1. Ino bamwi balimvwa buti caboola kukutola lubazu mumulimo wamumuunda? (Amubone acifwanikiso)

 MBOTULI bantu ba Jehova, tulabakambaukila bamwi akaambo kakuti tulamuyanda Tateesu wakujulu alimwi tuyanda kugwasya basimukoboma kutegwa bamuzyibe. Basikumwaya banji balaukkomanina kapati mulimo wakukambauka. Pele bamwi tabaukkomanini. Nkaambo nzi? Nkaambo kakuti bamwi balaansoni alimwi balimvwa kuti tabali bamayi bacibwene. Bamwi tabaanguluki kuunka kumaanda abantu kuti naa tiibatambwa. Mpoonya bamwi bayoowa kuti inga tiibatambulwa kabotu. Bamwi bakayiisyigwa kuti tabeelede kunyemya bamwi. Nokuba kuti balamuyanda kapati Jehova, bakwesu abacizyi aaba cilabayumina kubaambila makani mabotu bantu mbobatazyi. Nokuba boobo, balizyi mbouyandika kapati mulimo ooyu, aboobo balasolekesya kutola lubazu lyoonse. Eelo kaka Jehova ulabakkomanina kapati!

2. Ikuti naa cilamukatazya kuukkomanina mulimo wakukambauka, nkaambo nzi ncomuteelede kutyompwa?

² Sena zimwi ziindi cilamukatazya kuukkomanina mulimo wakukambauka akaambo kakulimvwa boobu? Ikuti naa mbocibede oobo, mutatyompwi pe. Kulimvwa boobu kutondezya kuti mulalicesya alimwi tamuyandi kuti bantu kababikkila ndinywe maano. Alimwi citondezya kuti tamuyandi kukazyanya abantu. Bwini mbwakuti, kunyina uuyanda kunyemya bamwi, kwaambisya ciindi nasola kubacitila zintu zibotu. Uso wanu wakujulu ulizyi bwini mbomulimvwa alimwi uliyandide kumugwasya. (Is. 41:13) Mucibalo eeci, tulalanga-langa nzila zili 5 mbotukonzya kukuzunda kulimvwa boobu alimwi ambotukonzya kuukkomanina mulimo wakukambauka.

AMULEKELE JWI LYA LEZA KUMUYUMYA

3. Ncinzi cakagwasya musinsimi Jeremiya kucikonzya kukambaukila bamwi?

³ Kuzwa kaindi, mulumbe uuzwa kuli Leza wali kubayumya-yumya  babelesi bakwe, ciindi nobakali kujana buyumuyumu bwakuzuzikizya mulimo uukatazya. Atubone cikozyanyo camusinsimi Jeremiya. Ciindi Jehova naakamupa mulimo wakukambauka, wakawayawaya. Jeremiya wakaamba kuti: “Mebo nsikonzyi kwaambaula pe, nkaambo ndili mwana muniini.” (Jer. 1:6) Ncinzi cakamugwasya kukambauka cabusicamba? Wakayumizyigwa ajwi lya Leza. Wakaamba kuti: “Lyakali mbuli mulilo uuvwilima wajalilwa mumafwuwa aangu, ndakakatala kufwida mumoyo.” (Jer. 20:​8, 9) Nokuba kuti Jeremiya wakali kubelekela mucilawo cikatazya, mulumbe ngwaakaambilwa kukambauka wakamupa nguzu nzyaakali kuyandika kutegwa aubeleke mulimo ooyu.

4. Ino inga twagwasyigwa buti ciindi notubala Jwi lya Leza alimwi akuzinzibala kuyeeya nzyotubala? (Bakolose 1:​9, 10)

⁴ Banakristo balayumizyigwa amulumbe uujanika mu Jwi lya Leza. Naakali kulembela mbungano yaku Kolose, mwaapostolo Paulo wakaamba kuti kwiiya zinji kujatikizya Jehova kwakali kuyoobagwasya bakwesu kuzumanana “kuzyala micelo mumilimo mibotu,” calo cakali kuyoobapa ‘kweenda mbwayanda Jehova.’ (Amubale Bakolose 1:​9, 10.) Milimo mibotu eeyi ibikkilizya kukambauka makani mabotu. Aboobo ciindi notubala Jwi lya Leza akuzinzibala kuyeeya nzyotubala, lusyomo lwesu muli Jehova lulayuma alimwi tulamvwisya kaambo ncociyandika kapati kukambauka mulumbe uujatikizya Bwami bwakwe.

5. Ncinzi ncotweelede kucita kutegwa tugwasyigwe kapati ciindi notwiiya alimwi akubala Bbaibbele?

⁵ Kutegwa tugwasyigwe kapati a Jwi lya Leza, tatweelede kulibala cakubinda, kuliiya caatala-tala akubelesya ciindi cisyoonto cakuzinzibala kuyeeya. Aboobo, atubelesye ciindi cinji. Ikuti naa mwajana lugwalo ilwamukatazya kumvwisya, mutalusotoki pe. Muciindi caboobo, amubelesye Watch Tower Publications Index naa Bbuku Ligwasya Kuvwuntauzya lya Bakamboni ba Jehova, kutegwa mubumvwisye bupanduluzi bwalugwalo oolo. Kuti kamubelesya ciindi cinji kwiiya, muyoosinizya kuti Bbaibbele nzyolyaamba zyamasimpe. (1Tes. 5:21) Kusinizya kuyoomugwasya kukukkomanina kwaambila bamwi nzyomwakaiya.

AMULIBAMBILE KABOTU KAMUTANAUNKA MUMULIMO WAKUKAMBAUKA

6. Nkaambo nzi ncotweelede kulibambila kabotu katutanaunka mumulimo wakukambauka?

⁶ Kuti mwalibambila kabotu kamutanaunka mumulimo wakukambauka, tamukalibiliki kapati mwanoobandika abantu. Jesu wakabagwasya basikwiiya bakwe kulibambila katanabatuma mumulimo wakukambauka. (Lk. 10:​1-11)  Akaambo kakuti bakazibelesya Jesu nzyaakabayiisya, bakacikonzya kucita zintu zinji zibotu, aboobo bakakkomana kapati.—Lk. 10:17.

7. Mbuti mbotukonzya kulibambila mulimo wakukambauka? (Amubone acifwanikiso.)

⁷ Mbuti mbotukonzya kulibambila mulimo wakukambauka? Tweelede kuyeeya kujatikizya ncotuyanda kwaamba, mpoonya akucaamba munzila ngubauba mumajwi eesu. Alimwi cilagwasya kuyeeya mbobakonzya kututambula bantu alimwi akuzyiba mbotukonzya kubaingula mubukkale bumwi abumwi. Mpoonya ciindi notubandika abantu, tweelede kucita oobo cakwaanguluka, cabulongwe alimwi kumwi katumweta-mweta.

8. Muunzila nzi Banakristo mobali mbuli ziyobwedo zyabulongo zyaambidwe mucikozyanyo camwaapostolo Paulo?

⁸ Mwaapostolo Paulo wakaambila bakwesu abacizyi kuti: “Tujisi lubono oolu muziyobwedo zyabulongo.” (2Kor. 4:7) Ino ndubono nzi oolu? Mulimo wakufwutula bantu uujatikizya kwaambilizya mulumbe wa Bwami. (2Kor. 4:1) Ino ziyobwedo zyabulongo ninzi? Ziiminina babelesi ba Leza, ibaambila bamwi makani mabotu. Mumazuba aa Paulo, basambazi bakali kubelesya nongo kunyamwida zintu ziyandisi, mbuli zyakulya, waini alimwi amali. Mbubwenya buyo, Jehova wakatupa mulumbe uuyandika kapati wamakani mabotu. Kwiinda mukugwasyigwa a Jehova, tulakonzya kuba anguzu zyakucikonzya kukambauka cakusyomeka.

AMUPAILILE BUSICAMBA

9. Ino kuyoowa bantu inga twakuzunda buti? (Amubone acifwanikiso.)

⁹ Zimwi ziindi tulakonzya kutalika kuyoowa bantu. Pele ino inga twakuzunda buti? Amubone mupailo ngobakapaila baapostolo ciindi nobakaambilwa kuti baleke kukambauka. Muciindi cakuyoowa, bakalomba Jehova kuti abagwasye “kuzumanana kukanana ijwi [lyakwe] cabusicamba.” Jehova wakawiingula mupailo wabo mpoonya-mpoonya. (Mil. 4:​18, 29, 31) Kuti zimwi ziindi katuyoowa bantu, atupaile kuli Jehova kulomba lugwasyo. Tweelede kumulomba Jehova kuti atugwasye kubayanda bantu kutegwa tutanooyoowi kubaambila makani mabotu.

10. Ino mbuti Jehova mbwatugwasya kuzuzikizya mukuli wesu mbotuli Bakamboni bakwe? (Isaya 43:​10-12)

¹⁰ Jehova wakatusala kuba Bakamboni bakwe, alimwi usyomezya kutugwasya kuba basicamba. (Amubale Isaya 43:​10-12.) Atubone nzila zyone buyo mbwacita oobo. Yakusaanguna, Jesu ulaandiswe ciindi coonse notukambauka makani mabotu.(Mat. 28:​18-20) Yabili, Jehova wakasala  bangelo kutegwa kabatugwasya. (Ciy. 14:6) Yatatu, wakatupa muuya usalala kutegwa kautugwasya kuyeeya zintu nzyotwakaiya. (Joh. 14:​25, 26) Yane, wakatupa bakwesu abacizyi kutegwa katubeleka antoomwe ambabo. Kwiinda mukugwasyigwa a Jehova alimwi abunyina bwanyika yoonse, tulijisi zyoonse nzyotuyandika kutegwa tuzumanane kukambauka cabusicamba.

AMUNYONEKE, AKUBABONA MUNZILA YEELEDE BANTU

11. Nomuli mumulimo wamumuunda, mbuti mbomukonzya kujana bantu banji? (Amubone acifwanikiso.)

¹¹ Sena mulatyompwa ciindi nomujana buyo bantu basyoonto aŋanda? Ambweni cilakonzya kugwasya kulibuzya kuti: ‘Ino bali kuli bantu mucilawo cangu aciindi aawa? (Mil. 16:13) Sena bali kumulimo naa kuyoowula zintu? Kuti kabatako, sena mulakonzya kujana bantu banji kwiinda mukucita bukambausi bwamumugwagwa? Mukwesu wazina lya Joshua wakaamba kuti: “Ndilacibelesya coolwe cakukambaukila mumasena muli zintoolo alimwi amasena aambi mujanika bantu banji.” Mukwesu ooyu alimwi abakaintu bakwe ba Bridget, balajana bantu banji mumaanda ciindi cakumangolezya alimwi a Munsondo kumazuba.—Ef. 5:​15, 16.

12. Ncinzi cikonzya kutugwasya kuzyiba nzyobasyoma bantu naa zintu zibapa kulibilika?

¹² Kuti bantu kabatatondezyi luyandisisyo kumulumbe ngomubaambila, amusole kuzyiba nzyobasyoma naa zintu zibapa kulibilika. Mukwesu Joshua abakaintu bakwe ba Bridget babelesya mibuzyo iili kumatalikilo akatulakiti kutalisya mubandi. Mucikozyanyo, ciindi nobabelesya katulakiti kakuti: Ino Bbaibbele Mulibona Buti? inga baamba kuti: “Bantu bamwi babona Bbaibbele kuti ndibbuku lyakazwa kuli Leza, pele bamwi baladooneka. Ino nywebo muyeeya buti?” Nzila eeyi ipa kuti mubandi uzumanane.

13. Nkaambo nzi ncotweelede kulimvwa kuti twauzuzikizya mulimo wakukambauka nokuba kuti bantu tabaswiilili? (Tusimpi 27:11)

¹³ Nokuba kuti bantu tabatuswiilili ciindi notukambauka, swebo tulauzuzikizya mukuli wesu. Nkaambo kakuti twacicita eeco Jehova alimwi a Mwanaakwe ncobayanda kuti tucite, nkokuti ikupa bumboni. (Mil. 10:42) Nociba ciindi notutajani bantu bakubandika limwi naa nobaukaka mulumbe wesu, tulakkomana akaambo kakuti tulizyi kuti tukkomanisya Taateesu wakujulu.—Amubale Tusimpi 27:11.

14. Nkaambo nzi ncotweelede kukkomana ciindi sikumwaya umwi naajana muntu uujisi luyandisisyo mucilawo?

 ¹⁴ Alimwi tulakkomana ciindi sikumwaya umwi naajana muntu uujisi luyandisisyo mucilawo. Ngazi Yamulindizi imwi yakakozyanisya mulimo wesu kukuyandaula mwana iwasweeka. Bantu banji balatola lubazu mukumuyandaula, balainda mumasena aayindene-indene. Ciindi mwana ooyo naajanwa, boonse balakkomana kapati, ikutali buyo yooyo iwamujana. Mbubwenya buyo, boonse bali mumbungano balatola lubazu kugwasya bantu kuba basikwiiya ba Jesu. Boonse balayandika kutegwa cikonzyeke kukambaukila bantu boonse bali mucilawo, alimwi balakkomana ciindi mupya naatalika kujanika kumiswaangano.

AMUBIKKILE MAANO KUYANDA JEHOVA ALIMWI ABASIMUKOBONYOKO

15. Ino lugwalo lwa Matayo 22:​37-39 inga lwatugwasya buti kuyungizya busungu bwesu mumulimo wakukambauka? (Amubone icili acivwumbyo.)

¹⁵ Tulakonzya kuyungizya busungu bwesu mumulimo wakukambauka kwiinda mukubikkila maano kuyanda Jehova alimwi abasimukoboma. (Amubale Matayo 22:​37-39.) Amuciyeeyele buyo Jehova mbwakkomana ciindi natubona katukambauka alimwi abantu mbobakkomana ciindi nobatalika kwiiya Bbaibbele. Alimwi amuyeeye kuti aabo ibautambula mulumbe wesu akusala kubelekela Jehova balakonzya kuyoopona kukabe kutamani.—Joh. 6:40; 1Tim. 4:16.

16. Mbuti mbotukonzya kuukkomanina mulimo wesu wakukambauka ciindi nocitakonzyeki kuzwa muŋanda yesu? Amupe zikozyanyo.

¹⁶ Sena ciindi coonse inga muli buyo muŋanda akaambo katwaambo tumwi? Kuti naa mbocibede oobo, amubikkile maano kuzintu nzyomukonzya kucita kutondezya kuti mulamuyanda Jehova alimwi abasimukobonyoko. Lyabulwazi bwa COVID-19, ba Samuel abakaintu babo ba Dania tiibakali kuzwa muŋanda yabo. Muciindi eeci cikatazya, bakali kucita bukambausi bwaafooni lyoonse, kulemba magwalo alimwi akusololela ziiyo zya Bbaibbele a Zoom. Ba Samuel bakali kubakambaukila bantu mbobakali kujana kucibbadela nkobakali kuunka kuyoosilikwa bulwazi bwakkansa. Bakaamba kuti: “Ciindi notujisi mapenzi, tulakonzya kulibilika, kulimvwa kukatala alimwi lusyomo lwesu inga lulasunkwa. Aboobo tuyandika kujana lukkomano mumulimo wesu ngotubelekela Jehova.” Kabacili mubukkale oobu, ba Dania bakawida ansi, aboobo tiibakali kubukilwa bulo kwamyezi yotatwe. Alimwi bakali kuyandika kweendela akacinga  kabalema kwamyezi iili 6. Bakaamba kuti: “ Ndakali kucita kufwumbwa ncondakali kukonzya. Ndakali kumukambaukila nesi iwakali kuboola kundibona alimwi abaabo ibakali kuleta zintu. Alimwi ndakali kubandika afooni amukaintu umwi iwakali kubeleka akkampani imwi yabusilisi.” Bukkale bwaba Samuel abakaintu babo tiibwakali kubazumizya kucita zinji, pele bakali kucita kufwumbwa ncobakali kukonzya akujana lukkomano kwiinda mukucita boobo.

17. Mbuti mbomukonzya kugwasyigwa kapati anzila zyaambwa mucibalo eeci?

¹⁷ Atusole kuzibelesya nzila zyoonse zili 5 zyaambwa mucibalo eeci. Nzila imwi aimwi ili mbuli tuntu tubikkilizyigwa ciindi notujika cakulya. Mwatusanganya toonse, tupa kuti cakulya cinone kapati. Aboobo kuti twazibelesya nzila zyoonse nzyotwabandika, tuyoocikonzya kukuzunda kulimvwa bubi alimwi tuyakuukkomanina kapati mulimo wakukambauka.