Makani aa Matayo kujatikizya zintu zyakacitika ciindi Jesu naakazyalwa alimwi abuumi bwakwe naakacili muniini aliimpene ayaayo ngaakalemba Luka akaambo kakuti nzyobakalemba balembi ba Makani Mabotu aaba bakali kuzibona mumbazu ziindene-iindene.

Makani ngaakalemba Matayo ayeeme kapati azintu izyakali kujatikizya Josefa. Atwaambila Josefa mbwaakalimvwa ciindi naakamvwa kuti Mariya ulaada, ciloto ncaakalota oomo mungelo mwaakali kupandulula kumita kwa Mariya alimwi ambwaakaazumina makani ngaakaamba mungelo. (Mt. 1:19-25) Alimwi Matayo ulapandulula kujatikizya ciloto ca Josefa oomo mungelo mwaakamukulwaizya kuti atijile ku Egepita antoomwe amukwasyi wakwe, ciloto oomo mwaakaambilwa kuti apiluke ku Israyeli alimwi akusala kwakwe kwakuti akakkale amukwasyi wakwe mu Nazareta. (Mt. 2:13, 14, 19-23) Kumatalikilo aazyaandaano zya Makani Mabotu aa Matayo, izina lya Josefa lilaambwa ziindi zili lusele kakuli izina lya Mariya lyaambidwe buyo ziindi zyone.

Kulubazu lumwi, makani aa Luka aamba kapati kujatikizya Mariya. Abikkilizya kuswaigwa kwa Mariya amungelo uutegwa Gabriyeli, kuswaya kwakwe kumubbululu wakwe Elizabeta alimwi amajwi aa Mariya aakutembaula Jehova. (Lk. 1:26-56) Luka alimwi ulaamba amajwi Simeoni ngaakaambila Mariya kujatikizya kupenga nkwaakali kuyoopenga Jesu kumbele. Nomuba mumakani aajatikizya mukwasyi nowakaunka kutempele ciindi Jesu naakajisi myaka iili 12, Luka wakazubulula majwi aa Mariya ikutali aa Josefa pe. Luka uyungizya kuti Mariya wakajatikizyigwa kapati azintu zyoonse eezyi izyakali kucitika. (Lk. 2:19, 34, 35, 48, 51) Muzyaandaano zyobilo zyakusaanguna zya Makani Mabotu aa Luka, izina lya Mariya lilaambwa ziindi zili 12, pele lya Josefa lyaambidwe buyo ziindi zyotatwe. Aboobo Matayo upandulula kapati izyakali kumupa kulibilika Josefa alimwi azintu nzyaakali kucita kakuli Luka waamba kapati kujatikizya lubazu lwa Mariya alimwi azintu zyakamucitikila.

Kuyungizya waawo, mazyalani ngobakalemba balembi ba Makani Mabotu aaba aalo aliindene. Matayo ubikkila kapati maano kuzyalani lya Josefa alimwi utondezya kuti Jesu imwana wakujana wa Josefa ngowakali sikulya zina wamumulawo wabwami bwa Davida. Ino nkaambo nzi? Nkaambo Josefa wakali walunyungu lwa Mwami Davida kwiinda muzyalani lyamwana wa Davida Solomoni. (Mt. 1:6, 16) Kulubazu lumbi, Luka ubikkila kapati maano kuzyalani lya Mariya alimwi utondezya kuti Jesu ngowakali sikulya zina weelede, kucuuno cabwami ca Davida kweelana “amubili wanyama.” (Rom. 1:3) Ino nkaambo nzi? Nkaambo Mariya wakali walunyungu lwa Mwami Davida kwiinda muzyalani lyamwana wa Davida Natani. (Lk. 3:31) Pele ino nkaambo nzi Luka ncaatakamulemba Mariya mumulongo wamazyalani kuti mwana wa Heli? Nkaambo mulongo wamazyalani kanji-kanji wakali kutobelwa kwiinda mubaalumi. Aboobo ciindi Luka naakaamba Josefa akumwaamba kuti mwana wa Heli, cakali kupandulula kuti Josefa wakali mukwe wa Heli.—Lk. 3:23.

Mulongo wamazyalani iwakalembwa a Matayo alimwi a Luka ulatondezya caantangalala kuti Jesu ngowakali Mesiya wakasinsimwa. Bwini mbwakuti, nobaba ba Farisi aba Saduki tiibakali kukonzya kwaakazya makani aaya aajatikizya izyalani lya Jesu nkaambo aakalizyibidwe kapati. Mazuba aano, makani aa Matayo alimwi a Luka kujatikizya mazyalani acili cibeela cantalisyo yalusyomo lwesu alimwi mbumboni bwakuti ncobeni zisyomezyo zya Leza ziyakuzuzikizyigwa.