1, 2. (a) Ino cikwati cakatalika buti? (b) Ino kweelede kuti banabukwetene bakusaanguna aaba bakabubona buti bubambe bwacikwati? (Amubone cifwanikiso icili kumatalikilo aacibalo.)

CIKWATI ncibeela cipati kapati mubuumi bwabantu. Ikulanga-langa mbocakatalika alimwi amakanze aancico kulakonzya kutugwasya kubulanga munzila yeelede bubambe oobu akukkomana cakumaninina azileleko zijanika mumo. Ciindi Leza naakamana kulenga muntu wakusaanguna Adamu, wakamuletela banyama kutegwa abaulike mazina. Pele “muntu wakanyina sikumugwasyilizya, imweenzinyina uumweelede.” Aboobo Leza wakooneka Adamu ŋonzi zyalufwu, mpoonya wakagwisya kabambo komwe akukabelesya kupanga mukaintu, eelyo wakamuleta kumwaalumi. (Amubale Matalikilo 2:20-24.) Aboobo, Leza ngonguwe iwakatalisya cikwati.

² Jesu wakazuminizya kuti Jehova ngonguwe iwakaamba kuti: “Mwaalumi uyoosiya bausyi abanyina akukakatila kumukaintu wakwe, eelyo aaba bobilo bayooba mubili omwe.” (Mt. 19:4, 5) Ikubelesya kabambo Leza nkaakagwisya kuli Adamu ciindi naakalenga mukaintu,  kweelede kuti kwakagwasya banabukwetene bakusaanguna aaba kubona bubambe oobu mbobwakali kubakamantanya kapati. Kwakanyina bubambe bwakulekana naa bwakukwata naa kukwatwa mumaali.

3. Ino makanze mapati aacikwati akali makanze nzi?

³ Adamu wakakkomana kapati amukaintu wakwe mubotu kapati, ooyo ngwaakaulika kuti Eva. Mbwaanga wakali “mweenzinyina uumweelede,” wakali kuyooba “sikumugwasyilizya” akaambo kakuti bakali kuyookkomanisyanya lyoonse kwiinda mukuzuzikizya mikuli yabo kabali mulumi amukaintu. (Matl. 2:18) Makanze mapati aacikwati akali aakuzuzya nyika. (Matl. 1:28) Nokuba kuti bakali kubayanda kapati bazyali babo, bana bakali kuyoobasiya bazyali babo akukwata naa kukwatwa kutegwa babe amikwasyi yabo. Bantu bakeelede kwiizuzya nyika alimwi akwiipa kuti yoonse mukuya kwaciindi ibe paradaiso.

4. Ino ncinzi cakacitika kucikwati cakusaanguna?

⁴ Cikwati cakusaanguna cakaba mumapenzi mapati akaambo kakuti ba Adamu a Eva bakasala kutazibelesya kabotu nguzu zyabo zyakulisalila kwiinda mukutamvwida Jehova. “Imuzoka ooyo wakaindi,” nkokuti Saatani Diabolosi, wakeena Eva kwiinda mukumoongelezya akumupa kusyoma kuti ikulya mucelo ‘kucisamu cakuzyiba bubotu abubi’ kwakali kuyoomupa kuba aluzyibo lulibedelede ilwakali kuyoomugwasya kusala cibotu acibi. Eva kunyina naakabulemeka busilutwe bwamulumaakwe nkaambo tanaakasaanguna kumubuzya kujatikizya makani aaya. Alimwi muciindi cakumvwida Leza, Adamu wakaile buyo kutambula mucelo Eva ngwaakamupa.—Ciy. 12:9; Matl. 2:9, 16, 17; 3:1-6.

5. Ino ncinzi ncotwiiya kuli ba Adamu a Eva kujatikizya mbobakamwiingula Jehova ciindi naakababuzya?

⁵ Ciindi Leza naakamubuzya kujatikizya makani aaya, Adamu wakapa mukaintu wakwe mulandu kwiinda mukwaamba kuti: “Mukaintu nguwakandipa kuti katukkala limwi ngowandipa mucelo kuzwa kucisamu, aboobo ndalya.” Eva awalo wakapa nzoka mulandu akaambo kakuti yakamucenga. (Matl. 3:12, 13) Zilitamizyo zyoonse eezyi tiizyakali kugwasya pe! Akaambo kakuti banabukwetene bakusaanguna tiibakamumvwida Jehova, wakababona kuti mbazangi mumeso aakwe. Eelo kaka eeyi nincenjezyo mpati kapati kulindiswe! Kutegwa cikwati cizwidilile, banabukwetene boonse bobilo beelede kuzumina kulubizya kwabo alimwi akumvwida Jehova.

6. Ino lugwalo lwa Matalikilo 3:15 inga mwalupandulula buti?

⁶ Nokuba kuti Saatani wakacita boobo mumuunda wa Edeni, Jehova wakabapa bulangizi bantu bujanika mubusinsimi bwakusaanguna mu Bbaibbele. (Amubale Matalikilo 3:15.) Cilenge camuuya eeci icakasaanguna kuzanga cakali kuyoopwayaulwa “alunyungu” lwa “mukaintu.” Aboobo Jehova wakabatondezya bantu asyoonto buyo cilongwe cilibedelede ciliko akati kanguwe alimwi amakamu aazilenge zyamuuya ziluleme izimubelekela kujulu. Magwalo kumbele akayubununa kuti kuzwa kumbunga yakwe iili mbuli mukaintu, Leza wakali kuyootuma yooyo iwakali ‘kuyoopwayaula’ Diabolosi alimwi akupa nzila iyakali kuyoopa kuti bantu bamvwida bakabe abulangizi mbobakasweekelwa banabukwetene bakusaanguna—kupona kukabe kutamani anyika kweelana amakanze aa Jehova aakumatalikilo.—Joh. 3:16.

7. (a) Ino ncinzi cacitika kujatikizya cikwati kuzwa ciindi ba Adamu a Eva nobakazanga? (b) Ino Bbaibbele lyaamba nzi kujatikizya bamalumi alimwi abamakaintu?

⁷ Buzangi bwaba Adamu a Eva bwakacijatikizya kapati cikwati cabo alimwi azikwati zyoonse izyakatobela. Mucikozyanyo, Eva alunyungu lwakatobela lwabamakaintunyina bakali kuyooba amacise kapati ciindi nobamitide alimwi aciindi cakutumbuka. Bamakaintu bakali kuyoobayandisisya bamalumi babo, pele bamaalumi bakali kuyoobeendelezya bamakaintu babo, zimwi ziindi munzila yalunya buya, mbubwenya mbocibede muzikwati zinji mazuba aano. (Matl. 3:16) Bbaibbele lyaamba kuti bamalumi beelede kubucita munzila yaluyando busilutwe bwabo. Mpoonya bamakaintu abalo beelede  kulibombya kubusilutwe bwabamalumi babo. (Ef. 5:33) Akaambo kakuti banabukwetene ibayoowa Leza balamvwana, zintu izileta mazwanga zilakonzya kucesyegwa naa kuzimanizyila limwi buya.

8. Ino cikwati cakali buti kuzwa kuciindi ca Adamu kusikila kuciindi ca Zambangulwe?

⁸ Ba Adamu a Eva kabatanafwa akaambo kacibi alimwi akutalondoka, bakazyala bana. (Matl. 5:4) Mwanaabo musankwa mutaanzi, Kaini, wakakwata umwi wabasazinyina. Lameki, umwi walunyungu lwa Kaini, ngomwaalumi waambidwe kuti ngowakasaanguna kukwata bamakaintu bobilo. (Matl. 4:17, 19) Imazyalani kuzwa kuli Adamu kusikila ku Zambangulwe lyakumazuba aa Nowa, mbasyoonto ibaambidwe kuti bakali bakombi ba Jehova. Akati kabaabo, kwakali Abelo, Enoki, alimwi a Nowa amukwasyi wakwe. Bbaibbele lyaamba kuti, mumazuba aa Nowa, “bana ba Leza mwini-mwini bakatalika kubona bana basimbi babantu aaba kuti bakali babotu. Aboobo bakatalika kulibwezela basimbi akukwata kufwumbwa aumwi ngwaakayanda.” Akaambo kakuti bangelo bakakwata bamakaintu bantunsi, bakazyala bana ibakajisi nguzu zitaambiki ibakali kwiitwa kuti ba Nefilimu. Kuyungizya waawo, ‘bubi bwabantu bwakavwulisya anyika, alimwi makanze aabo amizeezo njibakali kuyeeya mumyoyo yabo yakali mibi ciindi coonse.’—Matl. 6:1-5.

9. Ino ncinzi Jehova ncaakacita kubantu babi kuciindi ca Nowa, alimwi nciiyo nzi ncotweelede kwiiya kuzintu izyakacitika kuciindi eeco?

⁹ Jehova wakaleta Zambangulwe kuciindi ca Nowa kutegwa anyonyoone bantu babi. Kuciindi eeco, bantu bakajisi bubi kapati azintu zyabuzuba abuzuba, kubikkilizya acikwati, cakunga bakaubya-ubya nzyaakali kwaamba “Nowa, imukambausi wabululami,” kujatikizya kuyonyoonwa kwakali kuyoocitika. (2Pet. 2:5) Jesu wakakozyanisya zintu izyakali kucitika kuciindi eeco kuzintu nzyotwakali kuyoobona mazuba aano. (Amubale Matayo 24:37-39.) Mazuba aano, bantu banji balakaka kuswiilila makani mabotu aa Bwami bwa Leza aali mukukambaukwa munyika yoonse kuti bube bumboni kumasi oonse kaitana kunyonyoonwa nyika eeyi mbyaabi. Alimwi atukayeeye kaambo aaka kakuti naaba makani aajatikizya mukwasyi, mbuli cikwati alimwi akukomezya bana, tatweelede kwaazumizya kuti atulesye kupakamana kujatikizya mbobuli afwaafwi buzuba bwa Jehova.

10. (a) Ino nzilengwa nzi izijatikizya makani aakoonana izyakadumide kapati mumasena manji? (b) Mbuti Abrahamu a Sara mbobakapa cikozyanyo cibotu mucikwati cabo?

¹⁰ Nokuba kuti Nowa abana bakwe umwi aumwi wabo wakakwete mukaintu omwe buyo, kukwata maali kwakaliko kuciindi cansiku. Mumasena manji, kutalilemeka mumakani aakoonana kwakalidumide kapati, mane buya kwakali kubikkilizyigwa amuzilengwa zyabukombi. Ciindi Abramu (Abrahamu) amukaintu wakwe Sarai (Sara), nobakamvwida ncaakabaambila Leza akuunka ku Kanana, nyika eeyo yakazwide zilengwa izyakali kusampaula bubambe bwacikwati. Aboobo Jehova wakalailila kuti minzi ya Sodoma a Gomora inyonyoonwe akaambo kakuti bantu ibakali kukkala mumo bakali kucita naa kuzumizya kutalilemeka kupati ikujatikizya koonana. Abrahamu wakali kusololela kabotu mumukwasyi wakwe, alimwi Sara wakapa cikozyanyo cibotu kapati kwiinda mukulibombya kubusilutwe bwamulumaakwe. (Amubale 1 Petro 3:3-6.) Abrahamu wakabona kuti mwanaakwe Izaka wakwata mukombi wa Jehova. Mbubwenya buyo, ikubikkila maano kubukombi bwakasimpe kwakamugwasya imwana wa Izaka, Jakobo ooyo iwakazyala bana ibakaba bamausyi bamisyobo iili 12 ya Israyeli.

11. Ino mbuti Mulawo wa Musa mbowakali kubakwabilila bana Israyeli?

¹¹ Mukuya kwaciindi, Jehova wakapanga cizuminano alunyungu lwa Jakobo (Israyeli). Muzintu  zimwi izyakali kucitwa mucikwati lyansiku, kubikkilizya akukwata maali, kwakali milawo mu Mulawo wa Musa iyakali kutobelwa mumakani aaya. Mulawo wakali kukwabilila bana Israyeli kumuuya kwiinda mukubakasya kukwatana abakombi bakubeja. (Amubale Deuteronomo 7:3, 4.) Ikuti naa kwaba mazwanga mapati mucikwati, kanji-kanji bantu bakali kugwasyigwa abaalu. Kutasyomeka, buzuba, alimwi akuyeeyela bamwi kuti tabasyomeki mucikwati, kwakali kulanganizyigwa munzila yeelede. Kulekana kwakali kuzumizyigwa, pele kwakali milawo iyakali kutobelwa mumakani aaya. Mwaalumi wakali kukonzya kumuleka mukaintu wakwe kuti naa “wajana cintu cuusya nsoni mulinguwe.” (Dt. 24:1) Cintu icakali ‘kuusya nsoni’ tacaambidwe pe, pele kuboneka kuti tiicakali kubikkilizya twaambo tutayi koomoonga.—Lev. 19:18.

12, 13. (a) Ino bamaalumi bamwi kuciindi ca Malaki bakali kubeendelezya buti bamakaintu babo? (b) Mazuba aano, ikuti muntu uubbapatizyidwe wabwezana amukamuntu, ino ncinzi cikonzya kucitika?

¹² Mumazuba aamusinsimi Malaki, bamalumi banji ba Juda bakali kubacitila cabumpelenge bamakaintu babo kwiinda mukubaleka, akupa zilitamizyo zitayi koomoonga. Bamaalumi bali boobo bakali kubaleka bamakaintu babo bakubukubusi, ambweni kutegwa bakwate bamakaintu bacili bana-bana naa bamakaintu ibatakali kukomba Leza mwini-mwini. Bamaalumi ba Juda cabumpelenge bakacili kubaleka bamakaintu babo ‘akaambo katwaambo tuli toonse’ ciindi Jesu naakali aanyika. (Mt. 19:3) Jehova Leza tanaakali kukukkomanina kulekana kuli boobo naaceya.—Amubale Malaki 2:13-16.

¹³ Mazuba aano, kucita cabumpelenge mucikwati takuzumizyigwi akati kabantu ba Jehova. Pele ino ncinzi cikonzya kucitika ikuti mwaalumi uukwete naa mukaintu uukwetwe wabwezana amukamuntu mpoonya bakwatana amuntu ooyo nobamana kulekana amukaintu naa mwaalumi ngobakwetene limwi? Ikuti naa sikubisya teempedwe, ulagwisyigwa mumbungano kutegwa mbungano izumanane kusalala kumuuya. (1Kor. 5:11-13) Muntu wabisya weelede ‘kuzyala micelo yeendelana akweempwa kwakwe’ katanapilusyigwa mumbungano. (Lk. 3:8; 2Kor. 2:5-10) Nokuba kuti taakwe ciindi cibikkidwe ceelede kwiinda muntu ooyo katanapilusyigwa, bumpelenge buli boobu, ibutavwuli kucitika akati kabantu ba Leza, tabukonzyi kulangwa buyo pe. Kulakonzya kwiinda ciindi cili mbocibede ambweni mwaka omwe naa kwiinda aawo kuti sikubisya atondezye kuti weempwa ncobeni. Nokuba kuti muntu ooyo wapilusyigwa, uceelede kuyoolyaambilila mwini “kumbele lyacuuno calubeta ca Leza,” kujatikizya kweempwa kwakwe ikuti naa kwakali kwancobeni.—Rom. 14:10-12; amubone Ngazi Yamulindizi yamu Chingisi yamu November 15,1979, pp. 31-32.

14. Ino Mulawo wakazuzikizya makanze nzi?

¹⁴ Mulawo wa Musa wakabeendelezya bana Israyeli kwamyaka iinda ku 1,500. Wakabagwasya bantu ba Leza kuzibikkila maano njiisyo zyamu Bbaibbele nobakali kulanganya makani aamumukwasyi alimwi atwaambo tumwi kauli mbuli musolozi iwakali kubasololela kuli Mesiya. (Gal. 3:23, 24) Nowakaleka kubeleka Mulawo ciindi Jesu naakafwa, Leza wakatalisya bubambe bupya. (Heb. 8:6) Mububambe oobu bupya, zintu zimwi izyakali kuzumizyigwa mu Mulawo tiizyakacili kuyandika.

15. (a) Ino mbubambe nzi bujatikizya cikwati ibwakeelede kutobelwa mumbungano ya Bunakristo? (b) Ino ntwaambo nzi Munakristo ntwayelede kulanga-langa katanayeeya zyakulekana?

¹⁵ Naakali kwiingula mubuzyo ngobakabuzya ba Farisi, Jesu wakaamba kuti ikuzumizya nkwaakazumizya Musa ikwakuleka mukaintu “tabusyi mbocakabede kuzwa kumatalikilo.” (Mt. 19:6-8) Aboobo Jesu wakatondezya kuti bubambe Leza mbwaakabikka bwacikwati mumuunda wa Edeni bwakali kuyoozumanana kutobelwa  mumbungano ya Bunakristo. (1Tim. 3:2, 12) Mbwaanga bakali “nyama yomwe,” banabukwetene bakeelede kukakatilana, alimwi kuyanda Leza aluyando ilwakali akati kabo lwakeelede kuyumya cikwati cabo. Ikulekana kweelana amulawo wamfwulumende pele ikutacitwi akaambo kabwaamu, takukonzyi kuzumizya muntu kukwata naa kukwatwa kumbi. (Mt. 19:9) Nokuba boobo, muntu ulakonzya kusala kumulekelela muntu ngwakwetene limwi iwakacita bumambe iweempwa, mbubwenya musinsimi Hosea mbwaakamulekelela mukaintu wakwe muhuule, Gomeri. Ncimwi buyo, Jehova wakabafwida luse bana Israyeli ibakeempwa ciindi nobakacita bumambe bwakumuuya. (Hos. 3:1-5) Aboobo inga kwaambwa kuti, ikuti muntu kazyi kuti ngwakwetene limwi wakacita bumambe, pele wasala kuzumanana koonana anguwe, ikucita boobo ncitondezyo cakuti wamulekelela alimwi Magwalo taakonzyi kumuzumizya kumuleka pe.

16. Ino Jesu wakaamba nzi kujatikizya kutakwata naa kutakwatwa?

¹⁶ Naakamana kwaamba kuti akati ka Banakristo bakasimpe taakwe cikonzya kuzumizya kulekana kunze buyo lyakucita bumambe, Jesu wakaamba kujatikizya ‘baabo bajisi cipego’ cakutakwata naa kutakwatwa. Wakayungizya kuti: “Ooyo uukonzya kuzumanana kakunyina kukwata, akkale mbubonya oobo.” (Mt. 19:10-12) Bantu banji basala kutakwata naa kutakwatwa kutegwa babelekele Jehova kakunyina kunyonganizyigwa. Beelede kulumbwa akaambo kakusala nzila eeyi.

17. Ino ncinzi cikonzya kugwasya Munakristo ikusala kukwata naa kukwatwa?

¹⁷ Kusala kutakwata naa kutakwatwa alimwi akukwata naa kukwatwa nkaambo umwi aumwi nkayelede kulisalila mumoyo wakwe ikuti naa inga wacikonzya kuzumanana kukkala alikke. Mwaapostolo Paulo wakakulwaizya kutakwata naa kutakwatwa; nokuba boobo, wakati: “Akaambo kakuvwula kwabwaamu, mwaalumi umwi aumwi abe amukaintu wakwe uumugeme alimwi mukaintu umwi aumwi abe amulumaakwe uumugeme.” Paulo wakayungizya ulaamba: “Ikuti kabatakonzyi kulilesya, abakwate naa kukwatwa, nkaambo cilainda kubota kukwata naa kukwatwa ikwiinda kufwa luunyaunya.” Kukwata naa kukwatwa kulakonzya kumugwasya muntu kutantamuka luunyaunya ilukonzya kusololela kuzilengwa mbuli kulisobanya kubusankwa naa kubukaintu alimwi abwaamu. Kuyungizya waawo, ciimo ncajisi muntu acalo ceelede kubikkilwa maano, nkaambo mwaapostolo wakati: “Ikuti umwi wabona kuti camwaalila kukkala buyo katakwete, alimwi ikuti kali wainda kale aciimo cakukubuka, nkokuti mboobu mboceelede kuba: Kacita eeco ncayanda; tabisyide pe. Abakwate.” (1Kor. 7:2, 9, 36; 1Tim. 4:1-3) Nokuba boobo, muntu teelede kukwata naa kukwatwa akaambo buyo kaluunyaunya ilukonzya kuboola nacili mukubusi. Ambweni ulakonzya kuti tanasima cakuti inga wakonzya kuzuzikizya mikuli iiboola mucikwati.

18, 19. (a) Ino ncintu nzi cakusaanguna ciyandika kapati mucikwati ca Banakristo? (b) Ino cibalo citobela ciyoolanga-langa nzi?

¹⁸ Cintu cakusaanguna ciyandika mucikwati ca Bunakristo ncakuti, mwaalumi amukaintu beelede kuti kabalyaabide kuli Jehova alimwi kabamuyanda camoyo woonse. Alimwi beelede kuti kabasikide aciimo cakuyandana kapati cakuti balilyaabide kukkala antoomwe mucikwati. Bwini mbwakuti, banoolelekedwe akaambo kakutobela lulayo lwakukwata naa kukwatwa “buyo mu Mwami.” (1Kor. 7:39) Cakutadooneka, mucikwati cabo banoozyi kuti Bbaibbele ndelijisi lulayo lwiinda kubota ilukonzya kupa kuti cikwati cabo cizwidilile.

¹⁹ Cibalo citobela ciyoolanga-langa twaambo twamu Magwalo itukonzya kugwasya Banakristo banabukwetene ikulwana buyumuyumu bwakupona “kumazuba aamamanino” ciindi bamaalumi abamakaintu banji nobajisi bube ibupa kuti cikwati citazwidilili. (2Tim. 3:1-5) Mu Jwi lyakwe liyandisi, Jehova watupa makani ngotuyandika kutegwa tube acikwati cikkomanisya oomo imuli lukkomano notuyaabweenda abantu bakwe munzila iisololela kubuumi butamani.—Mt. 7:13, 14.