CIBALO CAKWIIYA 19
Mbuti Mbotukonzya Kuyumya Lusyomo Lwesu Mucisyomezyo ca Jehova Canyika Mpya?
“Ikuti naa [Jehova] waamba cintu, sena takonzyi kucicita?”—MY. 23:19.
LWIIMBO 142 Ikujatisya Bulangizi Mbotujisi
IZILI MUCIBALO a
1-2. Ncinzi ncotweelede kucita ciindi notulindila nyika mpya?
TULALUMBA kapati akaambo kacisyomezyo ca Jehova cakugwisya bweende bwazintu oobu, akuleta nyika mpya yabululami. (2Pet. 3:13) Nokuba kuti tatuzyi ciindi cini nyika mpya noiyakuboola, pele zintu zicitika munyika zitondezya kuti ilaafwaafwi kapati.—Mt. 24:32-34, 36; Mil. 1:7.
2 Aboobo, tacikwe makani amyaka njotwakkala mukasimpe, toonse tweelede kuzumanana kuyumya lusyomo lwesu mucisyomezyo eeci. Nkaambo nzi? Nkaambo kakuti noluba lusyomo luyumu, lulakonzya kuzungaana. Nkakaambo kaako, mwaapostolo Paulo wakaamba kuti kubula lusyomo ‘ncibi cifwambaana kutuzambaila.’ (Heb. 12:1) Aboobo kutegwa lusyomo lwesu lutazungaani, lyoonse tweelede kuzinzibala kuyeeya zintu zitondezya kuti nyika mpya ilaafwaafwi ncobeni.—Heb. 11:1.
3. Ncinzi ncotutiibandike mucibalo eeci?
3 Mucibalo eeci, tulabandika zintu zyotatwe zikonzya kutugwasya kuyumya lusyomo mucisyomezyo ca Jehova canyika mpya: (1) kuzinzibala kuyeeya kujatikizya cinunuzyo, (2) kuzinzibala kuyeeya nguzu zyajisi Jehova, mpoonya (3) kujata bubi muzintu zyakumuuya. Kumane tulabandika kujatikizya mulumbe wa Jehova kuli Habakuku mboukonzya kuyumya lusyomo lwesu mazuba aano. Pele cakusaanguna, amuleke tulange-lange bukkale bumwi mwalo motuyandika kuba alusyomo luyumu mucisyomezyo canyika mpya.
BUKKALE BUYANDIKA LUSYOMO LUYUMU
4. Ino zyakusala zili buti ziyandika lusyomo luyumu?
4 Buzuba abuzuba, tulapanga zyakusala ziyandika lusyomo luyumu. Mucikozyanyo, tulapanga zyakusala kujatikizya balongwe, kulikondelezya, lwiiyo, cikwati, bana, alimwi amulimo wakumubili. Aboobo tweelede kulibuzya kuti, ‘Sena zintu nzyondisala zilatondezya kuti ndilisinizyide kuti bweende bwazintu oobu bulamana ino-ino akuti nyika mpya ya Leza ilaafwaafwi? Naa zitondezya kuti ndilayungwa abantu basyoma kuti lufwu ngamamanino aazintu zyoonse?’ (Mt. 6:19, 20; Lk. 12:16-21) Tulakonzya kupanga zyakusala zibotu ikuti naa twayumya lusyomo lwesu lwakuti nyika mpya ilaafwaafwi kapati.
5-6. Nkaambo nzi ncotuyandika lusyomo luyumu muziindi zyamapenzi? Amupe cikozyanyo.
5 Zimwi ziindi tulajana masunko aayandika kuba alusyomo luyumu. Mucikozyanyo, tulakonzya kupenzyegwa, kuciswa bulwazi butaponi, naa kucitikilwa zintu zimwi buyo zikonzya kututyompya. Kumatalikilo, tulakonzya kuyeeya kuti inga twacikonzya kuliyumya kupenzi eelyo. Pele kuti naa lyazumanana, inga twayandika kuba alusyomo luyumu kutegwa tucikonzye kuliyumya akuzumanana kumubelekela Jehova calukkomano.—Rom. 12:12; 1Pet. 1:6, 7.
6 Ciindi notuli mubukkale bukatazya, tulakonzya kulimvwa mbuli kuti nyika mpya ya Jehova taikabooli. Pele sena eeci caamba kuti tatujisi lusyomo luyumu? Peepe. Mucikozyanyo, ikuti naa kakutontola kapati, tulakonzya kuyeeya mbuli kuti kunyina nokuyoopya. Pesi bwini mbwakuti, inga kulatalika alimwi kupya. Mbubwenya buyo, ikuti naa twatyompwa kapati tulakonzya kuyeeya mbuli kuti nyika mpya kunyina noiyakuboola. Pele kuti katujisi lusyomo luyumu, tunoosinizyide kuti zisyomezyo zya Leza ziyoozuzikizyigwa. (Int. 94:3, 14, 15; Heb. 6:17-19) Ikuti katujisi lusyomo luli boobu, tuyoozumanana kubikka bukombi bwesu kuli Jehova mubusena bwakusaanguna.
7. Nkuyeeya kuli buti nkotweelede kucenjelela?
7 Amubone mbazu aimwi motuyandika lusyomo luyumu, mumulimo wakukambauka. Bantu banji mbotukambaukila bayeeya kuti “makani mabotu” aajatikizya nyika mpya ya Leza ncintu citakonzyi kucitika. (Mt. 24:14; Ezk. 33:32) Aboobo, tweelede kucenjela kutegwa andiswe tutataliki kudooneka mbuli mbabo. Pele kutegwa eeci citacitiki, tweelede kuzumanana kuyumya lusyomo lwesu. Lino atulange-lange nzila zyotatwe mbotukonzya kucita oobo.
AMUZINZIBALE KUYEEYA KUJATIKIZYA CINUNUZYO
8-9. Mbuti kuzinzibala kuyeeya kujatikizya cinunuzyo mbokuyumya lusyomo lwesu?
8 Inzila yakusaanguna mbotukonzya kuyumya lusyomo lwesu nkwiinda mukuzinzibala kuyeeya kujatikizya cinunuzyo. Cinunuzyo, ncecitupa kusyoma kuti zisyomezyo zya Leza zyoonse ziyoozuzikizyigwa ncobeni. Ciindi notuzinzibala kuyeeya kaambo cinunuzyo ncocakapedwa alimwi azyakajatikizyidwe, tulaba alusyomo luyumu lwakuti cisyomezyo ca Leza cabuumi butamani ciyoozuzikizyigwa ncobeni. Nkaambo nzi ncotwaambila boobo?
9 Ncinzi cakajatikizyidwe mukupa cinunuzyo? Jehova wakatuma Mwanaakwe simuzyalwaalikke walo iwakali mulongwe wakwe mwini-mwini, kuzwa kujulu akuboola aano anyika kuti azoozyalwe kali muntu uulondokede. Naakali waano anyika, Jesu wakaliyumya kumapenzi aayindene-indene. Wakapenga citaambiki akufwa lufwu lucisa kapati. Eelo kaka ooku kwakali kulyaaba nkwaakacita Jehova! Leza wesu siluyando naatakamuzumizya Mwanaakwe kupenga akufwa kuti naakali kuyanda kuti tupone buumi bubotu, pele kwaciindi cisyoonto buyo. (Joh. 3:16; 1Pet. 1:18, 19) Mbwaanga Jehova wakaaba Mwanaakwe ngwayandisya kapati akaambo kandiswe, tuli masimpe kuti uyoocizuzikizya cisyomezyo cakwe cakuti tukapone kukabe kutamani munyika mpya.
AMUZINZIBALE KUYEEYA KUJATIKIZYA NGUZU ZYAJISI JEHOVA
10. Kweelana alugwalo lwa Baefeso 3:20, ncinzi ncakonzya kucita Jehova?
10 Nzila yabili mbotukonzya kuyumya lusyomo lwesu nkwiinda mukuzinzibala kuyeeya kujatikizya nguzu zyajisi Jehova. Ulijisi nguzu zyakuzuzikizya zintu zyoonse nzyaakasyomezya. Masimpe kuti, kuzuzikizyigwa kwacisyomezyo cabuumi butamani munyika mpya, kulakonzya kulibonya mbuli kuti takukacitiki kweelana ambobayeeya bantu. Pele kanji-kanji zintu zyasyomezya Jehova, nzintu nzyobatakonzyi kucita bantu. Kayi walo ngu Leza Singunzuzyoonse. (Job. 42:2; Mk. 10:27) Aboobo tatweelede kugambwa ciindi natusyomezya zintu zilibonya mbuli kuti tazikonzyi kucitika mukulanga kwabuntu.—Amubale Baefeso 3:20.
11. Amupe cikozyanyo cazisyomezyo zya Leza zimwi zigambya. (Amubone kabbokesi kakuti “ Zisyomezyo Zimwi Zigambya Izyakazuzikizyigwa Kale.”)
11 Amubone zintu zimwi Jehova nzyaakasyomezya babelesi bakwe bakaindi izyakali kulibonya mbuli kuti tazikonzyeki. Wakaambila Abrahamu a Sara kuti bakali kuyooba amwana mubucembele bwabo. (Matl. 17:15-17) Alimwi wakaambila Abrahamu kuti baluzubo lwakwe bakali kuyoopegwa nyika ya Kanana. Ciindi bana Israyeli balo ibakali baluzubo lwa Abrahamu nobakali mubuzike mu Egepita kwamyaka minji, kweelede kuti cakali kulibonya mbuli kuti cisyomezyo eeci tacikazuzikizyigwi. Pele cakazuzikizyigwa. Mpoonya, Jehova wakaamba kuti Elizabeta wakali kuyooba amwana nokuba kuti wakalicembeede kapati. Alimwi wakaambila Mariya walo iwakali nakalindu, kuti wakali kuyoomuzyalila mwana. Eeci cakali kuyoozuzikizya cisyomezyo Jehova ncaakasyomezya mumuunda wa Edeni kakwiindide myaka minji!—Matl. 3:15.
12. Ino lugwalo lwa Joshua 23:14 alwa Isaya 55:10, 11 lutwaambila nzi kujatikizya nguzu zyajisi Jehova?
12 Ciindi notuzinzibala kuyeeya zisyomezyo zyoonse Jehova nzyaakasyomezyede alimwi ambwaakazizuzikizya, tulabona kuti ulijisi nguzu zinji kapati. Aboobo eeci citupa kuba alusyomo luyumu mucisyomezyo canyika mpya. (Amubale Joshua 23:14; Isaya 55:10, 11.) Eeci cipa kuti tucikonzye kugwasya bamwi kuzyiba kuti cisyomezyo canyika mpya tacili ciloto buyo naa caano. Jehova lwakwe kumugama wakaamba boobu kujatikizya julu mpya anyika mpya: “Majwi aaya alasyomeka alimwi ngamasimpe.”—Ciy. 21:1, 5.
AMUJATE BUBI KUCITA ZINTU ZYAKUMUUYA
MISWAANGANO YAMBUNGANO
Ino cintu eeci cakumuuya inga caluyumya buti lusyomo lwanu? (Amubone muncali 13)
13. Ino miswaangano yambungano inga yaluyumya buti lusyomo lwesu? Amupandulule.
13 Nzila yatatu mbotukonzya kuyumya lusyomo lwesu nkwiinda mukucita zintu zyakumuuya. Mucikozyanyo, amuyeeye buyo mbotugwasyigwa kumiswaangano yesu yambungano. Ba Anna, ibabeleka kwamyaka minji mumbazu ziindene-indene zyamulimo waciindi coonse, bakaamba kuti: “Miswaangano ilandigwasya kuyumya lusyomo lwangu. Nokuba kuti mwaambi inga katali mwaambi uucibwene naa kataambi kaambo kambi kapya, kanji-kanji inga ndilamvwa kaambo kamwi ikandigwasya kukamvwisya kabotu kasimpe kamu Bbaibbele akuyumya lusyomo lwangu.” b Alimwi lusyomo lwesu lulayuma ciindi notuswiilila bwiinguzi bwabakwesu abacizyi.—Rom. 1:11, 12; 10:17.
MULIMO WAKUKAMBAUKA
Ino cintu eeci cakumuuya inga caluyumya buti lusyomo lwanu? (Amubone muncali 14)
14. Mbuti mulimo wakukambauka mbouyumya lusyomo lwesu?
14 Kunze lyaboobo, lusyomo lwesu lulayuma ciindi notutola lubazu mumulimo wakukambauka. (Heb. 10:23) Ba Barbara, ibamubelekela Jehova kwamyaka yiinda ku 70, bakaamba kuti: “Ndabona kuti mulimo wakukambauka uyumya lusyomo. Ciindi nondaambila bamwi zisyomezyo zya Jehova zitaliboteli, cipa kuti alwalo lusyomo lwangu luyume kapati.”
CIIYO CANU NOBENI
Ino cintu eeci cakumuuya inga caluyumya buti lusyomo lwanu? (Amubone muncali 15)
15. Ino ciiyo cesu tobeni inga caluyumya buti lusyomo lwesu? (Amubone azifwanikiso.)
15 Amubone cintu cimbi cikonzya kuyumya lusyomo lwesu: ciiyo cesu tobeni. Ba Susan bakaamba kuti cilabagwasya kubikka ciindi nobeelede kucita ciiyo cabo beni. Bakaamba kuti: “Mu Nsondo, inga ndilibambila Ciiyo ca Ngazi Yamulindizi cansondo iitobela. Mpoonya mu Muhulo amuli Bwabili, inga ndilibambila miswaangano yamukati kansondo. Kumane mumazuba aasyaala inga ndilanga-langa makani aamwi ngondakasala.” Kwiinda mukuba abubambe oobu busitikide bwakwiiya, ba Susan bazumanana kuyumya lusyomo lwabo. Ba Irene, ibabeleka kwamyaka minji kumaofesi mapati, bakaamba kuti kwiiya businsimi bwamu Bbaibbele kwayumya lusyomo lwabo. Bakaamba kuti: “Cilandikkomanisya kubona kuti twaambo toonse tujatikizya businsimi bwa Jehova tulazuzikizyigwa.” c
“ZIYUME ZITETE CIYOOZUZIKIZYIGWA”
16. Nkaambo nzi majwi Jehova ngaakaambila Habakuku ncaakonzya kutugwasya mazuba aano? (Bahebrayo 10:36, 37)
16 Babelesi ba Jehova bamwi bali kwaalindila kwaciindi cilamfwu mamanino aabweende bwazintu oobu. Kweelana ambobazibona zintu bantu, kuzuzikizyigwa kwacisyomezyo ca Leza kulakonzya kulibonya mbuli kuti kwamuka. Pele Jehova ulizyi mbobalimvwa babelesi bakwe, nkakaambo kaako wakaambila musinsimi Habakuku kuti: “Cilengaano eeci ciyoocitika aciindi caco cibikkidwe, alimwi cifwambaanina kumamanino, eelyo tacikabeji pe. Nokuba kuti camuka, kozumanana kucilangila! Nkaambo ziyume zitete ciyoozuzikizyigwa. Tacikamuki pe!” (Hab. 2:3) Sena Leza wakali kwaambila buyo Habakuku majwi aaya? Naa alakonzya kutugwasya andiswe mazuba aano? Kwiinda mukusololelwa amuuya, mwaapostolo Paulo wakaabelesya majwi aaya ku Banakristo balindila nyika mpya. (Amubale Bahebrayo 10:36, 37.) Aboobo, nokuba kuti cisyomezyo ca Jehova calibonya mbuli kuti camuka, tulakonzya kuba masimpe kuti, “ziyume zitete ciyoozuzikizyigwa. Tacikamuki pe!”
17. Mbuti mucizyi uumwi mbwaakalubelesya lulayo Jehova ndwaakaambila Habakuku?
17 Bunji bwababelesi ba Jehova balutobela lulayo lwakwe ‘lwakuzumanana kulangila.’ Ibamwi bacita oobo kwamyaka minji. Mucikozyanyo, ba Louise bakatalika kubelekela Jehova mu 1939. Bakaamba kuti: “Aciindi eeci, ndakali kuyeeya kuti Amagedoni ilasika kanditanamanizya cikolo. Pele tiiyakasika. Kwamyaka minji, kubala zibalo zyamu Bbaibbele izyabantu bakalindila Jehova kuti azuzikizye zisyomezyo zyakwe, kwandigwasya kulindila Jehova. Ndilabala kujatikizya Nowa, Abrahamu, Josefa, alimwi abamwi ibakalindila Jehova kwaciindi cilamfwu kutegwa abalumbule. Kuba alusyomo lwakuti zisyomezyo zya Jehova zyoonse ziyoozuzikizyigwa ncobeni, kwandigwasya mebo abamwi kuba masimpe kuti nyika mpya ilaafwaafwi kapati.” Abamwi bamubelekela Jehova kwamyaka minji, balakazumina kaambo aaka!
18. Ino kulangilila zilenge inga kwatugwasya buti kuyumya lusyomo lwakuti nyika mpya iyakuboola?
18 Masimpe kuti nyika mpya tainasika. Nokuba boobo, amuyeeye buyo kujatikizya zintu ziliko, mbuli nyenyeezi, masamu, banyama andiswe tobantu. Kunyina uukonzya kudooneka kuti zintu eezyi nkozili, nokuba kuti aciindi cimwi tiizyakaliko. Nkozili lino akaambo kakuti Jehova wakazilenga. (Matl. 1:1, 26, 27) Alimwi Leza wasyomezya kulenga nyika mpya. Uyakwiilenga ncobeni. Munyika mpya, bantu bayoopona buumi butamani kakunyina kuciswa. Tuli masimpe kuti nyika mpya iyooboola aciindi ncabikkide Leza, mbubwenya mbuli zintu nzyotubona mbozyakabako.—Is. 65:17; Ciy. 21:3, 4.
19. Ino inga mwaluyumya buti lusyomo lwanu?
19 Calino, amuzumanane kucita kufwumbwa ncomukonzya kuyumya lusyomo lwanu. Amutondezye kulumba kujatikizya cinunuzyo. Amuzinzibale kuyeeya kujatikizya nguzu zyajisi Jehova. Amujate bubi kucita zintu zyakumuuya. Kuti mwacita oobo, mulakonzya kuba akati kabaabo “kwiinda mulusyomo akukkazika moyo ibayookona zyakasyomezyegwa.”—Heb. 6:11, 12; Rom. 5:5.
LWIIMBO 139 Amweezyeezye Kuti Muli Munyika Mpya
a Bantu banji mazuba aano, tabacisyomi cisyomezyo camu Bbaibbele canyika mpya. Bayeeya kuti nciloto buyo, naa ncaano buyo citakonzyi kucitika. Pele swebo tulisinizyide kuti zisyomezyo zya Jehova zyoonse ziyoozuzikizyigwa. Nokuba boobo, tweelede kuzumanana kubeleka canguzu ikuyumya lusyomo lwesu. Munzila nzi? Cibalo eeci cilapandulula.
b Mazina aamwi acincwa.
c Tulakonzya kujana zibalo zinji izyaamba businsimi bwamu Bbaibbele kwiinda mukulanga akatwe kakuti “Businsimi” mu Bbuku Ligwasya Kuvwuntauzya lya Bakamboni ba Jehova. Mucikozyanyo, amubone cibalo cakuti “Zyoonse Nzyaamba Jehova Zilazuzikizyigwa” mu Ngazi Yamulindizi ya January 1, 2008.
