1. Ncinzi Jehova ncayanda kuti tucite?

 CINTU cimwi cibapa kukkomana kapati banabukwetene nciindi mwanaabo naazyalwa. Pele nokuba kuti balamuyanda kapati mwanaabo, kunyina nobayanda kuti kali muvwanda lyoonse. Bwini mbwakuti, inga balibilika kapati kuti mwanaabo katakomeni. Mbubwenya buyo, Jehova ulakkomana ciindi notubweza ntaamu yakusaanguna yakwiiya kujatikizya nguwe, pele takkomani kuti katutakomeni kumuuya. (1Kor. 3:1) Aboobo, utulomba kuti ‘tube bantu bapati’ kumuuya.—1Kor. 14:20.

2. Ncinzi ncotutiilange-lange mucibalo eeci?

² Ino caamba nzi kuba Munakristo uusimide kumuuya? Ncinzi ncotweelede kucita kutegwa tube Munakristo uusimide? Ino cakulya cakumuuya ciyumu cigwasya buti kukomena kumuuya? Nkaambo nzi ncotuteelede kuyeeya kuti tulisimide kale kumuuya alimwi akuti tatuyandiki kuzumanana kuyumya cilongwe cesu a Jehova? Mucibalo eeci, tulabulanga-langa bwiinguzi bwamibuzyo eeyi.

INO CAAMBA NZI KUBA MUNAKRISTO UUSIMIDE KUMUUYA?

3. Ino caamba nzi kuba Munakristo uusimide kumuuya?

³ Mu Bbaibbele, ibbala lya Chigiriki lyakasandululwa kuti ‘kuba bantu bapati’ alimwi lilakonzya kwaamba “kusima,” “kulondoka,” “akuzulila.” a (Ef. 4:​13, bupanduluzi buyungizyidwe) Mbubwenya mwana mbwazumanana kukomena kusikila mane waba mupati, andiswe tweelede kuzumanana kuyumya cilongwe cesu a Jehova. Kuti twacita oobo, tulaba Banakristo basimide kumuuya. Bwini mbwakuti, nociba ciindi notwasima kumuuya, tweelede kuzumanana kuyaambele. (1Tim. 4:15) Toonse buyo, kubikkilizya  abana, tulakonzya kusima kumuuya. Pele ino inga twazyiba buti kuti tulisimide kumuuya?

4. Ino inga twamuzyiba buti muntu uusimide kumuuya?

⁴ Munakristo uusimide kumuuya ngooyo uucita zintu zyoonse Jehova nzyamwaambila. Kunyina nacita buyo zintu nzyayanda lwakwe mwini. Bwini mbwakuti, akaambo kakutalondoka, unoolubizya. Nokuba boobo, buzuba abuzuba ulasolekesya kuyeeya alimwi akucita zintu munzila njakkomanina Jehova. Ulasama buntu bupya akusolekesya kuzumanana kuyeeya mbuli mbwayeeya Jehova. (Ef. 4:​22-24) Wakaiya kusala cabusongo kwiinda mukuyeeya milawo ya Jehova anjiisyo zyakwe. Aboobo tayandiki milawo minji iimwaambila ncayelede kucita. Ciindi napanga zyakusala, ulabeleka canguzu kuzizuzikizya.—1Kor. 9:​26, 27.

5. Ncinzi cikonzya kucitikila Munakristo uutasimide kumuuya? (Baefeso 4:​14, 15)

⁵ Kulubazu lumbi, Munakristo uutasimide kumuuya ulakonzya kufwambaana koongelezyegwa ‘alweeno,’ alimwi ‘anzila zyakubeja.’ Ulakonzya kusyoma baabo bamwaya makani aakubeja alimwi amakani aatasinizyidwe anyuuzi. Naa ambweni ulakonzya kweenwa abasiluleyo. b (Amubale Baefeso 4:​14, 15.) Ulakonzya kutalika kubamvwida munyono bamwi, kuzwangana ambabo, naa kufwambaana kukalala. Alimwi bunji bwaziindi ncuubauba kulinguwe kucita cibi ciindi naasunkwa.—1Kor. 3:3.

6. Ino kukomena kumuuya inga twakukozyanisya kunzi? (Amubone acifwanikiso.)

⁶ Mbubwenya mbokwaambwa kale, Magwalo akozyanisya kukomena kumuuya kukukomena kwamuntu kusikila waba mupati. Kuli zintu zinji mwana nzyatazyi, aboobo uyandika muntu umwi mupati uukonzya kumukwabilila alimwi akumusololela. Mucikozyanyo, muzyali ulakonzya kwaambila mwanaakwe kuti amujatilile kukwaanza ciindi nobakosola mugwagwa. Ciindi mwana ooyo nayaabukomena, muzyali ambweni ulakonzya kumuzumizya kukosola mugwagwa alikke, pele unoomuyeezya kulanga kumabazu oonse katanakosola. Mpoonya ciindi naakomena, ulacizyiba kutantamuka ntenda alikke. Mbubwenya mwana mbwayandika lugwasyo kuzwa kubapati kutegwa atantamuke ntenda, abalo Banakristo batasimide  bayandika lugwasyo kuzwa ku Banakristo basimide, kutegwa bataciti cintu cili coonse cikonzya kunyonganya cilongwe cabo a Jehova alimwi akusala cabusongo. Kulubazu lumwi, ciindi Banakristo basimide kumuuya nobayanda kupanga cakusala, balazinzibala kuyeeya kujatikizya ncolyaamba Bbaibbele kutegwa bazyibe mbwayeeya Jehova mumakani aayo. Mpoonya cilabagwasya kucita ciluzi.

7. Sena kuli lugwasyo luli loonse ndobayandika Banakristo basimide kumuuya?

⁷ Sena eeci caamba kuti Munakristo uusimide kumuuya tayandiki lugwasyo luli loonse? Peepe. Nobaba baabo basimide kumuuya zimwi ziindi abalo bayandika kulomba lugwasyo. Pele muntu uutasimide kumuuya ulakonzya kulomba bamwi kuti bamwaambile cakucita naa kumupangila cakusala. Mukwiimpana, Munakristo uusimide kumuuya ulalomba lugwasyo kuli baabo bajisi busongo aluzyibo, kumwi kazyi kuti mukuli wakwe kulipangila cakusala akuti weelede “kunyamuna mukuli wakwe uumugeme.”—Gal. 6:5.

8. Muunzila nzi bantu bapati mobaindene?

⁸ Mbubwenya mbuli bantu bapati mbobatakozyanyi caboola kuli mbobalibonya, tabali Banakristo boonse basimide kumuuya bajisi bube bukozyenye. Mucikozyanyo, bamwi balakonzya kuti kabali basongo, mpoonya bamwi inga kabali basicamba. Bamwi balakonzya kuti kabali baabi, kumane bambi inga kabali basilweetelelo. Kuyungizya waawo, Banakristo bobilo basimide kumuuya balakonzya kulijana mubukkale bukonzyenye, pele inga bapanga zyakusala ziindene, pesi kazyeendelana anjiisyo zyamu Bbaibbele. Kanji-kanji eeci cilacitika ciindi nobapanga zyakusala kweelana amanjezeezya aabo. Aboobo tababetekani ciindi zyakusala zyabo nozyaindana. Muciindi caboobo, balazumanana kukamantana.—Rom. 14:10; 1Kor. 1:10.

NCINZI NCOTWEELEDE KUCITA KUTEGWA TUBE MUNAKRISTO UUSIMIDE?

9. Sena kukomena kumuuya inga kulicitikila buyo? Amupandulule.

⁹ Mwana ulakonzya kukomena mbwaayaabuya mazuba, pele ciyandika kubeleka canguzu kutegwa tube acilongwe ciyumu a Jehova. Mucikozyanyo, bakwesu abacizyi mu Korinto bakaazumina makani mabotu, bakabbapatizyigwa, bakatambula muuya uusalala alimwi akugwasyigwa amalailile ngaakabapa mwaapostolo Paulo. (Mil. 18:​8-11) Nokuba boobo, nokwakainda myaka kuzwa nobakabbapatizyigwa, banji tiibakalinasima kumuuya. (1Kor. 3:2) Mbuti mbotukonzya kupa kuti eeci citatucitikili?

10. Ncinzi ncotweelede kucita kutegwa tusime kumuuya? (Juda 20)

¹⁰ Kutegwa tube muntu uusimide kumuuya, tweelede kuba aluyandisisyo lwakucita boobo. Aabo ‘bayandisya kubula luzyibo’ alimwi batayandi kucinca, kunyina nobayookomena kumuuya. (Tus. 1:22) Tatweelede kuba mbuli muntu mupati, pele uusalilwa zyakucita abazyali bakwe. Muciindi caboobo, tweelede kubona kuti mukuli wesu kuzumanana kuyumya cilongwe cesu a Jehova. (Amubale Juda 20.) Kuti naa mucibelekela akuyanda kusima kumuuya, amupaile kuli Jehova kutegwa amupe ‘kukanza alimwi anguzu zyakucita zintu.’—Flp. 2:13.

11. Ino ncinzi Jehova ncabelesya kutugwasya kusima kumuuya? (Baefeso 4:​11-13)

¹¹ Jehova talangili kuti tubelesye nguzu zyesu kutegwa tukomene kumuuya. Aabo babeleka mbuli beembezi alimwi abamayi mumbungano ya Bunakristo, balilibambilide kutugwasya ‘kuba bantu bapati’ kumuuya kutegwa ‘tusike aciimo cizulide ica Kristo.’ (Amubale Baefeso 4:​11-13.) Jehova alimwi ulatupa muuya wakwe uusalala kutegwa utugwasye kuba ‘amizeezo ya Kristo.’ (1Kor. 2:​14-16) Kuyungizya waawo, Leza wakasololela kuti mabbuku aa Makani Mabotu one alembwe kututondezya Jesu mbwaakali  kuyeeya, kwaambaula alimwi akucita zintu ciindi naakali kucita mulimo wakwe anyika. Kwiinda mukwiiya mbwaakali kuyeeya Jesu alimwi akucita zintu, mulakonzya kusika ambaakani yakuba Munakristo uusimide kumuuya.

MBOCIGWASYA CAKULYA CAKUMUUYA CIYUMU

12. Ino “njiisyo zyantalisyo zya Kristo” ninzi?

¹² Kutegwa tusime kumuuya, alimwi tweelede ‘kuziinda njiisyo zyantalisyo zya Kristo,’ nkokuti injiisyo zyantalisyo zya Bunakristo. Njiisyo zimwi zyakusaanguna nzyotwakaiya zijatikizya kweempwa, lusyomo, lubbapatizyo alimwi abubuke. (Heb. 6:​1, 2) Eezyi ninjiisyo zimwi zyantalisyo nzyobasyoma Banakristo boonse. Aboobo ciindi Petro naakali kukambauka lya Pentekoste, wakazyaamba njiisyo eezyi. (Mil. 2:​32-35, 38) Kutegwa tube basikwiiya ba Kristo, tweelede kuzizumina njiisyo eezyi zyantalisyo. Mucikozyanyo, Paulo wakatondezya kuti, ikuti naa katutasyomi mububuke, tatukonzyi kuba basikwiiya ba Kristo. (1Kor. 15:​12-14) Nokuba boobo, kutegwa tusime kumuuya tweelede kuba aluyandisisyo lwakwiiya zinji kunze buyo lyakuzyiba njiisyo eezyi zyantalisyo.

13. Ncinzi ncotweelede kucita kutegwa tugwasyigwe acakulya cakumuuya ciyumu caambidwe kulugwalo lwa Bahebrayo 5:14? (Amubone acifwanikiso.)

¹³ Mukwiimpana anjiisyo zyantalisyo, cakulya cakumuuya ciyumu tacibikkilizyi buyo milawo ya Jehova, pele alimwi cilabikkilizya anjiisyo zyakwe, zyalo izitugwasya kumvwisya mbwayeeya. Kutegwa tugwasyigwe acakulya cakumuuya eeci, tweelede kubala Bbaibbele, kuzinzibala kuyeeya nzyotubala alimwi akuzibelesya mubuumi bwesu. Ciindi notucita boobo, tuliyiisya mbotukonzya kupanga zyakusala zikonzya kukkomanisya Jehova. c—Amubale Bahebrayo 5:14.

14. Ino Paulo wakabagwasya buti bana Korinto kusima kumuuya?

¹⁴ Banakristo batasimide kumuuya cilabayumina kupanga cakusala cili kabotu ciindi nokutakwe mulawo uugaminide mu Bbaibbele waamba kujatikizya cakusala eeco. Kuti kakutakwe mulawo wamu Bbaibbele uugaminide, bamwi balakonzya kulimvwa kuti inga bacita kufwumbwa ncobayanda. Ambweni bamwi balakonzya kuyanda kuzyiba ncowaamba  mulawo nokuba kucintu citabikkilidwe mulawo. Mucikozyanyo, Banakristo baku Korinto bakalomba Paulo kuti abaambile kuti naa kwakali mulawo wakali kubazumizya kulya zyakulya zituulwa kumituni. Muciindi cakubaambila ncobakeelede kucita, Paulo wakabatondezya kuti umwi aumwi wabo wakalijisi ‘lwaanguluko lwakulisalila’ kweelana amanjezeezya aakwe. Wakabaambila njiisyo zyamu Bbaibbele zimwi, izyakali kukonzya kubagwasya kupanga cakusala cakali kukonzya kubapa kuba amanjezeezya aasalala alimwi akutalebya bamwi. (1Kor. 8:​4, 7-9) Paulo wakayiisya bana Korinto kubelesya Magwalo ciindi nobakali kupanga zyakusala, muciindi cakusyoma bantu naa kuyandaula milawo. Aboobo, wakabagwasya kusima kumuuya.

15. Ino Paulo wakabagwasya buti Banakristo Bahebrayo kuzumanana kuyaambele kumuuya?

¹⁵ Kuli ciiyo ciyandika kapati ncotwiiya kumajwi Paulo ngaakalembela Banakristo ba Hebrayo. Bamwi tiibakazumanana kukomena kumuuya; bakatalika ‘kupilukila musyule akuba bantu bayandika mukupa, ikutali cakulya [cakumuuya] ciyumu pe.’ (Heb. 5:12) Bakaalilwa kwiiya akuzumina zintu zipya Jehova nzyaakali kubayiisya kwiinda mumbungano. (Tus. 4:18) Mucikozyanyo, bunji bwaba Juda basyomi bakacili kusumpula Mulawo wa Musa nokuba kuti wakalilekede kale kubeleka myaka iibalilwa ku 30 ciindi Kristo naakaaba buumi bwakwe. (Rom. 10:4; Tit. 1:10) Cakutadooneka myaka iili 30 eeyi yakali minji kapati ku Banakristo kumvwisya kuti tiibakeelede kutobela Mulawo. Kufwumbwa muntu wakalubala kale lugwalo lwakasololelwa amuuya Paulo ndwaakalembela bana Hebrayo, ulakonzya kuzumina kuti bbuku eeli lijisi cakulya cakumuuya ciyumu. Lugwalo oolu lwakabagwasya kubona mboyakali mbotu nzila mpya yakukomba, Jehova njaakabikka kwiinda muli Jesu. Alimwi yakabapa busicamba bwakuzumanana kukambauka nokuba kuti bakali kukazyigwa aba Juda.—Heb. 10:​19-23.

NKAAMBO NZI NCOTWEELEDE KUZUMANANA KUSIMA KUMUUYA?

16. Kunze lyakuzumanana kusima kumuuya, ncinzi acimwi ncotweelede kucita?

¹⁶ Tweelede kubeleka canguzu ikutali buyo akaambo kakuyanda kusima kumuuya, pele alimwi katujisi makanze aakuzumanana kusima. Aboobo tweelede kucenjela kutegwa tutataliki kuyeeya kuti tulisimide kale kumuuya alimwi akuti tatuyandiki kuzumanana kuyumya cilongwe  cesu a Jehova. (1Kor. 10:12) Tweelede ‘kuzumanana kulisunka’ kutegwa tusinizye kuti tuli mukuyaambele kumuuya.—2Kor. 13:5.

17. Ino lugwalo Paulo ndwaakalembela bana Kolose lutondezya buti mbociyandika kuzumanana kusima kumuuya?

¹⁷ Mulugwalo ndwaakalembela bana Kolose, Paulo alimwi wakatondezya kaambo ncociyandika kuzumanana kusima kumuuya. Nokuba kuti bakali kale Banakristo basimide kumuuya, Paulo wakabaambila kuti bakeelede kucenjela kapati kutegwa bateenwi akuyeeya kwabantu bamunyika. (Kol. 2:​6-10) Alimwi Epafra, walo iwakabazyi kabotu aabo bakali mumbungano alimwi akubabikkila maano, wakali kubapailila lyoonse kutegwa ‘kumamanino baime kabazulide,’ naa kabasimide kumuuya. (Kol. 4:12) Ino twiiya nzi? Paulo a Epafra bakali kumvwisya kuti kuzumanana kusima kumuuya kuyandika kubeleka canguzu alimwi akugwasyigwa a Leza. Aboobo bakali kuyanda kuti bana Kolose bazumanane kusima kumuuya naa kukomena, nokuba kuti bakali kujana mapenzi.

18. Ncinzi cikonzya kucitikila Munakristo uusimide kumuuya? (Amubone acifwanikiso.)

¹⁸ Paulo wakacenjezya bana Hebrayo kuti, naa Munakristo uusimide tanaacenjela, Leza ulakonzya kulekela limwi kumukkomanina. Ikuti naa wakaka kumvwida Jehova, ulakonzya kutantamukila limwi kulinguwe cakuti takonzyi kweempwa alimwi akulekelelwa anguwe. Cikkomanisya ncakuti, bana Hebrayo kunyina nobakasika antaamu ili boobu. (Heb. 6:​4-9) Ino mbuti kujatikizya baabo mazuba aano batacisungweede naa kugusyigwa buya mumbungano mpoonya kumbele beempwa? Ikuti naa beempwa cakumaninina, batondezya kuti tabali mbuli baabo Paulo mbaakaamba kuti Leza ulakonzya kulekela limwi kubakkomanina. Nokuba boobo, ciindi nobapiluka kuli Jehova, inga bayandika lugwasyo ndwapa. (Ezk. 34:​15, 16) Aboobo baalu balakonzya kulomba mukwesu naa mucizyi uusimide kumuuya kubagwasya kubambulula cilongwe cabo a Jehova.

19. Ino nimbaakani nzi njotweelede kuba anjiyo?

¹⁹ Kuti naa mujisi mbaakani yakuba Munakristo uusimide kumuuya, cikkomanisya ncakuti mulakonzya kwiizuzikizya! Amuzumanane kulya cakulya cakumuuya ciyumu alimwi akuzumanana kuyeeya mbuli mbwayeeya Jehova. Kuti naa mulisimide kale kumuuya, amucite kufwumbwa ncomukonzya kutegwa muzumanane kuba Munakristo uusimide.