CIBALO CAKWIIYA 33
Jehova Ulabalanganya Bantu Bakwe
“Liso lya Jehova lilangide baabo bamuyoowa.”—INT. 33:18.
LWIIMBO 4 “Jehova Mweembezi Wangu”
IZILI MUCIBALO *
1. Nkaambo nzi Jesu ncaakalomba Jehova kuti abakwabilile basikumutobela?
BUSIKU katanafwa, Jesu wakalomba Bausyi bakujulu cintu cimwi cilibedelede. Wakalomba kuti abakwabilile basikumutobela. (Joh. 17:15, 20) Masimpe kuti Jehova lyoonse ulababikkila maano, kubalanganya alimwi akubakwabilila bantu bakwe. Nokuba boobo, Jesu wakalizyi kuti basikumutobela bakali kuyookazyigwa citaambiki a Saatani. Aboobo wakabona kuti bakali kuyandika kugwasyigwa a Jehova kutegwa bamukazye Diabolosi.
2. Kweelana a Intembauzyo 33:18-20, nkaambo nzi ncotuteelede kwaayoowa mapenzi?
2 Munyika eeyi yeendelezyegwa a Saatani, Banakristo bakasimpe balajana mapenzi manji. Tulajana mapenzi aakonzya kututyompya alimwi buya akusunka lusyomo lwesu muli Jehova. Pele kweelana ambotutiibone mucibalo eeci, tatweelede kuyoowa pe. Jehova ulatukwabilila, ulibubwene buyumuyumu mbotujana, alimwi lyoonse ulilibambilide kutugwasya kubuzunda. Lino atulange-lange zikozyanyo zyobilo zyamu Bbaibbele izitondezya kuti Jehova ‘ulababikkila maano aabo bamuyoowa.’—Amubale Intembauzyo 33:18-20.
CIINDI NOTULIMVWA KUBULA MUGWASYI
3. Ncinzi cikonzya kutupa kulimvwa kubula mugwasyi?
3 Nokuba kuti tuli cibeela camukwasyi mupati wabakombi, zimwi ziindi tulakonzya kulendelelwa. Mucikozyanyo, bakubusi balakonzya kulimvwa kubula mugwasyi ciindi nobapandulwida basicikolonyina nzyobasyoma naa nobalongela kumbungano mpya. Andiswe tulakonzya kulimvwa kubula mugwasyi naa kupenga akaambo kakulimvwa bubi notuyeeya kuti tulakonzya kwaalwana mapenzi aayo tolikke. Tulakonzya kuwayawaya kubandika abamwi katuyeeya kuti tabakonzyi kutumvwisya. Pele, zimwi ziindi tulakonzya kudooneka naa kuli batubikkila maano. Kufwumbwa naa ncinzi citupa kulimvwa kubula mugwasyi, tulakonzya kulibilika. Jehova tayandi kuti katulimvwa boobo. Nkaambo nzi ncotukonzya kwaamba boobo?
4. Nkaambo nzi musinsimi Elija ncaakaamba kuti: “Ndasyaala buyo endikke”?
4 Atulange-lange cikozyanyo camwaalumi uusyomeka Elija. Jezebeli wakakanzide kumujaya, aboobo kwamazuba aa 40, wakali kuyaabutija. (1Bam. 19:1-9) Mpoonya, kali mumpangala alikke, wakamulilila Jehova akwaamba kuti: “Ndasyaala buyo endikke.’’ (1Bam. 19:10) Nokuba boobo, kwakali abasinsimi bambi mucisi; Obadiya wakacikonzya kufwutula basinsimi bali 100 kuzwa kuli Jezebeli mujayi. (1Bam. 18:7, 13) Nkaambo nzi Elija ncaakalimvwa kubula mugwasyi? Sena wakali kuyeeya kuti basinsimi boonse aabo Obadiya mbaakafwutula lino bakalifwide? Sena wakalimvwa kubula mugwasyi akaambo kakuti kunyina wakamusangana mukubelekela Jehova nowakamana musunko wa Baala ku Cilundu ca Karameli? Sena wakalimvwa kuti kunyina wakazyi kuti wakali muntenda, naa wakali kulibilika kuti kunyina wakali kumulanganya? Cibalo kunyina nocaamba bwini Elija mbwaakalimvwide. Pele ncotuzyi ncakuti Jehova wakalizyi kabotu-kabotu Elija ncaakalimvwida kubula mugwasyi alimwi wakalizyi mbwakonzya kumugwasya.
Ciindi notulimvwa kubula mugwasyi, ino tuumbulizyigwa buti twalanga Jehova mbwaakamugwasya Elija? (Amubone mincali 5-6)
5. Mbuti Jehova mbwaakamugwasya Elija kuzyiba kuti tanaakali alikke?
5 Jehova wakamugwasya Elija munzila zinji. Wakamukulwaizya kwaambaula. Ziindi zyobilo wakamubuzya kuti: “Ino ucita nzi okuno Elija?” (1Bam. 19:9, 13) Ciindi coonse, Jehova wakali kumuswiilila Elija naakali kwaamba zyakali kumoyo. Jehova wakamwiingula kwiinda mukumutondezya kuti ulaanguwe alimwi akuti ulaanguzu kapati. Kuyungizya waawo, Jehova wakaambila kuti kuli bakombinyina banji. (1Bam. 19:11, 12, 18) Cakutadooneka, Elija wakalimvwa kwaanguluka naakamana kwaambila Jehova izyakali kumoyo alimwi akumvwa mbwaakamwiingula. Kumane wakapa Elija milimo iili mbwiibede iiyandika kapati. Wakamulomba kuti ananike Hazaeli kuba mwami wa Siriya, Jehu kuba mwami wa Israyeli, mpoonya Elisha kuba musinsimi. (1Bam. 19:15, 16) Kwiinda mukupa Elija milimo eeyi, Jehova wakamugwasya kuti abikkile maano kuzintu zigwasya. Kunze lyaboobo, Leza wakapa Elija mulongwe, nkokuti Elisha. Mbuti mbomukonzya kugwasyigwa a Jehova ciindi nomulimvwa kubula mugwasyi?
6. Ncinzi ncomukonzya kupailila ciindi nomulimvwa kubula mugwasyi? (Intembauzyo 62:8)
6 Jehova umutamba kuti kamupaila kulinguwe. Ulaabwene mapenzi oonse ngomujisi, alimwi umusyomezya kuti uyakuyiingula mipailo yanu aciindi cili coonse. (1Tes. 5:17) Ulakkomana kuswiilila mipailo yabakombi bakwe. (Tus. 15:8) Ncinzi ncomukonzya kupailila ciindi nomulimvwa kubula mugwasyi? Mbubwenya mbwaakacita Elija, amumwaambile Jehova zyoonse zili kumoyo. (Amubale Intembauzyo 62:8.) Amumwaambile zintu zimupa kulibilika alimwi ambomulimvwa kujatikizya zintu eezyo. Amumulombe Jehova kuti amugwasye kuliyumya. Mucikozyanyo, ciindi nomulimvwa kubula mugwasyi akuyoowa kupa bumboni kucikolo, amumulombe Jehova kuti amupe busicamba mbomuyandika. Mane buya mulakonzya kumulomba kuti amupe busongo bwakucikonzya kupandulula nzyomusyoma cabupampu. (Lk. 21:14, 15) Kuti kamujisi penzi lyakutyompwa, amumulombe Jehova kuti amugwasye kubandika a Munakristo uusimide. Mulakonzya kumulomba Jehova kuti amugwasye Munakristo ooyo ngomuyanda kubandika limwi kuti amuswiilile nywebo cakubikkila maano. Amumwaambile Jehova zyoonse zili kumoyo, amubone mbwaingula mipailo yanu alimwi amulutambule lugwasyo lwabamwi, kuti mwacita oobo, muyoolimvwa kuti tamuli nyolikke pe.
Sena mulajana nzila zyakuyungizya ciindi ncomubelesya mubukambausi akubeleka abamwi? (Amubone muncali 7)
7. Ncinzi ncomwiiya kucikozyanyo camukwesu Mauricio?
7 Toonse Jehova wakatupa mulimo uuyandika kapati. Mulakonzya kusyoma kuti ulabona alimwi ulalumba kusolekesya koonse nkomucita kutegwa muzuzikizye mulimo wanu mumbungano alimwi amubukambausi. (Int. 110:3) Mbuti kubeleka canguzu mbokukonzya kumugwasya ciindi nomulimvwa kubula mugwasyi? Atulange-lange cikozyanyo camukwesu uucili mwana-mwana Mauricio. * Nokwakainda buyo ciindi cisyoonto kuzwa mukwesu Mauricio naakabbapatizyigwa, mweenzinyina umwi wakatalika kuleya mukasimpe aasyoonto-syoonto. Mukwesu Mauricio wakaamba kuti “Kumubona kayaabuleya mukasimpe, kwakandityompya kapati. Ndakatalika kulibilika kuti naa ndiyoozumanana kupona kweelana akulyaaba kwangu akuzumanana kuba mumukwasyi wa Jehova. Ndakalimvwa kubula mugwasyi alimwi ndakali kuyeeya kuti kunyina uundimvwisya.” Ncinzi cakamugwasya mukwesu Mauricio? Wakaamba kuti “Ndakayungizya ciindi ncindakali kubelesya mubukambausi. Eeci cakandigwasya kwaaluba mapenzi aangu. Ndakakkomana alimwi ndakalubona lugwasyo ciindi nindakali kubeleka abamwi mubukambausi.” Inzya, nokuba kuti tatukonzyi kukambauka abasyomima cacigaminina, tulayumizyigwa kwiinda mukutola lubazu mubukambausi bwakulemba magwalo naa bwaafooni. Ncinzi cimwi cakamugwasya mukwesu Mauricio? Wakayungizya kuti: “Ndakatalika kubeleka canguzu mumbungano. Ndakali kulibambila cakulomya akuzuzikizya zibeela zyabasicikolo. Milimo eeyi yakandipa kulimvwa kuti ndilayandwa a Jehova alimwi abamwi.”
NOTWATYOMPWA AKAAMBO KAMASUNKO MAPATI
8. Mbuti masunko mapati mbwaakonzya kutujatikizya?
8 Mumazuba aaya aamamanino tulangila kujana masunko. (2Tim. 3:1) Nokuba boobo, ciindi alimwi amusyobo wamasunko zilakonzya kutugambya. Cakutayeeyela tulakonzya kujana penzi lyakubula mali, kujanwa abulwazi bupati, naa kufwidwa muyandwa. Aziindi zili boobu, tulatyompwa kapati, kwaambisya kuti masunko aayo kaacitika cakutobelana naa oonse aciindi comwe. Nokuba boobo, katuyeeya kuti Jehova ulatukwabilila, alimwi ulatugwasya kuliyumya kusunko lili lyoonse cabusicamba.
9. Masunko nzi amwi aakamucitikila Jobu?
9 Atulange-lange Jehova mbwaakamugwasya mwaalumi uusyomeka Jobu. Wakacitikilwa masunko mapati muciindi buyo cisyoonto. Mubuzuba bomwe buyo, Jobu wakaambilwa kuti banyama bakwe boonse babbigwa naa kujaigwa, alimwi akuti babelesi abana bakwe bajaigwa. (Job. 1:13-19) Kacili mubuumba, Jobu wakaciswa bulwazi ibucisa alimwi busampuzya kapati. (Job. 2:7) Mapenzi aakwe akavwula kapati cakuti Jobu wakaamba kuti: “Buumi bwandicima; tandiyandi kuzumanana kupona.”—Job. 7:16.
Kutondezya kuti wakali kumulanganya caluyando Jobu, Jehova wakamwaambila nzila zinji mbwalanganya zilenge zyakwe (Amubone muncali 10)
10. Mbuti Jehova mbwaakamugwasya Jobu kuliyumya mumasunko? (Amubone cifwanikiso icili aacivwumbyo.)
10 Jehova wakali kumubikkila maano Jobu. Akaambo kakuti Jehova wakali kumuyanda Jobu, wakamupa nguzu zyakuliyumya mumasunko alimwi akuzumanana kusyomeka. Jehova wakabandika a Jobu, kumuyeezya busongo bwakwe butamani alimwi aluyando ndwajisi kuzilenge zyakwe. Wakaamba kujatikizya banyama banji ibagambya. (Job. 38:1, 2; 39:9, 13, 19, 27; 40:15; 41:1, 2) Kuyungizya waawo, Jehova wakabelesya mwaalumi uucili mwana-mwana Elihu kumuyumya akumuumbulizya Jobu. Elihu wakasyomezya Jobu kuti Jehova lyoonse ulabalumbula bakombi bakwe akaambo kakuliyumya. Pele alimwi Jehova wakaambila Elihu ikupa Jobu lulayo lwaluyando. Elihu wakamugwasya Jobu kuti atanoolibikkili kapati maano kwiinda mukumuyeezya mbwali musyoonto kapati alyeezyanisya a Jehova Mulengi wabubumbo boonse. (Job. 37:14) Kunze lyaboobo, Jehova wakapa Jobu mulimo umwi; kupailila beenzyinyina botatwe bakabisya. (Job. 42:8-10) Mbuti Jehova mbwatugwasya mazuba aano ciindi notwajana masunko aakatazya?
11. Mbuti Bbaibbele mbolikonzya kutuumbulizya ciindi notuli mumasunko?
11 Jehova tabandiki andiswe mbuli mbwaakacita kuli Jobu, pele ulacita oobo kwiinda mu Jwi lyakwe, Bbaibbele. (Rom. 15:4) Ulatuumbulizya kwiinda mukutupa bulangizi bwakumbele. Atubone majwi masyoonto aamu Bbaibbele aakonzya kutuumbulizya ciindi notwajana masunko. Mu Magwalo, Jehova utusyomezya kuti kunyina cintu naaba masunko cikonzya ‘kutwaandaanya kuluyando lwakwe.’ (Rom. 8:38, 39) Kuyungizya waawo, utusyomezya kuti “ulaafwaafwi abaabo boonse bamwiita” mumupailo. (Int. 145:18) Jehova utwaambila kuti, ikuti naa twamusyoma tulakonzya kuliyumya alimwi buya akujana lukkomano ciindi notupenga. (1Kor. 10:13; Jak. 1:2, 12) Kunze lyaboobo, Jwi lya Leza lituyeezya kuti masunko ngotujana ngakaindi buyo kasyoonto twaayezyanisya kuzilongezyo zitamani nzyatusyomezya. (2Kor. 4:16-18) Jehova watupa bulangizi bwakuti uyoomugusya sikutalisya masunko woonse, nkokuti Saatani Diabolosi alimwi abaabo batobela nzila zyakwe zibyaabi. (Int. 37:10) Sena kuli zibalo zyamu Bbaibbele zyuumbulizya nzyomwakaswata iziyoomugwasya kuliyumya mwaakusunkwa kumbele?
12. Ncinzi Jehova ncayanda kuti tucite kutegwa tugwasyigwe cakumaninina a Jwi lyakwe?
12 Jehova uyanda kuti katujana ciindi cakubala Bbaibbele abuzuba alimwi akuzinzibala kuyeeya kujatikizya nzyotubala. Ciindi notuzibelesya nzyotwiiya, lusyomo lwesu lulayuma alimwi tulaba acilongwe ciyumu kapati a Taateesu wakujulu. Ikuti twacita oobo, tulaba anguzu zyakuliyumya mumasunko. Kunze lyaboobo, Jehova ulabapa muuya wakwe uusalala aabo ibalisyoma Jwi lyakwe. Alimwi muuya ooyu ulatupa “nguzu zigambya iziinda zyabantu” kutegwa tuliyumye kusunko lili lyoonse.—2Kor. 4:7-10.
13. Mbuti cakulya cakumuuya cibambwa ‘amuzike uusyomeka alimwi uucenjede’ mbocitugwasya kuliyumya mumasunko?
13 Kwiinda mukugwasyigwa a Jehova, “muzike uusyomeka alimwi uucenjede” ulamwaya zibalo zinji, mavidiyo alimwi anyimbo zikonzya kuyumya lusyomo lwesu akutupa kuzumanana kupakamana kumuuya. (Mt. 24:45) Tweelede kuzibelesya kabotu zintu zyoonse eezyi nzyatupa Jehova. Mucizyi umwi uukkala ku United States, wakalumba kapati kucakulya cakumuuya coonse eeci. Wakaamba kuti: “Mumyaka iili 40 njondamubelekela Jehova, lusyomo lwangu lwali kusunkwa ciindi aciindi.” Wakajana masunko aaindene-indene, bakaapanyina bakalimbwa mootokala anamutekenya uukoledwe, bazyali bakwe bakaciswa bulwazi bujaya, awalo wakaciswa bulwazi bwakkansa ziindi zyobilo. Ncinzi cakamugwasya kuliyumya? Wakapandulula kuti: “Jehova lyoonse wali kundilanganya. Cakulya cakumuuya ncatupa kwiinda mumuzike uusyomeka alimwi uucenjede candigwasya kapati kuliyumya. Akaambo kacakulya eeci, ndilimvwa mbwaakalimvwa Jobu ciindi naakaamba kuti: ‘Kusikila ndikafwe, tandikaleki kusyomeka pe!’”—Job. 27:5.
Mbuti mbotukonzya kugwasya bamwi mumbungano? (Amubone muncali 14)
14. Mbuti Jehova mbwabelesya bakombima kutugwasya ciindi notusunkwa? (1 Batesalonika 4:9)
14 Jehova wabayiisya bantu bakwe kuyandana alimwi akuumbulizyanya muziindi eezyi zyamapenzi. (2Kor. 1:3, 4; amubale 1 Batesalonika 4:9.) Kwiinda mukwiiya Elihu, bakwesu alimwi abacizyi balilibambilide kutugwasya kuzumanana kusyomeka ciindi notujana buyumuyumu. (Mil. 14:22) Mucikozyanyo, atubone mbungano mwazulilwa mucizyi Diane mboyakamukulwaizya alimwi akumugwasya kuzumanana kusyomeka kuli Jehova ciindi mulumaakwe naakaciswa bulwazi bujaya. Wakaamba kuti: “Cakali ciyumu. Pele ndakalibona janza lya Jehova lyanguzu alimwi lyaluyando mumyezi eeyo iikatazya. Basimbungano bakatugwasya kapati. Bakali kutuswaya, kututumina mafooni alimwi akutukumbata, izintu nzyotwakali kuyandika kapati muciindi eeci. Mbwaanga tiindakacizyi kweenzya mootokala, bakwesu abacizyi bakali kubikkila maano kubona kuti ndilacikonzya kuunka kumiswaangano amubukambausi.” Eelo kaka ncilongezyo kuzulilwa mumukwasyi ooyu waluyando wakumuuya!
KULUMBA KULUGWASYO LWA JEHOVA LWALUYANDO
15. Nkaambo nzi ncotusinizyide kuti tuyooliyumya mumasunko?
15 Toonse buyo tuyoojana masunko. Nokuba boobo, mbubwenya mbotwaiya, kunyina notuyakwaalwana masunko aayo tolikke. Mbubwenya mbuli Taata siluyando, Jehova lyoonse ulatubikkila maano. Uli kulubazu lwesu, ulilibambilide kutuswiilila notulomba lugwasyo alimwi uliyandide kutugwasya. (Is. 43:2) Tulisinizyide kuti tuyoocikonzya kwaazunda masunko, nkaambo cabwaabi wakatupa zyoonse nzyotuyandika kutegwa tuliyumye. Wakatupa cipego cakupaila, Bbaibbele, cakulya cakumuuya cinji alimwi abakwesu abacizyi basiluyando ibalibambilide kutugwasya muziindi zyamapenzi.
16. Mbuti mbotukonzya kuzumanana kulanganizyigwa a Jehova?
16 Eelo kaka tulalumba kapati kuba a Taateesu wakujulu uutubikkila maano! “Myoyo yesu ilakondwa mulinguwe.” (Int. 33:21) Notuzibelesya zipego zyoonse nzyatupede Jehova kutegwa atugwasye, tutondezya kuti tulamulumba akaambo kakutulanganya caluyando. Alimwi tweelede kucita lubazu lwesu kutegwa tuzumanane kulanganizyigwa anguwe. Kulubazu lumwi, ikuti twazumanana kubeleka canguzu kumvwida Jehova alimwi akucita ciluzi mumeso aakwe, uyoozumanana kutubikkila maano kukabe kutamani!—1Pet. 3:12.
LWIIMBO 30 Ngu Taata, ngu Leza Wangu, Mweenzuma