Sena Mulizyi?
Nkaambo nzi bantu batakali bana Israyeli ncobakali kubeleka kabali basikalumamba ba Davida?
Basikalumamba ba Davida batakali bana Israyeli bakali kubikkilizya Zeleki muna Amoni, Uriya muna Heti, alimwi a Itima muna Moabu. a (1Mak. 11:39, 41, 46) Basikalumamba ba Davida alimwi bakali kubikkilizya ‘bana Kereti, bana Peleti abana Gati’. (2Sam. 15:18) Kulangilwa kuti bana Kereti alimwi abana Peleti bakali baluzubo lwaba Filisiti. (Ezk. 25:16) Bana Gati bakali kukkala mudolopo lyabana Filisiti lya Gati.—Josh. 13:2, 3; 1Sam. 6:17, 18.
Nkaambo nzi Davida ncaakalekela bamaalumi aaba batakali bana Israyeli kuba basikalumamba bakwe? Wakalisinizyide kuti bakali kusyomeka kulinguwe alimwi kwaambisya kuli Jehova. Mucikonzyanyo, kujatikizya bana Kereti alimwi abana Peleti, bbuku limwi lipandulula makani aamu Bbaibbele lyakati: “Bakazumanana kusyomeka kuli Davida muziindi zikatazya kapati ciindi naakali kulela.” Mubuti? Ciindi “baalumi bana Israyeli boonse” nobakamusiya Mwami Davida akutobela “mwaalumi simanyongwe wazina lya Sheba,” bana Kereti alimwi abana Peleti bakazumanana kusyomeka kuli Davida akumugwasyilizya kumana manyongwe ngaakatalisya Sheba. (2Sam. 20:1, 2, 7) Aciindi cimwi, mwana wa Mwami Davida Adonija wakayanda kuti abe nguwe mwami muciindi ca Solomoni. Nokuba boobo, bana Kereti alimwi abana Peleti bakazumanana kusyomeka kuli Davida alimwi akumugwasyilizya kubikka Solomoni kuba mwami wakali kutobela, nkaambo ngonguwe Jehova ngwaakasalide.—1Bam. 1:24-27, 38, 39.
Muntu umwi watakali muna Israyeli iwakazumanana kusyomeka kapati kuli Davida wakali Itai muna Gati. Itai abasikalumamba bakwe bali 600 bakamugwasyilizya Mwami Davida, ciindi mwanaakwe Abisalomu naakamuzangila kwiinda mukuyunga baalumi bana Israyeli kuti babikke nguwe kuba mwami muciindi ca Davida. Davida wakaambila Itai kuti akaambo kakuti tanaakali muna Israyeli, tanaakeelede kumulwanina. Pele Itai wakaamba kuti: “Masimpe mbubonya Jehova mbwali muumi alimwi mbubonya anduwe omwami simalelaangu mboli muumi, kufwumbwa kubusena nkoya kuba omwami simalelaangu, kofwide naa koli muumi, nkukonya ooko andime nkondiya kuba!”—2Sam. 15:6, 18-21.
Itai wakali kusyomeka kuli Davida, mwami wakananikidwe a Jehova
Nokuba kuti bana Kereti, bana Peleti abana Gati kunyina nobakali bana Israyeli, bakalizyi kuti Jehova ngo Leza wakasimpe alimwi akuti Davida wakali munanike wa Jehova. Eelo kaka Davida wakalumba kapati kuba aabamaalumi bali boobu basyomeka!
a Mulawo wa Leza uulembedwe ku Deuteronomo 23:3-6 tiiwakali kuzumizya bana Amoni alimwi abana Moabu kunjila mumbungano yabana Israyeli. Nokuba boobo, kulibonya kuti mulawo ooyu wakali kwaamba kuba sicisi alimwi tiiwakali kulesya bantu aaba batakali bana Israyeli kuyanzana naa kukkala abantu ba Leza. Amubone Insight on the Scriptures, Volume 1, p. 95.
