MAKANI EESU AAKAINDI
“Ino Ndilili Notuyooba Amuswaangano Uumbi Alimwi?”
KWAKALI kumamanino aamwezi wa November mu 1932 mudolopo lya Mexico. Kwakaindide buyo nsondo yomwe kuzwa malobboti aakusaanguna naakabikkwa mudolopo eeli mwalo imuli bantu banji bainda ku 1 miliyoni. Aciindi eeci, cilengwa cakwiimika myootokala amaanza mumigwagwa lino cakalimanide. Basimubweza twaambo bamudolopo eeli bakaluunkide kubusena ikwakeelede kucitilwa muswaangano mupati munsondo eeyi. Kabalibambilide amakkamela aabo, bakaunka kucitisyini cacitima kuyoolindila mweenzu uuyandika kapati, nkokuti ba Joseph F. Rutherford, mweendelezi wa Watch Tower Society. Bakamboni bakubusena oobu abalo bakaliko kutegwa bamutambule Mukwesu Rutherford, walo iwakali kuboola kuzoojanika kumuswaangano wacisi coonse wamazuba otatwe.
Magazini iitegwa The Golden Age yakaamba kuti, “Cakutadooneka muswaangano ooyu unooyeeyegwa lyoonse kuti wakali muswaangano uuyandika kapati mukumwaya Kasimpe mucisi ca Mexico.” Pele ino ncinzi cakapa kuti muswaangano ooyu ube muswaangano uutalubiki kwalo ikwakajanika buyo bantu bali 150?
Kautanacitika muswaangano ooyu, mulumbe wa Bwami tiiwakajisi mpuwo mucisi ca Mexico. Kuzwa mu 1919, miswaangano yabbazu yakali kucitwa, pele mweelwe wambungano wakali kuyaabuyaansi mumyaka yakatobela. Kuyaambele kwakali kulangilwa kuba ciindi nowakajalulwa mutabi mudolopo lya Mexico mu 1929. Nokuba boobo, kwakali buyumuyumu. Ciindi nobakalaililwa kuleka kucita makwebo kumwi kabakambauka, mupainiya umwi wakanyema akucileka kuba kamboni mpoonya wakatalisya kabunga kakwe kakwiiya Bbaibbele. Aciindi nciconya eeco, mulangizi wamutabi wakacita zintu ziteendelani amagwalo, aboobo kwakabikkwa mulangizi uumbi. Bakamboni basyomeka mucisi ca Mexico bakali kuyandika kuyumya-yumya kumuuya.
Mukuswaya kwakwe, Mukwesu Rutherford wakabayumya-yumya bakwesu basyomeka aaba kwiinda mukupa makani obilo aakulwaizya amuswaangano wacooko alimwi amakani osanwe aakamwaigwa awailesi. Eeci cakali ciindi cakusaanguna maanda aasikapepele aamucisi ca Mexico ikumwaya makani mabotu mucisi coonse. Nowakamana muswaangano wacooko, mulangizi wamutabi mupya wakabikka bubambe bwakubeleka mulimo, alimwi mbwaanga bakayumizyigwa, bakamboni basungu bakazumanana kukambauka alimwi Jehova wakabalongezya.
Muswaangano wacooko wamu 1941, mudolopo lipati lya Mexico
Mwaka wakatobela kwakacitika miswaangano yacooko yobilo ikutali buyo omwe pe. Muswaangano umwi wakacitilwa mudolopo lya Veracruz ilili mumbali aankomwe mpoonya umbi wakacitilwa mudolopo lipati lya Mexico. Mpindu yakatalika kulibonya akaambo kakubeleka canguzu mumulimo wakukambauka. Mu 1931 kwakali basikumwaya ibali 82. Nokwakainda myaka iili kkumi, kwakali basikumwaya basika ku 820. Bantu basika ku 1,000 bakaboola kudolopo lipati lyaku Mexico kumuswaangano wamu 1941.
“KUNJILAUKA MUMIGWAGWA YOONSE”
Mu 1943, Bakamboni ba Jehova bakali kusama zikwankwani izyakalembedwe kumbele akusyule ikwaambilizya muswaangaano iwakajisi mutwe wakuti “Free Nation’s” walo iwakacitwa mumadolopo aali 12 mucisi ca Mexico. * Nzila yakwaambilizya eeyi yakali kubelesyegwa a Bakamboni ba Jehova kuzwa mu 1936.
Magazini yamu 1944 iitondezya bantu basamide zikwankwani mudolopo lipati lya Mexico
Kayaamba kujatikizya kuzwidilila kwanzila yakubelesya zikwankwani zyakusama mudolopo lya Mexico, magazini iitegwa La Nación yakaamba kuti: “Buzuba bwamuswaangano bwakusaanguna, [Bakamboni] bakalombwa kuti batambe bantu abamwi kumuswaangano. Buzuba bwakatobela, bantu ibakaboola bakavwula kapati cakuti busena bwakucitila muswaangano bwakaceya.” Nzila eeyi yakubelesya zikwankwani tiiyakabakkomanisya ba Cikombelo ca Katolika aboobo bakatalika kumwaya makani mabi kujatikizya Bakamboni ba Jehova. Nokuba kuti bakali kukazyigwa, bakwesu abacizyi basicamba bakazumanana kukambauka mumigwagwa. Magazini iitegwa La Nación ayalo yakaamba kuti: “Bantu boonse bamudolopo bakababona . . . bamaalumi—abamakaintu—kabasamide zikwankwani zyakwaambilizya.” Cibalo camagazini eeyi cakali kutondezya cifwoto cabakwesu kabali mumigwagwa yamudolopo lipati lya Mexico. Ansi aacifwoto kwakali mutwe wakuti: “Kunjilauka mumigwagwa yoonse.”
“MALO MATETEETE KWIINDA KOONA ANSI”
Kuciindi eeco, Bakamboni banji bakeelede kulyaaba ncobeni kutegwa bajanike kumiswaangano iyakali kucitwa mucisi ca Mexico. Bunji bwabasimuswaangano bakali kuzwa muminzi yakule kapati ooko ikwakanyina zitima noiba migwagwa buyo. Mbungano imwi yakalemba kuti, “Cintu comwe buyo icakali kwiinda afwaafwi abusena oobu yakali ntambo yaluwaile.” Aboobo basimuswaangano bakali kutanta mbongolo naa kweenda amaulu kwamazuba manji kutegwa basike nkocakali kutantilwa citima icakali kukonzya kubatola kudolopo nkowakali kucitilwa muswaangano.
Bunji bwa Bakamboni bakali bacete kapati cakuti tiibakali kukonzya nokuba kubbadelela buyo lweendo lwakuyoosika kumuswaangano. Nobakali kusika kubusena bwakuswaanganina, banabunji bakali kukkala mumaanda aa Bakamboninyina bakubusena oobo balo ibakabatambula kabotu. Bamwi bakali koona mu Maanda aa Bwami. Aciindi cimwi, basimuswaangano ibabalilwa ku 90 bakasikila kumutabi, kwalo nkobakali koona “amalo aazibbokesi zyamabbuku. Bulo bumwi abumwi bwakali kupangwa azibbokesi izili 20.” Cibalo ca Bbuku Lyaamwaka cakaamba kuti beenzu aaba ibalumba akabakkomanisya malo aaya nkaambo bakaamba kuti akali malo “mateteete kwiinda koona ansi.”
Kuli Bakamboni aaba ibalumba, ikuunka kumuswaangano uukkomanisya wa Bunakristo cakutadooneka kwakali kuyandika kapati. Aano mazuba, mweelwe wabasikumwaya mbouyaabuyungizyika kusika ku 1 miliyoni, muuya wakulumba ooyu uciliko. * Lipooti yakazwa kumutabi waku Mexico mu 1949, yakaamba boobu kujatikizya bakwesu: “Ziindi zikataazya nzyobayaanya tazibatyompyi pe akaambo kakuti wainda muswaangano umwi aumwi inga babandika buyo makani aakumuswaangano kwaciindi cilamfwu alimwi mubuzyo inga ngobabuzya bakwesu ngwakuti, Ino ndilili notuyooba amuswaangano uumbi alimwi?” Lipooti eeyi icili yamasimpe mazuba aano mbubwenya mboyakali yamasimpe kuciindi eeco.—Makani eesu aakaindi ku Central America.
^ munc. 9 Kweelana a Bbuku Lyaamwaka lyamu 1944, muswaangano ooyu “wakapa kuti Bakamboni ba Jehova bazyibwe kapati mucisi ca Mexico.”
^ munc. 14 Ku Mexico, bantu ibali 2,262,646 bakajanika ku Ciibalusyo mu 2016.
Andiza Inga Mwaakkomanina Ayaaya
NGAZI YAMULINDIZI—YAKWIIYA
Mbozyakasyangwa Mbuto zya Bwami Zyakusaanguna ku Portugal
Mbuyumuyumu nzi mbobakajisi basikumwaya ba Bwami bakaindi ku Portugal?
NGAZI YAMULINDIZI—YAKWIIYA
Makani Aabuleya Akamwaya Makani Mabotu mu Ireland
Ino ncinzi cakapa C. T. Russell kuti asyome kuti masena aayo wakali muunda “iwakayumide kale kuti utebulwe?”
NGAZI YAMULINDIZI—YAKWIIYA
‘Twakaba Basungu Alimwi Twakazula Luyando Mumyoyo Yesu Kwiinda Kaindi’
Nowakamana muswaangano wabo mu 1922, mbuti Basikwiiya Bbaibbele mbobakalutobela lulayo ‘lwakwaambilizya Mwami a Bwami bwakwe’?
NGAZI YAMULINDIZI—YAKWIIYA
“Kunyina Nzila Mbi Alimwi Kunyina Nzila Ndamfwu”
Kumamanino amyaka yakuma 1920 alimwi akumatalikilo kwamyaka yakuma 1930, bapainiya basungu bakatondezya luyandisisyo lwabo lwakutola makani mabotu aa Bwami kuminzi yaku Australia iili kulamfwu kapati.
NGAZI YAMULINDIZI—YAKWIIYA
“Nobasikumwaya ba Bwami mu Britain—Amusinsimuke!!”
Kwakanyina kuyaambele kujatikizya mweelwe wabasikumwaya ba Bwami mu Britain kwamyaka iili 10! Ino ncinzi cakapa kuti kube kuyaambele?
NGAZI YAMULINDIZI—YAKWIIYA
“Ndili Mukuzyala Micelo Iipa Kuti Jehova Atembaulwe”
Nokuba kuti Basikwiiya Bbaibbele tiibakali kwaamvwisya makani aajatikizya kutatola lubazu mutwaambo twacisi alimwi amumazwanga aacitika munyika ciindi cankondo yakusaanguna yanyika yoonse, kusyomeka kwabo kwakagwasya kapati.
