CIINDI nondakali amyaka yakuzyalwa iili 12, ndakazyiba kuti ndakajisi cintu ciyandika kapati ncondakali kukonzya kupa bamwi. Lyamuswaangano wabbazu, mukwesu wakandibuzya naa ndakali kuyanda kukambauka. Nokuba kuti kunyina nondakakambaukide kale, ndakati “inzya.” Twakaunka kucilawo, mpoonya wakandipa tubbuku itwakali kwaamba zya Bwami bwa Leza. Wakaamba kuti: “Ukambaukile bantu ibali kulubazu ooluya lwamugwagwa mpoonya mebo ndilakambaukila bantu ibali kulubazu ooluno.” Kandiyoowede, ndakatalika kukambauka kuŋanda aŋanda, alimwi icakandigambya ncakuti ndakatwaabila tubbuku toonse ntondakajisi. Cakutadooneka, bantu banji bakatukkomanina tubbuku ntondakali kwaabila.

Ndakazyalwa mu 1923 mu Chatham, Kent, ku England, alimwi ciindi nondakali kukomena, nyika yakazwide bantu batyompedwe. Nkondo Yakusaanguna Yanyika Yoonse tiiyakazuzikizya cisyomezyo cakuleta luumuno munyika. Bazyali bangu abalo bakalityompedwe akaambo kabasololi bacikombelo ca Baptist ibakali kubikkila buyo maano kukusumpuka kwabo beni. Nondakali amyaka iili 9, bamaama bakatalika kuunka kuŋanda yakuswaanganina yaba International Bible Students Association, ooko nkobakali kuswaanganina bantu ibakatalika kwiitwa kuti Bakamboni ba Jehova. Mucizyi umwi wakali kutuyiisya swebo tobana ziiyo zyamu Bbaibbele kubelesya Bbaibbele alimwi abbuku lyakuti The Harp of God. Ndakali kuzikkomanina nzyondakali kwiiya.

Nondakali mukubusi, cakali kundikkomanisya kupa bantu bulangizi buzwa mu Jwi lya Leza. Nokuba kuti kanji-kanji ndakali kukambauka kuŋanda aŋanda ndelikke, kukambauka abamwi akwalo kwakandigwasya. Mucikozyanyo, buzuba bumwi mebo amukwesu umwi mupati notwakali kuccovwa macinga kuunka kucilawo nkotwakali kuyookambaukila, twakabona musololi wacikombelo mpoonya ndakati: “Njiilya mpongo.” Mukwesu ngotwakali limwi wakaimika ncinga yakwe akundilomba kuti tukkale ansi. Mpoonya wakati: “Ino nguni wakakupa nguzu zyakubeteka bantu kuti nimpongo? Atukkomane buyo akupa bantu makani mabotu akulekela Jehova kuti akababeteke.” Mumyaka eeyo yakumatalikilo, ndakaiya zinji kujatikizya lukkomano luboola kwiinda mukupa.—Mt. 25:31-33; Mil. 20:35.

Mukwesu uumbi mupati wakandiyiisya kuti kutegwa tujane lukkomano mukupa, zimwi ziindi tweelede kuliyumya cakukkazika moyo. Mukaintu wakwe tanaakali kubayanda Bakamboni ba Jehova. Bumwi buzuba mukwesu ooyu wakanditamba kuŋanda yakwe kutegwa tukanwe tii. Bakaintu bakwe bakalinyemede kapati akaambo kakuti mukwesu ooyu wakainkide kuyookambauka mpoonya bakatalika kutufwusa masamba. Muciindi cakubanyemena bakaintu bakwe, wakabwezelela buyo masamba kumwi kaseka-seka akwaapilusya mwaakabede. Nokwakainda myaka iili mbwiibede, kukkazika moyo kwakwe kwakalumbulwa ciindi mukaintu wakwe naakabbapatizyigwa kuba Kamboni wa Jehova.

 Luyandisisyo lwangu lwakupa bantu bulangizi bwakumbele lwakazumanana kukomena, mpoonya mebo abamaama twakabbapatizyigwa ku Dover mu March 1940. Britain yakatalika kulwana cisi ca Germany mu September 1939 nondakajisi myaka iili 16. Mu June 1940, ndakalangilila kandiimvwi amulyango kumbele lyaŋanda yesu ciindi basikalumamba banji ibakali kweetezya nobakali kwiinda muzyoota zipati. Mbabakafwutuka mu Nkondo Yaku Dunkirk. Nondakabalanga, bakali kulibonya kuti tiibakajisi bulangizi, aboobo ndakali kuyanda kubaambila zya Bwami bwa Leza. Kumamanino aamwaka nguwenya uulya, bana German bakatalika kufwusa mabbomba mu Britain. Busiku bumwi abumwi, ndakali kulangilila ciindi ndeke zyankondo zyabasikalumamba bana German nozyakali kwiinda mubusena motwakali kukkala. Mabbomba akali kulila alimwi twakali kwaamvwa kaaloka, eeci cakali kutupa kuyoowa kapati. Twabuka buzuba butobela, twakali kujana kuti maanda manji anyonyoonwa. Ndakazumanana kuyeeya kuti Bwami bulikke mbobwakali kukonzya kundipa bulangizi bwakumbele.

Mwakali mu 1941 nondakatalika buumi ibwandipa kuba muntu uukkomene kapati. Ndakali kubeleka nkobakali kupanga mato mu Chatham kutegwa kumwi kandiiya mulimo ooyu, walo bantu banji ngobakali kunyomenena alimwi wakali kuvwolwa mali manji. Kwaciindi cilamfwu, babelesi ba Jehova bakalizyi kuti Banakristo tabeelede kulwanina cisi cimwi naa kulwana cisi cimbi. Kuzoosika mu 1941 twakatalika kuzyiba kuti tatweelede kubeleka mulimo uujatikizya kupanga zilwanyo zyankondo. (Joh. 18:36) Mbwaanga kkampani iyakali kupanga mato nkondakali kubeleka yakali kupanga mato aankondo, ndakasala kuti nduuleke mulimo ooyu ngondakali kubeleka kutegwa nditalike mulimo waciindi coonse. Kusaanguna ndakaambilwa kuyoobelekela ku Cirencester, idolopo libotu kapati ilili mumalundu.

Nondakaba amyaka iili 18 ndakaangwa kwamyezi iili 9 akaambo kakuti ndakakaka mulimo wabusikalumamba. Ndakayoowa kapati ciindi nobakandijalila ndelikke mukaanda kamuntolongo. Pele tiilyakalampa, basikugatela alimwi abasintolongo bakatalika kundibuzya ikaambo ncondakaangilwa, aboobo ndakakkomana kubapandulwida kujatikizya lusyomo lwangu.

Nondakaangununwa, ndakaambilwa kunoobeleka amukwesu Leonard Smith * kutegwa katukambaukila mumadolopo aaindene-indene aakali mucooko motwakali kukkala ku Kent. Kutalikila mu 1944, ndeke zyankondo ziteenzyegwi abantu iziinda ku 1000 izyakanyamwide mabbomba zyakali kuwida mu Kent. Twakali kukkala mwini mozyakali kwiinda ndeke akati kabusena bwaku Europe mbobakali kweendelezya basikalumamba bana Nazi alimwi a London. Mabbomba aayo aakali kuuluka akali kwiitwa kuti ma doodlebugs. Yakali nzila yakuyoosya bantu, nkaambo kuti wamvwa buyo kuti ndeke yacileka kulila, mbuli mbocakali kucitika kanji-kanji, twakali kuzyiba kuti kwainda buyo ciindi cisyoonto ndeke ilawa akubboloka. Twakali kusololela ciiyo ca Bbaibbele kumukwasyi umwi wabantu bosanwe.  Zimwi ziindi, twakali kukkala munsi aatebulu lyalubulo ilyakabambilidwe kubakwabilila ikuti naa ŋanda yawa. Boonse mumukwasyi ooyu mukuya kwaciindi bakabbapatizyigwa.

Noyakamana nkondo, ndakacita bupainiya kwamyaka yobilo kucooko ca Ireland nkocili kumusanza. Tiitwakazyi kuti cisi ca Ireland cakaliindene kapati aca England. Twakali kuunka kuŋanda aŋanda katuyaabulomba kwakoona, twakali kwaamba kuti tuli bamisyinali, alimwi twakali kwaabila mamagazini mumigwagwa. Kucita boobu bwakali “bufwuba-fwuba” nkaambo mubusena oobu bantu banji bakali kuzulilwa kucikombelo ca Katolika. Ciindi muntu umwi naakali kuyanda kutuuma, ndakatongookela mupulisa walo iwakandaambila kuti: “Ino mebo ndicite buti?” Tiitwakazyi pe kuti bapaizi bacikombelo mbebakajisi nguzu kapati. Bakali kutanda bantu milimo kuti naa baatambula mabbuku eesu, alimwi bakali kupa kuti tutandwe mumaanda motwakali koona.

Kalitanalampa twakazyiba kuti ciindi notwasika mucilawo cipya, cakali kabotu kuccovwa macinga akuyookambaukila kubusena ibuli kule abusena nkotwakali kukkala, ooko bantu nkobakajisi mupaizi uumbi. Kumamanino, twakali kukambaukila bantu ibakali afwaafwi. Ku Kilkenny, twakali kwiiya amusankwa umwi ziindi zyotatwe mumvwiki nokuba kuti bantu bakali kuyoowa mabbomba. Ndakali kukukkomanina kuyiisya kasimpe kamu Bbaibbele cakuti ndakasala kulembela kuyooyiisyigwa mulimo wabumisyinali kucikolo ca Watchtower Bible School of Gilead.

Notwakamana kwiiya kwamyezi yosanwe mu New York, swebo tone twakatumwa kuyoobelekela kunsumbu zisyoonto-syoonto zyamu Caribbean Sea. Mu November 1948, twakazwa mu New York akutanta bwato ibwakali kulampa mamita aali 18 ibutegwa Sibia. Cakali ciindi cakusaanguna mebo kweenda mulwizi, aboobo ndakalikkomene kapati. Umwi akati kesu, ba Gust Maki bakali bakapitawo bacibwene bamato mulwizi. Bakatuyiisya zintu zimwi ziyandika izijatikizya mbwaayenzyegwa mato mulwizi, mbuli kunyamuna masaili alimwi akwaaleta ansi, mboibelesyegwa kkampasi, ambokucitwa kuti kwaba guwo. Ba Gust bakabelesya luzyibo lwabo kweenzya bwato muguwo pati liyoosya kwamazuba aali 30 mane kusikila twakasika ku Bahamas.

Notwakamana kukambauka kwamyezi misyoonto munsumbu zisyoonto-syoonto zyamu Bahamas, twakatanta bwato kuunka kunsumbu zyaku Leeward azyaku Windward, nsumbu eezyi zitalikila ku Virgin Islands kufwaafwi a Puerto Rico kusikila kufwaafwi a Trinidad makkilomita aabalilwa ku 800. Kwamyaka yosanwe, kanji-kanji twakali kukambaukila munsumbu izyakali kulamfwu ooko ikwakanyina Bakamboni. Zimwi ziindi twakali kukkala kwansondo zili mbozibede katutakonzyi kutuma naa kutambula magwalo. Pele cakali kutukkomanisya kapati kwaambilizya Jwi lya Jehova akati kansumbu!—Jer. 31:10.

Kufwumbwa notwakali kwiima acito, bantu bamumunzi bakali kukkomana kapati akubungana acito kutegwa babone naa ndiswe bani. Bamwi bantu cakali ciindi cakusaanguna kubona bwato mbotwakali kweendela naa kubona mukuwa. Bantu ibakali kukkala munsumbu eezyi bakali bantu babotu myoyo ibakali kuyandisya makani aabukombi alimwi bakalilizyi kabotu Bbaibbele. Kanji-kanji bakali kutupa nswi zitete, makkotapela alimwi anyemu. Bwato bwesu busyoonto bwakajisi busena busyoonto bwakoona, bwakujikila, naa bwakuwasyila zisani pele twakali kukonzya kucita zintu eezyi.

Twakali kuzwa mubwato akuunka kumulundu akuswaya bantu buzuba boonse. Twakali kubaambila kuti kulaba makani aa Bbaibbele. Mpoonya kumangolezya twakali kulizya mulangu wamubwato. Cakali kukkomanisya kubona bantu bamumunzi kabasika. Malambe aabo akali kuboneka mbuli nyenyezi zimweka-mweka kunsi aamulundu. Zimwi ziindi bantu ibali 100 bakali  kusika, alimwi bakali kukkala mane kusikila kwasiya kababuzya mibuzyo. Bakali kukukkomanina kwiimba, aboobo twakali kutaipa nyimbo zya Bwami zimwi akubapa. Swebo tone twakali kusolekesya kusikila mpotugolela kwiimba nyimbo eezyi, bantu bakali kutusangana, bakali kwiimba munzila iimvwika kabotu kapati. Eelo kaka eezyi zyakali ziindi zikkomanisya!

Twamana kweendelezya ciiyo ca Bbaibbele, mbotwakali kwiiya limwi bamwi bakali kutuccilila kumukwasyi uutobela kutegwa bakajanike kuciiyo eeco alimwi. Nokuba kuti twakali kulonga akuunka kumbi kwainda mvwiki zili mbozibede, kanji-kanji twakali kulomba baabo ibakajisi luyandisisyo kapati kuti bazumanane kwiiya abeenzinyina kusikila twaakupiluka alimwi. Cakali kukkomanisya kapati kubona bamwi mbobakali kuubikkila maano mukuli wakwiiya abeenzinyina.

Mazuba aano, bunji bwansumbu eezyi masena aayebeka alimwi aakkomanisya ngobaswaya bantu banji, pele kaindi munsumbu eezyi kwakanyina zintu zinji izyakali kucitika, akali buyo masena aakajisi zizyiba, museenga kunkomwe yalwizi alimwi azisamu zyamakunka. Kanji-kanji twakali kweenda abwato masiku kuzwa kunsumbu iimwi kuya kunsumbu iimbi. Inswi zitegwa Dolphin zyakali kusobana kazitobelezya bwato, alimwi ncotwakali kukonzya kumvwa buyo, maanzi ciindi bwato nobwakali kweenda. Mumuni wamwezi mulwizi lutakwe mayuwe wakali kupa kuti lwizi kaluŋaima.

Nokwakainda myaka yosanwe katukambauka munsumbu eezyi, twakaunka ku Puerto Rico kutegwa tukacincanye bwato bwesu abwato bwakajisi mainjini. Notwakasika ku Puerto Rico, ndakaswaangana a Maxine Boyd, mucizyi mumisyinali weebeka, mpoonya ndakamuyanda. Wakali mukambausi musungu wamakani mabotu kuzwa kubwana. Mukuya kwaciindi, wakabeleka kali misyinali ku Dominican Republic kusikila ciindi naakatandwa mucisi eeci amfwulumende yaba Katolika mu 1950. Akaambo kakuti ndakali sikweenzya bwato, ndakajisi cipepa icakali kundizumizya kukkala mucisi ca Puerto Rico kwamwezi omwe buyo. Kakutanainda ciindi ndakeelede kuunka kunsumbu akuyookkala ooko kwamyaka iili mbwiibede. Aboobo ndakalyaambauzya mumoyo kuti: ‘Ronald, ikuti komuyanda musimbi ooyu weelede kubweza ntaamu cakufwambaana.’ Nokwakainda nsondo zyotatwe, ndakamusyaba, mpoonya nokwakainda nsondo zili cisambomwe twakakwatana. Mebo aba Maxine twakaambilwa kubelekela mu Puerto Rico katuli bamisyinali, aboobo taakwe nondakabutanta bwato bupya.

Mu 1956 twakatalika kuswaya mbungano mumulimo wabbazu. Bakwesu banji bakali bacete, pele twakali kukkomana kubaswaya. Mucikozyanyo, mumunzi wa Potala Pastillo, mwakali mikwasyi yobilo ya Bakamboni abana banji, alimwi ndakali kubalizizya muntolilo. Ndakabuzya musimbi umwi muniini utegwa Hilda ikuti naa wakali kuyanda kuunka kuyookambauka antoomwe andiswe. Wakati: “Ndilayanda, pele tandikonzyi kuunka nkaambo tandijisi mabbusu.” Twakamuulila mabbusu mpoonya wakatusangana kuyookambauka. Nokwakainda myaka iili mbwiibede, nkokuti mu 1972, ciindi mebo aba Maxine notwakali kuswaya Bbeteli yaku Brooklyn, mucizyi iwakazwide akumanizya Cikolo ca Gileadi wakatusikila. Wakali afwaafwi kunyamuka kuunka kucisi ca Ecuador nkwaakatumwa kuyoobelekela, wakati: “Sena mwandizyiba? Ndendime musimbi muniini iwakali kukkala ku Pastillo iwatakajisi mabbusu.” Wakali Hilda! Twakakkomana kapati cakuti yakatweenda misozi!

Mu 1960 twakaambilwa kuyoobelekela kumutabi waku Puerto Rico, maofesi akali muŋanda nsyoonto iyakajisi midadaada yobilo kuyamujulu mu Santurce, San Juan. Kumatalikilo, ba Lennart Johnson andime ndiswe twakali kubeleka milimo minji. Balo abakaintu babo mbebakali Bakamboni ba Jehova bakusaanguna mu Dominican Republic, alimwi bakasika mu Puerto Rico mu 1957. Mukuya kwaciindi, ba Maxine bakali kubeleka mulimo wakutuma mamagazini kubantu ibakalembela kuti kabatambula—mvwiki amvwiki bakali kubelekela amamagazini aainda ku 1000. Bakali kuukkomanina mulimo ooyu nkaambo bakali kuyeeya bantu boonse aabo ibakali kutambula cakulya cakumuuya.

Ndilaukkomanina kapati mulimo waku Bbeteli, nkaambo mulimo ooyu uujatikizya kupa bamwi. Nokuba boobo, ulijisi buyumuyumu. Mucikozyanyo, lyamuswaangano wamasi wakusaanguna mu Puerto Rico mu 1967, ndakalimvwa kuti mulimo wakandikkomenena kapati. Mukwesu Nathan Knorr, iwakali kusololela akati ka Bakamboni ba Jehova aciindi eeco, wakasika ku Puerto Rico. Wakayeeya kuti tiindakabikkide bubambe bwazyakweendela zyabamisyinali nokuba kuti bubambe oobo bwakaliko. Mpoonya wakandinyemena kapati akaambo kakuti wakandiyeeyela kuti tiindakali kuzyeendelezya kabotu zintu alimwi wakaamba kuti ndakamutyompya kapati. Tiindakayanda kukazyanya anguwe pe, pesi ndakalimvwa kuti taakwe naakandeendelezya kabotu, aboobo eeci cakandicisa kwaciindi cili mbocibede. Nokuba boobo, ciindi cakatobela mebo aba Maxine notwakamubona Mukwesu Knorr, wakatutamba kuŋanda yakwe akutujikila cakulya.

Notwakazwa ku Puerto Rico, twakali kuvwula kubaswaya bamukwasyi wangu ku England. Bataata taakwe nobakakatambula kasimpe ciindi mebo abamaama notwakaiya  kasimpe. Pele ciindi baambi ibakali kuzwa ku Bbeteli nobakali kuswaya, bamaama kanji-kanji bakali kubatambula muŋanda yesu. Bataata bakabona mbobakali kulicesya balangizi aaba ibakali kuzwa ku Bbeteli mukwiimpana abasololi bazikombelo ibakali kubasuluzya myaka yainda musyule. Mpoonya mu 1962, bataata bakabbapatizyigwa kuba Kamboni wa Jehova.

Bakaintu bangu mbondakali kuyandisya, ba Maxine, bakafwa mu 2011. Ndilangila kumbele kuyoobabona alimwi baakubusyigwa. Eelo kaka oobu mbulangizi bukkomanisya! Mumyaka iili 58 njotwakakkala antoomwe, mebo abakaintu bangu twakabona mweelwe wabantu ba Jehova mbowakali kuyaabuyungizyika mu Puerto Rico kuzwa kuli Bakamboni bali 650 kusikila ku 26,000! Mpoonya, mu 2013 mutabi waku Puerto Rico wakatalika kweendelezyegwa amutabi waku United States, mpoonya ndakaambilwa kuyoobelekela ku Wallkill, New York. Nondakakkala myaka iili 60 ansumbu, ndakalimvwa kuba muna Puerto Rico mbuli ka coquí, kacula kasyoonto ikazyibidwe kapati ku Puerto Rico ikakkala muzisamu ikalila kuti kko-kki, kko-kki kumangolezya. Pele cakasika ciindi cakuti ndizwe kubusena oobu.

Ndicikukkomanina kubelekela Leza a Bbeteli. Lino ndijisi myaka yakuzyalwa iinda ku 90, alimwi mbondili mweembezi wakumuuya, mulimo wangu ngwakuyumyayumya bamukwasyi wa Bbeteli. Ndakaambilwa kuti ndakaswaya kale bakwesu abacizyi ibainda ku 600 kuzwa ciindi nondakasika ku Wallkill. Bamwi ibaboola kundibona inga bayanda kubandika twaambo tubajatikizya naa mapenzi aamukwasyi. Bamwi inga balomba lulayo lujatikizya mbobakonzya kuzwidilila mumulimo wabo waa Bbeteli. Mpoonya bamwi ibakakwatana caino-ino inga balomba lulayo lukonzya kubagwasya kuzwidilila mucikwati cabo. Bamwi bakaambilwa kuyoobelekela kumasena aambi. Inga ndilabaswiilila boonse ibaboola kubandika andime, alimwi nokuyandika ndibaambila kuti: “‘Leza uyanda muntu uupa kumwi kakkomene.’ Aboobo, amuukkomanine mulimo wanu. Nkaambo mubelekela Jehova.”—2Kor. 9:7.

Ncomweelede kucita ikuti kamuyanda kukkomana a Bbeteli, ncencico ncomweelede kucita nomuli kubusena bumbi buyo: Mweelede kubikkila maano kuzyiba ikaambo ncouyandika kapati mulimo ngomubeleka. Milimo yoonse njotubeleka ku Bbeteli milimo iisetekene. Milimo eeyi igwasyilizya “muzike uusyomeka alimwi uucenjede” kuti kapa cakulya cakumuuya kubakwesu abacizyi munyika yoonse. (Mt. 24:45) Kufwumbwa nkotumubelekela Jehova, tulijisi coolwe cakumutembaula. Atuukkomanine mulimo ngwatupede kuti tubeleke, nkaambo “Leza uyanda muntu uupa kumwi kakkomene.”