CIBALO CAKWIIYA 34
Mulijisi Busena Mumbungano ya Jehova!
“Mbubonya mubili mbouli omwe pele ujisi zizo zinji, alimwi zizo zyoonse izyamubili ooyo nokuba kuti nzinji, mubili omwe, awalo Kristo mbwabede oobo.”—1KOR. 12:12.
LWIIMBO 101 Kubelekela Antoomwe Calukamantano
IZILI MUCIBALO *
1. Ino ncoolwe nzi ncotujisi?
EELO kaka ncoolwe cilibedelede kuba mumbungano ya Jehova! Tuli muparadaiso yakumuuya imuli bantu basiluumuno alimwi ibakkomene. Ino mujisi busena nzi mumbungano?
2. Ncikozyanyo nzi mwaapostolo Paulo ncaakabelesya mumagwalo aakwe manji aakasololelwa amuuya?
2 Tulakonzya kwiiya zinji kujatikizya makani aaya kucikozyanyo mwaapostolo Paulo ncaakabelesya mumagwalo aakwe manji aakasololelwa amuuya. Mumagwalo oonse aaya, Paulo wakakozyanisya mbungano kumubili wamuntu. Alimwi wakakozyanisya bantu ibali mumbungano kuzizo zyamubili.—Rom. 12:4-8; 1Kor. 12:12-27; Ef. 4:16.
3. Nziiyo nzi zyotatwe nzyotutiilange-lange mucibalo eeci?
3 Mucibalo eeci, tulalanga-langa ziiyo ziyandika kapati nzyotukonzya kwiiya kucikozyanyo ca Paulo. Cakusaanguna, tulaiya kuti aumwi ulijisi busena * mumbungano ya Jehova. Cabili, tulaiya ncotukonzya kucita ikuti kacitukatazya kuzyiba busena mbotujisi mumbungano. Catatu, tulaiya kaambo ncotweelede kujata bubi kuzuzikizya lubazu ndotujisi mumbungano ya Leza.
AUMWI ULIJISI LUBAZU MUMBUNGANO YA JEHOVA
4. Ino lugwalo lwa Baroma 12:4, 5 lutuyiisya nzi?
4 Ciiyo cakusaanguna ncotwiiya kuzwa kucikozyanyo ca Paulo ncakuti, aumwi ulijisi lubazu luyandika kapati mumukwasyi wa Jehova. Paulo utalika cikozyanyo cakwe kwiinda mukwaamba kuti: “Mbubonya mumubili omwe mbotujisi zizo zinji, pele zizo zyoonse eezyi tazibeleki mulimo omwe, mbubonya buyo aswebo, nokuba kuti tuli banji, tuli mubili omwe muli Kristo, pele toonse tuli zizonyina kuli umwi aumwi.” (Rom. 12:4, 5) Ino ncinzi ncaakali kupandulula Paulo? Wakali kupandulula kuti aumwi ulijisi mulimo mumbungano, pele toonse tulayandika kapati.
Tujisi masena aayindene-indene mumbungano nokuba boobo toonse tulayandika kapati (Amubone muncali 5-12) *
5. Ino ‘nzipego’ nzi Jehova nzyaakapa mbungano?
5 Toonse tulijisi busena mumbunga ya Jehova, lino atubandike kujatikizya baabo basololela mumbunga. (1Tes. 5:12; Heb. 13:17) Masimpe kuti kwiinda muli Kristo, Jehova wakapa “zipego mubantu” kumbunga yakwe. (Ef. 4:8) “Zipego mubantu” eezyi zibikkilizya bamu Kabunga Keendelezya, basikugwasyilizya bamu Kabunga Keendelezya, bamu Kkomiti Yamutabi, balangizi bamabazu, bamayi bazikolo zyakumuuya, baalu alimwi abakutausi. Bakwesu boonse aaba bakasalwa amuuya uusalala kulanganya mbelele zya Jehova iziyandika kapati alimwi akuyumya mbungano.—1Pet. 5:2, 3.
6. Kweelana alugwalo lwa 1 Batesalonika 2:6-8, ncinzi bakwesu basalidwe amuuya uusalala ncobasolekesya kucita?
6 Bakwesu balasalwa amuuya uusalala kutegwa balanganye mikuli iindene-indene. Mbubwenya zizo ziindene-indene zyamubili, mbuli maanza alimwi amaulu mbozibelekela antoomwe kugwasya mubili woonse, bakwesu ibasalwa amuuya uusalala balabeleka canguzu kutegwa bagwasye mbungano yoonse. Kunyina nobasola kuliyandawida bulemu. Muciindi caboobo, balasolekesya kubakulwaizya alimwi akubayumya Banakristonyina. (Amubale 1 Batesalonika 2:6-8.) Eelo kaka tulamulumba Jehova akaambo kabakwesu aaba beelela ibabikka nzyobayandika bamwi mubusena bwakusaanguna!
7. Nzilongezyo nzi njobajana banji ibali mumulimo waciindi coonse?
7 Bamwi mumbungano balakonzya kusalwa kubeleka kabali bamisyinali, bapainiya baalubazu naa bapainiya baciindi coonse. Alimwi buya, bakwesu abacizyi bamwi munyika yoonse bakasala kunjila mulimo waciindi coonse kutegwa bakambaukile bantu akubagwasya kuba basikwiiya. Kwiinda mukucita boobo, bagwasya bantu banji kuba basikwiiya ba Kristo Jesu. Nokuba kuti bunji bwababelesi baciindi coonse aaba tabajisi zintu zinji zyakumubili, Jehova wabagwasya azintu zinji nzyobayandika. (Mk. 10:29, 30) Tulabayanda kapati bakwesu abacizyi aaba alimwi tulalumba kuti bali mumbungano!
8. Nkaambo nzi sikumwaya wamakani mabotu uuli woonse ncayandika kapati kuli Jehova?
8 Sena bakwesu ibapedwe mikuli alimwi abaabo ibali mumulimo waciindi coonse mbambabo balikke bajisi busena mumbungano? Peepe! Sikumwaya makani mabotu uuli woonse ulayandika kapati kuli Leza alimwi akumbungano. (Rom. 10:15; 1Kor. 3:6-9) Alimwi buya, makanze mapati aambungano ngakugwasya bantu kuba basikwiiya ba Mwami wesu Jesu Kristo. (Mt. 28:19, 20; 1Tim. 2:4) Bakambausi boonse, babbapatizyidwe alimwi abaabo batanabbapatizyigwa, balasoleka kubikka mulimo ooyu mubusena bwakusaanguna.—Mt. 24:14.
9. Nkaambo nzi ncotubayanda kapati bacizyi Banakristo?
9 Jehova ulabalemeka bacizyi Banakristo kwiinda mukubapa busena mumbungano. Ulabayanda kapati bamakaintu, bamatumbu, bamukabafwu alimwi abacizyi batakwetwe ibamubelekela cakusyomeka. Bbaibbele lilaamba zikozyanyo zinji zyabamakaintu ibakamukkomanisya Leza. Balalumbaizyigwa kapati akaambo kacikozyanyo cabo cabusongo, lusyomo, busungu, busicamba, bwaabi alimwi amilimo mibotu. (Lk. 8:2, 3; Mil. 16:14, 15; Rom. 16:3, 6; Flp. 4:3; Heb. 11:11, 31, 35) Eelo kaka tulamulumba kapati Jehova akaambo kabamakaintu Banakristo mbotujisi mumbungano yesu, ibajisi bube bubotu kapati ibukozyenye aboobo mbobakajisi bamakaintu ibaambidwe mu Bbaibbele!
10. Nkaambo nzi ncotubayanda kapati ibacembeede?
10 Tulilongezyedwe kapati akaambo kakuba abacembeede banji mumbungano. Mumbungano zimwi muli bakwesu alimwi abacizyi bacembeede ibamubelekela Jehova cakusyomeka mubuumi bwabo boonse. Ibacembeede bamwi ambweni bakakaiya caino-ino kasimpe. Bunji bwabacembeede aaba balaciswa-ciswa akaambo kakucembaala. Akaambo kakuciswa-ciswa ooku, cilakonzya kubakatazya kucita zinji mumbungano alimwi amumulimo wakukambauka. Nokuba boobo, balabeleka kusikila mpobagolela mumulimo wakukambauka alimwi balabelesya nguzu zyabo zyoonse kukulwaizya akuyiisya bamwi! Kuyungizya waawo, tulagwasyigwa kapati akaambo kaluzyibo lwabo. Balayandika kapati kuli Jehova akulindiswe.—Tus. 16:31.
11-12. Mbuti mbomukulwaizyigwa abakubusi mbomujisi mumbungano yanu?
11 Amuyeeye alimwi kujatikizya bakubusi mbotujisi mumbungano. Balajana buyumuyumu bunji munyika eeyi yeendelezyegwa a Saatani Diabolosi alimwi akuyungwa amizeezo yakwe mibyaabi. (1Joh. 5:19) Nokuba boobo, toonse tulakulwaizyigwa ciindi notubabona kabapa bwiinguzi lyamiswaangano, nobatola lubazu mumulimo wakukambuka alimwi anobatondezya busicamba kwiiminina nzyobasyoma. Masimpe, nywebo nobakubusi mulijisi busena buyandika kapati mumbungano ya Jehova!—Int. 8:2.
12 Nokuba boobo, bakwesu abacizyi bamwi cilabakatazya kusyoma kuti balayandika kapati mumbungano. Ncinzi cikonzya kumugwasya umwi aumwi wesu kulimvwa kuti ulijisi busena mumbungano? Atubone.
MULIJISI BUSENA MUMBUNGANO
13-14. Nkaambo nzi bamwi ncobakonzya kulimvwa kuti tabayandiki mumbungano?
13 Amubone ciiyo cabili ncotwiiya kuzwa kucikozyanyo ca Paulo. Wakaamba penzi ndyobajisi banji mazuba aano; cilabakatazya kusyoma kuti balayandika kapati mumbungano. Wakalemba kuti: “Ikuti kuulu kwaamba kuti, ‘Akaambo kakuti tandili janza, mebo tandili cibeela camubili pe,’ aaka kaambo takakonzyi kupa kuti kuulu kutabi cibeela camubili pe. Alimwi ikuti kutwi kwaamba kuti, ‘Akaambo kakuti tandili liso, mebo tandili cibeela camubili pe,’ aaka kaambo takakonzyi kupa kuti kutwi kutabi cibeela camubili pe.” (1Kor. 12:15, 16) Ncinzi Paulo ncatuyiisya?
14 Ikuti mwatalika kulyeezyanisya abamwi mumbungano, mulakonzya kutalika kulibona kuti tamuyandiki. Bamwi mumbungano inga kabajisi cipego cakuba bamayi babotu, beendelezya kabotu zintu naa beembezi bacibwene. Kuti kamulimvwa kuti tamujisi zipego zyoonse eezyi mbuli mbabo, citondezya kuti mulalicesya alimwi akulibombya. (Flp. 2:3) Pele mweelede kucenjela. Kuti lyoonse kamulyeezyanisya abaabo bajisi zipego, muyootyompwa. Muyoolimvwa kuti tamujisi busena mumbungano. Ncinzi cikonzya kumugwasya kulwana buyumuyumu buli boobu?
15. Kweelana alugwalo lwa 1 Bakorinto 12:4-11, ncinzi ncotweelede kuyeeya kujatikizya zipego nzyotukonzya kuba anzizyo?
15 Amubone kaambo aaka kamasimpe: Jehova wakapa Banakristo bamwi bamumwaanda wamyaka wakusaanguna cipego camaleele camuuya uusalala, pele tabali Banakristo boonse ibakatambula zipego zikozyenye. (Amubale 1 Bakorinto 12:4-11.) Jehova wakabapa zipego ziindene-indene alimwi anguzu, pele boonse bakali kuyandika. Mazuba aano, tatujisi zipego zyamaleele zyamuuya uusalala. Pele tubelesya njiisyo. Toonse tatukonzyi kuba azipego zikozyenye, pele toonse tulayandika kapati kuli Jehova.
16. Ndulayo nzi luzwa kumwaapostolo Paulo ndotweelede kutobela?
16 Muciindi cakulyeezyanisya abamwi tweelede kutobela lulayo lwamwaapostolo Paulo lwakasololelwa amuuya lwakuti: “Umwi aumwi alingule nzyacita lwakwe mwini, mpoonya ulajana kaambo kamupa kukondwa lwakwe mwini, ikutali akaambo kakulyeezyanya amuntu uumbi.”—Gal. 6:4.
17. Ino inga twagwasyigwa buti kuti twalutobela lulayo lwa Paulo?
17 Ikuti twalutobela lulayo lwa Paulo ilwakasololelwa amuuya alimwi akulingula milimo yesu, tuyoobona kuti tulijisi zipego zilibedelede alimwi tulakonzya kucita zintu zimwi. Mucikozyanyo, mwaalu ulakonzya katajisi cipego cakuyiisya ciindi nali acibumbili, pele ulakonzya kuti kacita kabotu mumulimo wakugwasya bantu kuba basikwiiya. Naa ambweni taciti zintu munzila yabulondo mbuli baalu bamwi mumbungano, pele ulakonzya kazyibidwe kuti mweembezi siluyando ooyo basikumwaya ngobaangulukide kulomba lulayo lwamu Magwalo. Ambweni ulakonzya kuti kajisi cikozyanyo cibotu kujatikizya kusamausya. (Heb. 13:2, 16) Ciindi notubona mbotucikonzya kucita zintu alimwi azipego nzyotujisi, tuyooba atwaambo tubotu tuyootupa kulimvwa kabotu alimwi akugwasya mbungano. Alimwi tatukabafwidi munyono bakwesu ibajisi zipego ziindene anzyotujisi.
18. Mbuti mbotukonzya kuba bamayi bacibwene?
18 Kufwumbwa naa tujisi busena buli buti mumbungano, toonse tweelede kuba amakanze aakuyaambele mumulimo wesu alimwi akuba mwiiyi uucibwene. Kutegwa atugwasye kuyaambele, Jehova watupa lwiiyo lubotu kapati kwiinda mumbunga yakwe. Mucikozyanyo, lyamuswaangano wamukati kansondo, tulatambula malailile aatugwasya kubona mbotukonzya kuba basungu mumulimo wesu wakukambauka. Sena mulalubelesya lwiiyo ndomutambula kumuswaangano ooyu?
19. Mbuti mbomukonzya kwaazuzikizya makanze aanu aakunjila Cikolo Cabakambausi ba Bwami?
19 Cikolo Cabakambausi ba Bwami, ndwiiyo alumbi lukkomanisya kapati. Ibakonzya kunjila cikolo eeci mbakwesu alimwi abacizyi ibali mumulimo waciindi coonse alimwi ibajisi myaka yakuzyalwa iili akati-kati ka 23 a 65. Ambweni mulakonzya kulimvwa mbuli kuti tamukonzyi kucinjila cikolo eeci. Muciindi cakulemba mulongo watwaambo itumupa kulimvwa kuti tamukonzyi kucinjila, amulembe twaambo itumupa kuyanda kucinjila cikolo eeci. Mpoonya amujane nzila izikonzya kumugwasya kutegwa mweelele kulembela. Kwiinda mukugwasyigwa a Jehova alimwi akubeleka canguzu kwanu, mulakonzya kucita cintu ncomwali kuyeeyela kuti inga tacikonzyeki.
AMUZIBELESYE ZIPEGO ZYANU KUYAKA MBUNGANO
20. Ncinzi ncotwiiya kulugwalo lwa Baroma 12:6-8?
20 Ciiyo catatu ncotwiiya kuzwa kucikozyanyo ca Paulo cijanika kulugwalo lwa Baroma 12:6-8. (Amubale.) Mulugwalo oolu, Paulo utondezya kuti aabo ibali mumbungano balijisi zipego ziindene. Pele aawa ukulwaizya kuti tweelede kucibelesya cipego cili coonse ncotujisi kuyaka alimwi akuyumya mbungano.
21-22. Nciiyo nzi ncotukonzya kwiiya kuli ba Robert alimwi aba Felice?
21 Atulange-lange cikozyanyo camukwesu Robert. Wakali kubelekela kucisi cimbi, mpoonya wakatumwa kuyoobelekela ku Beteli mucisi cokwabo. Nokuba kuti bakwesu bakamwaambila kuti kunyina cibi ncaakacita, mukwesu Robert wakaamba kuti: “Tiindakakkomene kwamyezi minji nkaambo ndakali kuyeeya kuti ndakaalilwa kuubeleka kabotu mulimo wangu. Kuli ziindi nondakali kuyeeya kuzwa a Beteli.” Ino mbuti mbwaakaba alukkomano alimwi? Mwaalunyina wakamuyeezya kuti Jehova wakatuyiisya mulimo uuli woonse ngotwakali kubeleka musyule kutegwa tucikonzye kuzuzikizya mulimo ngotubeleka lino. Mukwesu Robert wakabona kuti wakeelede kuleka kuyeeya zintu izyakacitika musyule akutalika kubikkila maano kuzintu nzyakonzya kucita lino.
22 Mukwesu Felice Episcopo awalo wakajana buyumuyumu bukozyenye aboobu. Walo abakaintu bakwe bakamanizya cikolo ca Gileadi mu 1956 akubeleka mulimo wamubbazu ku Bolivia. Mu 1964 bakaba amwana. Ba Felice bakaamba kuti: “Cakatukatazya ncobeni kuleka mulimo ngotwakali kuyanda kapati. Inga ndaamba kuti wakakkwana mwaka kandityompedwe kapati. Pele kwiinda mukugwasyigwa a Jehova, ndakacinca mbondakali kuzilanga zintu akubikkila maano kumukuli mupya wakuba muzyali.” Sena andinywe mulimvwa mbuli ba Robert naa ba Felice? Sena mulityompedwe akaambo kakuti lino tamujisi mikuli mbuli njomwakajisi musyule? Kuti naa mbocibede oobo, muyookkomana ikuti mwacinca mbomuyeeya akutalika kubikkila maano kuzintu nzyomukonzya kucita lino, nkokuti kubelekela Jehova alimwi abakwesu. Amujate bubi kuzibelesya zipego nzyomujisi alimwi aluzyibo kutegwa mugwasye bamwi, mpoonya muyoojana lukkomano ciindi nomuyaka mbungano.
23. Ino ncinzi ncotweelede kucita alimwi ncinzi ncotuyoolanga-langa mucibalo citobela?
23 Umwi aumwi wesu ulayandika kapati kuli Jehova. Uyanda kuti katuli cibeela camukwasyi wakwe. Ikuti twazinzibala kuyeeya zintu nzyotukonzya kucita kutegwa tuyake bakwesu abacizyi alimwi akubeleka canguzu kutegwa tuzizuzikizye, tuyooleka kulimvwa kuti tatujisi busena mumbungano! Pele ino mbuti kujatikizya mbotubabona bamwi mumbungano? Mbuti mbotukonzya kutondezya kuti tulabalumba? Mucibalo citobela, tuyakwaalanga-langa makani aaya aayandika kapati.
LWIIMBO 24 Amuboole Kucilundu ca Jehova
^ munc. 5 Toonse tulayanda kulimvwa kuti tuzulilwa kuli Jehova. Pele zimwi ziindi, tuladooneka naa tulijisi busena mumbungano. Cibalo eeci cilatugwasya kuzyiba kuti aumwi ulijisi busena mumbungano.
^ munc. 3 BUPANDULUZI BWAMABALA: Busena mbotujisi mumbungano ya Jehova caamba lubazu ndotujisi mukuyaka alimwi akuyumya mbungano. Tabuyeeme amusyobo, mali ngotujisi, mukwasyi nkotuzwa, zilengwa naa lwiiyo ndotujisi.
^ munc. 62 BUPANDULUZI BWACIFWANIKISO: Zifwanikiso zyotatwe zitondezya zintu zicitika kautanatalika muswaangano wambungano, noucitwa alimwi anowamana. Cifwanikiso 1: Mwaalu waanzya mweenzu, mukwesu uucili mwana-mwana usola mamaikulofooni mpoonya mucizyi ulabandika amucizyi uucembeede. Cifwanikiso 2: Bana alimwi abapati bapa bwiinguzi lyaciiyo ca Ngazi Yamulindizi. Cifwanikiso 3: Banabukwetene batola lubazu mukusalazya Ŋanda ya Bwami. Muzyali ugwasya mwanaakwe kubikka cakusanga mukabbokesi kakusangila. Mukwesu uucili mwana-mwana upukuta mabbuku mpoonya mukwesu mupati ukulwaizya mucizyi uucembeede.
