1, 2. (a) Nkaambo nzi ncocikonzyeka kusama buntu bupya? (b) Ino nzibeela nzi zyabuntu bupya zilembedwe kulugwalo lwa Bakolose 3:10-14?

“BUNTU bupya.” Mabala aaya ajanika ziindi zyobilo mu Bbaibbele lya Busanduluzi Bwanyika Mpya. (Ef. 4:24; Kol. 3:10) Aamba buntu “ibwakalengwa kweelana akuyanda kwa Leza.” Ikuba abuntu bupya oobo ncintu cikonzyeka kulindiswe. Nkaambo nzi ncotukonzya kwaamba boobo? Nkaambo kakuti Jehova wakalenga bantu mucinkonzya cakwe aboobo wakapa kuti kacikonzyeka kulindiswe kutondezya bube bwakwe ibutaliboteli kapati.—Matl. 1:26, 27; Ef. 5:1.

² Inzya, akaambo kakutalondoka nkotwakakona kubazyali besu bakusaanguna, tulalombozya zintu zibyaabi. Alimwi ambweni twakanyonganizyigwa kapati akaambo kabukkale motwakakomenena. Nokuba boobo, akaambo kaluse lwa Jehova, tulakonzya kugwasyigwa akuba bantu mbakkomanina. Kutegwa tucikonzye kusika ambaakani eeyo, tulalanga-langa zibeela ziindene-indene zyabuntu bupya eezyo mwaapostolo Paulo nzyaakasololelwa kuti alembe. (Amubale Bakolose 3:10-14.) Alimwi tulalanga-langa mbotukonzya kutondezya bube oobu mumulimo wesu wakukambauka.

3. Ino mbube nzi bumwi buyandika kapati bwabuntu bupya?

³ Naamana kutukulwaizya kusama buntu bupya, Paulo wazumanana kupandulula bube bwakutasalulula kuti mbube buyandika kapati bwabuntu bupya. Waamba kuti: “Kunyina mu Giriki, naba mu Juda, nobuba bupalule naa kutapalulwa, muzwamasi, mu Sikuti, muzike naa muntu waangulukide.” * Mumbungano, ino nkaambo nzi ncokuteelede kuba kwaandaana akaambo kamubala, cisi naa bukkale? Nkaambo basikutobela Kristo bakasimpe ‘boonse mbamwi.’—Kol. 3:11; Gal. 3:28.

4. (a) Ino babelesi ba Jehova beelede kubeendelezya buti bantu bamwi? (b) Ino mbukkale nzi ibukonzya kupa kuti cikatazye kuba alukamantano lwa Bunakristo?

⁴ Aabo ibakasama buntu bupya beendelezya basyominyina alimwi abantu bakunze munzila yabulemu, tacikwe makani abukkale naa mubala wabo. (Rom. 2:11) Eeci cilakonzya kukatazya kapati mumasena aamwi aamunyika. Mucikozyanyo, kucisi caku South Africa Bakamboni banji bacikkala mumasena oomo bantu mobakaandaanizyidwe akaambo kamubala wabo, kufwumbwa naa muumasena aasumpukide, makkomponi aabantu basiya, naa masena aamwi buyo oomo bantu baindene mubala mobakali kukkala. Aboobo kutegwa bakwesu bakulwaizyigwe ‘kujalula myoyo yabo,’ mu October 2013 Kabunga Keendelezya kakazumizya bubambe bwaalubazu kutegwa bagwasye bakwesu kuzyibana kabotu. (2Kor. 6:13.) Ino eeci cakali kubikkilizya nzi?

5, 6. (a) Kutegwa lukamantano luzumanane akati kabantu ba Leza mucisi cimwi, ino mbubambe nzi ibwakabikkwa? (Amubone cifwanikiso icili kumatalikilo aacibalo.) (b) Ino mbubotu nzi ibwakaba?

⁵ Kwakabikkwa bubambe bwakuti mbungano zyobilo izibelesya myaambo yiindene naa zyamubala wiindene kuti zimwi ziindi kazibelekela antoomwe mu Mujibelo a Munsondo. Bakwesu abacizyi mumbungano zyobilo eezyo bakabeleka antoomwe mubukambausi, bakaswaangana kumiswaangano antoomwe alimwi bakakkomana kusamausyanya kumaanda aabo. Mbungano zinji zyakatola lubazu mububambe oobu alimwi mutabi wakatambula malipooti mabotu kapati, mane buya akubantu bakunze. Mucikozyanyo, musololi umwi wacikombelo wakaamba boobu, “Tandili Kamboni pe, pele ndiyanda buyo kwaamba kuti mulimo wakukambauka mulaucita cabulondo kapati alimwi mulikamantene nokuba kuti muliindene mubala.” Ino bubambe oobu bwakabajatikizya buti Bakamboni kubagama?

⁶ Kumatalikilo, mucizyi umwi iwaambaula mwaambo waci Xhosa wazina lya Noma tanaakaangulukide kutamba bakwesu kuzwa kumbungano iibelesya mwaambo wa Chingisi kuŋanda yakwe nsyoonto kapati. Naakamana kutola lubazu mubukambausi antoomwe a Bakamboni bakuwa, alimwi akusamausyigwa mumaanda aabo, wakagambwa akwaamba kuti, “Anu mbantu buyo mbubwenya mbuli ndiswe!” Aboobo nocakasika ciindi cakuti mbungano yabo yaci Xhosa isamausye mbungano iibelesya mwaambo wa Chingisi, wakajika cakulya akubatamba bakwesu. Akati kabakwesu aabo, kwakali amwaalu mukuwa. Mucizyi Noma wakati, “Ndakakkomana kapati kubona kuti wakalilyaabide kukkala aakkileti lyacipulasitiki.” Akaambo kakuti bubambe oobu bwazumanana, bakwesu abacizyi banji bapanga zilongwe zipya alimwi bakanzide kuzumanana kujalula myoyo mukuyanzana kwabo.

7. Nkaambo nzi ncociyandika kapati kuzumanana kweetelelana?

⁷ Tuyoozumanana kusunkwa mane kusikila nyika ya Saatani ikamane. Tujisi mapenzi mbuli kubula milimo, malwazi mapati, kupenzyegwa, ntenda zilicitikila, kusweekelwa zintu akaambo kabugwebenga, naa mapenzi aambi. Kutegwa tugwasyanye mumapenzi eesu naa buyumuyumu bumbi, tweelede kufwidilana lweetelelo lwini-lwini. Kuba amoyo walubomba kuyootukulwaizya kucita milimo yaluzyalo. (Ef. 4:32) Zibeela eezyi  zyabube bwabuntu bupya ziyootugwasya kwiiya Leza alimwi akuba bantu ibaumbulizya bamwi.—2Kor. 1:3, 4.

8. Ino mbubotu nzi bukonzya kuba ikuti katutondezya lweetelelo alimwi aluzyalo kubantu boonse mumbungano? Amupe cikozyanyo.

⁸ Mbuti mbotukonzya kutondezya kuti tulababikkila maano kapati bamuzwakule naa aabo bapengede mumbungano yesu? Tweelede kumvwana abantu ibali boobu alimwi akubapa kulimvwa kuti balayandika kapati mumbungano yesu. (1Kor. 12:22, 25) Amubone icakacitikila ba Dannykarl balo ibakalonga kuzwa ku Philippines kuya ku Japan. Kumulimo nkobakali kubelekela, bantu tiibakali kubalanganya mbuli mbobakali kulanganizyigwa babelesi bamwi bamucisi eeci. Kumane bakaunka kumuswaangano wa Bakamboni ba Jehova. Ba Dannykarl bakaamba kuti, “Bunji bwabantu ibakali kumuswaangano ooyu bakali bana Japan, nokuba boobo bakanditambula camaanza obilo mbuli kuti mbalongwe bangu mbotwakazyibene kuzwa kaindi.” Bakazumanana kulubona luzyalo ndobakali kutondezyegwa, calo cakabagwasya kuti bayaambele kumuuya. Mukuya kwaciindi, bakabbapatizyigwa, alimwi mazuba aano mbaalu. Baalunyina babona ba Dannykarl abakaintu babo ba Jennifer kuti ncileleko kuba ambabo mumbungano. Mboobu mbobaamba baalu kujatikizya mbabo, “Kabali bapainiya, bapona buumi buuba-uba alimwi bapa cikozyanyo cibotu mumakani aakubikka Bwami mubusena bwakusaanguna mubuumi bwabo.”—Lk. 12:31.

9, 10. Amupe zikozyanyo izitondezya zilongezyo ziboola akaambo kakutondezya lweetelelo mumulimo wakukambauka.

⁹ Ciindi notukambaukila bamwi mulumbe wa Bwami, tuba acoolwe cibotu kapati cakucitila “bantu boonse milimo mibotu.” (Gal. 6:10) Akaambo kalweetelelo ndobajisi kuli bamuzwakule, Bakamboni banji balasolekesya kwiiya mwaambo mupya. (1Kor. 9:23) Kucita boobo kwaleta zilongezyo zinji. Mucikozyanyo, mucizyi umwi mupainiya kucisi ca Australia wazina lya Tiffany wakaiya mwaambo waci Swahili kutegwa agwasyilizye mbungano iibelesya mwaambo waci Swahili mudolopo lya Brisbane. Nokuba kuti kwiiya mwaambo ooyu cakali ciyumu kuli ba Tiffany, bajana zilongezyo zinji mubuumi bwabo. Aboobo bakati: “Ikuti kamuyanda mulimo wanu wamumuunda kuti kaukkomanisya, amukasole kuyoobelekela mumbungano iibelesya mwaambo wakucisi cimbi. Cili buyo mbuli kuti mwaunka kubusena bumbi pesi kamuli mumwenya mubusena momukkala. Mulakonzya kujana lukkomano mubunyina bwesu bwanyika yoonse alimwi akulibonena ameso lukamantano lugambya.”

¹⁰ Alimwi amulange-lange cikozyanyo camukwasyi umwi ku Japan. Mwanaabo musimbi wazina lya Sakiko uluula kuti: “Kanji-kanji mumyaka yakuma 1990, twakali kujana bantu bazwa kucisi ca Brazil notwakali mumulimo wakukambauka. Ciindi notwakali kubatondezya magwalo mu Bbaibbele lyabo lyaci Portuguese, magwalo  mbuli Ciyubunuzyo 21:3, 4 naa Intembauzyo 37:10, 11, 29, bakali kuswiililisya alimwi zimwi ziindi mane buya misozi yakali kweenda.” Pele lweetelelo ilwakali kutondezyegwa amukwasyi ooyu tiilwakagolela buyo waawo pe. Sakiko wakati: “Notwakabona nzala yakumuuya njobakajisi, twakatalika kwiiya ci Portuguese mbuli mukwasyi.” Mukuya kwaciindi, mukwasyi ooyu wakagwasya mukutalisya mbungano iyakali kubelesya mwaambo waci Portuguese. Mumyaka yakatobela, mukwasyi ooyu wakagwasya bantu banji bamuzwakule kuti babe babelesi ba Jehova. Sakiko wakayungizya kuti, “Twakabeleka canguzu kutegwa twiiye ci Portuguese, pele zilongezyo nzyotwakajana zilainda aakusolekesya kuli koonse nkotwakacita. Tulamulumba kapati Jehova akaambo kazilongezyo eezyi.”—Amubale Milimo 10:34, 35.

11, 12. (a) Ino nkaambo nzi ikuzilanga kabotu zintu kujatikizya kaambo ncotusamina buntu bupya ncokuyandika kapati? (b) Ino ncinzi ciyootugwasya kuzumanana kulicesya?

¹¹ Makanze eesu aakusama buntu bupya ayelede kuba aakulemeka Jehova, ikutali kuyanda kulumbaizyigwa abantu. Mutalubi kuti nociba cilenge cimwi camuuya calo icakalondokede aciindi cimwi cakabisya akaambo kakulekela kuti muuya wakulisumpula ukomene mulincico. (Amweezyanisye Ezekieli 28:17.) Eelo kaka cilainda kubayumina bantu batalondokede kutantamuka muuya wakulisumpula! Nokuba boobo, cilakonzyeka kulisamika kulicesya. Ino ncinzi cikonzya kutugwasya kucita boobo?

¹² Kutegwa tuzumanane kulicesya, lyoonse tweelede kujana ciindi cakuzinzibala kuyeeya nzyotubala mu Jwi lya Leza. (Dt. 17:18-20) Tweelede kuyeeyesya kwaambisya anjiisyo zya Jesu alimwi acikozyanyo cakwe citaliboteli camilimo yakulicesya njaakacita. (Mt. 20:28) Mane buya Jesu wakasanzya maulu aabaapostolo bakwe. (Joh. 13:12-17) Andiswe tweelede kuupailila cakwiinduluka-induluka muuya wa Leza kutegwa utugwasye kulwana kampenda kakulimvwa kuti tulabainda bamwi.—Gal. 6:3, 4; Flp. 2:3.

13. Nzilongezyo nzi ziboola akaambo kakulicesya?

¹³ Amubale Tusimpi 22:4. Kulicesya kulayandika kubakombi boonse bakasimpe alimwi kuleta zilongezyo zinji. Kulicesya kuyootugwasya kusumpula luumuno alimwi alukamantano mumbungano. Kuyungizya waawo, ikuba abube oobu bwakulicesya alimwi akusungwaala kubutondezya kuyootupa kutambula zilongezyo ziboola akaambo kaluzyalo lwa Leza. Mwaapostolo Petro wakaamba kuti: “Nyoonse amulicesye kuli umwi aumwi, nkaambo Leza ulabakazya ibalisumpula, pele ulabafwida luzyalo aabo ibalicesya.”—1Pet. 5:5.

14. Nguni wiinda kutondezya bube bwakubomba moyo alimwi akukkazika moyo?

¹⁴ Munyika mazuba aano, babombe myoyo alimwi abaabo ibakkazika myoyo kanji-kanji babonwa kuti balikompeme. Kuyeeya kuli boobo kuliimpene kapati akasimpe. Bube oobu butaliboteli buzwa kuli Singuzuzyoonse iwakalenga bubumbo. Jehova Leza nguuyinda kutondezya bube bwakubomba moyo alimwi akukkazika moyo. (2Pet. 3:9) Amubone buyo mbwaakaingula kwiinda mubangelo bakwe ibakali kumwiiminina ciindi naakabuzyigwa a Abrahamu alimwi a Loti. (Matl. 18:22-33; 19:18-21) Kuyungizya waawo, Jehova wakazumanana kucikkazikila moyo cisi icakazangide ca Israyeli kwamyaka iili 1,500.—Ezk. 33:11.

15. Ino ncikozyanyo nzi Jesu ncaakapa cakutondezya kubomba moyo alimwi akukkazika moyo?

¹⁵ Jesu wakali “mubombe moyo.” (Mt. 11:29) Wakatondezya kukkazika moyo kapati ciindi basikumutobela nobakali kulezya. Mumulimo wakwe woonse naakali anyika, Jesu wakaliyumya kukazyigwa abasololi babukombi. Nokuba boobo, wakatondezya kubomba moyo alimwi akukkazika moyo mane kusikila naakajaigwa calunya. Kamvwide kucisa kutaambiki aacisamu cakupenzyezya, Jesu wakapaila kuli Bausyi kulomba kuti  babalekelele aabo ibakali kuyoomujaya nkaambo wakati, “tabazyi ncobacita.” (Lk. 23:34) Eelo kaka taciliboteli cikozyanyo cakubomba moyo alimwi akukkazika moyo mubukkale bukatazya kapati alimwi butyompya!—Amubale 1 Petro 2:21-23.

16. Ino muunzila nzi zigaminide motukonzya kutondezya kubomba moyo alimwi akukkazika moyo?

¹⁶ Mbuti mbotukonzya kutondezya kubomba moyo alimwi akukkazika moyo? Paulo wakaamba nzila yomwe ciindi naakalembela basyominyina kuti: “Amuzumanane kweengelelana akulekelelana camoyo woonse nokuba kuti umwi kajisi kaambo kakutongooka mweenzinyina. Mbubonya Jehova mbwaakamulekelela camoyo woonse, andinywe mweelede kucita mbubonya oobo.” (Kol. 3:13) Masimpe, kuyandika kubomba moyo alimwi akukkazika moyo kutegwa twaatobele malailile aaya. Pele ikuti katulekelela bamwi, nkokuti tukulwaizya muuya walukamantano mumbungano.

17. Nkaambo nzi kubomba moyo alimwi akukkazika moyo ncoziyandika kapati?

¹⁷ Kusama kubomba moyo alimwi akukkazika moyo tacili cintu Munakristo ncakonzya kusala kucita naa kutacita. Ncintu ciyandika kapati kutegwa tukafwutuke. (Mt. 5:5; Jak. 1:21) Alimwi cipati kwiinda zyoonse ncakuti, kwiinda mukutondezya bube oobu, tulemeka Jehova alimwi akugwasya bamwi kutobela lulayo lwamu Bbaibbele.—Gal. 6:1; 2Tim. 2:24, 25.

18. Ino luyando luswaangene buti akutasalulula?

¹⁸ Bube boonse mbotwabandika kale buliswaangene kapati aluyando. Mucikozyanyo, sikwiiya Jakobo wakabapa lulayo Banakristonyina akaambo kakubikkila buyo maano kubavwubi ikutali bacete. Wakaamba kuti micito iili boobo ityola mulawo wamwami wakuti: “Weelede kuyanda simukobonyoko mbubonya mbuli mboliyanda omwini.” Kumane wakayungizya kuti: “Ikuti kamuzumanana kusalululana, mucita cibi.” (Jak. 2:8, 9) Mukwiimpana aceeco, luyando luyootupa kweeleba cilengwa cakusampaula bamwi akaambo kalwiiyo, mubala naa bukkale bwabo. Masimpe, kutasalulula kweelede kulibonya lyoonse, kutali buyo muziindi. Bube oobu bweelede kuba cibeela cabuumi mbotupona.

19. Nkaambo nzi ncociyandika kapati kulisamika luyando?

¹⁹ Luyando “lulakkazika moyo alimwi lulaaluzyalo” alimwi “talulisumpuli.” (1Kor. 13:4) Masimpe, kuyandika kukkazika moyo, kuba aluzyalo alimwi akulicesya kutegwa tuzumanane kwaambila bantu mulumbe wa Bwami. (Mt. 28:19) Bube mbubwenya oobu bupa kuti cuube-ube kumvwana abakwesu alimwi abacizyi boonse mumbungano. Ino mbubotu nzi buboola akaambo kakutondezya luyando luli boobu? Cipa kuti kube mbungano zikamantene izilemeka Jehova alimwi akukwelelezya bapya kuti batalike kuyanzana ambungano. Cakweelela, majwi aamamanino mubupanduluzi mbolipa Bbaibbele kujatikizya buntu bupya aamba kasimpe aaka kayandika kapati kakuti: “Kunze lyazintu zyoonse eezyi, amulisamike luyando, nkaambo ncecaanzyo calukamantano cilondokede.”—Kol. 3:14.

20. (a) Ino mibuzyo nzi njotweelede kulibuzya, alimwi nkaambo nzi? (b) Ino tulangila nzi kumbele?

²⁰ Umwi aumwi wesu weelede kulibuzya kuti, ‘Ino ncinzi acimbi ncondikonzya kucita kutegwa ndibusamunune akubulekela limwi buntu bwakaindi?’ Tweelede kupaila cakusinizya kuti Leza atugwasye alimwi tweelede kubeleka canguzu kutegwa tubuzunde bube naa bukkale ibukonzya kutulesya kuyookona Bwami bwa Leza. (Gal. 5:19-21) Kuyungizya waawo, tweelede kulibuzya kuti, ‘Sena ndilazumanana kubukulusya mizeezo iindeendelezya lyoonse?’ (Ef. 4:23, 24) Kusama buntu bupya akuzumanana katubusamide ncintu ncobeelede kuzumanana kucita Banakristo boonse kusikila tukakonzye kucita oobo cakuzulila. Amweezyeezye mbobuyoobota buumi ciindi bantu boonse mbotuzyi nobayoolondoka akusama buntu bupya!