1. Makani nzi ngomwakaiya kujatikizya Mulengi?

IKUTI naa mwakakomezyegwa kamuli umwi wa Bakamboni ba Jehova, mweelede kuti mwakaiya kujatikizya Jehova kamuli baniini. Mwakayiisyigwa kuti Jehova Mulengi, uli abube bubotu, alimwi ujisi makanze mabotu kujatikizya bantu.—Matl. 1:1; Mil. 17:24-27.

2. Ino bantu bamwi bababona buti aabo ibasyoma mu Mulengi?

² Bantu banji tabasyomi kuti Leza nkwali, naa kuti ngowakalenga zintu zyoonse. Muciindi caboobo, basyoma kuti buumi bwakalitalikila buya, alimwi akuti asyoonto-syoonto bwakatalika kuzwa kutuntu tusyoonto tupona kusikila mane zyaakuba zintu zipati zipona. Bantu bamwi ibasyoma boobo, mbantu bayiide kapati. Baamba kuti sayaansi ilatondezya kuti Bbaibbele taliluzi alimwi akuti bantu basyoma mu Mulengi, mbantu batayiide alimwi ibatakwe busongo.

3. Nkaambo nzi ncociyandika kuyumya lusyomo lwesu?

³ Sena zintu nzyobaamba bantu bamwi ibayiide kapati, zilakonzya kutupa kuleka kusyoma kuti Jehova Mulengi wesu siluyando? Eeci ciyeeme akaambo kapati katupa kusyoma kuti Jehova Mulengi. Sena cili boobo akaambo kakuti twakaambilwa kuti tweelede kusyoma oobo, naa akaambo kakuti swebo tobeni twakajana ciindi cakulanga-langa bumboni? (1Kor. 3:12-15) Tacikwe makani naa twali umwi wa Bakamboni kwaciindi cilamfwu, toonse tweelede kuzumanana kuyumya lusyomo lwesu. Kwiinda mucita boobo, tatukacengwi ‘abusongo bwabantu alweeno’ ibuyiisyigwa abantu ibakazya Jwi lya Leza. (Kol. 2:8; Heb. 11:6) Kutegwa tugwasyigwe mucibalo eeci tulanga-langa (1) kaambo banji ncobatasyomi mu Mulengi, (2) mbomukonzya kuyumya lusyomo lwanu muli Jehova, Mulengi wanu, alimwi (3) mbomukonzya kuyumya lusyomo lwanu.

4. Kweelana alugwalo lwa Bahebrayo 11:1 alimwi abupanduluzi buyungizyidwe, ino lusyomo lwini-lwini luyeeme anzi?

⁴ Bamwi bayeeya kuti kuba alusyomo caamba buyo kusyoma cintu kakunyina abumboni. Pele kweelana a Bbaibbele, oolu taluli lusyomo lwini-lwini. (Amubale Bahebrayo 11:1 alimwi abupanduluzi buyungizyidwe.) Bbaibbele lipandulula kuti lusyomo luyeeme abumboni. Aboobo nokuba kuti tatukonzyi kumubona Jehova, Jesu, alimwi a Bwami, tulijisi bumboni busalede bwakuti eezyi nzintu zini-zini. (Heb. 11:3) Kamboni umwi syaazibwene musayaansi wakaamba kuti: “Zintu nzyobasyoma Bakamboni ba Jehova kuli mpoziyeeme, pesi ayalo sayaansi balaisyoma.”

5. Nkaambo nzi bantu banji ncobasyoma kuti buumi bwakalitalikila buya?

⁵ Tulakonzya kubuzya kuti, ‘Kuti naa kuli bumboni butondezya kuti kuli Mulengi, nkaambo nzi bantu banji ncobasyoma kuti Leza tali nguwe wakalenga buumi?’ Bamwi kunyina nobakabulanga-langa bumboni lwabo beni. Ba Robert, lino uuli ngumwi wa Bakamboni ba Jehova, baamba kuti: “Mbwaanga makani aakulenga tanaakali kubandikwa muzikolo, mebo ndakali kuyeeya kuti taali aamasimpe. Nindakajisi myaka yakuma 20, ndendilyo nindakabandika a Bakamboni ba Jehova alimwi akwiiya kuti Bbaibbele lilapa twaambo tulimvwisya itupa kusyoma kuti Leza nguwakalenga zintu zyoonse.” *—Amubone kabbokesi kakuti “ Majwi Kubazyali.”

6. Nkaambo nzi bamwi ncobatasyomi mu Mulengi?

⁶ Bamwi tabasyomi mu Mulengi, nkaambo baamba kuti basyoma buyo muzintu nzyobakonzya kubona. Pele mubwini  balasyoma muzintu nzyobatakonzyi kubona, mucikozyanyo, muya, nkaambo baamba kuti kuli bumboni butondezya kuti nkouli ncobeni. Musyobo walusyomo lwaambidwe mu Bbaibbele, awalo uyeeme “azintu zitalibonyi.” (Heb. 11:1) Cilatola ciindi alimwi ciyandika kubeleka canguzu kutegwa twiiye kujatikizya bumboni, amana buya bantu tabayandi kwiiya kujatikizya bumboni. Muntu uutayandi kuliyiisya lwakwe mwini kujatikizya bumboni, ulakonzya kuyeeya kuti kunyina Leza.

7. Sena bantu boonse bayiide tabazumini kuti Leza nguwakalenga zintu zyoonse? Amupandulule.

⁷ Nobakamana kwiiya kujatikizya bumboni, basayaansi bamwi bakasyoma kuti Leza nguwakalenga zintu zyoonse. * Mbubwenya mbuli ba Robert ibaambidwe kale, bamwi bayeeya  buyo kuti kunyina Mulengi nkaambo mumayunivesiti tabayiisyi kujatikizya Mulengi. Nokuba boobo, basayaansi banji bakamuzyiba alimwi akumuyanda Jehova. Mbubwenya mbobakacita basayaansi aaba, toonse tweelede kuyumya lusyomo lwesu muli Leza tacikwe makani alwiiyo ndotujisi. Kunyina muntu uukonzya kutuyumizyila lusyomo.

8-9. (a) Mubuzyo nzi ngotutiilange-lange lino? (b) Ino makani aajatikizya zilenge inga amugwasya buti?

⁸ Mbuti mbomukonzya kuyumya lusyomo lwanu mu Mulengi? Lino atulange-lange nzila zyone.

⁹ Amwiiye kujatikizya zilenge. Mulakonzya kuyumya lusyomo lwanu mu Mulengi kwiinda mukulangilila banyama, zisyango alimwi anyenyezi. (Int. 19:1; Is. 40:26) Mbumuyaabwiiya kujatikizya zintu eezyi, muyoosinizya kuti Jehova Mulengi. Mabbuku eesu kanji-kanji alijisi zibalo zipandulula bube bwiindene-indene bwazilenge. Mutanoozisotoki zibalo eezyi nokuba kuti zilakatazya kumvwisya. Amwiiye nzyomukonzya. Mulakonzya kweebelela mavidiyo eesu mabotu aajatikizya zilenge aajanika aa webbusaiti yesu ya jw.org, alo akeebelelwa ino-ino lyamiswaangano yesu yacooko.

10. Amupe cikozyanyo icitondezya kuti kuli Mulengi. (Baroma 1:20)

¹⁰ Cindi nomwiiya kujatikizya zilenge, amubikkile maano kapati kutwaambo ntomukonzya kwiiya kujatikizya Mulengi. (Amubale Baroma 1:20.) Mucikozyanyo, zuba lipa kuti katukasaalilwa alimwi amumuni uupa kuti kakuli buumi anyika, pele mitungazuba imwi iizwa kuzuba mibyaabi kapati. Swebo tobantu tweelede kukwabililwa kuzwa kumitungazuba eeyi. Alimwi buya tulikwabilidwe. Munzila nzi? Kuli cibeela camuya ikuzinguluka nyika, calo citukwabilila kuzwa kumitungazuba eeyi mibyaabi. Ciindi mitungazuba eeyi mibyaabi noyaba aanguzu kapati, acalo cibeela camuya eeci icitukwabilila cilakomena. Lino, sena tamuzumini kuti kuli Mulengi siluyando alimwi musongo iwakabikka bubambe oobu?

11. Nkuli nkomukonzya kujana makani aakonzya kuyumya lusyomo lwanu? (Amubone kabbokesi kakuti “ Zibelesyo Zimwi Zikonzya Kumugwasya Kuyumya Lusyomo.”)

¹¹ Mulakonzya kujana makani manji aakonzya kuyumya lusyomo lwanu mu Mulengi kwiinda mukubelesya Watch Tower Publications Index alimwi akuvwuntauzya a jw.org. Mulakonzya kutalika kwiinda mukubala zibalo alimwi akweebelela mavidiyo aali mucibeela cakuti “Sena Cakalengwa Buya?” Eezyi zibalo alimwi amavidiyo nzifwaafwi pesi zilapandulula makani aakkomanisya kujatikizya zilenge. Alimwi zilaamba azikozyanyo nzyobaamba basayaansi zyalo nzyobaiya kuzwa kuzilenge.

12. Ciindi notwiiya Bbaibbele, ntwaambo nzi tumwi ntotweelede kubikkila kapati maano?

¹² Amwiiye Bbaibbele. Syaazibwene musayaansi waambidwe mumuncali wane kumatalikilo tanaakali kusyoma kuti kuli Mulengi. Nokuba boobo, mukuya kwaciindi wakatalika kusyoma kuti kuli Mulengi. Waamba kuti: “Lusyomo lwangu tiilwakayeeme buyo azintu nzyondakali kwiiya musayaansi. Pele alimwi lwakayeeme azintu nzyondakali kwiiya cakulomya kuzwa mu Bbaibbele.” Ambweni mulijisi kale luzyibo lwini-lwini lwanjiisyo zyamu Bbaibbele. Nokuba boobo, kutegwa muyumye lusyomo lwanu mu Mulengi mweelede kuzumanana kwiiya Jwi lya Leza. (Jos. 1:8; Int. 119:97) Mucikozyanyo amubone Bbaibbele mbolizipandulula kabotu-kabotu zintu zyakacitika kaindi. Amubikkile maano kubusinsimi alimwi akweendelana kwamakani aali mumo. Kucita boobo kulakonzya kuyumya lusyomo lwanu mu Mulengi siluyando alimwi  musongo ooyo wakapa kuti Bbaibbele lilembwe. *—2Tim. 3:14; 2Pet. 1:21.

13. Ncikozyanyo nzi comwe cabusongo icijanika mu Jwi lya Leza?

¹³ Ciindi nomwiiya Jwi lya Leza amubone lulayo luli mulindilyo mbolugwasya. Mucikozyanyo, kaindi Bbaibbele lyakacenjezya kuti kuciindizya kuyandisya mali nkubyaabi alimwi kuletela “macise manji.” (1Tim. 6:9, 10; Tus. 28:20; Mt. 6:24) Sena kucenjezya ooku kucibeleka amazuba aano? Bbuku limwi lipandulula bube bwabantu mazuba aano lyaamba kuti: “Ziindi zinji bantu ibasyoma kuti kuba amali manji ncintu ciyandika kapati mubuumi, tabakkomene alimwi balityompedwe. Nobaba baabo ibayandisya kujana mali manji tabakkomene alimwi balangilwa kuciswa.” Aboobo, nkokuti ncenjezyo yamu Bbaibbele yakuti tatweelede kuciindizya kuyandisya mali nimbotu kapati. Sena kuli njiisyo zyamu Bbaibbele zimwi izyakamugwasya? Ciindi notulukkomanina lulayo lwamu Bbaibbele, ndendilyo notuyoogwasyigwa abusongo mbwatupa Mulengi wesu siluyando. (Jak. 1:5) Kuti twacita oobo, tunookkomene mubuumi.—Is. 48:17, 18.

14. Ino kwiiya Bbaibbele kuyoomugwasya buti kumuzyiba kabotu-kabotu Jehova?

¹⁴ Amwiiye Bbaibbele kamujisi makanze aakumuzyiba kabotu Jehova. (Joh. 17:3) Ciindi nomwiiya Magwalo, muyoobuzyiba bube bwa Jehova bwalo bulibonya muzilenge. Kwiiya kujatikizya bube bwa Jehova, kutupa kusinizya kuti nkwali ncobeni. (Kul. 34:6, 7; Int. 145:8, 9) Ciindi nomumuzyiba kabotu-kabotu Jehova, lusyomo alimwi aluyando lwanu ziyooyuma.

15. Mbuti mbomukonzya kugwasyigwa kwiinda mukwaambila bamwi zyalusyomo lwanu?

¹⁵ Amwaambile bamwi zyalusyomo lwanu muli Leza. Ciindi nomucita boobo, lusyomo lwanu luyooyuma. Pele ino kuti muntu ngomukambaukila wadooneka naa Leza nkwali alimwi tamuzyi cakwaamba? Amusole kujana bwiinguzi bwamu Magwalo kuzwa mumabbuku eesu, akubandika amuntu ooyo. (1Pet. 3:15) Alimwi mulakonzya kulomba lugwasyo kuzwa kuli Kamboni umwi uusimide. Kufwumbwa naa muntu ooyo ulabuzumina bwiinguzi bwamu Bbaibbele naa pe, nywebo mulagwasyigwa akaambo kakuvwuntauzya. Lusyomo lwanu lulayuma. Alimwi akaambo kaceeci, tamukacengwi amizeezo yabantu balibonya kuti mbasongo naa baliyiide aabo ibatasyomi kuti kuli Mulengi.

16. Ncinzi cikonzya kucitika kuti mwacileka kuyumya lusyomo lwanu?

¹⁶ Tacikwe makani abulamfwu bwaciindi ncotwamubelekela Jehova, tweelede kuzumanana kuyumya lusyomo lwesu mulinguwe. Nkaambo nzi? Nkaambo kuti naa tiitwacenjela lusyomo lwesu lulakonzya kumana. Kamuyeeya kuti, lusyomo mbumboni bwazintu zini-zini zitalibonyi. Ncuuba-uba kuziluba zintu nzyotutaboni. Nkakaambo kaako, Paulo wakaamba kuti kubula lusyomo “ncibi cifwambaana kutuzambaila.” (Heb. 12:1) Aboobo, ino mbuti mbotukonzya kuluyumya lusyomo lwesu?—2Tes. 1:3.

17. Ncinzi cikonzya kutugwasya kuba alusyomo luyumu?

¹⁷ Cakusaanguna, amulombe muuya uusalala wa Jehova, alimwi kamucita oobo lyoonse. Nkaambo nzi? Nkaambo muuya uusalala ncibeela camucelo wamuuya uusalala. (Gal. 5:22, 23) Tatukonzyi kuyumya lusyomo lwesu  mu Mulengi kakunyina kugwasyigwa amuuya wakwe uusalala. Kuti twazumanana kulomba muuya uusalala wa Jehova, uyootupa. (Lk. 11:13) Mubwini, tweelede kupaila kuti: “Kotuyungizyila lusyomo.”—Lk. 17:5.

18. Kweelana a Intembauzyo 1:2, 3, ncoolwe nzi ncotukonzya kuba ancico?

¹⁸ Kuyungizya waawo, kamubala Jwi lya Leza lyoonse. (Amubale Intembauzyo 1:2, 3.) Ciindi ntembauzyo eeyi noyakalembwa, mbasyoonto bana Israyeli bakajisi Mulawo wa Leza uukkwene. Nokuba boobo, bami alimwi abapaizi bakali kucikonzya kubweza mabbuku amwi aa Jwi lya Leza. Alimwi lyoonse kuti naa yakkwana myaka iili ciloba, kwakali kubikkwa bubambe bwakuti “baalumi, bamakaintu, alimwi abana,” baswiilile ciindi noubalwa Mulawo wa Leza. (Dt. 31:10-12) Mumazuba aa Jesu, mbasyoonto bakaajisi mabbuku aaya, mabbuku manji akali kuyobwedwa muzikombelo. Mukwiimpana, mazuba aano, bantu banji balakonzya kulibala Jwi lya Leza. Eelo kaka eeci ncoolwe cipati! Mbuti mbotukonzya kutondezya kulumba kucoolwe eeci?

19. Ncinzi ncotweelede kucita kutegwa tuyumye lusyomo lwesu?

¹⁹ Tulakonzya kutondezya kuti tulalumba kucoolwe eeci, kwiinda mukulibala Jwi lya Leza lyoonse. Tweelede kuba amulongo wakwiiya alimwi akubala Bbaibbele, ikutali buyo leelyo notujisi ciindi. Kuti twazumanana kuutobela mulongo ooyo, tuyoozumanana kuyumya lusyomo lwesu.

20. Ino tweelede kuba amakanze aali buti?

²⁰ Mukwiimpana ‘abasongo alimwi abacenjede’ bamunyika eeyi, tuyooba alusyomo luyumu luyeeme abumboni bwa Jwi lya Leza. (Mt. 11:25, 26) Bbaibbele lilatwaambila kaambo zintu munyika ncoziyaabwiindila buya kubija, alimwi akuti Jehova uyoobweza ntaamu. Aboobo atube amakanze akuyumya lusyomo lwesu alimwi akugwasya bantu banji kuba alusyomo mu Mulengi. (1Tim. 2:3, 4) Alimwi atuzumanane kulanga kumbele ciindi bantu boonse ibapona anyika nobayoomutembaula Jehova alimwi akwaamba majwi aali mulugwalo lwa Ciyubunuzyo 4:11 aakuti: “Uleelela, Jehova, O Leza wesu, ikutambula bulemu . . . nkaambo nduwe wakalenga zintu zyoonse.”