1, 2. (a) Ino businsimi bulembedwe kulugwalo lwa Isaya 60:22 bwazuzikizyigwa buti mumazuba aaya aamamanino? (b) Ino nkubula kuli buti ikuliko lino mumbunga ya Jehova iili aanyika?

“MUNIINI uyooba cuulu awalo musyoonto uyooba cisi cilaanguzu.” (Is. 60:22) Majwi aabusinsimi aaya ali mukuzuzikizyigwa mumazuba aaya aamamanino. Kayi mumwaka wamulimo wa 2015, basikumwaya ba Bwami ibali 8,220,105 bali basungu mumulimo wakukambauka nyika yoonse. Cibeela camamanino cabusinsimi oobu, ceelede kubajatikizya cacigaminina Banakristo boonse, nkaambo Taateesu wakujulu waamba kuti: “Mebo lwangu, nde Jehova, ndiyoopa kuti eeci cifwambaane kucitika muciindi cancico ceelede.” Mbubwenya mbuli bantu ibakkwelede mumootokala iiyaabuzuza kapati, tulibwene mbouli mukuyaambele mulimo wakupanga basikwiiya. Ino tulimvwa buti kujatikizya kuyaambele ooku? Sena tuli mukubeleka canguzu kusikila mpotugolela mbotuli basikumwaya ba Bwami basungu? Bakwesu alimwi abacizyi banji bali mukulyaaba kubeleka kabali bapainiya baciindi coonse naa bapainiya bagwasyilizya. Alimwi sena tacitukkomanisyi kubona bantu banji kabalyaaba kuunka kuyoobelekela kubusena kubulide naa kutola lubazu mumbazu zimwi zyamulimo wakumuuya?

² Kuyungizya waawo, tulibwene kuti babelesi banji baciyandika kapati. Mbungano zisika ku 2,000 zilapangwa mwaka amwaka. Ikuti  naa kuli baalu bosanwe ibabelekela mumbungano mpya imwi aimwi, nkokuti inga kwayandika kuti bakutausi ibali 10,000 beelele kuba balangizi mwaka amwaka. Eeci caamba kuti inga kwayandika kuti zyuulu zyuulu zyabakwesu basike azyeelelo ziyandika kutegwa babe bakutausi. Kuyungizya waawo, tacikwe makani naa tuli bakwesu naa bacizyi, toonse tulijisi “zinji zyakucita mumulimo wa Mwami.”—1Kor. 15:58.

3, 4. Ino kuyaambele kumuuya caamba nzi kulindinywe?

³ Amubale 1 Timoteyo 3:1. Mabala aamu Chigiriki aakuti ‘kuyanda kuba mulangizi’ aamba kusumpukila, ambweni kutegwa mubweze cintu cimwi icili alamfwu. Naakabelesya mabala aaya, mwaapostolo Paulo wakali kukankaizya kaambo kakuti ikuyaambele kumuuya kuyanda kubeleka canguzu. Amweezyeezye mukwesu uuyeeya kujatikizya lubazu ndwanoojisi kumbele mumbungano. Ambweni lino tali mukutausi, pele wabona kuti weelede kuba abube bwakumuuya. Cakusaanguna, wabeleka canguzu kutegwa ayelele kuba mukutausi. Mukuya kwaciindi, ulombozya kweelela kumuuya kutegwa akabe mulangizi. Mumbazu zyoonse zyobilo eezyi, wabeleka canguzu kutegwa asike azyeelelo ziyandika kutegwa abe amikuli iiyungizyidwe mumbungano.

⁴ Ncimwi buyo abakwesu alimwi abacizyi ibayanda kubeleka kabali bapainiya, kubelekela ku Bbeteli, naa basikulisungula kuyaka Maanda aa Bwami, abalo beelede kusumpukila kutegwa basike ambaakani zyabo. Atulange-lange Jwi lya Leza mbolitukulwaizya toonse kuyaambele mubukombi bwakasimpe.

5. Ino mbuti bakubusi mbobakonzya kubelesya nguzu zyabo mumulimo wa Bwami?

⁵ Bakubusi balijsi nguzu ziyandika kutegwa babeleke milimo minji mumulimo wa Jehova. (Amubale Tusimpi 20:29.) Bakwesu bamwi ibacili bana-bana ibabelekela mumitabi balabeleka kusimba ma Bbaibbele amabbuku aamba zyamu Bbaibbele. Mpoonya bamwi balabeleka mumulimo wakuyaka alimwi akubambulula Maanda aa Bwami. Ciindi nokwacitika ntenda, bakubusi balabasangana Bakamboni ibalaaluzyibo mukugwasyilizya mumasena aaya. Bakubusi bamwi bapainiya balaunka kuyookambauka makani mabotu kubantu ibaambaula myaambo yaambaulwa buyo mumasena aamwi alimwi abantu baambaula myaambo yakunze aacisi.

6-8. (a) Ino mbuti mukubusi umwi mbwaakacinca mbwaakali kukubona kubelekela Leza, alimwi ncinzi cakacitika? (b) Mbuti mbotukonzya ‘kulabila akubona kuti Jehova mubotu’?

⁶ Cakutadooneka, andinywe mulaukkomanina mulimo uubelekwa camoyo woonse kuli Leza. Pele ino mbuti kuti mulimvwa mbuli mbwaakalimvwide aciindi cimwi mukwesu wazina lya Aaron? Nokuba kuti wakakomenena mumukwasyi wa Bakamboni, wakaamba kuti: “Miswaangano alimwi amulimo wamumuunda tiizyakali kundikkomanisya pe.” Wakali kuyanda kubelekela Leza kakkomene pele wakali kukatazyigwa ikaambo ncaatakalikkomene. Ino wakacita nzi?

⁷ Mukwesu Aaron wakajisi bubambe bwakumuuya ibwakali kubikilizya kubala Bbaibbele, kulibambila miswaangano, alimwi akutola lubazu. Mpoonya wakaba acilengwa cakupaila lyoonse. Luyando ndwaakajisi kuli Jehova nolwakakomena, wakatalika kuyaambele kumuuya. Kuzwa ciindi eeco, mukwesu Aaron ulaukkomanina mulimo wabupainiya, kugwasya bamwi nokwacitika ntenda, alimwi akukambaukila mucisi cimbi. Mukwesu Aaron lino ubelekela ku Bbeteli alimwi mwaalu. Ino ulimvwa buti kujatikizya buumi mbwapona? Waamba kuti: “‘Ndalabila akubona kuti Jehova mubotu.’ Akaambo kazilongezyo zyakwe, ndilamulumba kapati alimwi eeci candikulwaizya kuyungizya mulimo wangu kulinguwe, calo capa kuti ndilongezyegwe kapati.”

⁸ Sintembauzyo wakaimba kuti: “Aabo bayandaula Jehova tabakabuli cintu cibotu niciba comwe.” (Amubale Intembauzyo 34:8-10.) Inzya,  Jehova tabalekelezyi aabo ibamubelekela cabusungu. Tulakonzya ‘kulabila akubona kuti Jehova mubotu’ ciindi notumubelekela kusikila mpotugolela. Alimwi ciindi notumukomba Leza camoyo woonse, tujana lukkomano lutakonzyi kweelanisyigwa acintu cili coonse.

9, 10. Ino nkaambo nzi ncociyandika kapati kuba amoyo ‘wakulindila’?

⁹ Nomuyaabubeleka kutegwa muzuzikizye mbaakani zyanu, amube amoyo ‘wakulindila.’ (Mik. 7:7) Lyoonse Jehova ulabagwasya babelesi bakwe basyomeka, nokuba kuti ulakonzya kubalekela kuti balindile kwaciindi cili mbocibede kuti bapegwe zyoolwe zimwi naa kulindila bukkale ibukonzya kupa kuti zintu zibeendele kabotu. Wakasyomezya Abrahamu kuti ulaba amwana musankwa, pele sikale ooyu wakeelede kuba alusyomo alimwi akukkazika moyo. (Heb. 6:12-15) Nokuba kuti wakalindila kwamyaka minji kuti Izaka azyalwe, Abrahamu tanaakatyompwa pe, alimwi Jehova tanaakamubeja pe.—Matl. 15:3, 4; 21:5.

¹⁰ Kulindila kulakatazya. (Tus. 13:12) Ikuti twazumanana kulimvwa bubi akaambo kakuti tatunasika ambaakani zyesu, tulakonzya kutyompwa kapati. Muciindi cakutyompwa boobo, inga cagwasya kuti ciindi ncotujisi tucibelesye kuyaambele kuzuzikizya zyeelelo zyesu zyakumuuya. Amubone nzila zyotatwe mbotukonzya kucita oobo.

11. Ino mbube nzi bwakumuuya mbotuyandika kubelekela kutegwa tube ambubo, alimwi nkaambo nzi ncobuyandika?

¹¹ Amube abube bwakumuuya. Kwiinda mukubala Jwi lya Leza alimwi akuzinzibala kuyeeya nzyotwabala, tulakonzya kuba abusongo, bupampu, kusala kabotu, luzyibo, kuyeeya kabotu, alimwi  akulibatamika. Bube buli boobu bulayandika kapati kuli baabo ibasololela mubukombi bwakasimpe. (Tus. 1:1-4; Tit. 1:7-9) Alimwi ciindi notubala mabbuku eesu aamba zyamu Bbaibbele, tulakonzya kuzyiba Leza mbwayeeya mumakani manji kapati. Buzuba abuzuba, tulasala mumakani aajatikizya zyakulikondelezya, nsamino akulibamba, kubelesya kabotu mali, alimwi ambotweelede kweendelezyanya kabotu abantu bamwi. Kwiinda mukubelesya nzyotwiiya mu Bbaibbele, tulakonzya kusala zintu zimukkomanisya Jehova.

12. Ino mbuti basimbungano mbobakonzya kutondezya kuti balasyomeka?

¹² Amube bantu basyomeka. Tacikwe makani naa tuli bakwesu naa tuli bacizyi, tweelede kwiibeleka canguzu milimo yoonse yakumuuya njotupegwa. Mbwaanga wakali mweendelezi, Nehemiya wakeelede kwaabanya milimo akati kabantu ba Leza. Ino mbaani mbaakapa? Wakapa baabo ibakali kuyoowa Leza alimwi ibakali kusyomeka. (Neh. 7:2; 13:12, 13) Ncimwi buyo amazuba aano, “iciyandika mubabanzi ncakuti bakajanike kabasyomeka.” (1Kor. 4:2) Milimo mibotu ilalibonya.—Amubale 1 Timoteyo 5:25.

13. Ino mbuti mbomukonzya kutobela cikozyanyo ca Josefa ikuti naa bamwi tiibamweendelezya kabotu?

¹³ Amumulekele Jehova kuti amusensemune. Ncinzi ncomukonzya kucita ikuti naa bamwi tiibamweendelezya kabotu? Ambweni mulakonzya kutubamba twaambo cakufwambaana. Pele zimwi ziindi ikuti mwabelesya nguzu nomuliiminina, inga mwapa kuti penzi liindile kukomena. Banabokwabo Josefa tiibakamweendelezya kabotu, pele taakwe naakababikkilila. Nokwakainda ciindi, bakamubejekezya Josefa mpoonya wakaangwa katakwe mulandu. Nokuba boobo, wakalekela Jehova kuti amusololele muziindi zikatazya. Ino ncinzi cakacitika? “Ijwi lya Jehova ndilyakamusensemuna.” (Int. 105:19) Masunko aayo naakamana, Josefa wakeelela kupegwa mukuli waalubazu. (Matl. 41:37-44; 45:4-8) Ciindi nomuli mumapenzi aakatazya kapati, amulombe Leza kuti amupe busongo, amucite zintu akwaambaula cakukkazika moyo, alimwi amulange kuli Leza kuti amupe nguzu. Jehova uyoomugwasya.—Amubale 1 Petro 5:10.

14, 15. (a) Nkaambo nzi ncotweelede ‘kulibamba tobeni akubikkila maano kapati’ kukuyiisya kwesu? (b) Ino mbuti mbomukonzya kucinca-cinca kweelana abukkale? (Amubone cifwanikiso icili kumatalikilo aacibalo alimwi akabbokesi kakuti “ Sena Inga Mwabelesya Nzila Imbi?”)

¹⁴ Paulo wakakulwaizya Timoteyo kuti: “Kozumanana kulitakata kubala kubuleya, ikulaya, akuyiisya.” (1Tim. 4:13, 16) Timoteyo wakali kale sikumwaya wa Bwami uucibwene. Nokuba boobo, wakali kuyoozwidilila mumulimo lelikke buyo naakali ‘kuyoolibamba mwini akubikkila maano kapati’ kukuyiisya kwakwe. Tanaakeelede kulangila kuti bantu bakali kuyooswiilila kunzila nzyaakali kubelesya lyoonse. Kutegwa azumanane kubasika aamoyo bantu, wakeelede kucinca-cinca nzila nzyaakali kubelesya mukuyiisya kwakwe kweelana abukkale bwabo. Mbotuli basikumwaya ba Bwami, andiswe tweelede kucita mbubwenya oobo.

¹⁵ Kanji-kanji tatubajani bantu ciindi notukambauka kuŋanda aŋanda. Mumasena aamwi, tacikonzyeki kusika mumaanda aamwi alimwi amaanda aayakilidwe bwaanda. Ikuti naa cilawo canu mbocibede oobo, inga cagwasya kubelesya nzila imbi yakukambauka makani mabotu.

16. Ino mbuti bukambausi bwakubuleya mbobukonzya kuba nzila mbotu yakukambauka?

¹⁶ Bukambausi bwakubuleya ninzila imwi mbotu kapati yakumwaya makani mabotu. Bakamboni banji balatola lubazu cabusungu mumulimo ooyu alimwi balalongezyegwa. Balajana ciindi cakuyookambaukila bantu muzitisyini zyacitima amabbaasi, mumisika amumasena aakulyookezyezya, alimwi amumasena aambi buyo aakubuleya. Cabupampu, Kamboni ulakonzya kutalisya mubandi kumuntu kwiinda mukwaamba makani aakaambwa mumuteende, muwailesi naa a T.V, kulumbaizya bana bakwe, naa kubuzya mubuzyo kujatikizya mulimo ngwabeleka. Mbobayaabubandika,  sikumwaya inga waamba kaambo kamu Magwalo ikakonzya kupa kuti muntu ooyo abe aluyandisisyo lwakuzyiba zinji. Bwiinguzi mbwapa kanji-kanji inga busololela kukubandika makani manji aamu Bbaibbele.

17, 18. (a) Mbuti mbomukonzya kuzyibila kutola lubazu mubukambausi bwakubuleya? (b) Nkaambo nzi ncomunga mwaamba kuti majwi aakutembaula Jehova ngaakaamba Davida alayandika kapati kulindinywe ciindi nomutola lubazu mumulimo wamumuunda?

¹⁷ Ikuti naa bukambausi bwakubuleya bulamukatazya, mutatyompwi pe. Ba Eddie, bapainiya ibakkala ku New York City, bakali kuwayawaya kubandika abantu mubuleya. Nokuba boobo, mukuya kwaciindi, bakatalika kucita boobo. Ino ncinzi cakabagwasya? Bakaamba kuti: “Notucita kukomba kwamumukwasyi, mebo abakaintu bangu tulavwuntauzya kutegwa tujane bwiinguzi kumibuzyo njobabuzya bantu alimwi amizeezo njobavwula kuba aanjiyo. Alimwi tulabuzya-buzya mizeezo iigwasya kuli Bakamboni bamwi.” Lino ba Eddie balayandisisya kutola lubazu mubukambausi bwakubuleya.

¹⁸ Mbomuyaabuba aaluzyibo alimwi akuzyibila ikukambauka makani mabotu, kuyaambele kwanu kwakumuuya kunooyaabulibonya. (Amubale 1 Timoteyo 4:15.) Kuyungizya waawo, cakutadooneka muyoomutembaula Taateesu wakujulu mbubwenya mbwaakacita Davida iwakaimba kuti: “Ndinootembaula Jehova ciindi coonse; intembauzyo zyakwe zinooli amilomo yangu lyoonse. Ndinoolidunda muli Jehova; babombe myoyo bayoomvwa akukondwa.” (Int. 34:1, 2) Alimwi ambweni akaambo kabukambausi bwanu, inga mwapa kuti babombe myoyo bamusangane cakukondwa mubukombi bwakasimpe.

19. Ino nkaambo nzi mubelesi wa Jehova uusyomeka ncayelede kukkomana nokuba kuti uli mubukkale bukatazya?

¹⁹ Davida alimwi wakaimba kuti: “O Jehova, milimo yako yoonse inookulemeka, alimwi bantu bako basyomeka banookutembaula. Banakwaambilizya bulemu bwabwami bwako alimwi akwaamba kujatikizya nguzu zyako, kutegwa bazyibye bantu milimo yako mipati alimwi abulemu bwabwami bwako bweebeka.” (Int. 145:10-12) Majwi aaya aamba bwini mbobalimvwa Bakamboni ba Jehova basyomeka boonse. Pele ino mbuti kuti kuciswa naa kucembaala kupa kuti mutacikonzyi kukambauka mbuli mbomuyanda? Mutalubi kuti ciindi nomukambauka makani mabotu kubantu ibamulanganya alimwi abantu bamwi buyo, milimo yanu eeyo iisetekene ilamulemeka Leza wesu mubotu. Ikuti naa mulaangidwe akaambo kalusyomo lwanu, cakutadooneka mulaamba kujatikizya kasimpe kweelana abukkale momubede, alimwi eeco cipa kuti moyo wa Jehova ukkomane. (Tus. 27:11) Alimwi ncimwi buyo ikuti naa mukkala abantu batakombi Jehova, pele kamuzumanana kutobela bubambe bwanu bwakucita zintu zyakumuuya. (1Pet. 3:1-4) Nomuba mubukkale bukatazya kapati, mulakonzya kumutembaula Jehova alimwi akuyaambele kumuuya.

20, 21. Ikuti naa mwapegwa milimo minji mumbunga ya Jehova, mbuti mbomukonzya kuba cileleko kuli bamwi?

²⁰ Jehova uyoomuleleka ncobeni ikuti naa mwazumanana kuyaambele kumuuya. Ambweni kwiinda mukuubambulula aniini mulongo wanu wazintu nzyomucita naa bukkale bwanu, mulakonzya kuba alubazu lupati mukukambauka kasimpe kayandisi ka Leza kuli baabo ibayandika kugwasyigwa kuba abulangizi. Kuyungizya waawo, ikuyaambele kwanu kumuuya alimwi akulyaaba kwanu zilakonzya kuleta zilongezyo zitaambiki kubasyominyoko. Alimwi akaambo kamilimo njomubeleka cakulicesya mumbungano, muyoolumbwa, muyookkomaninwa alimwi akugwasyigwa abaabo ibamuyanda Jehova.

²¹ Kufwumbwa naa twabeleka myaka minji naa myezi misyoonto mumulimo wa Jehova, toonse buyo tulakonzya kuyaambele mubukombi bwesu. Pele ino mbuti Banakristo basimide mbobakonzya kubagwasya ibapya kuyaambele kumuuya? Tuyookabandika kaambo aaka mucibalo citobela.