1. Ncinzi ncaakaamba Davida kujatikizya kulicesya kwa Jehova?

SENA mubwini inga twaamba kuti Jehova ulalicesya? Inzya, inga twaamba oobo. Davida wakaamba kuti: “Yebo ulandipa ntobo yako yalufwutuko, alimwi kulicesya kwako kulandisumpula.” (2Sam. 22:36; Int. 18:35) Ciindi Davida naakalemba majwi aaya, ambweni wakali kuyeeya ciindi musinsimi Samuele naakaboola kuŋanda yabausyi kuzoonanika yooyo iwakali kuyooba mwami wa Israyeli kumbele. Davida ngowakali muniini akati kabana basankwa ibali lusele; nokuba boobo, Jehova wakasala nguwe kunjila mubusena bwa Mwami Saulo.—1Sam. 16:1, 10-13.

2. Ino ncinzi ncotutiibandike mucibalo eeci?

² Kweelede kuti Davida wakaazumina majwi ngaakaamba sintembauzyo kujatikizya Jehova kuti: “Ulooka kuti alange julu anyika, nguubusya muntu uupengede kuzwa mulusuko. Nguusumpula mucete . . . kuti amupe kukkala ankumekume.” (Int. 113:6-8) Mucibalo eeci, tulasaanguna kubandika ziiyo iziyandika kapati kujatikizya kulicesya kwiinda mukulanga-langa mbwaakabutondezya bube oobu Jehova. Mpoonya tulabandika kujatikizya nzyotukonzya kwiiya ku Mwami Saulo, musinsimi Daniele alimwi a Jesu kujatikizya bube oobu.

3. Mbuti Jehova mbwatweendelezya alimwi ino eeci citondezya nzi?

³ Kweelana ambwabeendelezya bakombi bakwe batalondokede, Jehova ulatondezya kuti ulalicesya. Tatambuli buyo bukombi bwesu, pele alimwi utubona kuti tuli balongwe bakwe. (Int. 25:14) Kutegwa cilongwe cesu anguwe cikonzyeke, Jehova wakabweza  ntaamu kwiinda mukupa Mwanaakwe kacili cipaizyo cakumanya zibi zyesu. Eelo kaka Jehova ngusilweetelelo kapati!

4. Ino ncinzi Jehova ncaakatupa alimwi nkaambo nzi?

⁴ Amubone nzila aimbi Jehova mbwatondezya kuti ulalicesya. Mbwali Mulengi, Jehova naakatulenga munzila yakuti katutajisi nguzu zyakulisalila buumi mbotuyanda kupona. Pele kunyina naakacita boobo. Wakatulenga mucinkozya cakwe alimwi akutupa nguzu zyakulisalila. Uyanda kuti swebo tobantu baansi kapati katumubelekela kuzwa ansi aamoyo akaambo kakuti tulamuyanda alimwi akuti tulibuzyi bubotu buboola akaambo kakumumvwida. (Dt. 10:12; Is. 48:17, 18) Eelo kaka tuleelede kulumba kapati akaambo kakulicesya kwa Jehova ikuli boobu!

5. Mbuti Jehova mbwatuyiisya kuba bantu balicesya? (Amubone cifwanikiso icili aacivwumbyo.)

⁵ Kweelana ambwatweendelezya, Jehova ulatuyiisya kuba bantu balicesya. Jehova nguuyinda kuba abusongo mububumbo boonse. Nokuba boobo, ulazumina kubeleka abamwi alimwi akuswiilila mizeezo yabo. Mucikozyanyo, Jehova wakazumizya Mwanaakwe kuti amugwasye kulenga zintu zyoonse. (Tus. 8:27-30; Kol. 1:15, 16) Alimwi nokuba kuti Jehova ngu Singuzuzyoonse, ulabapa mikuli bamwi. Mucikozyanyo, wakasala Jesu kuba Mwami wa Bwami bwakwe, alimwi ulabapa nguzu zyabweendelezi zimwi bantu ibali 144,000 ibayooyendelezya antoomwe a Jesu. (Lk. 12:32) Jehova wakamuyiisya Jesu kuba Mwami alimwi a Mupaizi Mupati. (Heb. 5:8, 9) Alimwi abaabo mbayoolela limwi Jesu ulabayiisya kutegwa bauzuzikizye mulimo wabo, pele talili lyoonse nabeendelezya kujatikizya mbobaubeleka mulimo. Muciindi caboobo, ulijisi lusyomo lwakuti balacita kuyanda kwakwe.—Ciy. 5:10.

6-7. Ncinzi ncotukonzya kwiiya kuli Taateesu wakujulu kujatikizya kupa bamwi mikuli?

 ⁶ Ikuti Taateesu wakujulu, walo uutayandiki lugwasyo kumuntu uuli woonse, ulabapa mikuli bamwi, nkokuti swebo tweelede kwiindila buya kucita mbubwenya oobo! Mucikozyanyo, sena muli silutwe wamukwasyi naa mwaalu mumbungano? Amutobele cikozyanyo ca Jehova kwiinda mukupa bamwi mikuli imwi alimwi akutasola kubeendelezya ciindi coonse kujatikizya mbobazuzikizya mikuli eeyo. Ikuti mwamwiiya Jehova, mulimo uyoocitwa, muyoopa kuti bamwi baiye alimwi akubagwasya kuyaambele. (Is. 41:10) Ncinzi acimbi ncobakonzya kwiiya kuli Jehova aabo ibajisi nguzu zyabweendelezi?

⁷ Bbaibbele litondezya kuti Jehova ulabikkila maano kumizeezo yabana bakwe bangelo. (1Bam. 22:19-22) Nobazyali, mbuti mbomukonzya kwiiya cikozyanyo ca Jehova? Kuti kaceelela, amubabuzye bana banu kutegwa baambe mbobayeeya kujatikizya mboweelede kucitwa mulimo umwi. Alimwi kuti kaceelela, amwiitobele mizeezo yabo.

8. Mbuti Jehova mbwaakabeendelezya cakukkazika moyo ba Abrahamu a Sara?

⁸ Nzila aimbi Jehova mbwatondezya kuti ulalicesya nkwiinda mukukkazika moyo. Mucikozyanyo, Jehova ulakkazika moyo ciindi aabo ibamubelekela, cabulemu nobakudooneka kusala kwakwe. Wakaswiilila ciindi Abrahamu naakaamba mbwaakali kulimvwa kujatikizya muzeezo wakunyonyoona Sodoma alimwi Gomora. (Matl. 18:22-33) Alimwi amuyeeye Jehova mbwaakamweendelezya mukaintu wa Abrahamu, Sara. Kunyina naakanyema ciindi Sara naakaseka kujatikizya cisyomezyo cakwe cakuti wakali kuyoomita mubucembele bwakwe. (Matl. 18:10-14) Muciindi caboobo, wakamweendelezya cabulemu Sara.

9. Ncinzi ncobakonzya kwiiya bazyali alimwi abaalu kucikozyanyo ca Jehova?

⁹ Nobazyali alimwi andinywe nobaalu, ncinzi ncomukonzya kwiiya kucikozyanyo ca Jehova? Ino mucita buti ciindi bana banu naa bamwi mumbungano nobatakuzumini kusala kwanu? Sena mulabalulamika mpoonya-mpoonya? Naa sena mulasoleka kumvwisya mizeezo yabo? Banamukwasyi alimwi abasimbungano balagwasyigwa kapati ciindi aabo ibabeendelezya nobamwiiya Jehova. Kusikila waawa, twabandika ncotukonzya kwiiya kujatikizya kulicesya kuzwa kucikozyanyo ca Jehova. Lino atubone ncotukonzya kwiiya kujatikizya kulicesya kuzwa kuzikozyanyo izili mu Jwi lya Leza.

10. Mbuti Jehova mbwabelesya zikozyanyo zyabamwi kutegwa atuyiisye?

¹⁰ Mbwali ‘Mwiiyi wesu Mupati,’ Jehova ulatupa zikozyanyo kwiinda mu Jwi lyakwe kutegwa atuyiisye. (Is. 30:20, 21) Tulaiya ciindi notuzinzibala kuyeeya zibalo zyamu Bbaibbele izijatikizya baabo ibakatondezya bube bwabunaleza, kubikkilizya abube bwakulicesya. Alimwi tulaiya ciindi notulanga-langa icakabacitikila aabo ibakaalilwa kutondezya bube bubotu oobu.—Int. 37:37; 1Kor. 10:11.

11. Ncinzi ncotukozya kwiiya kucikozyanyo ca Saulo cibyaabi?

¹¹ Amuyeeye icakacitikila Mwami Saulo. Kumatalikilo wakali kulicesya. Naakacili mwana-mwana wakalikuzyi kulezya kwakwe alimwi buya wakali kulitenga kuzumina mikuli minji. (1Sam. 9:21; 10:20-22) Pele mukuya kwaciindi, Saulo wakatalika kulisumpula. Wakatalika kucita boobu nokwakainda buyo ciindi cisyoonto kuzwa naakaba mwami. Aciindi cimwi, wakaalilwa kukkazika moyo ciindi naakali kulindila musinsimi Samuele. Muciindi cakusyoma Jehova  kuti abweze ntaamu akaambo kabantu bakwe, Saulo wakatuula cipaizyo cuumpwa nokuba kuti tanaakazumizyidwe kucita boobo. Akaambo kaceeci, Jehova wakaleka kumukkomanina alimwi mukuya kwaciindi, wakamukaka kuba mwami. (1Sam. 13:8-14) Inga twacita cabusongo ikuti twaiya kucikozyanyo eeci itucenjezya alimwi akutacita zintu nzyotutazumizyidwe kucita.

12. Nkaambo nzi Daniele ncaakali cikozyanyo cibotu?

¹² Mukwiimpana acikozyanyo ca Saulo cibyaabi, amubone cikozyanyo cibotu camusinsimi Daniele. Mubuumi bwakwe boonse, Daniele wakazumanana kulicesya alimwi lyoonse wakali kulomba Jehova kuti amusololele. Mucikozyanyo, ciindi naakabelesyegwa a Jehova kupandulula ciloto ca Nebukadinezara, Daniele kunyina naakayanda kuti apegwe nguwe bulemu akaambo kakupandulula ciloto eeci. Muciindi caboobo, bulemu boonse wakabupa kuli Jehova. (Dan. 2:26-28) Ino ncinzi ncotwiiya? Ikuti bakwesu balakkomana kuswiilila makani eesu naa ikuti kuli kuzwidilila kuli koonse nkotujisi mumulimo wamumuunda, tweelede kupa bulemu boonse kuli Jehova. Tweelede kuzyiba kuti tulacikonzya kucita zintu zyoonse akaambo kalugwasyo lwa Jehova. (Flp. 4:13) Ikuti naa katujisi muuya uuli boobu, nkokuti twiiya cikozyanyo ca Jesu cibotu. Munzila nzi?

13. Ncinzi ncotwiiya kujatikizya kulicesya kumajwi aa Jesu aali kulugwalo lwa Johane 5:19, 30?

¹³ Nokuba kuti Mwana wa Leza uulondokede, Jesu wakali kusyoma Jehova. (Amubale Johane 5:19, 30.) Kunyina naakasola kubanyanga nguzu zyabweendelezi Bausyi bakujulu. Lugwalo lwa Bafilipi 2:6 lwaamba kuti Jesu “kunyina pe naakayeeya kubweza bweendelezi, nkokuti kutegwa kabeelene a Leza.” Mbwali Mwana uulibombya, Jesu wakalizyi kuti nguzu zyakwe kuli mpozigolela alimwi wakali kubulemeka bweendelezi bwa Bausyi.

14. Ciindi Jesu naakalombwa kucita cintu iciindilila anguzu nzyaakapedwe, ino wakacita buti?

¹⁴ Amuyeeye kujatikizya ncaakacita Jesu ciindi Jakobo, Johane alimwi abanyina nobakamulomba cintu icakali kwiindilila anguzu nzyaakapedwe. Cakutasowa ciindi Jesu wakaamba kuti alikke Usyi wakujulu ngowakali kukonzya kusala baabo ibakali kuyookkala kujanza lya Jesu lyalulyo alimwi akujanza lyakwe lyalumwensyi mu Bwami. (Mt. 20:20-23) Kwiinda mukucita boobo, Jesu wakatondezya kuti wakalizyi mpozyakali kugolela nguzu zyakwe.  Wakali kulicesya. Kunyina naakacita cintu cili coonse Jehova ncaatakamupa nguzu zyakuti acicite. (Joh. 12:49) Mbuti mbotukonzya kwiiya cikozyanyo ca Jesu cibotu?

15-16. Mbuti mbotukonzya kubelesya lulayo lwamu Bbaibbele iluli kulugwalo lwa 1 Bakorinto 4:6?

¹⁵ Tulaiya cikozyanyo ca Jesu cakulicesya kwiinda mukutobela lulayo lwamu Bbaibbele iluli kulugwalo lwa 1 Bakorinto 4:6. Kulugwalo oolu twaambilwa kuti: “Mutaindilili zintu zilembedwe.” Aboobo ciindi notwalombwa lulayo, tatweelede kusinikizya bamwi kuzumina mizeezo yesu naa kwiile kwaamba buyo kakunyina kusaanguna kuzinzibala kuyeeya kujatikizya makani aayo. Muciindi caboobo, tweelede kubikkila maano kululayo lwamu Bbaibbele alimwi amumabbuku eesu aamba zyamu Bbaibbele. Kwiinda mucita boobu, tutondezya kuti tulizyi nguzu zyesu mpozigolela. Cakulicesya, tupa bulemu kuli Singuzuzyoonse, nkaambo ‘milawo yakwe ililuleme.’—Ciy. 15:3, 4.

¹⁶ Kunze buyo lyakumupa bulemu Jehova, tulijisi twaambo tumbi tubotu ncotweelede kutondezya bube bwakulicesya. Mbuti kulicesya mbokukonzya kutuletela lukkomano alimwi akutugwasya kumvwana abamwi? Aaka nkekaambo nkotuyanda kubandika lino.

17. Nkaambo nzi bantu balicesya ncobajisi lukkomano?

¹⁷ Ikuti katulicesya, tulakonzya kuba alukkomano lunji. Nkaambo nzi? Nkaambo kakuti ciindi notuzumina kuti kuli zintu zimwi nzyotutakonzyi kucita, tuyoolumba kapati kulugwasyo luli loonse ndobayootupa bamwi. Mucikozyanyo, amuyeeye ciindi eeciya Jesu naakaponya basicinsenda ibali kkumi. Omwe buyo akati kabo ngowakapiluka kumulumba Jesu akaambo kakumuponya kubulwazi bwakwe bubyaabi, icintu ncaatakali kukonzya kucita mwaalumi ooyu. Mwaalumi ooyu uulicesya wakalumba kulugwasyo ndwaakapegwa,  alimwi wakatembaula Leza akaambo kalugwasyo oolo.—Lk. 17:11-19.

18. Mbuti kulicesya mbokutugwasya kumvwana abamwi? (Baroma 12:10)

¹⁸ Bantu balicesya balamvwana abamwi alimwi balakonzya kuba abalongwe banji. Nkaambo nzi? Balakkomana kuzyiba kuti bantu bamwi balijisi bube bubotu alimwi balabasyoma. Aabo balicesya balakkomana ciindi bamwi nobazwidilila mumulimo uuli woonse ngobapegwa alimwi tabawayi-wayi kubalumbaizya akubalemeka.—Amubale Baroma 12:10.

19. Ino muntu uulisumpula uli buti?

¹⁹ Mukwiimpana, bantu balisumpula cilabakatazya kulumbaizya bamwi, bayanda kuti balo kabalumbaizyigwa mbabo. Balalyeezyanisya abamwi alimwi akukulwaizya muuya wakuzundana. Muciindi cakuyiisya bamwi alimwi akubapa mikuli, balakonzya kwaamba kuti, “Kuti koyanda kuti cintu cicitwe munzila iiluzi”—nkokuti munzila njobayanda balo, “weelede kulicitila omwini.” Muntu uulisumpula kanji-kanji uyanda kubonwa kuti ulayandika kapati kwiinda bamwi alimwi ulafwa munyono ciindi bamwi nobamwiinda. (Gal. 5:26) Bantu bali boobo tabavwuli kuba azilongwe zizumanana. Ikuti naa twabona kuti tujisi penzi lyakulisumpula, tweelede kuzumanana kupaila kuli Jehova kuti atugwasye ‘kucinca mizeezo yesu’ kutegwa cilengwa eeci cibyaabi citasimpi miyanda mulindiswe.—Rom. 12:2.

20. Nkaambo nzi ncotweelede kulicesya?

²⁰ Eelo kaka tulalumba kapati akaambo kacikozyanyo ca Jehova! Tulakubona kulicesya kwakwe kweelana ambwabeendelezya babelesi bakwe, alimwi tuyanda kumwiiya. Kuyungizya waawo, tuyanda kwiiya baabo ibakabelekela Jehova cakulicesya. Lyoonse atumupe bulemu Jehova alimwi alulemeko oolo ilumweelede. (Ciy. 4:11) Ikuti twazicita zintu zyoonse eezyi, tulakonzya kuba balongwe ba Jehova mane kukabe kutamani, nkaambo ulabayanda bantu balicesya.