1, 2. Nkaambo nzi ncotweelede kubayiisya bamwi kutegwa beelele kupegwa mikuli mumbunga?

KUKAMBAUKA makani mabotu aa Bwami ngomulimo mupati Jesu ngwaakali kucita. Nokuba boobo, wakajana ciindi cakuyiisya bamwi kuba beembezi alimwi abamayi. (Mt. 10:5-7) Nokuba kuti Filipo wakajisi bubi mumulimo wabukambausi, cakutadooneka wakagwasya bana bakwe basimbi botatwe kuba bantu bacibwene mukukambaukila bamwi kasimpe kamu Magwalo. (Mil. 21:8, 9) Ino nkaambo nzi kuyiisya kuli boobo ncokuyandika kapati mazuba aano?

² Mweelwe wabantu ibatambula makani mabotu nyika yoonse mboizulwa, uyaabuyaambele. Bapya ibatanabbapatizyigwa beelede kumvwisya kaambo ncociyandika kapati kuba aciiyo cabo beni ca Bbaibbele. Alimwi beelede kuyiisyigwa kukambaukila bamwi makani mabotu akubayiisya kasimpe bantu aabo. Mumbungano zyesu, bakwesu beelede kukulwaizyigwa kubeleka canguzu kutegwa beelele kubeleka kabali bakutausi alimwi abaalu. Kwiinda mukupa “malailile mabotu,” Banakristo basimide balakonzya kugwasya bapya kutegwa bayaambele kumuuya.—Tus. 4:2.

3, 4. (a) Ino mbuti Paulo mbwaakatondezya kuti kubala Magwalo kuliswaangene akuba basungu mumulimo wakukambauka? (b) Katutanakulwaizya basikwiiya besu kwiiya Bbaibbele lwabo beni, ino ncinzi swebo lwesu kutugama ncotweelede kuti katucita?

³ Ino nkaambo nzi kwiiya Magwalo tobeni ncociyandika kapati? Bwiinguzi bulajanika mumajwi mwaapostolo Paulo ngaakalembela Banakristonyina baku Kolose. Wakalemba kuti: “Swebo tatuleki pe kumupailila akumulombela kuti muzuzyigwe luzyibo lwini-lwini lwamakanze aa [Leza] mubusongo boonse akumvwisya zintu zyakumuuya, kutegwa kamweenda mbwayanda Jehova akumukkomanisya cakumaninina, nomuzumanana kuzyala micelo mumilimo mibotu iili yoonse akuyungizya luzyibo lwini-lwini lwa Leza.” (Kol. 1:9, 10) Ikuba aluzyibo lwini-lwini luli boobo, kwakali kuyoogwasya Banakristo baku Kolose ‘kweenda mbwayanda Jehova akumukkomanisya cakumaninina.’ Eeci cakali kuyoobagwasya kuzumanana “kuzyala micelo mumilimo mibotu iili yoonse,” kwaambisya mumulimo wakukambauka makani mabotu. Kutegwa abeleke munzila yeelede, mukombi wa Jehova weelede kutobela bubambe busitikide bwaciiyo ca Bbaibbele. Tweelede kubagwasya basikwiiya Bbaibbele kukamvwisya kaambo aaka.

⁴ Katutanabatondezya bamwi mbocigwasya ciiyo ca Bbaibbele cabo beni, swebo lwesu kutugama tweelede kwiibona mpindu iiliko yakucitila boobo. Mubwini, swebo lwesu tobeni tweelede kuba abubambe bubotu bwakwiiya Bbaibbele. Aboobo mulakonzya kulibuzya kuti: ‘Ikuti naa bamukamwini ŋanda baamba muzeezo wiimpene ancaamba Magwalo naa ikubuzya mibuzyo miyumu, sena ndilakonzya kupa bwiinguzi buyeeme aa Bbaibbele? Ciindi nondibala kujatikizya Jesu, Paulo, alimwi abamwi mbobakazumanana kuba basungu mumulimo wakukambauka, sena ndilazinzibala kuyeeya kujatikizya busungu bwabo mbobukonzya kundigwasya kubelekela Jehova cabusungu?’ Toonse tuyandika luzyibo alimwi alulayo kuzwa mu Jwi lya Leza. Ikuti naa twabaambila bamwi kujatikizya mbotwagwasyigwa abubambe bwaciiyo ca Bbaibbele cesu tobeni, tulakonzya kubakulwaizya kuti abalo bajane mpindu izili boobo kwiinda mukuba basikwiiya basungu ba Magwalo.

5. Amupe muzeezo kujatikizya mbomukonzya kubagwasya bapya kuba abubambe busitikide bwaciiyo ca Bbaibbele cabo beni.

⁵ Mulakonzya kubuzya kuti, ‘Ino inga ndamuyiisya buti sikwiiya wangu ikwiiya Bbaibbele lyoonse?’ Cakusaanguna mulakonzya kucita oobo kwiinda mukumutondezya mbwayelede kulibambila ciiyo ncomwiiya anguwe. Mulakonzya kumwaambila kuti kabala zibeela zyamakani aayungizyidwe mubbuku lya Ino Ncinzi Cini Bbaibbele Ncoliyiisya? alimwi akubala magwalo aatazubulwidwe. Amumugwasye kulibambila miswaangano kajisi makanze aakutola lubazu. Amumukulwaizya kubala Ngazi Yamulindizi alimwi a Sinsimuka! mpya iimwi aimwi. Ikuti naa LAIBBULALI YAA INTANETI ya Watchtower nkoili mumwaambo wakwe, inga mwamutondezya mbwakonzya kwiibelesya  kwiingula mibuzyo yamu Bbaibbele. Akaambo kakumugwasya munzila eeyo, kulalangilwa kuti sikwiiya Bbaibbele wanu unoocikkomanina ciiyo cakwe mwini ca Jwi lya Leza.

6. (a) Mbuti mbomukonzya kumugwasya sikwiiya wanu kuliyandisya Bbaibbele kuzwa ansi aamoyo? (b) Ino ncinzi sikwiiya Bbaibbele ncalangilwa kucita ikuti waayandisya Magwalo kuzwa ansi aamoyo?

⁶ Mubwini, tatweelede kusinikizya muntu uuli woonse kubala alimwi akwiiya Bbaibbele. Muciindi caboobo, atubelesye zibelesyo nzyotupedwe mumbunga ya Jehova kutegwa tubagwasye mbotwiiya limwi kuti bazumanane kuliyandisya Bbaibbele. Mukuya kwaciindi, sikwiiya uubikkila maano kapati ulakonzya kulimvwa mbwaakalimvwa sintembauzyo iwakaimba kuti: “Cilandibotela kuswena kuli Leza. Ndasala Mwami Singuzuzyoonse Jehova kuba mayubilo aangu.” (Int. 73:28) Muuya wa Jehova uyoomugwasya sikwiiya Bbaibbele ooyo imunkutwe alimwi uulumba.

7. Ino mbuti Jesu mbwaakabayiisya basikwaambilizya makani mabotu? (Amubone cifwanikiso icili kumatalikilo aacibalo.)

⁷ Mulugwalo lwa Matayo caandaano 10, tujana malailile Jesu ngaakapa baapostolo bakwe ibali 12. Muciindi cakwaambaamba buyo, wakapa twaambo tugaminide. ^[1] Baapostolo bakaswiilila ciindi Jesu naakali kubayiisya mbobakonzya kukambauka munzila iigwasya. Mpoonya nkamu eeyi yakaunka mubukambausi. Mbwaanga bakazibona nzila nzyaakali kubelesya Jesu, kalitanalampa abalo bakaba bamayi bacibwene ibakali kuyiisya kasimpe kamu Magwalo. (Mt. 11:1) Andiswe tulakonzya kubayiisya basikwiiya Bbaibbele besu kuba basikumwaya bamakani mabotu ibayiisya munzila iigwasya. Lino atulange-lange nzila zyobilo nzyotukonzya kubelesya kutegwa tubagwasye.

8, 9. (a) Ino mbuti Jesu mbwaakali kubasikila bantu mumulimo wakukambauka? (b) Ino mbuti mbotukonzya kubagwasya basikumwaya bapya kubandika abantu mbubwenya Jesu mbwaakali kucita?

⁸ Amubandike abantu. Kanji-kanji Jesu wakali kubandika abantu kujatikizya Bwami. Mucikozyanyo, wakajisi mubandi mubotu ciindi naakaambaula amukaintu amugoti wa Jakobo iwakali afwaafwi amunzi wa Sukari. (Joh. 4:5-30) Alimwi wakabandika a Matayo Levi, simutelo. Mabbuku aa Makani Mabotu aamba buyo makani masyoonto kujatikizya mubandi ooyo, pele Matayo wakakuzumina kutamba kwa Jesu kwakuti abe sikumutobela. Matayo alimwi abamwi bakamuswiilila Jesu kwaciindi cilamfwu naakali kwaambaula ciindi capobwe ilyakacitilwa muŋanda ya Matayo.—Mt. 9:9; Lk. 5:27-39.

⁹ Aciindi cimwi, Jesu wakabandika a Natanayeli munzila mbotu, nokuba kuti tanaakali kubabona munzila yeelede bantu ibakali kuzwa ku Nazareta. Nokuba boobo, Natanayeli wakagwasyigwa kucinca mbwaakali kuyeeya. Wakasala kwiiya zinji kujatikizya makani ngaakali kuyiisya Jesu, imwaalumi iwakali kuzwa ku Nazareta. (Joh. 1:46-51) Aboobo tulijisi twaambo tubotu ncotweelede kuyiisya basikumwaya bapya kubandika abantu munzila iili kabotu alimwi cakulikwaya. ^[2] Aabo mbotugwasya munzila eeyi banookkomana kubona bantu ibabombe myoyo mbobatambula makani mabotu akaambo kakubabikkila maano alimwi akubelesya majwi mabotu.

10-12. (a) Ino mbuti Jesu mbwaakagwasya baabo ibakali kutondezya luyandisisyo mumakani mabotu? (b) Mbuti mbotukonzya kubagwasya basikumwaya bapya kutegwa bayaambele muluzyibo kabali bamayi bakasimpe kamu Bbaibbele?

¹⁰ Amubabikkile maano bantu. Jesu wakajisi buyo ciindi cisyoonto cakubeleka mulimo wakwe. Nokuba boobo, wakajana ciindi cakubandika abantu ibakali kutondezya luyandisisyo mumakani mabotu. Mucikozyanyo, Jesu wakayiisya nkamu yabantu ciindi naakali mubwato. Aciindi eeco, camaleele wakapa kuti Petro ajate nswi zinji mpoonya wakamwaambila kuti: “Kuzwa lino unoozuba bantu baumi.” Ino majwi aa Jesu alimwi amilimo yakwe zyakabajatikizya buti bamwi? Petro abaabo mbaakali limwi, “bakatola mato aabo kucito akusiya zyoonse akumutobela [Jesu].”—Lk. 5:1-11.

¹¹ Nikodemo, iwakali cibeela ca Nkuta Mpati Yaba Juda, wakakkomana azintu nzyaakali  kuyiisya Jesu. Wakali kuyanda kwiiya zinji pele wakali kuyoowa bantu ncobakali kukonzya kwaamba ikuti bamubona kabandika a Jesu aabuleya. Jesu wakali muntu uunyoneka alimwi wakalilyaabide kubelesya ciindi cakwe kugwasya bamwi; wakaswaangana a Nikodemo masiku—bantu kabatababwene. (Joh. 3:1, 2) Ino nciiyo nzi ncotukonzya kwiiya kuzibalo eezyi? Mwana wa Leza wakali kujana ciindi cakuyumya lusyomo lwabamwi. Sena andiswe tatweelede kuba basungu kucita nyendo zyakupilukila alimwi akusololela ziiyo zya Bbaibbele kubantu ibajisi luyandisisyo?

¹² Basikumwaya bapya balalangilwa kuyaambele muluzyibo kabali bamayi bakasimpe kamu Bbaibbele ikuti naa katubeleka ambabo mumulimo wamumuunda. Tulakonzya kubagwasya kuti kabababikkila maano nobaba baabo ibatondezya luyandisisyo noluceya. Tulakonzya kubatamba basikumwaya bapya kuti tubeleke limwi ciindi notucita nyendo zyakupilukila alimwi anotusololela ziiyo zya Bbaibbele zyaaŋanda. Kwiinda mukubayiisya akubakulwaizya munzila eeyi, cakutadooneka basikumwaya ibatanasima balakonzya kwiiya kubabikkila maano bamwi alimwi akusololela ziiyo zya Bbaibbele zibagame. Alimwi bayakwiiya kutafwambaana kutyompwa pele kuba bantu bakkazika moyo alimwi ibazumanana mumulimo.—Gal. 5:22; amubone kabbokesi kakuti “Kuzumanana Kulayandika Kapati.”

13, 14. (a) Ino inga mwaamba nzi kujatikizya zikozyanyo zyamu Bbaibbele zyabaabo ibakali kulyaaba kapati kugwasya bamwi? (b) Ino muunzila nzi motukonzya kuyiisya basikumwaya bapya alimwi abana basyoonto ikutondezya kuti balababikkila maano basyominyina?

¹³ Zibalo zyamu Bbaibbele zitondezya coolwe ncotujisi icakutondezya “luyando lwabunyina” alimwi akugwasyanya. (Amubale 1 Petro 1:22; Luka 22:24-27.) Mwana wa Leza wakapa zintu zyoonse, kubikkilizya abuumi bwakwe ikugwasya bamwi. (Mt. 20:28) Dorika “wakali kucitila bamwi milimo mibotu minji alimwi akupa zipego zyaluse.” (Mil. 9:36, 39) Mariya, imucizyi waku Roma, ‘wakabeleka canguzu’ kugwasya baabo ibakali mumbungano. (Rom. 16:6) Ino mbuti mbotukonzya kugwasya bapya kubona mbociyandika kugwasya basyominyina?

¹⁴ Bakamboni basimide balakonzya kubatamba bapya kuti baunke limwi kuyoobona baciswa alimwi abaabo ibacembeede. Ikuti kaceelela, bazyali balakonzya kuunka abana babo ciindi nobaunka kuyooswaya bantu ibali boobo. Baalu balakonzya kubelekela antoomwe abamwi kubona kuti bacembeede balijisi zyakulya zyeelede akuti maanda aabo ali kabotu. Kwiinda mukucita boobo, bana basyoonto alimwi abapya mukasimpe balakonzya kwiiya kutondezya luzyalo kubantu bamwi. Ciindi naakali kukambauka, mwaalu umwi wakali kuleya kwakaindi kasyoonto kutegwa ababone Bakamboninyina ibakali kukkala mucilawo cakwe. Mukwesu umwi uucili mwana mwana kanji-kanji iwakali kubeleka amwaalu ooyu wakaiya kuti boonse ibali mumbungano beelede kulimvwa kuti balabikkilwa maano.—Rom. 12:10.

15. Ino nkaambo nzi ncociyandika kapati kuti baalu kababikkila maano kubona mbobayaambele bamaalumi mumbungano?

¹⁵ Mbwaanga Jehova ubelesya bamaalumi kuyiisya mumbungano, cilayandika kapati kuti bakwesu baiye kuba baambi ibacibwene. Nobaalu, sena inga mwamuswiilila mukutausi ciindi nalibambila makani aakwe? Kwiinda mukumugwasya, inga wacikonzya kuba mwiiyi wa Jwi lya Leza uucibwene.—Neh. 8:8. ^[3]

16, 17. (a) Ino mbuti mwaapostolo Paulo mbwaakamubikkila maano Timoteyo kutegwa ayaambele kumuuya? (b) Mbuti baalu mbobakonzya kubayiisya kabotu aabo kumbele ibayooba beembezi mumbungano?

¹⁶ Kuyandika beembezi banji mumbungano ya Bunakristo, alimwi aabo ibayoobeleka mulimo ooyu kumbele beelede kuzumanana kuyiisyigwa. Paulo wakatondezya kuyiisya ooko mbokweelede kucitwa ciindi naakaambila Timoteyo kuti: “Yebo mwanaangu, kozumanana kujana nguzu muluzyalo lwa Leza luli muli Kristo Jesu; alimwi izintu nzyookamvwa kulindime izyakasinizyigwa abakamboni banji, zintu eezyi kozibikka mumaanza aabantu  basyomeka, kutegwa abalo beelele ncobeni ikuyiisya bamwi.” (2Tim. 2:1, 2) Timoteyo wakaiya kwiinda mukubelekela antoomwe amwaapostolo, ooyo iwakali mwaalu. Mpoonya Timoteyo wakazitobela mumulimo wakwe alimwi amumbazu zimwi zyamulimo uusetekene nzila nzyaakali kubelesya Paulo.—2Tim. 3:10-12.

¹⁷ Paulo wakali kujana ciindi cakuyiisya Timoteyo. Wakali kweenda amukubusi ooyu. (Mil. 16:1-5) Baalu balakonzya kwiiya cikozyanyo ca Paulo kwiinda mukuunka antoomwe abakutausi ibeelela munyendo zyabweembezi ikuti kaceelela kucita oobo. Ciindi baalu nobacita boobo, bapa coolwe kubakwesu ibali boobo kutegwa balibonene baalu mbobayiisya, mbobatondezya lusyomo, mbobakkazika moyo, alimwi ambobatondezya luyando ndobeelede kuba andulo balangizi Banakristo. Nzila eeyi igwasya kuyiisya baabo kumbele ibayooba beembezi ‘babutanga bwa Leza.’—1Pet. 5:2.

18. Nkaambo nzi kuyiisya bamwi mumulimo wa Jehova ncokuyandika kapati?

¹⁸ Kuyiisya bamwi kulayandika kapati akaambo kamulimo uuyaabukomena alimwi azyoolwe ziyaabuvwula izyakubelekela Jehova. Nzila zyakuyiisya nzyaakapa Jesu alimwi a Paulo zicibeleka noliba lino. Jehova uyanda kuti babelesi bakwe bamazuba aano bayiisyigwe kabotu kubeleka milimo yabo yakumuuya. Leza watupa coolwe cakugwasya baabo ibatanaba aluzyibo lunji kuti baiye mbobakonzya kubeleka milimo iiyandika mumbungano. Mbwaanga zintu ziyaabwiindila kubija munyika akuti zyoolwe zyakukambauka ziyaabuvwula, ikuyiisya ooko kulayandika kapati alimwi kulibindide kapati.

19. Ino nkaambo nzi ncotweelede kusinizya kuti kusoleka kwesu kwakuyiisya bamwi mumulimo wa Jehova kuyoozwidilila?

¹⁹ Bwini mbwakuti, kuyiisya bantu kutola ciindi alimwi kuyanda kubeleka canguzu. Pele Jehova a Mwanaakwe ngwayandisya banootugwasya alimwi akutupa busongo kutegwa tucikonzya kuyiisya bamwi. Tuyookkomana kubona kuti aabo mbotugwasya balazumanana ‘kubeleka canguzu akulitakata.’ (1Tim. 4:10) Andiswe lwesu kutugama atuzumanane kuyaambele kumuuya notubelekela Jehova mulimo uusetekene.