1. Nkaambo nzi bana Babuloni ncobakamukkomanina musinsimi Daniele?

 MUSINSIMI Daniele wakali mukubusi ciindi bana Babuloni nobakamubweza kuba mwaange akumutola kubusena kulamfwu amunzi ookwabo. Pele nokuba kuti wakacili mwana, balupati-pati bana Babuloni bakamukkomanina Daniele. Bakabona “zilibonya ameso” kuti Daniele ‘tanaakajisi kampenda nokaba komwe, wakali aciwa cibotu’ akuti wakali kuzwa mumukwasyi uulemekwa. (1Sam. 16:7) Aboobo, bana Babuloni bakamuyiisya kutegwa kabelekela muŋanda yamwami.—Dan. 1:3, 4, 6.

2. Ino Jehova wakali kumubona buti Daniele? (Ezekieli 14:14)

² Jehova wakali kumuyanda Daniele, kutali akaambo kaciwa cakwe cibotu naa mikuli njaakajisi, pele akaambo kabube ooyu mukubusi mbwaakasala kuba ambubo. Mubwini, ambweni Daniele wakajisi myaka yakuma 20 ciindi Jehova naakamwaamba kuti wakali mbuli Nowa a Jobu. Aboobo Jehova wakali kubona mukubusi ooyu kuti wakali kusyomeka mbubwenya mbuli Nowa a Jobu ibaalumi ibakamubelekela Leza cakusyomeka kwamyaka minji. (Matl. 5:32; 6:9, 10; Job. 42:16, 17; amubale Ezekieli 14:14.) Alimwi Jehova wakazumanana kumuyanda Daniele mubuumi bwakwe boonse alimwi ibukkomanisya.—Dan. 10:11, 19.

3. Ncinzi ncotutiilange-lange mucibalo eeci?

³ Mucibalo eeci, tulalanga-langa bube bobilo mbwaakajisi Daniele bwalo ibwakapa kuti Jehova amukkomanine. Cakusaanguna, tulapandulula bube bumwi abumwi akulanga-langa ciindi naakabutondezya. Mpoonya, tulabona cakagwasya Daniele kutondezya bube oobo. Kumane, tulabandika mbotukonzya kumwiiya. Nokuba kuti cibalo eeci cakalembelwa bakubusi, toonse buyo tulakonzya kwiiya cikozyanyo ca Daniele.

4. Mbuti Daniele mbwaakatondezya busicamba? Amupe cikozyanyo.

⁴ Bantu basicamba balakonzya kuyoowa, pele kunyina nobazumizya kuyoowa kubalesya kucita cintu ciluzi. Daniele wakali mukubusi sicamba ncobeni. Amubone ziindi zyobilo naakatondezya busicamba. Ciindi cakusaanguna kulangilwa kuti cakacitika nikwakainda myaka iibalilwa kuli yobilo kuzwa bana Babuloni nobakamana kunyonyoona Jerusalemu. Mwami Nebukadinezara wa Babuloni wakalota ciloto ciyoosya cacibumbwa cipati kapati. Wakalailila kuti baalumi basongo boonse kubikkilizya a Daniele bamwaambile ncocakali kupandulula ciloto, buyo-buyo bakali kuyoojaigwa kuti baalilwa kucita oobo. (Dan. 2:3-5) Daniele wakeelede kubweza ntaamu cakufwambaana, buyo-buyo bantu banji bakali kuyoojaigwa. “Daniele wakaunka kumwami akumulomba kuti amupe ciindi cakuti amupandulwide ciloto cakwe.” (Dan. 2:16) Eelo kaka eeci cakali kuyandika busicamba alusyomo! Bbaibbele kunyina mpolyaamba kuti Daniele kuli naakapandulude kale ciloto. Wakalomba beezinyina, aabo ibakapedwe mazina aaku Babuloni aakuti Sadirake, Mesaki alimwi a Abedinego “kuti bapaile kuli Leza wakujulu kuti abafwide luse akubagwasya kujatikizya maseseke aaya.” (Dan. 2:18) Jehova wakayiingula mipailo yabo. Kwiinda mukugwasyigwa a Leza, Daniele wakacikonzya kucipandulula ciloto ca Nebukadinezara. Aboobo Daniele alimwi abeenzinyina tiibakajaigwa pe.

5. Ino ndilili alimwi Daniele naakeelede kutondezya busicamba?

⁵ Nikwakainda ciindi kuzwa Daniele naakapandulula ciloto cacibumbwa cipati, busicamba bwakwe bwakasunkwa alimwi. Nebukadinezara alimwi wakalota ciloto ciyoosya. Eeci ciloto cakali kujatikizya cisamu cipati kapati. Cabusicamba Daniele wakacikonzya kupandulwida Mwami ncocakali kwaamba ciloto. Mane buya wakamwaambila mwami kuti wakali kuyoosondoka alimwi akuti tanaakali kuyooba mwami kwaciindi cili mbocibede. (Dan. 4:25) Mwami naakayeeya kuti Daniele wakali sinkondonyina alimwi naakamujaya. Pele Daniele wakatondezya busicamba alimwi wakacipandulula ciloto.

6. Ncinzi cakamugwasya Daniele kuba sicamba?

⁶ Ncinzi cakagwasya Daniele kuba sicamba mubuumi bwakwe boonse? Naakacili  mwana, Daniele wakaiya cikozyanyo cabausyi abanyina. Tacidoonekwi buya kuti, bazyali bakwe bakaatobela malailile Jehova ngaakapede bazyali bana Israyeli, bakamuyiisya mwanaabo Mulawo wa Leza. (Dt. 6:6-9) Daniele tanaakazyi buyo Mulawo wantalisyo, mbuli Milawo Iili Kkumi, pele alimwi wakalizyi zijatikizyidwe caboola kuzintu muna Israyeli nzyaakeelede kulya naa kutalya. b (Lev. 11:4-8; Dan. 1:8, 11-13) Kunze lyaboobo, Daniele wakaiya kujatikizya makani aakaindi aabantu ba Leza alimwi azyeezyo izyakali kubacitikila nobakali kwaalilwa kupona kweelana azyeelelo zya Jehova. (Dan. 9:10, 11) Zintu izyakamucitikila Daniele zyakamupa kusyoma kuti Jehova alimwi abangelo bakwe basinguzu bakali kumugwasyilizya.—Dan. 2:19-24; 10:12, 18, 19.

7. Ncinzi cimbi cakagwasya Daniele kuba sicamba? (Amubone cifwanikiso.)

⁷ Daniele wakaaiya malembe aabasinsimi ba Leza, kubikkilizya abusinsimi bwa Jeremiya. Kwiinda mulwiiyo oolu, Daniele kumbele wakazikuzyiba kuti ba Juda ibakali mubuzike ku Babuloni bakali kuyakwaangununwa lino-lino. (Dan. 9:2) Kubona businsimi bwamu Bbaibbele oobu kabuzuzikizyigwa, kwakayumya lusyomo lwa Daniele muli Jehova, alimwi buya nobaba baabo ibajisi lusyomo luyumu muli Leza balakonzya kuba basicamba. (Amweezyanisye Baroma 8:31, 32, 37-39.) Kwiinda zyoonse, Daniele wakali kupaila kuli Bausyi bakujulu. (Dan. 6:10) Wakali kulyaambilila zibi zyakwe kuli Jehova alimwi akumwaambila mbwaakali kulimvwa. Alimwi wakali kulomba lugwasyo. (Dan. 9:4, 5, 19) Mbubwenya mbuli ndiswe, Daniele tanaakazyalwa kali sicamba pe. Muciindi caboobo, wakaba abube oobu kwiinda mukwiiya, kupaila alimwi akusyoma Jehova.

8. Mbuti mbotukonzya kuba basicamba?

⁸ Kutegwa tube basicamba, ncinzi ncotweelede kucita? Bazyali besu balakonzya kutukulwaizya kuba basicamba, pele tatukonzyi kuba basicamba akaambo buyo kakuti balo mbaasicamba. Kuba sicamba kuli mbuli kwiiya mulimo mupya. Nzila imwi motukonzya kwiiya mulimo ooyo, nkwiinda mukulangilila cakubikkila maano kuzintu mwiiyi zyacita mpoonya akwiiya cikozyanyo cakwe. Mbubwenya buyo, andiswe tulaiya kuba basicamba kwiinda mukulangilila cakubikkila maano ciindi bamwi nobatondezya bube oobu mpoonya akwiiya cikozyanyo cabo. Aboobo, ncinzi ncotwaiya kuli Daniele? Mbuli nguwe, tweelede kulizyiba kabotu-kabotu Jwi lya Leza. Tweelede kuba acilongwe ciyumu a Jehova kwiinda mukubandika anguwe alimwi akumwaambila mbotulimvwa. Alimwi tweelede kumusyoma Jehova cakumaninina, ikuti twacita oobo uyootugwasya. Kumane lusyomo lwesu lwaakusunkwa, tuyoocikonzya kuba basicamba.

9. Ino tugwasyigwa buti ciindi notuli basicamba?

⁹ Tulagwasyigwa munzila zinji kwiinda mukuba basicamba. Amubone cakacitikila Ben. Wakali kwiiya acikolo cimwi ku Germany alo basicikolonyina boonse mpobakali kusyoma munjiisyo yakusanduka alimwi akuti makani aamu Bbaibbele aajatikizya kulengwa kwazintu ngakubeja. Bumwi buzuba, Ben wakapegwa coolwe cakupandulwida basicikolonyina kaambo ncaakali kusyoma kuti buumi bwakalengwa buya. Cabusicamba wakabaambila boonse nzyasyoma. Ncinzi cakacitika? Ben wakaamba kuti: “Bayi bangu bakaswiilila cakubikkila maano, mpoonya bakapa basicikoloma mapepa ngondakali kubelesya kubapandulwida.” Ino basicikolonyina Ben bakacita buti?  Ben wakaamba kuti: “Bunji bwabo bakali kuswiilila nzyondakali kubaambila, mpoonya bakaamba kuti bakali kundilemeka.” Mbubwenya mbotwabona mucakuluula ca Ben, bantu basicamba balalemekwa abantu bamwi. Balakonzya kukwelelezya babombe myoyo kuli Jehova. Masimpe, tulijisi twaambo tubotu itweelede kutupa kuba basicamba.

10. Ino bbala lyakusyomeka mu Bbaibbele lyaamba nzi?

¹⁰ Kanji-kanji Bbaibbele lyaamba kujatikizya “kusyomeka,” naa “luyando lutamani” oolo Leza ndwatondezya kubalongwe bakwe. Ibbala eeli alimwi lilakonzya kubelesyegwa kupandulula luyando ndobatondezyanya babelesi ba Leza. (2Sam. 9:6, 7) Lusyomo lwesu lulakonzya kuyuma mukuya kwaciindi. Atubone eeci mbocakamucitikila Daniele.

11. Ino lusyomo lwa Daniele lwakasunkwa buti naakacembaala? (Amubone cifwanikiso icili aacivwumbyo.)

¹¹ Kusyomeka kwa Daniele kuli Jehova kwakasunkwa mubuumi bwakwe boonse. Pele sunko lipati lyakamusikila ciindi naakali aamyaka yakuma 90. Aciindi eeci bana Babuloni bakali kweendelezyegwa abana Mediya a Persia mubulelo bwa Mwami Dariyo. Balupati-pati ba Mwami Dariyo tiibakali kumuyanda Daniele alimwi tiibakali kumulemeka Leza wakwe. Aboobo bakakanza kuti Daniele ajaigwe. Bakasungilizya mwami kuti abikke mulawo iwakali kuyoosunka Daniele kubona naa wakali kuyoosyomeka kuli Leza wakwe naa kumwami Dariyo. Ncakeelede buyo kucita Daniele kutegwa asyomeke kumwami Dariyo akukkomaninwa abantu boonse, nkucileka kupaila kuli Jehova kwamazuba aali 30. Pele Daniele wakasala kusyomeka kuli Jehova. Akaambo kaceeci, wakasowelwa mumulindi wabasyuumbwa. Pele Jehova wakakulumbula kusyomeka kwa Daniele kwiinda mukumuvwuna kumilomo yabasyuumbwa. (Dan. 6:12-15, 20-22) Mbuti mbotukonzya kuzumanana kusyomeka kuli Jehova mbuli mbwaakacita Daniele?

12. Mbuti Daniele mbwaakaba alusyomo luyumu kapati muli Jehova?

¹² Mbubwenya mbokwaambwa kale, kutegwa tusyomeke kuli Jehova, tweelede kumuyanda ncobeni. Luyando Daniele ndwaakajisi kuli Jehova lwakali luyumu kapati akaambo kakuti wakali kumuyanda kapati Usyi wakujulu. Kakunyina kudooneka, Daniele wakaba aluyando oolu kwiinda mukuyeeya bube bwa Jehova  alimwi akubona mbwaakali kubutondezya. (Dan. 9:4) Kunze lyaboobo, Daniele wakali kuzinzibala kuyeeya zintu zyoonse zibotu Jehova nzyaakamucitila walo alimwi abantu bakwe.—Dan. 2:20-23; 9:15, 16.

13. (a) Ino masunko aali buti ngobajana bakubusi mazuba aano? Amupe cikozyanyo. (Amubone cifwanikiso.) (b) Mbubwenya mboitondezya vidiyo, ino inga mwaingula buti ikuti umwi wamubuzya naa Bakamboni ba Jehova balabazumizya bantu boonana amuntu ngobakozyenye limwi zizo?

¹³ Mbubwenya mbuli Daniele, bakubusi bazingulukidwe aabantu batamulemeki Jehova alimwi azyeelelo zyakwe. Bantu bali boobu tabamuyandi muntu uuli woonse uumuyanda Leza. Bamwi buya mane balabakonga bakubusi kwiinda mukuboongelezya kutasyomeka kuli Jehova. Mucikozyanyo, amubone cakacitikila mukubusi wazina lya Graeme, waku Australia. Wakalijana mubukkale bukatazya ciindi naakali kusekondali. Bayi bakabuzya basicikolo ncobakonzya kucita ikuti sicikolo umwi waambila mweenzinyina kuti ulaakoonana abantu mbakozyenye limwi zizo. Mpoonya bayi bakaamba kuti basicikolo boonse ibazumina kuti cili buyo kabotu ncacita sicikolo ooyo baunke kulubazu lumwi mpoonya aabo batazumini baunke kulubazu lumbi. Graeme wakaamba kuti: “Kunze buyo lyangu a Kambonima umwi, basicikoloma boonse bakawuumukila kulubazu lwabaabo ibakali kwaamba kuti cili kabotu.” Bukkale bwakaindila buya kubija alimwi Graeme wakeelede kutondezya kuti ulasyomeka kuli Jehova. Wakaamba kuti: “Kwawoola lyomwe, basicikoloma boonse kubikkilizya abayi, bakali kutufwubaazya alimwi akututukila. Ndakasolekesya kusikila mpondigolela kulwiiminina lusyomo lwangu cakukkazika moyo, pele tiibakandiswiilila naaceya.” Ino Graeme wakalimvwa buti? Wakaamba kuti: “Tiindakakkomene ciindi basicikoloma nobakali kunditukila, pele kulubazu lumwi, ndakalikkomene kapati akaambo kakuti ndakazumanana kusyomeka kuli Jehova alimwi akulwiiminina lusyomo lwangu.” c

14. Ninzila nzi imwi iikonzya kutugwasya kuba alusyomo luyumu muli Jehova?

¹⁴ Mbubwenya mbuli Daniele, tulakonzya kuba alusyomo luyumu muli Jehova kuti katumuyanda ncobeni. Tulakonzya kuba aluyando luli boobu kwiinda mukwiiya kujatikizya bube bwa Jehova. Mucikozyanyo, tulakonzya kwiiya kuzintu nzyaakalenga. (Rom. 1:20) Kuti kamuyanda kuyumya luyando lwanu muli Jehova alimwi akumulemeka, inga mwabala zibalo zifwaafwi zili mumulongo wazibalo zijisi mutwe wakuti “Sena Cakalengwa Buya?” naa kweebelela mavidiyo. Kunze lyaboobo, mulakonzya kubala mabroshuwa aaya: Was Life Created? alimwi ayakuti The Origin of Life—Five Questions Worth Asking. Amubone ncaakaamba mukubusi wazina lya Esther waku Denmark kujatikizya mabroshuwa aaya naakati: “Ajisi mizeezo mibotu ncobeni. Mabroshuwa aaya aamba buyo twaambo twamasimpe akukulekela kuti usale cakucita.” Ben, iwaambwa kale, wakati: “Makani aali mumo alaluyumya ncobeni lusyomo. Akandipa kusinizya ncobeni kuti Leza nguwakalenga buumi.” Mwamana kulanga-langa makani aaya, tacidoonekwi kuti muyoocizumina ncolyaamba Bbaibbele noliti: “Uleelela, Jehova, O Leza wesu, ikutambula bulemu alulemeko alimwi anguzu, nkaambo nduwe wakalenga zintu zyoonse, alimwi akaambo kakuyanda kwako zyakabako alimwi zyakalengwa.”—Ciy. 4:11. d

15. Ninzila nzi imwi iikonzya kutugwasya kuba acilongwe ciyumu a Jehova?

¹⁵ Nzila imwi mbomukonzya kuyumya luyando lwanu muli Jehova nkwiinda mukwiiya cakulomya  kujatikizya buumi bwa Mwanaakwe, Jesu. Eeci ncaakacita mucizyi uucili mwana-mwana wazina lya Samira uukkala ku Germany. Wakaamba kuti: Ndakamuzyiba kabotu-kabotu Jehova kwiinda muli Jesu.” Naakacili mwana, Samira wakali kukatazyigwa kumvwisya kuti Jehova kuli mbwalimvwa. Pele wakali kumvwisya Jesu mbwaakali kulimvwa. Ulayungizya kuti: “Ndilamuyanda Jesu, akaambo kakuti wakali kumvwana alimwi akubayanda bana.” Naakali kuzumanana kwiiya kujatikizya Jesu, alwalo luyando lwakwe kuli Jehova lwakali kuyuma. Nkaambo nzi? Wakaamba kuti: “Asyoonto-syoonto ndakatalika kumvwisya kuti Jesu wiiya bausyi munzila iilondokede. Balikozyene kapati. Ndakazyiba kuti aaka nkakaambo kakapa kuti Jehova atume Jesu aano anyika, kutegwa bantu bacikonzye kumuzyiba kabotu Jehova.” (Joh. 14:9) Kuti kamuyanda kuyumya luyando lwanu a Jehova, eelo kaka inga cabota kuti mwajana ciindi cakwiiya kujatikizya Jesu! Kuti mwacita oobo, luyando lwanu muli Jehova akusyomeka kwanu kulinguwe ziyooyuma kapati.

16. Ino tugwasyigwa buti akaambo kakusyomeka? (Intembauzyo 18:25; Mika 6:8)

¹⁶ Kuti katusyomeka kuli bamwi, tulalangilwa kuba abalongwe basyomeka. (Rut. 1:14-17) Kuyungizya waawo, bantu basyomeka balijisi twaambo tubapa kuba aluumuno lwamumizeezo. Nkaambo nzi? Nkaambo Jehova usyomezya kuti ulasyomeka kuli baabo basyomeka kulinguwe. (Amubale Intembauzyo 18:25; Mika 6:8.) Amweezyeezye buyo, kuba acilongwe ciyumu a Mulengi singuzuzyoonse! Alimwi kuti kali mulongwe wesu, kunyina cintu cikonzya kunyonganya cilongwe cesu anguwe, noliba sunko, naba sikutukazya, naa lufwu buya. (Dan. 12:13; Lk. 20:37, 38; Rom. 8:38, 39) Eelo kaka cilayandika kuti twiiye cikozyanyo ca Daniele akuzumanana kusyomeka kuli Jehova!

17-18. Ncinzi acimbi ncotukonzya kwiiya kuli Daniele?

¹⁷ Mucibalo eeci, twalanga-langa buyo bube bwa Daniele bobilo. Pele kuli zintu zinji nzyotukonzya kwiiya kulinguwe. Mucikozyanyo, Jehova wakapa Daniele mulongo wazilengaano aziloto, alimwi wakamupa anguzu zyakucikonzya kupandulula milumbe yabusinsimi. Bunji bwabusinsimi oobu bwakazuzikizyigwa kale. Bumwi bujisi makani aamba zintu ziyoocitika kumbele zyalo ziyoojatikizya muntu uuli woonse anyika.

¹⁸ Mucibalo citobela, tuyoolanga-langa kujatikizya businsimi bobilo ibwakalembwa a Daniele. Kumvwisya businsimi oobu, kulakonzya kutugwasya toonse kusala cabusongo, tacikwe makani tuli bana naa bapati. Kunze lyaboobo, bulakonzya kuyumya busicamba bwesu alimwi akutupa kuzumanana kusyomeka kutegwa katulibambilide kulwana masunko aboola kumbele.