1. Mbuti musankwa umwi mbwaakatondezya lusyomo luyumu mubulangizi bwabubuke?

 MWANA musankwa uutegwa Matthew uciswa bulwazi bukatazya kapati, calo cakapa kuti aandulwe kwaziindi zinji. Ciindi naakali amyaka iili 7, walo amukwasyi wakwe bakali kweebelela JW Broadcasting^®. Noyakali kumamanino, bakabona kavidiyo kanyimbo kakali kutondezya bantu bakali kutambula bayandwa babo bakali kubusyigwa. b Nobakamana kweebelela, Matthew wakaunka munsi aabazyali bakwe, wakabajata kumaanza, akwaamba kuti: “Baama, bataata tee mwabona, nokuba kuti ndafwa ndiyoobuka alimwi. Aboobo mutapengi mukandilindile buyo.” Amweezeezye buyo mbobakakkomana kapati bazyali aaba ikuzyiba kuti mwanaabo wakalaalusyomo luyumu mubulangizi bwabubuke.

2-3. Nkaambo nzi ncotweelede kuzinzibala kuyeeya kujatikizya cisyomezyo cabubuke?

² Ciindi aciindi, cilayandika kapati kulindiswe toonse kuzinzibala kuyeeya cisyomezyo camu Bbaibbele cijatikizya bulangizi bwabubuke. (Joh. 5:28, 29) Nkaambo nzi? Nkaambo kakuti tatuzyi notukonzya kuciswa bulwazi bupati naa kufwidwa muyandwa wesu cakutayeeyela. (Muk. 9:11; Jak. 4:13, 14) Kuba alusyomo mubulangizi bwabubuke kulakonzya kutugwasya kuliyumya mubukkale oobu bukatazya. (1Tes. 4:13) Magwalo atwaambila kuti Taateesu wakujulu ulituzyi kabotu alimwi ulatuyanda kapati. (Lk. 12:7) Amuyeeye buyo Jehova Leza mbwatuzyi kabotu cakuti ulakonzya kutubusya katujisi bube alimwi amizeezo njiyonya. Jehova ulatuyanda kapati alimwi uyanda kuti katupona kukabe kutamani. Aboobo nokuba kuti twafwa uyootubusya.

³ Mucibalo eeci, tulasaanguna kubandika twaambo itutupa kuti katucisyoma cisyomezyo cabubuke. Mpoonya tulalanga-langa  cibalo camu Bbaibbele ciyumya lusyomo, cijisi majwi aayeeme mutwe wacibalo aakuti: “Imunyoko ulabuka.” (Joh. 11:23) Kumamanino, tulaiya mbotukonzya kuyumya lusyomo lwesu mubulangizi bwabubuke.

4. Kutegwa tucisyome cisyomezyo cimwi, ncinzi ncotweelede kusinizya? Amupe cikozyanyo.

⁴ Kutegwa tucisyome cisyomezyo cimwi, tweelede kusinizya kuti ooyo wacisyomezya uliyandide kucizuzikizya alimwi ulijisi nguzu. Mucikozyanyo, amweezeezye kuti ŋanda yanu yanyonyoonwa kapati aguwo. Mpoonya mulongwe wanu waboola akumusyomezya kuti, ‘Ndilamugwasya kuyakulula ŋanda yanu.’ Ulisinizyide, aboobo mwaba alusyomo lwakuti uliyandide kumugwasya. Ikuti naa kajisi luzyibo lwakuyaka alimwi kajisi zibelesyo zyoonse ziyandika, inga mwaba alusyomo lwakuti ulakonzya kumugwasya ncobeni. Aboobo inga mwamusyoma. Pele mbuti kujatikizya cisyomezyo ca Leza cabubuke? Sena uliyandide kuyoocizuzikizya alimwi ulijisi nguzu?

5-6. Nkaambo nzi ncotukonzya kuba masimpe kuti Jehova uliyandide kuyoobabusya bafwide?

⁵ Sena Jehova uliyandide kuyoobabusya bafwide? Eeco tacidoonekwi buya. Wakasololela balembi ba Bbaibbele bali mbobabede kulemba cisyomezyo cakwe cijatikizya bubuke bwakumbele. (Is. 26:19; Hos. 13:14; Ciy. 20:11-13) Alimwi kuti Jehova wasyomezya cintu, lyoonse ulacizuzikizya. (Jos. 23:14) Alimwi buya ulijisi luyandisisyo lwakubusya bantu bakafwa. Nkaambo nzi ncotwaambila boobo?

⁶ Amuyeeye majwi ngaakaamba Jobu. Wakalisinizyide kuti nokuba kuti wafwa, Jehova wakali kuyoomubusya. (Job. 14:14, 15) Mbubwenya buyo, eeci Jehova ncayanda kuyoocitila bakombi bakwe boonse bakafwa. Uliyandide kuyoobabusya kutegwa bakapone buumi buli kabotu alimwi kabakkomene. Ino mbuti kujatikizya mabbiliyoni aabantu bakafwa kabatajisi coolwe cakwiiya kujatikizya Jehova? Leza wesu siluyando uyoobabusya abalo. (Mil. 24:15) Uyanda kuti abalo bakabe acoolwe cakuba balongwe bakwe akupona kukabe kutamani anyika. (Joh. 3:16) Cilisalede kuti, Jehova ulayandisya kuyoobabusya bafwide.

7-8. Nkaambo nzi ncotuli masimpe kuti Jehova ulijisi nguzu zyakubusya bafwide?

⁷ Sena Jehova ulijisi nguzu zyakubusya bafwide? Inzya! Kayi ngu “Singuzuzyoonse.” (Ciy. 1:8) Aboobo ulijisi nguzu zyakuzunda sinkondo uli woonse, noluba lufwu. (1Kor. 15:26) Kuzyiba kaambo aaka cilatuyumya-yumya alimwi akutuumbulizya kapati. Amumvwe cakuluula ca Mucizyi Emma Arnold. Lusyomo lwakwe amukwasyi wakwe lwakasunkwa kapati lya Nkondo Yanyika Yoonse Yabili. Kutegwa awumbulizye mwanaakwe nobakafwidwa bayandwa babo muzilabba zyakupenzezya zyaba Nazi, wakaamba kuti: “Ikuti naa bantu bakafwa tabakonzyi kupona alimwi, nkokuti lufwu uuli ngosinkondoma, lulaanguzu kapati kwiinda Leza. Pele eeco tacikonzyi kucitika. Kunyina cintu cili coonse cijisi nguzu kwiinda Jehova. Tacidoonekwi buya kuti Leza singuzuzyoonse iwakalenga buumi ulijisi nguzu zyakubusya baabo bakafwa.

⁸ Kaambo kambi katupa kusyoma kuti Leza ulakonzya kubabusya aabo bakafwa nkakuti walo talubi. Mucikozyanyo, ulayiita nyenyeezi imwi aimwi kweelana azina lyanjiyo. (Is. 40:26) Aboobo, ulibayeeyede aabo bakafwa. (Job. 14:13; Lk. 20:37, 38) Ulaziyeeya zintu zyoonse zijatikizya baabo mbayoobusya, kubikkilizya ambobakali kulibonya alimwi abube bwabo.

9. Ncinzi nywebo kumugama cimupa kucisyoma cisyomezyo ca Jehova cabubuke?

 ⁹ Cakutadooneka, tulacisyoma cisyomezyo ca Jehova cabubuke nkaambo tulizyi kuti uliyandide alimwi ulijisi nguzu zyakucizuzikizya. Nkaaka kaambo kambi katupa kucisyoma cisyomezyo eeci: Jehova wakabusya kale bantu bafwide. Kaindi, wakapa baalumi basyomeka basyoonto buyo nguzu, kubikkilizya a Jesu, zyakubusya bafwide. Atulange-lange cibalo caamba zyabubuke bumwi mbwaakacita Jesu cilembedwe kulugwalo lwa Johane caandaano 11.

10. Ncinzi cakacitika ku Betaniya ciindi Jesu naakali kukambauka mutala lya Jordano, alimwi ino wakacita buti? (Johane 11:1-3)

¹⁰ Amubale Johane 11:1-3. Amweezeezye cakacitika ku Betaniya kumamanino aamwaka wa 32 C.E. Jesu wakajisi balongwe mumunzi ooyu, nkokuti Lazaro abacizyi bakwe bobilo, Mariya a Marta. (Lk. 10:38-42) Mpoonya Lazaro wakazikuciswa, aboobo bacizyi bakwe bakalibilika kapati. Kumane bakatuma mulumbe kuli Jesu walo wakali mutala lya Jordano, imusinzo wakali kweendwa mazuba obilo kuzwa ku Betaniya. (Joh. 10:40) Cuusisya ncakuti, Lazaro wakafwa ciindi nciconya sikutola mulumbe naakasika kuli Jesu. Nokuba kuti Jesu wakazyiba kuti mulongwe wakwe wafwa, wakazumanana kukkala ooko nkwaakabede kwamazuba aambi obilo, mpoonya wakaunka ku Betaniya. Aboobo ciindi Jesu naakasika, Lazaro wakalifwide kale kwamazuba one. Aciindi aawa, Jesu wakali kuyanda kucita cintu cimwi icakali kukonzya kugwasya balongwe bakwe akuleta bulemu kuli Leza.—Joh. 11:4, 6, 11, 17.

11. Ncinzi ncotwiiya kujatikizya balongwe kucibalo eeci?

¹¹ Cibalo eeci cituyiisya kujatikizya balongwe. Amubone kaambo aaka: Ciindi Mariya a Marta nobakatuma mulumbe kuli Jesu, tiibakamulomba kuti aboole ku Betaniya. Bakamuzyibya buyo kuti mulongwe wakwe wakali kufwumba bulamfwu. (Joh. 11:3) Ciindi Lazaro naakafwa, Jesu wakali kukonzya kumubusya nokuba kuti wakali kulamfwu. Nokuba boobo, wakasala kuunka buya ku Betaniya kuyooba antoomwe abalongwe bakwe, Mariya a Marta. Sena mulijisi mulongwe uuli boobu, uukonzya kumugwasya nokuba kuti tiimwamulomba? Ikuti naa nkwali, nkokuti mulakonzya kusyoma kuti ulakonzya kumugwasya “muziindi zyamapenzi.” (Tus. 17:17) Mbubwenya mbuli Jesu, atube balongwe bali boobu kuli bamwi. Lino atujokele kucibalo tubone cakatobela.

12. Ncinzi Jesu ncaakasyomezya Marta, alimwi nkaambo nzi ncaakeelede kucisyoma? (Johane 11:23-26)

¹² Amubale Johane 11:23-26. Ciindi Marta naakazyiba kuti Jesu ulaafwaafwi a Betaniya, mpoonya-mpoonya wakaunka kuyoomucinga akumwaambila kuti: “Mwami, ikuti nookaliko kuno, mukwesu naatakafwa.” (Joh. 11:21) Masimpe kuti, Jesu naakamuponya Lazaro. Pele wakali kuyanda kucita cintu cimwi caalubazu. Wakasyomezya Marta kuti: “Imunyoko ulabuka.” Alimwi wakaamba kaambo kambi kakeelede kumupa kucisyoma cisyomezyo eeci, naakaamba kuti: “Ndendime bubuke abuumi.” Masimpe kuti wakalipedwe nguzu kuzwa kuli Leza zyakubusya bafwide. Kacitanacitika eeci, wakabusyide kale mwana musimbi wakazwide akufwa, alimwi amwana musankwa ambweni mubuzuba mbweena mbwaakafwa. (Lk. 7:11- 15; 8:49-55) Pele sena wakali kukonzya kubusya muntu wakafwide kwamazuba one alimwi mubili wakwe iwakatalikide kubola?

13. Kweelana alugwalo lwa Johane 11:32-35, ino Jesu wakacita buti ciindi naakabona Mariya abamwi kabalila? (Amubone acifwanikiso.)

¹³ Amubale Johane 11:32-35. Amweezeezye kujatikizya cakatobela. Mariya mwanookwabo a Lazaro, awalo wakaunka kuli Jesu akwiinduluka majwi ngoonya ngaakaamba Marta mwanookwabo aakuti: “Mwami, ikuti nookaliko kuno, mukwesu naatakafwa.” Walo abantu mbaakali limwi bakaluuside kapati. Ciindi Jesu naakababona akubamvwa kabalila, wakeetezyegwa kapati. Akaambo kaceeci, Jesu yakamweenda misozi. Ulizyi mbocicisa kapati kuti muntu wafwidwa muyandwa. Aboobo uliyandide kuyoozigusya zintu zyoonse zipa bantu kulila.

14. Ncinzi ncotukonzya kwiiya kujatikizya Jehova twayeeya ncaakacita Jesu naakabona Mariya kalila?

¹⁴ Ncaakacita Jesu naakabona Mariya kalila cituyiisya kuti Jehova ngu Leza siluzyalo. Nkaambo nzi ncotwaambila boobo? Kweelana ambotwakayiya mucibalo cainda, Jesu wakali kwiiya bube bwa Bausyi. (Joh. 12:45) Aboobo ciindi notubala kuti Jesu wakalila akaambo kakweetezyegwa kubona balongwe bakwe bakali mubuumba, tulazyiba kuti Jehova awalo cilamucisa kapati kutubona katulila akaambo kabuumba. (Int. 56:8) Sena eeci tacimupi kuyanda kuba acilongwe a Leza ooyu siluzyalo?

15. Kweelana alugwalo lwa Johane 11:41-44, ncinzi cakacitika kucuumbwe ca Lazaro? (Amubone acifwanikiso.)

¹⁵ Amubale Johane 11:41-44. Jesu wakasika kucuumbwe ca Lazaro akwaamba kuti baligwisye bbwe lyakali mpawo. Marta wakasola kukasya akwaamba kuti kweelede kuti mubili ulanunka lino. Jesu wakamwaambila kuti: “Sena tiindakwaambila kuti, ikuti naa wasyoma ulabona bulemu bwa Leza?” (Joh. 11:39, 40) Kumane Jesu wakalanga kujulu akupaila bantu kabalangilila. Wakali kuyanda kupa Jehova bulemu boonse kuli ceeci cakali kuyanda kucitika. Mpoonya Jesu wakoompolola kuti: “Lazaro, kozwa oomo!” Lazaro wakazwa mucuumbwe! Aboobo Jesu wakacita cintu bantu ncobatakali kuyeeyela kuti inga cacitika.—Amubone katwe kakuti, “Nkaambo nzi Jesu ncaakatolela  mazuba one kuti asike kucuumbwe ca Lazaro?” kali mu Ngazi Yamulindizi ya January 1, 2008.

16. Ino cibalo cili ku Johane caandaano 11 ciluyumya buti lusyomo lwesu mubulangizi bwabubuke?

¹⁶ Cibalo cijanika kulugwalo lwa Johane caandaano 11 ciyumya lusyomo lwesu kujatikizya bulangizi bwabubuke. Mubuti? Amuyeeye cisyomezyo Jesu ncaakaambila Marta cakuti: “Imunyoko ulabuka.” (Joh. 11:23) Mbubwenya mbuli Bausyi, Jesu ulayanda alimwi ulijisi nguzu zyakucizuzikizya cisyomezyo eeci. Misozi yakwe yakatondezya kuti uliyandide kuyoobabusya bantu bafwide alimwi akugusya mapenzi woonse aaboola akaambo kalufwu. Ciindi Lazaro naakazwa mucuumbwe, Jesu alimwi wakatondezya kuti ulijisi nguzu zyakubusya bafwide. Kuyungizya waawo, amuyeeye Jesu ncaakayeezya Marta. Wakati: “Sena tiindakwaambila kuti, ikuti naa wasyoma ulabona bulemu bwa Leza?” (Joh. 11:40) Aboobo tulijisi twaambo tubotu tweelede kutupa kusyoma kuti cisyomezyo ca Leza cabubuke ciyoocitika ncobeni. Pele ncinzi ncotweelede kucita kutegwa tube alusyomo luyumu mubulangizi oobu?

17. Ncinzi ncotweelede kuyeeya ciindi notubala zibalo zyabubuke bwaambidwe mu Bbaibbele?

¹⁷ Amubale kujatikizya bubuke bwakacitika kaindi alimwi akuzinzibala kuyeeya. Mu Bbaibbele kuli zibalo zyabantu bali 8 bakabusyigwa akupona aano anyika. c Amujane ciindi cakuzibala zibalo eezyi cakusitikila. Ciindi nomubala, kamuyeeya kuti aaba bakali bantu beni-beni, bamaalumi, bamakaintu alimwi abana. Amusole kujana ziiyo nzyomukonzya kwiiya. Amuyeeye cibalo cimwi acimwi mbocitondezya kuti Leza uliyandide alimwi ulijisi nguzu zyakubusya bafwide. Kwiinda zyoonse, amuzinzibale kuyeeya bubuke bwa Jesu bwalo buyandika kapati. Kamuyeeya kuti, bubuke bwakwe bwakasinizyigwa abantu banji kapati ibakalibonena buya ameso alimwi butupa kuba alusyomo mubulangizi bwabubuke.—1Kor. 15:3-6, 20-22.

18. Mbuti mbotukonzya kuzibelesya kabotu nyimbo zyesu zyaamba bulangizi bwabubuke? (Amubone abupanduluzi buyungizyidwe.)

 ¹⁸ Amuzibelesye nyimbo zyakumuuya zyaamba bulangizi bwabubuke. d (Ef. 5:19) Nyimbo eezyi, zilatugwasya kubona kuti bubuke ncintu ciyoocitika ncobeni alimwi akuyumya lusyomo lwesu mubulangizi oobu butaliboteli. Aboobo amuziswiilile, amuziiye kutegwa kamucikonzya kuziimba kabotu. Mpoonya ciindi cakukomba mumukwasyi amubandike kujatikizya ncaamba majwi aali mumo. Amwaaswate akuzinzibala kuyeeya kujatikizya ngayo kutegwa muyumye lusyomo lwanu. Aboobo ciindi mwaakujana sunko libikka buumi bwanu muntenda naa kufwidwa muyandwa wanu, muuya wa Jehova uyoomugwasya kuziyeeya nyimbo eezyi kutegwa zimuumbulizye alimwi akumuyumya-yumya.

19. Nzintu nzi nzyotukonzya kweezeezya kujatikizya bubuke? (Amubone kabbokesi kakuti “ Ncinzi Ncomuyanda Kuyoobabuzya?”)

¹⁹ Amweezeezye. Jehova wakatulenga munzila yakuti katucikonzya kweezeezya kuti tuli munyika mpya. Mucizyi umwi wakaamba kuti: “Ndilatola ciindi cinji kweezeezya kuti ndili munyika mpya, kandinunkizya maluba-luba mu Paradaiso.” Amweezeezye kubonana abamaalumi alimwi abamakaintu basyomeka bakaindi. Nguni ngomuyandide kuyoobona? Mibuzyo nzi njomuyanda kuyoomubuzya? Alimwi amweezeezye kubonana abayandwa banu baakubusyigwa. Amuyeeye kujatikizya cintu cakusaanguna ncomuyoobaambila, mbomuyoobakumbata alimwi ambomuyookkomana kubabona.

20. Ncinzi ncotweelede kuzumanana kucita?

²⁰ Eelo kaka tulamulumba kapati Jehova akaambo kacisyomezyo cabubuke! Tuli masimpe kuti cisyomezyo eeci ciyoozuzikizyigwa ncobeni, nkaambo Jehova ulayanda alimwi ulijisi nguzu zyakucizuzikizya. Aboobo atuzumanane kuyumya lusyomo lwesu mubulangizi oobu butaliboteli. Kwiinda mukucita boobo, tuyoozumanana kuyumya cilongwe cesu a Leza walo uutusyomezya kuti, ‘Ibayandwa banu bayoobuka!’