SENA kuli mulimo umwi ngomulombozya kucita mumbungano pele tamukonzyi kuucita lino? Ambweni mukuli ngwajisi muntu umwi. Ambweni mulimo ngomwakali kubeleka naa mukuli ngomwakajisi musyule. Nokuba boobo, akaambo kakucembaala, kuciswa-ciswa, kuyuma kwabukkale naa kulanganya mukwasyi lino kumupa kutacita zinji. Akaambo kakucinca kwazintu mumbunga, ambweni mwakaleka kubeleka mulimo ngomwakali kubeleka kwaciindi cilamfwu. Kufwumbwa mbocibede, ambweni mulimvwa kuti tamuciti zintu zyoonse nzyomukonzya kuyanda kucita mumulimo wa Leza. Mubukkale buli boobu, cilalimvwisya kuti zimwi ziindi mulakonzya kutyompwa. Nokuba boobo, ino ncinzi cikonzya kumugwasya kutatyompwa naa kukalala lyoonse? Ino mbuti mbomukonzya kuzumanana kuba alukkomano?

Tulakonzya kwiiya mbotukonzya kuzumanana kuba alukkomano kwiinda mukulanga-langa cikozyanyo ca Johane Mubbapatizi. Johane wakalijisi mikuli mipati, pele ambweni tanaakazyi cakali kukonzya kucitika mubuumi bwakwe. Kweelede kuti tanaakali kuyeeyela kuti wakali kuyookkala muntolongo kwaciindi cilamfwu iciinda kuciindi ncaakabeleka mulimo wakwe. Nokuba boobo, Johane wakazumanana kuba alukkomano alimwi wakacita oobo mubuumi bwakwe boonse. Ino ncinzi cakamugwasya? Alimwi ino mbuti mbotukonzya kuzumanana kuba alukkomano nociba ciindi notwaba mubukkale butyompya?

Cakuma April mu 29 C.E., Johane wakatalika mulimo wakwe wakwiiminina Mesiya. Wakali kwaambila bantu kuti: “Amweempwe, nkaambo Bwami bwakujulu bwaswena afwaafwi.” (Mt. 3:2; Lk. 1:12-17) Ibanji bakaswiilila. Alimwi buya, makamu aabantu akeenda misinzo milamfwu kuyooswiilila mulumbe wakwe, eelyo banji bakeempwa akubbapatizyigwa. Kunze lyaboobo, Johane wakabacenjezya basololi babukombi ibakali kulibona kululama kujatikizya lubeta ilwakali kuyoobasikila ikuti batacinca. (Mt. 3:5-12) Johane wakacita cintu ciyandika kapati mumulimo wakwe ciindi naakabbapatizya Jesu mumwezi wa October, mu 29 C.E. Kuzwa ciindi eeco, Johane wakali kwaambila bantu kuti batobele Jesu, Mesiya iwakasyomezyedwe.—Joh. 1:32-37.

Kujatikizya mulimo wa Johane uulibedelede, Jesu wakaamba kuti: “Akati kabaabo ibakazyalwa kubakaintu, takunabwenwe mupati kwiinda Johane Mubbapatizi.” (Mt. 11:11) Cakutadooneka, Johane wakakkomana azilongezyo nzyaakatambula. Mbubwenya  mbuli Johane, ibanji mazuba aano bajana zilongezyo zinji. Amubone cikozyanyo camukwesu Terry. Walo alimwi abakaintu bakwe ba Sandra, babeleka myaka iinda ku 50 mumulimo waciindi coonse. Ba Terry bakaamba kuti: “Ndakabeleka milimo minji iikkomanisya. Ndakabeleka kandili mupainiya, mubelesi waku Beteli, painiya waalubazu, mulangizi wabbazu, mulangizi wacooko alimwi lino ndili mupainiya waalubazu.” Cilakkomanisya kupegwa mikuli mumbunga yeendelezyegwa a Leza, pele kweelana ambotutiibone kucikozyanyo ca Johane, kuzumanana kuba alukkomano kuyandika kubeleka canguzu ciindi bukkale bwesu nobwacinca.

Johane Mubbapatizi wakazumanana kuba alukkomano akaambo kakuti wakali kulumba kujatikizya mikuli njaakajisi. Amubone cikozyanyo eeci. Naakamana kubbapatizyigwa Jesu, mulimo wa Johane wakatalika kuyaansi, pele mulimo wa Jesu wakatalika kuyaambele. Akaambo kakulibilika, basikwiiya ba Johane bakamwaambila kuti: “Bona, awalo ulabbapatizya alimwi boonse baunka kulinguwe.” (Joh. 3:26) Johane wakaingula kuti: “Kufwumbwa ooyo uujisi nabwiinga ngusibwiinga. Pele imulongwe wasibwiinga naimikila munsi lyasibwiinga akumumvwa kaambaula, ulakondwa kapati akaambo kajwi lyakwe. Aboobo kukondwa kwangu ooku kwazulila.” (Joh. 3:29) Johane tanaakali kuzundana a Jesu; alimwi tanaakali kuyeeya kuti mulimo ngwaakajisi wakaceya akaambo kamulimo mupati ngwaakajisi Jesu. Muciindi caboobo, Johane wakazumanana kuba alukkomano akaambo kakuti mukuli wakwe wakuba “mulongwe wasibwiinga” wakali kuubona kuti ulayandika kapati.

Mbwaakali kuzibona zintu Johane kwakamugwasya kuzumanana kukkomana nokuba kuti mulimo wakwe tiiwakali muuba-uba. Mucikozyanyo, Johane wakazyalwa kali mu Naziri, aboobo tanaakeelede kunywa waini. (Lk. 1:15) Kaamba kujatikizya buumi bwa Johane buuba-uba, Jesu wakaamba kuti: “Johane wakaboola katalyi nokuba kunywa.” Kulubazu lumwi, Jesu alimwi abasikwiiya bakwe tiibakali kutobela mulawo waba Naziri alimwi bakali kupona buumi mbobapona bantu boonse. (Mt. 11:18, 19) Kuyungizya waawo, nokuba kuti Johane tanaakali kucita maleele, wakalizyi kuti basikwiiya ba Jesu, kubikkilizya abaabo ibakali basikwiiya ba Johane musyule, bakalipedwe nguzu zyakucita maleele. (Mt. 10:1; Joh. 10:41) Muciindi cakubikkila maano kukwiindana kwakali akati kabasikwiiya bakwe alimwi abasikwiiya ba Jesu, Johane wakabikkila kapati maano kumulimo wakwe ngwaakapegwa a Jehova.

Andiswe ikuti twaubikkila maano mukuli ngotujisi lino mumulimo wa Jehova, tuyoolukwabilila lukkomano lwesu. Ba Terry, ibaambwa kale bakaamba kuti, “Ndakali kuubikkila maano mulimo umwi aumwi ngondakali kupegwa.” Nobayeeya kujatikizya buumi bwabo mumulimo waciindi coonse, ba Terry baamba kuti, “Tanduuside pe, muciindi caboobo ndiyeeya buyo zintu zibotu zyakandicitikila.”

Tulakonzya kuba alukkomano kapati mumulimo wa Leza kwiinda mukuzinzibala kuyeeya icipa kuti mulimo naa mukuli uuli woonse kauyandika kapati. Ncoolwe kuba “basimilimonyina a Leza.” (1Kor. 3:9) Cintu ciyandika kapati cinooboneka kabotu lyoonse ikuti katucibamba kabotu. Mbubwenya buyo, tuyoozumanana kuba alukkomano ikuti lyoonse katuyeeya mbocili coolwe citaliboteli kubeleka a Jehova. Tatukeezyanisyi milimo njotucita kumilimo njobacita bakwesu. Kunyina notuyakuyeeya kuti mulimo ngwatupa Jehova ngwaansi kwiinda mulimo ngwapa bamwi.—Gal. 6:4.

Kweelede kuti Johane wakalizyi kuti mulimo wakwe tiiwakali kuyoozumanana kwaciindi cilamfwu, pele tanaakalizyi mbowakali kukonzya kumana cakutayeeyela. (Joh. 3:30) Mu 30 C.E., nokwakainda myezi iili cisambomwe kuzwa naakabbapatizya Jesu, Mwami Heroda wakabikka Johane muntolongo. Nokuba boobo, Johane wakacita kufwumbwa ncaakali kukonzya kutegwa azumanane kupa bumboni. (Mk. 6:17-20) Ncinzi cakamugwasya kuzumanana kuba alukkomano mubukkale buli boobu? Wakazumanana kubikkila maano kuzintu zyakumuuya.

Kali muntolongo, Johane wakamvwa makani aajatikizya mbowakali kuyaabukomena mulimo wa Jesu. (Mt. 11:2; Lk. 7:18) Johane wakalisinizyide kuti Jesu wakali Mesiya, pele kweelede kuti wakali kulibuzya kujatikizya Jesu mbwaakali kuyoozizuzikizya zyoonse nzyaakaamba Magwalo kuti Mesiya uyoozicita. Mbwaanga Mesiya wakali kuyoopegwa bwami, sena bweendelezi bwa Jesu bwakali kuyootalika kalitanalampa? Sena eeci cakali kuyoopa kuti Johane aangununwe  muntolongo? Johane wakali kuyanda kuzyiba zinji kujatikizya nzyaakali kuyoocita Jesu, aboobo wakatuma basikwiiya bakwe bobilo kuyoobuzya Jesu kuti: “Sena ndonduwe ooyo uuboola naa tweelede kulangila uumbi?” (Lk. 7:19) Mpoonya Jesu wakabatuma kuti bapiluke kuyakwaambila Johane kuti: “Boofwu lino balabona, balema baleenda, basicinsenda balasalazyigwa, basinkematwi balamvwa, bafwide balabusyigwa abalo bacete baambilwa makani mabotu.” (Lk. 7:20-22) Nobakapiluka basikwiiya, kweelede kuti Johane wakaswiilila cakubikkila maano ciindi nobakali kumupandulwida kuti Jesu wakali kuponya camaleele.

Cakutadooneka, Johane wakayumizyigwa kapati amakani ngobakamwaambila basikwiiya bakwe. Makani aayo akatondezya kuti Jesu wakali kuzuzikizya businsimi bwa Mesiya. Nokuba kuti Jesu tanaakamwaangununa Johane kuzwa muntolongo, Johane wakalizyi kuti mulimo wakwe wakali kuyandika kapati. Tacikwe makani abukkale mwaakabede, Johane wakalijisi twaambo itwakeelede kumupa kukkomana.

Mbubwenya mbuli Johane, ikuti twabikkila maano kuzintu zyakumuuya, tuyoocikonzya kuliyumya cakukkazika moyo alimwi akukondwa. (Kol. 1:9-11) Tulakonzya kucita oobo kwiinda mukubala Bbaibbele alimwi akuzinzibala kuyeeya nzyotubala. Kucita boobo kuyootugwasya kuzyiba kuti kubeleka kwesu mumulimo wa Leza takuli kwabuyo pe. (1Kor. 15:58) Ba Sandra bakaamba kuti: “Kubala caandaano camu Bbaibbele abuzuba kwandigwasya kuba acilongwe ciyumu a Jehova. Kucita boobo kulandigwasya kubikkila maano kuli Jehova, ikutali kulindime.” Kuyungizya waawo, tulakonzya kubikkila maano kumakani aajatikizya mulimo bakwesu alimwi abacizyi ngobacitila Jehova, calo icikonzya kutugwasya kutabikkila kapati maano kubukkale bwesu. Ba Sandra bakayungizya kwaamba kuti, “Mapulogilamu aa JW Broadcasting^® aamwaigwa mwezi amwezi alatugwasya kuswena aafwaafwi ambunga alimwi alatugwasya kuzumanana kuba alukkomano mumulimo wesu.”

Muciindi cisyoonto eeco ncaakakambauka Johane Mubbapatizi, wakakambauka “kajisi muuya anguzu mbuli zya Elija,” alimwi mbubwenya mbuli Elija, “wakali muntu iwakali kulimvwa mbubonya mbotulimvwa aswebo.” (Lk. 1:17; Jak. 5:17) Ikuti twaiya cikozyanyo cakwe cakulumba alimwi akubikkila maano kuzintu zyakumuuya, andiswe tulakonzya kuzumanana kuba alukkomano mumulimo wesu wa Bwami, tacikwe makani azintu izikonzya kutucitikila mubuumi.