MUNZILA imwi inga twaamba kuti, basikwiiya Bbaibbele basungu bali mbuli bantu ibayandaula ngolida. Basikwiiya ibali boobu beelede kubeleka canguzu akuzumanana kuvwuntauzya Magwalo kutegwa bajane busongo butakonzyi kuulwa. Mbotuli basikwiiya Bbaibbele, ncinzi ncotukonzya kwiiya kwiinda mukulanga-langa nzila zyotatwe izibelesyegwa kujana ngolida?

Amweezyeezye kuti muleenda mumbali aankomwe yamulonga mpoonya mwabona kantu ikalibonya mbuli kabwe kamweka kapati. Mooka kutegwa mukabweze, eelyo mwakkomana kapati kujana kuti ningolida. Nkasyoonto kapati kwiinda katwe kakancisi alimwi kwiindana adaimondi yamuulo waatala, takajaniki-janiki pe. Mbuli cilengwa, mwalanga-langa kutegwa mubone naa inga mwajana aimbi ngolida.

Mbubwenya buyo, ambweni kaindi kuli buzuba bumwi ibutalubiki, ciindi umwi wababelesi ba Jehova naakaboola kuŋanda yanu kuzoobandika makani aapa bulangizi aamu Bbaibbele. Ambweni mulayeeya kabotu ciindi nomwakajana ngolida yakusaanguna yakasimpe. Andiza eeci cakacitika ciindi nomwakasaanguna kulibona zina lya Leza lyakuti Jehova, mu Bbaibbele. (Int. 83:18) Naa ambweni nomwakaiya kuti mulakonzya kuba acilongwe a Jehova. (Jak. 2:23) Mwakazyiba mpoona-mpoona kuti mwajana cintu ciinda kubota kwiinda ngolida! Kuzwa ciindi eeco, andiza mwakali kuyandisisya kujana ngolida zyakumuuya azimbi.

Tubwe tusyoonto itusangene angolida tulajanika mutulonga tusyoonto alimwi amilonga mipati. Musyobo wangolida ooyu wiitwa kuti alluvial gold. Mumyezi buyo iili mbwiibede, basikuyandaula ngolida ibabeleka canguzu balakonzya kujana ngolida zinji mutubwe ooto, izikonzya kusambalwa muulo waatala kapati.

Ciindi nomwakatalika kwiiya Bbaibbele a Bakamboni ba Jehova, kweelede kuti mwakalimvwa mbuli basikuyandaula ngolida ibajana tubwe itujisi ngolida zinji kapati. Cakutadooneka, ikuzinzibala kuyeeya tupango tunji twamu Bbaibbele kwakayungizya luzyibo lwanu, calo cakapa kuti muvwube kapati kumuuya. Ciindi nomwakazinzibala kuyeeya caluyandisisyo ikasimpe kamu Bbaibbele kayandisi, mwakaiya mbomukonzya kuswena kuli Jehova alimwi akukkala muluyando lwakwe kamujisi bulangizi bwakupona kukabe kutamani.—Jak. 4:8; Jud. 20, 21.

 Mbubwenya mbuli sikuyandaula ngolida mbwasolekesya kuyandaula tubwe tujisi ngolida mbotu ya alluvial gold, mulakonzya mwakali basungu kapati kuyandaula mbono zyakumuuya iziyandika kapati. Nomwakaiya kasimpe kamu Bbaibbele kantalisyo, cakutadooneka mwakakulwaizyigwa kubweza ntaamu izyakamupa kuti mulyaabe akubbapatizyigwa.—Mt. 28:19, 20.

Sikuyandaula ngolida ulakonzya kujana ngolida mutubwe tusyoonto-syoonto. Tubeela-beela tumwi twatubwe ootu tulakonzya katujisi ngolida zinji kapati cakuti tulakonzya kusyigwa akugaigwa kutegwa kugwisyigwe ngolida. Ikuti tubwe ootu mwatulanga buyo atala, tamukonzyi kwiibona ngolida. Nkaambo nzi? Nkaambo tubwe itujisi ngolida itulema makkilogilamu aali 1,000, tulakonzya kuzwa buyo ngolida iini iilema magilamu aali 10! Nokuba boobo, kumuntu sikuyandaula ngolida, noiceya boobo, ubona kuti cilagwasya kapati kwiibelekela canguzu kutegwa aijane.

Mbubwenya buyo, muntu uyandika kubeleka canguzu amana kwiiya “njiisyo zyantalisyo zya Kristo.” (Heb. 6:1, 2) Mweelede kubeleka canguzu kutegwa mujane twaambo tupya alimwi aziiyo zigwasya kuciiyo canu ca Bbaibbele. Aboobo, ino ncinzi ncomukonzya kucita kutegwa musinizye kuti mulagwasyigwa kapati aciiyo canu ca Bbaibbele, nokuba kuti mwali kwaayiya Magwalo kwamyaka minji?

Amuzumanane kuba aaluyandisisyo lwakwiiya. Amubikkile maano kutwaambo. Amuzumanane kubeleka canguzu, eelyo muyoojana ngolida njandisi yamu Magwalo yabusongo bwa Leza alimwi abusolozi. (Rom. 11:33) Kutegwa muyungizye luzyibo lwanu lwamu Magwalo, amuzibelesye zibelesyo zyakuvwuntauzizya iziliko mumwaambo wanu. Amubuyandaule cakukkazika moyo busolozi mbomuyanda alimwi abwiinguzi kumibuzyo yanu yamu Bbaibbele. Amubuzye bamwi kujatikizya magwalo alimwi azibalo nzyobajana kuti zilagwasya kapati alimwi zilayumya-yumya. Amubaambile bamwi kujatikizya twaambo tubotu ntomwakajana muciiyo canu ca Jwi lya Leza.

Inzya, mbaakani yanu taili buyo yakuyungizya luzyibo lwanu kujatikizya twaambo twamasimpe. Mwaapostolo Paulo wakacenjezya kuti: “Luzyibo lupa kulisumpula.” (1Kor. 8:1) Aboobo, amubeleke canguzu kutegwa muzumanane kulicesya alimwi akuyuma mulusyomo. Kukomba mumukwasyi nsondo ansondo alimwi akuba aciiyo canu ca Bbaibbele kuyoomugwasya kuti kamupona kweelana azyeelelo zya Jehova alimwi kuyoomukulwaizya kugwasya bamwi. Kwiinda waawo, munookomene nkaambo mwajana cintu ciinda kubota kwiinda ngolida.—Tus. 3:13, 14.