyotukonzya kwiiya kumajwi aayo. Munzila imwi, ‘atumuswiilile.’—Mt. 17:5.

3. Ino mbaani Jesu mbaakali kwaamba ciindi naakaamba kuti: “Taata, kobalekelela”?

³ Ncinzi Jesu ncaakaamba? Naakamana kugagailwa acisamu, Jesu wakapaila kuti: “Taata, kobalekelela.” Ino mbaani mbaakeelede kulekelela Usyi? Tulabazyiba kwiinda mumajwi aatobela aakuti: “Nkaambo tabazyi ncobacita.” (Lk. 23:33, 34) Kweelede kuti Jesu wakali kwaamba basikalumamba bana Roma ibakamugagaila mpikili kumaanza akumaulu. Tiibakazyi kuti mubwini wakali ni. Alimwi kweelede kuti wakabikkilizya abantu bamwi ibakali munkamu ibakali kuyanda kuti ajaigwe, balo kumbele ibakatalika kumusyoma. (Mil. 2:36-38) Jesu tanaakazumizya kuti kutalulama ooku kumupe kunyema alimwi akubikkilila. (1Pet. 2:23) Muciindi caboobo, wakalomba Jehova kuti abalekelele aabo ibakamujaya.

4. Ncinzi ncotukonzya kwiiya twalanga Jesu mbwaakalibambilide kulekelela bamwi?

 ⁴ Ncinzi ncotukonzya kwiiya kumajwi aa Jesu? Mbubwenya mbuli Jesu, tweelede kulisungula kulekelela bamwi. (Kol. 3:13) Bantu bamwi, kubikkilizya ababbululu, balakonzya kutukazya nkaambo tabazimvwisyi nzyotusyoma alimwi abuumi bwesu bwa Bunakristo. Balakonzya kwaambila bamwi makani aakubeja kujatikizya ndiswe, kutusampaula, kunyonyoona mabbuku eesu, naa kutukonga kutuuma buya. Muciindi cakubabikkilila, tulakonzya kulomba Jehova kuti ajalule meso aabo kutegwa bakabone kasimpe. (Mt. 5:44, 45) Zimwi ziindi, cilakonzya kutukatazya kulekelela, kwaambisya kuti naa twakacitilwa cibi cipati. Pele kuti twalekela kunyema alimwi akubikkilila kuzumanana mumoyo wesu tulakonzya kuliletela mapenzi. Mucizyi umwi wakaamba kuti: “Ndakazyiba kuti kulekelela bamwi tacaambi kuti nzyobacita zili kabotu naa kuti ndilakkomana ciindi nobatandeendelezyi kabotu. Pele inga ndisala buyo kutababikkilila.” (Int. 37:8) Ciindi notulekelela bamwi, inga tusala kuti zintu zibyaabi zyakatucitikila zitazumanani kutupa kulimvwa bubi naa kutunyemya.—Ef. 4:31, 32.

5. Ncinzi Jesu ncaakasyomezya cigwebenga ncobakali limwi nobakali kujaigwa, alimwi nkaambo nzi ncaakacisyomezyela boobo?

⁵ Ncinzi Jesu ncaakaamba? Kwakali zigwebenga zyobilo izyakali aa Jesu acisamu cakupenzezya. Kumatalikilo, zigwebenga eezyi zyakali kumufwubaazya. (Mt. 27:44) Pele tiilyakalampa, cigwebenga cimwi cakacileka kumufwubaazya. Cakazyiba kuti ani Jesu kunyina “cibi ncaakacita pe.” (Lk. 23:40, 41) Kwiinda zyoonse, eeci cigwebenga cakasyoma kuti Jesu wakali kuyoobusyigwa kuzwa kubafwu alimwi akuti uyoolela kali mwami bumwi buzuba. Aboobo cakaamba boobu ku Mufwutuli iwakali afwaafwi kufwa: “Jesu, ukandiyeeye waakunjila mu Bwami bwako.” (Lk. 23:42) Eelo kaka mwaalumi ooyu wakatondezya lusyomo luyumu! Mukwiingula, Jesu wakaamba kuti: ‘Ncobeni sunu ndikwaambila kuti, uyooba andime ikutali mu Bwami, pele mu Paradaiso.’ (Lk. 23:43) Amubone kuti Jesu wakasyomezya cigwebenga eeci kwiinda mukubelesya majwi aacigaminina aakuti “ndikwaambila,” “uyooba,” alyakuti “andime.” Jesu wakapa cigwebenga eeci bulangizi nkaambo wakalizyi kuti Bausyi mbaasiluse.—Int. 103:8.

6. Ncinzi ncotwiiya kumajwi Jesu ngaakaambila cigwebenga?

⁶ Ncinzi ncotukonzya kwiiya kumajwi aa Jesu? Jesu ncikozyanyo ca Bausyi cilondokede. (Heb. 1:3) Jehova ulayanda kutulekelela alimwi akutufwida luse. Pele ulacita oobo kuti naa twausa ncobeni kuzibi nzyotwakacita musyule alimwi akuti naa twatondezya lusyomo mucinunuzyo ca Jesu Kristo. (1Joh. 1:7) Bamwi cilakonzya kubayumina kusyoma kuti Jehova ulakonzya kubalekelela zibi nzyobakacita musyule. Kuti kamulimvwa boobo, amulange-lange bukkale oobu: Jesu katanafwa, wakatondezya luse kucigwebenga icakazwa akutalika kutondezya lusyomo. Eelo kaka Jehova ulakonzya kutondezya luse kubabelesi bakwe basyomeka, ibasolekesya kusikila mpobagolela kutobela milawo yakwe!—Int. 51:1; 1Joh. 2:1, 2.

7. Kweelana alugwalo lwa Johane 19:26, 27, ncinzi Jesu ncaakaambila Mariya a Johane, alimwi nkaambo nzi ncaakaambila boobu?

⁷ Ncinzi Jesu ncaakaamba? (Amubale Johane 19:26, 27.) Jesu wakali kuyanda kubalanganya banyina, balo ibakali bamukamufwu. Banabokwabo Jesu bakali kukonzya kubalanganya kumubili. Pele ino nguni wakali kunoobalanganya kumuuya? Kunyina citondezya  kuti aciindi eeci banabokwabo bakali basikumutobela. Nokuba boobo, Johane wakali mwaapostolo uusyomeka alimwi wakali mulongwe wa Jesu. Jesu wakali kubona baabo ibakamusangana mukukomba Jehova kuti mbanamukwasyi bakumuuya. (Mt. 12:46-50) Jesu wakali kumuyanda Mariya alimwi wakali kuyanda kubona kuti walanganizyigwa kabotu. Aboobo wakalomba Johane kuti kamulanganya nkaambo wakalizyi kuti ulakonzya kumugwasya Mariya kumuuya. Banyina wakabaambila kuti, “Amubone! Ngooyu mwanaanu!” Kumane Johane wakamwaambila kuti: “Bona! Mbaaba banyoko!” Kuzwa buzuba oobu, Johane wakaba mwana wa Mariya alimwi wakamulanganya Mariya mbuli banyina bakamuzyala.  Eelo kaka Jesu wakatondezya luyando kumukaintu ooyu iwakamulanganya kuzwa naakazyalwa alimwi wakaliimvwi munsi lyakwe kalaafwaafwi kufwa!

8. Ncinzi ncotukonzya kwiiya kumajwi Jesu ngaakaambila Mariya a Johane?

⁸ Ncinzi ncotukonzya kwiiya kumajwi aa Jesu? Cilongwe ncotujisi abakwesu abacizyi Banakristo cilakonzya kuyuma kwiinda ceeco ncotujisi abanamukwasyi. Babbululu balakonzya kutukazya naa kutukaka buya, pele kweelana ambwaakasyomezya Jesu, ikuti twakakatila kuli Jehova alimwi akumbunga yakwe, tuyoojana “zintu ziyungizyidwe ziindi zili 100” kwiinda zeezyo nzyotwakasweekelwa. Banji bayooba mbuli bana besu basankwa, basimbi, bamamama, naa bamatata basiluyando. (Mk. 10:29, 30) Ino mulimvwa buti kuzulilwa mumukwasyi wakumuuya muli bantu bakamantene akaambo kalusyomo aluyando, ibayanda Jehova alimwi akuyandana umwi amweenzinyina?—Kol. 3:14; 1Pet. 2:17.

9. Ncinzi ncotwiiya kumajwi aa Jesu aali kulugwalo lwa Matayo 27:46?

⁹ Ncinzi Jesu ncaakaamba? Kalaafwaafwi kufwa, Jesu wakoompolola kuti: “Leza wangu, Leza wangu, ino wandilekelezyela nzi?” (Mt. 27:46) Bbaibbele kunyina nolyaamba kaambo Jesu ncaakaambila boobu. Nokuba boobo, amubone ncotwiiya kumajwi aaya. Cimwi ncotwiiya ncakuti, kwiinda mukwaamba majwi aaya, Jesu wakali kuzuzikizya businsimi mbotujana ku Intembauzyo 22:1. * Kuyungizya waawo, kwiinda mumajwi aaya, cilisalede kuti Jehova kunyina ‘naakamuyakila lukwakwa lwakumukwabilila’ Mwanaakwe. (Job. 1:10) Jesu wakalizyi kuti Bausyi bakamwaaba mumaanza abasinkondonyina kutegwa bamusunke kusikila mpobagolela, cakuti kunyina muntu wakasunkidwe boobu pe. Kuyungizya waawo, aaya majwi alasinizya kuti Jesu wakanyina mulandu wakeelede kumupa kujaigwa.

10. Ncinzi ncotukonzya kwiiya kumajwi Jesu ngaakaambila Bausyi?

¹⁰ Ncinzi ncotukonzya kwiiya kumajwi aa Jesu? Ciiyo cimwi ncotwiiya ncakuti, tatweelede kulangila kuti Jehova unootukwabilila kumasunko aakonzya kusunka lusyomo lwesu. Mbubwenya Jesu mbwaakasunkwa kapati, andiswe tweelede kuzumanana kusyomeka kusikila kulufwu kuti kaceelela kucita boobo. (Mt. 16:24, 25) Nokuba boobo, tulakonzya kusinizya kuti Leza kunyina nayoozumizya kuti tusunkwe kwiinda nguzu zyesu. (1Kor. 10:13) Ciiyo cimbi ncotwiiya ncakuti, mbubwenya mbuli Jesu, andiswe tulakonzya kucitilwa cakutalulama. (1Pet. 2:19, 20) Basikutupenzya balakonzya kutusunka, ikutali kuti ambweni twacita cintu cibyaabi pe, pele akaambo buyo kakuti tatuli banyika alimwi akuti tupa bumboni kukasimpe. (Joh. 17:14; 1Pet. 4:15, 16) Jesu wakalizyi kaambo Jehova ncaakazumizya kuti apenge. Pele bakombi basyomeka bamwi ciindi nobasunkwa balalibuzya kaambo Jehova ncazumizya zintu zimwi kucitika. (Hab. 1:3) Leza wesu siluse alimwi uukkazika moyo ulizyi kuti bakombi bakwe nobalimvwa boobu inga takuli kubula lusyomo buya pe; pele inga bayandika luumbulizyo luzwa buyo kulinguwe.—2Kor. 1:3, 4.

11. Nkaambo nzi Jesu ncaakaambila majwi aali kulugwalo lwa Johane 19:28?

¹¹ Ncinzi Jesu ncaakaamba? (Amubale Johane 19:28.) Nkaambo nzi Jesu ncaakaambila kuti: “Ndafwa nyota”? Wakacita oobo kutegwa “azuzikizye lugwalo,” nkokuti businsimi  bujanika ku Intembauzyo 22:15, bwalo ibwaamba kuti: “Nguzu zyangu zyamaninina, ndaba mbuli lukaye; mulaka wangu wanamatila kucilakula.” Kuyungizya waawo, naakamana kupenzyegwa, kubikkilizya akucisa kutaambiki acisamu cakupenzezya, kweelede kuti wakafwide nyota ncobeni. Wakali kuyandika kumana nyota njaakamvwide.

12. Ncinzi ncotukonzya kwiiya kumajwi aa Jesu aakuti “Ndafwa nyota”?

¹² Ncinzi ncotukonzya kwiiya kumajwi aa Jesu? Jesu kunyina naakayeeya kuti nkubula nguzu kwaamba mbwaakalimvwide, andiswe tweelede kwaamba mbotulimvwa. Ziindi zinji mubuumi, tulakonzya kulombozya kutaambila bamwi kujatikizya zintu nzyotuyanda. Pele kuti katuyandika lugwasyo, tatweelede kuwaya-waya kulomba lugwasyo kuzwa kuli bamwi. Mucikozyanyo, kuti katucembeede naa katuciswa, tulakonzya kulomba mulongwe kuti atutole kucintoolo naa kuyoobonana adokota. Ikuti katutyompedwe, tulakonzya kulomba mwaalu naa Munakristo uusimide kuti atuswiilile naa kutukulwaizya kwiinda mukutwaambila “jwi libotu.” (Tus. 12:25) Katuyeeya kuti bakwesu abacizyi balatuyanda, alimwi balayanda kutugwasya “muziindi zyamapenzi.” (Tus. 17:17) Pele tabakonzyi kuzyiba nzyotuyeeya. Tabakonzyi kuzyiba kuti tuyandika lugwasyo ccita kuti twabaambila.

13. Ncinzi Jesu ncaakazuzikizya ciindi naakazumanana kusyomeka kusikila kulufwu?

¹³ Ncinzi Jesu ncaakaamba? Kuma 3 koloko wakumazuba mu Nisani 14, Jesu wakoompolola kuti: “Zyazuzikizyigwa!” (Joh. 19:30) Majwi aa Jesu aaya atuyiisya kuti katanafwa, Jesu wakalizyi kuti wakazicita zyoonse nzyaakali kuyanda Jehova. Kwiinda mukuzumanana kusyomeka kusikila kulufwu, Jesu wakazuzikizya zintu zinji. Cakusaanguna, wakatondezya kuti Saatani mubeji. Jesu wakatondezya kuti muntu uulondokede ulakonzya kuzumanana kusyomeka, tacikwe makani azintu Saatani nzyakonzya kucita. Cabili, Jesu wakapa buumi bwakwe kacili cinunuzyo. Akaambo kakuti wakaaba buumi bwakwe, wakapa kuti cikonzyeke kubantu batalondokede kuba acilongwe a Leza alimwi akuba abulangizi bwakupona kukabe kutamani. Catatu, Jesu wakatondezya kuti Jehova mweendelezi mululami alimwi wakasalazya zina lya Bausyi.

14. Mbuti mbotweelede kupona abuzuba? Amupandulule.

¹⁴ Ncinzi ncotukonzya kwiiya kumajwi aa Jesu? Tweelede kusolekesya kusikila mpotugolela kuzumanana kusyomeka abuzuba. Amubone ncaakaamba Mukwesu Maxwell Friend, iwakali mwiiyi wacikolo ca Watchtower Bible School of Gilead. Mumakani aakwe aajatikizya kusyomeka, lyamuswaangano wamasi, Mukwesu Friend wakaamba boobu: “Mutanoosumpyi zintu nzyomukonzya kucita naa kwaamba sunu. Ino muzyi buti naa munooliko juunza? Abuzuba amupone mbuli kuti nciindi camamanino cakutondezya kuti muleelela kuyoopona kukabe kutamani.” Atupone buzuba bumwi abumwi mbuli kuti ncoolwe camamanino cakuzumanana kusyomeka. Mpoonya, kufwumbwa naa twafwa, tuyoocikonzya kwaamba kuti, “Jehova ndakasolekesya kuzumanana kusyomeka, kutondezya kuti Saatani mubeji, kusalazya zina lyako alimwi akusumpula bweendelezi bwako.”

15. Kweelana alugwalo lwa Luka 23:46, ndusinizyo nzi Jesu ndwaakajisi?

¹⁵ Ncinzi Jesu ncaakaamba? (Amubale Luka 23:46.) Kasinizyide, Jesu wakaamba kuti: “Taata, ndabikka muuya wangu mumaanza aako.” Jesu wakalizyi kuti buumi bwakwe bwakumbele  bwakayeeme ali Jehova, alimwi wakalisinizyide kuti Bausyi bakali kuyoomuyeeya.

16. Ncinzi ncotwiiya kucakuluula ca Kamboni uujisi myaka iili 15?

¹⁶ Ncinzi ncotukonzya kwiiya kumajwi aa Jesu? Amulisungule kubikka buumi bwanu mumaanza aa Jehova. Kutegwa mucite boobu, mweelede ‘kusyoma Jehova amoyo wanu woonse.’ (Tus. 3:5) Amubone cikozyanyo ca Joshua, Kamboni uujisi myaka iili 15 walo uuciswa bulwazi bujaya. Wakakaka kutambula busilisi bupa kutyola milawo ya Leza. Katanafwa, wakaambila banyina kuti: “Baama, ndili mumaanza aa Jehova. . . . Eeci ncondimwaambila Baama, ndilisinizyide: Ndilizyi kuti Jehova kakunyina kudooneka uyoondibusya. Ulizyi mbondiyeeya alimwi ambondilimvwa, andime ndilamuyanda.” * Umwi aumwi wesu weelede kulibuzya kuti, ‘Kuti ndalijana mubukkale bukonzya kusunka lusyomo lwangu, sena inga ndabikka buumi bwangu mumaanza aa Jehova akusyoma kuti ulakonzya kundiyeeya?’

17-18. Ino nziiyo nzi nzyotwaiya? (Amubone kabbokesi kakuti “Ncotwiiya Kumajwi aa Jesu Aamamanino.”)

¹⁷ Eelo kaka kuli ziiyo zibotu nzyotukonzya kwiiya kumajwi aa Jesu aamamanino! Twayeezyegwa kuti tweelede kulekelela bamwi alimwi akusyoma kuti Jehova awalo inga watulekelela. Tulijisi coolwe cakuba mumukwasyi wakumuuya imuli bakwesu abacizyi ibalibambilide kutugwasya. Pele ciindi notuyandika lugwasyo, tweelede kubaambila. Tulizyi kuti Jehova uyootugwasya kuliyumya musunko lili lyoonse likonzya kutusikila. Alimwi twabona mbociyandika kupona buzuba bumwi abumwi mbuli kuti mbwamamanino kutondezya kuti tulasyomeka, katusinizyide kuti buumi bwesu bulikwabilidwe mumaanza aa Jehova.

¹⁸ Masimpe, majwi Jesu ngaakaamba kali afwaafwi kufwa acisamu cakupenzezya alijisi bupandulula bugwasya. Kwiinda mukubelesya ziiyo nzyotwaiya, tutobela majwi aa Jehova ngaakaamba kujatikizya Mwanaakwe kuti: “Amumuswiilile.”—Mt. 17:5.