1. Ncinzi cakapa kuti Jehova alenge zintu zipona?

ACIINDI cimwi Jehova wakali alikke. Pele tanaakalendeledwe. Jehova tayandiki kuba amuntu umwi buya kutegwa kakkomene. Nokuba boobo, wakali kuyanda kuti abamwi bakkomane abuumi. Akaambo kaluyando, wakatalika mulimo wakulenga zintu.—Int. 36:9; 1Joh. 4:19.

2. Ino Jesu alimwi abangelo bakalimvwa buti ciindi Jehova naakalenga zintu zimbi?

² Kusaanguna, Jehova wakalenga Mwanaakwe, Jesu. Kwiinda mu Mwanaakwe ooyu, “zintu zimbi zyoonse zyakalengwa,” kubikkilizya abangelo. (Kol. 1:16) Jesu wakakkomana kapati kubeleka antoomwe a Bausyi. (Tus. 8:30) Abalo bangelo bakakkomana. Bakaliko ciindi Jehova alimwi a Jesu, Imubelesi Uucibwene, nobakalenga julu anyika. Ino bangelo bakatondezya buti kuti bakakkomana? ‘Bakatalika koompolola cakukondwa’ ciindi nyika noyakalengwa, alimwi tacidoonekwi buya kuti bakazumanana kumutembaula Jehova nobakabona zintu zimbi zyoonse nzyaakalenga, kwaambisya bantu. (Job. 38:7; Tus. 8:31, bupanduluzi buyungizyidwe) Cilenge cimwi acimwi citondezya luyando ndwajisi Jehova alimwi abusongo.—Int. 104:24; Rom. 1:20.

3. Kweelana alugwalo lwa 1 Bakorinto 15:21, 22, ncinzi cikonzyeka akaambo kacinunuzyo ca Jesu?

³ Jehova wakali kuyanda kuti bantu kabapona mane kukabe kutamani munyika mbotu kapati njaakalenga. Pele ba Adamu a Eva bakamuzangila Jehova, aboobo bakasweekelwa coolwe cakupona mane kukabe kutamani. Mpoonya mukuyakwaciindi, balo alimwi abana babo bakali kuyoofwa. (Rom. 5:12) Ino Jehova wakacita buti? Cakufwambaana, wakabikka bubambe bwakunununa bantu. (Matl. 3:15) Jehova wakapa kuti cikonzeke kubana  ba Adamu a Eva kwaangununwa kucibi alufwu kwiinda mububambe bwacinunuzyo. Mpoonya kufwumbwa muntu uuli woonse uusala kumubelekela uyoomupa buumi butamani.—Joh. 3:16; Rom. 6:23; amubale 1 Bakorinto 15:21, 22.

4. Mibuzyo nzi njotutiilange-lange mucibalo eeci?

⁴ Cisyomezyo ca Leza cakubusya bafwide cipa kubuzya mibuzyo minji. Mucikozyanyo, ino bubuke buyoocitika buti? Sena tuyoobazyiba bayandwa besu baakubusyigwa? Munzila nzi bubuke mobuyootupa kukkomana? Mbuti kuzinzibala kuyeeya bubuke mbokutupa kumulumba kapati Jehova akaambo kaluyando ndwajisi, busongo akukkazika moyo? Amuleke lino twiilange-lange mibuzyo eeyi.

5. Nkaambo nzi ncokulangilwa kuti bantu bafwide tabakabusyigwi aciindi comwe?

⁵ Ciindi Jehova aakubusya mamiliyoni aabantu kwiinda mu Mwanaakwe, kulangilwa kuti tabakabusyigwi aciindi comwe. Nkaambo nzi ncotwaambila boobo? Nkaambo kakuti, ikuti bantu banji babusyigwa aciindi comwe inga kwaba manyongwe. Alimwi Jehova kunyina nacita zintu munzila yamanyongwe. Ulizyi kuti kutegwa luumuno luzumanane, zintu zyeelede kucitwa kabotu-kabotu. (1Kor. 14:33) Jehova Leza wakabelesya busongo alimwi akukkazika moyo ciindi naakali kubeleka a Jesu kusaanguna kulenga nyika kutegwa bantu kabakkala mumo. Mbubwenya buyo, Jesu uyoobutondezya bube oobu mu Bulelo bwa Myaka Iili 1,000 aakubeleka abaabo ibayoofwutuka lyankondo ya Amagedoni ikubambulula nyika kutegwa batambule baabo ibayoobusyigwa.

6. Kweelana alugwalo lwa Milimo 24:15, ino mbaani ibayoobusyigwa a Jehova?

⁶ Ciyandika kapati ncakuti, aabo bayoofwutuka lya Amagedoni bayooyandika kubayiisya Bwami bwa Leza alimwi azyeelelo zyakwe aabo  ibayoobusyigwa. Nkaambo nzi? Nkaambo kakuti aakati kabantu bayoobusyigwa bamwi ‘tabanooluleme.’ (Amubale Milimo 24:15.) Bayooyandika kucinca bukkale bwabo kutegwa bakagwasyigwe acinunuzyo ca Kristo. Amuyeeye buyo mbounooli mulimo mupati kuyiisya mamiliyoni aabantu ibatajisi luzyibo luli loonse kujatikizya Jehova. Sena banooyiisyigwa aumwi alikke mbubwenya mbotusololela ziiyo zya Bbaibbele mazuba aano? Sena aabo ibayoobusyigwa bayakwaambilwa mbungano nkobanooswaangana akuyiisyigwa kutegwa abalo bakayiisye baabo ibayoobusyigwa musyule lyabo? Atulindile kutegwa tukabone mbociyooba. Ncotuzyi ncakuti, kumamanino aa Bulelo bwa Kristo bwa Myaka Iili 1,000, “nyika iyoozula luzyibo lwa Jehova.” (Is. 11:9) Eelo kaka tunoojisi bubi, pele tunookkomene mumyaka eeyo!

7. Nkaambo nzi bantu ba Leza ncobayooyandika kutondezya lweetelelo ciindi banooyiisya bantu ibayoobusyigwa?

⁷ Lya Bulelo bwa Kristo bwa Myaka Iili 1,000, bana ba Jehova boonse baanyika bayooyandika kuzumanana kucinca bukkale bwabo kutegwa bakamukkomanisye Jehova. Boonse banoojisi lweetelelo lwini-lwini ciindi nobanoogwasya baabo bayoobusyigwa kutegwa bacince bukkale bwabo akutalika kupona kweelana azyeelelo zya Jehova. (1Pet. 3:8) Aabo bayoobusyigwa bayoobona kuti bantu ba Jehova balalicesya akuti baciyandika kucinca kutegwa bamukkomanisye Jehova alimwi bayooyanda kuti bamukombe antoomwe ambabo.—Flp. 2:12.

8. Nkaambo nzi ncokulangilwa kuti aabo banikwaanzya bantu ibayoobusyigwa bayoobazyiba bayandwa babo?

⁸ Kuli twaambo tunji itutupa kuyeeya kuti aabo banikwaanzya bantu bayoobusyigwa bayoobazyiba bayandwa babo. Mucikozyanyo, kweelana abubuke bwakacitika kaindi, kulangilwa kuti Jehova uyoopa kuti bantu ibayoobusyigwa, kabaambaula, kuyeeya alimwi akulibonya mbubwenya mbobakabede kabatanafwa. Amuyeeye kuti Jesu wakakozyanisya lufwu kukoona, mpoonya bubuke kukubusyigwa kuzwa muŋonzi. (Mt. 9:18, 24; Joh. 11:11-13) Ciindi bantu nobabuka kuzwa muŋonzi, tabacinci mbobalibonya, mbobaambaula alimwi ambobayeeya. Amuyeeye buyo cikozyanyo ca Lazaro. Wakalifwide kwamazuba one, aboobo mubili wakwe wakalitalikide kale kubola. Nokuba boobo, ciindi Jesu naakamubusya, bacizyi bakwe bakamuzyiba mpoonya aawo alimwi awalo wakabazyiba.—Joh. 11:38-44; 12:1, 2.

9. Nkaambo nzi aabo ibayoobusigwa ncobatakabusyigwi kabalondokede?

⁹ Jehova usyomezya kuti kunyina naba omwe akati kabantu ibanikweendelezyegwa a Kristo uyakwaamba kuti: “Ndaciswa.” (Is. 33:24; Rom. 6:7) Aboobo aabo ibayoobusyigwa banoojisi mibili iili kabotu. Nokuba boobo, tabakalondoki mpoonya-mpoonya. Ikuti babusyigwa kabalondokede, inga tiibaakuzyibwa abayandwa babo. Kulangilwa kuti bantu boonse banooyaabulondoka aasyoonto-syoonto mu Bulelo bwa Kristo bwa Myaka Iili 1,000. Mpoonya kumamanino aa Myaka iili 1,000, Jesu uyoopilusya Bwami kuli Bausyi. Aciindi eeco, Bwami bunooli bwacizuzikizya kale ncayanda Jehova, kubikkilizya akugwasya bantu kuti balondoke.—1Kor. 15:24-28; Ciy. 20:1-3.

10. Ino bubuke buyoomupa kulimvwa buti?

¹⁰ Amweezeezye buyo mbocinookkomanisya kwaanzyanya abayandwa banu. Sena lukkomano ndomunoojisi luyoomupa kuseka naa kulila?  Sena muyookkomana kapati akumwiimbila nyimbo zyantembauzyo Jehova? Tacidoonekwi buya kuti tuyooindila kumuyanda Taateesu uubikkila maano alimwi a Mwanaakwe siluyando, balo ibakapa kuti bubuke bukakonzyeke.

11. Kweelana amajwi aa Jesu aali kulugwalo lwa Johane 5:28, 29, ncinzi ciyoocitika kuli baabo bamvwida Leza?

¹¹ Amweezeezye mbobayookkomana aabo ibayoobusyigwa ciindi baakusamununa buntu bwabo bwakaindi akutalika kupona kweelana azyeelelo zya Leza ziluleme. Aabo bayoocinca bukkale bwabo bayoozumizyigwa kupona kukabe kutamani mu Paradaiso. Mpoonya aabo ibatakacinci tabakazumizyigwi kunyonganya luumuno lunooli mu Paradaiso.—Is. 65:20; amubale Johane 5:28, 29.

12. Ino mbuti aabo bayoopona anyika mbobayoolongezyegwa a Jehova?

¹² Mubulelo bwa Bwami, bantu ba Leza boonse bayoolibonena mbwali aamasimpe majwi aali kulugwalo lwa Tusimpi 10:22 aakuti: “Cileleko icizwa kuli Jehova ncecivwubya, alimwi tayungizyi macise kulincico pe.” Kwiinda mukugwasyigwa amuuya uusalala, bantu ba Leza bayoovwuba kumuuya, nkokuti bayooba mbuli Kristo alimwi banooyaabulondoka. (Joh. 13:15-17; Ef. 4:23, 24) Buzuba abuzuba mibili yabo inooyaabubukuluka. Eelo kaka buumi bunookkomanisya! (Job. 33:25) Mbuti kuzinzibala kuyeeya makani aabubuke mbokumugwasya lino?

13. Kweelana alugwalo lwa Intembauzyo 139:1-4, ino bubuke buyootondezya buti kuti Jehova ulituzyi kabotu?

¹³ Mbubwenya mbotwabandika kale, ciindi Jehova aakubabusya bantu, banooyeeya mbubonya mbobakali kuyeeya alimwi tabakacinci bube bwabo. Amuciyeeyele buyo ncocaamba eeci. Jehova ulamuyanda kapati cakuti ulimubwene alimwi ulizizyi zyoonse nzyomuyeeya, mbomulimvwa, nzyomwaamba alimwi anzyomucita. Aboobo kuti naa wamubusya, ulamubusya mbubwenya mbomwakabede. Mwami Davida wakalizyi kuti Jehova ulimuzyi kabotu umwi aumwi wesu. (Amubale Intembauzyo 139:1-4.) Ino tulimvwa buti ciindi notumvwisya kuti Jehova ulituzyi kabotu?

14. Ino tweelede kulimvwa buti ciindi notuzinzibala kuyeeya mbwatuzyi kabotu Jehova?

¹⁴ Ciindi notuzinzibala kuyeeya mbwatuzyi Jehova, tatweelede kulibilika. Nkaambo nzi? Amuyeeye kuti Jehova ulatubikkila maano kapati. Umwi aumwi wesu umubona kuti ulayandika kapati kulinguwe. Ulazibikkila maano zintu zyoonse nzyotucita mubuumi bwesu. Eelo kaka cilakulwaizya eeci! Aboobo tatweelede kulimvwa kuti tuli tolikke. Lyoonse Jehova ulaandiswe, alimwi ulayanda kutugwasya.—2Mak. 16:9.

15. Mbuti bubuke mbobutondezya kuti Jehova musongo kapati?

¹⁵ Kuyoowa lufwu ncilwanyo cilaanguzu kapati. Bantu beendelezyegwa a Saatani balacibelesya cilwanyo eeci kusinikizya bantu kukaka balongwe babo naa kucita cintu cimwi ncobazyi buya kuti taciluzi. Pele cilwanyo eeci tiicazwidilila kulindiswe akaambo kakuti tulizyi kuti nokuba kuti twafwa, Jehova uyootubusya. (Ciy. 2:10) Tulisinizyide kuti kunyina ncobakonzya kucita icikonzya kunyonganya cilongwe cesu a Jehova. (Rom. 8:35-39) Eelo kaka Jehova wakatondezya kuti musongo kapati kwiinda mukutupa bulangizi bwabubuke! Akaambo kaceeci, tatuyoowi ciindi aabo ibeendelezyegwa a Saatani nobatukonga kuti balatujaya akaambo kakukaka kucita nzyobaamba. Alimwi eeci ciyumya busicamba bwesu bwakuzumanana kusyomeka kuli Jehova.

16. Mibuzyo nzi njomweelede kulibuzya, alimwi ino bwiinguzi inga bwamugwasya buti kuzyiba lusyomo ndomujisi muli Jehova?

 ¹⁶ Ikuti basinkondonyina a Jehova bamukonga kumujaya, sena muyooba alusyomo lwakuti Jehova uyoomubusya? Mbuti mbomukonzya kuzyiba naa inga mwamusyoma Jehova aciindi eeco? Nzila imwi nkwiinda mukulibuzya mubuzyo wakuti, ‘Sena nzyondisala abuzuba mutuntu tusyoonto-syoonto zitondezya kuti ndilamusyoma Jehova?’ (Lk. 16:10) Mubuzyo uumbi ngwakuti, ‘Sena buumi mbondipona bulatondezya kuti ndilacisyoma cisyomezyo ca Jehova cakuti unoondilanganya muzintu zyakumubili nzyondiyandika ikuti ndasaanguna kuyandaula Bwami?’ (Mt. 6:31-33) Ikuti bwiinguzi kumibuzyo yoonse eeyi mbwakuti inzya, nkokuti mulatondezya kuti muli aalusyomo muli Jehova, alimwi munoolibambilide kusunko lili lyoonse ilikonzya kumusikila.—Tus. 3:5, 6.

17. (a) Mbuti bubuke mbobutondezya kuti Jehova ulakkazika moyo? (b) Mbuti mbotukonzya kutondezya kulumba akaambo kakukkazika moyo kwakwe?

¹⁷ Jehova ulibikkide kale buzuba alimwi aciindi nayoonyonyoona bweende bwazintu oobu. (Mt. 24:36) Aboobo kunyina nayooleka kukkazika moyo akubweza ntaamu kacitanasika ciindi eeco. Uliyandide kapati kubabusya bafwide, pele ucikkazika moyo. (Job. 14:14, 15) Unoolindila kusikila mane ciindi ceelede cakubabusya cikasike. (Joh. 5:28) Tulijisi twaambo tubotu ncotweelede kumulumba Jehova akaambo kakukkazika moyo kwakwe. Amuyeeye kaambo aaka: Akaambo kakuti Jehova ulakkazika moyo, bantu banji, kubikkilizya andiswe, twakaba aciindi ‘cakukonzya kweempwa.’ (2Pet. 3:9) Jehova uyanda kuti bantu banji babe acoolwe cakuyooba abuumi butamani. Aboobo atutondezye kuti tulalumba akaambo kakukkazika moyo kwakwe. Munzila nzi? Kwiinda mukubeleka canguzu kuyandaula baabo ‘ibalibambilide kutambula buumi butamani’ akubagwasya kuyanda Jehova alimwi akumubelekela. (Mil. 13:48) Kuti twacita oobo, nkokuti bayoogwasyigwa akukkazika moyo kwa Jehova, mbubwenya mbotwakagwasyigwa andiswe.

18. Nkaambo nzi ncotweelede kubakkazikila moyo bamwi?

¹⁸ Kaitanamana myaka iili 1,000 kutegwa tulondoke, Jehova unootukkazikila moyo. Kusikila kuciindi eeco, Jehova ulilibambilide kutulekelela zibi. Aboobo tweelede kutobela  cikozyanyo cakwe kwiinda mukubikkila buyo maano kubube bubotu mbobajisi bamwi alimwi akubakkazikila moyo. Amubone cikozyanyo camucizyi umwi uuli aamulumi iwakaciswa bulwazi bwakulibilika kapati alimwi iwakaleka kujanika kumiswaangano. Mucizyi ooyu wakaamba kuti, “Cakandicisa kapati eeci. Buumi bwesu bwakacinca cakutayeeyela, alimwi tiitwakacili kucita zintu zyoonse nzyotwakali kuyanda kucita mbuli mukwasyi.” Pele mukaintu ooyu siluyando wakazumanana kumukkazikila moyo mulumi wakwe. Wakasyoma Jehova alimwi kunyina naakatyompwa. Mbubwenya mbuli Jehova, kunyina naakali kubikkila maano kupenzi, pele wakali kubikkila maano kubube bubotu bwamulumi wakwe. Wakayungizya kwaamba kuti, “Balumi bangu balijisi bube bubotu kapati, alimwi balasoleka kusikila mpobagolela kulwana penzi ndyobajisi.” Eelo kaka cilayandika kapati kubakkazikila moyo banamukwasyi naa basimbungano aabo ibasoleka kulwana buyumuyumu!

19. Makanze nzi ngotweelede kuba angawo?

¹⁹ Jesu alimwi abangelo bakakondwa ciindi nyika noyakalengwa. Pele amweezeezye buyo mbobayookkomana kubona nyika iizwide bantu balondokede, ibamuyanda alimwi akumubelekela Jehova. Amweezeezye buyo mbobayookkomana aabo ibayakuunka kujulu kuyoolela antoomwe a Kristo ciindi bakubona bantu kabagwasyigwa amulimo wabo. (Ciy. 4:4, 9-11; 5:9, 10) Alimwi amweezeezye buyo buumi mbobunoobede ciindi nokunooli misozi yalukkomano muciindi camisozi yabuumba, ciindi kuciswa, kuusa alimwi alufwu noziyoomanina limwi mane kukabe kutamani. (Ciy. 21:4) Kusikila kuciindi eeco, amube amakanze akwiiya Uso wanu siluyando, musongo alimwi uukkazika moyo. Ikuti mwacita oobo, muyoozumanana kuba alukkomano tacikwe makani amasunko ngomujisi. (Jak. 1:2-4) Eelo kaka tulalumba kapati akaambo kacisyomezyo ca Jehova cakuti, “kuyooba bubuke”!—Mil. 24:15.