1. Ino ncinzi cikonzya kutugwasya kutegwa katukukkomanina kwiiya businsimi bwamu Bbaibbele?

 MUKWESU umwi uucili mwana-mwana wazina lya Ben wakaamba kuti: “Ndilakukkomanina kapati kwiiya businsimi bwamu Bbaibbele.” Sena andinywe mbomulimvwa oobo? Naa sena mulimvwa kuti businsimi bwamu Bbaibbele bulakatazya kapati kubumvwisya? Zimwi ziindi mulakonzya kulimvwa kuti kubala makani aabusinsimi kujazya butolo. Nokuba boobo, ikuti mwazyiba kaambo Jehova ncaakasalila kuti businsimi bulembwe mu Bbaibbele, mulakonzya kutalika kubukkomanina.

2. Ino tulalanga-langa nzi mucibalo eeci?

² Mucibalo eeci tulabandika ikutali buyo kaambo ncotweelede kubwiiya businsimi bwamu Bbaibbele, pele alimwi ambotukonzya kucita oobo. Kumane tulalanga-langa businsimi bobilo bujanika mubbuku lya Daniele kutegwa tubone mbotukonzya kugwasyigwa lino ikuti twabumvwisya ncobwaamba businsimi oobu.

3. Ncinzi ncotweelede kucita kutegwa tubumvwisye businsimi bwamu Bbaibbele?

³ Tweelede kulomba lugwasyo ikuti katuyanda kumvwisya businsimi bwamu Bbaibbele. Amubone cikozyanyo eeci. Amweezyeezye kuti mwaswaya busena mbomutanasikide, pele mulongwe wanu ngomweenda limwi ulibuzyi kabotu busena oobo. Ulaazyi kabotu mpomweendela alimwi ulizyi nzila iili yoonse nkoitozya. Cakutadooneka mulakonzya kukkomana akaambo kakuti mulongwe wanu wakazumina kumusangana mulweendo oolo! Mbubwenya buyo, Jehova ulicizyi kabotu ciindi ecino ncotupona alimwi aziyoocitika kumbele. Aboobo kutegwa tubumvwisye businsimi bwamu Bbaibbele, cakulicesya tweelede kulomba lugwasyo kuli Jehova.—Dan. 2:28; 2Pet. 1:19, 20.

4. Nkaambo nzi Jehova ncaakasalila kuti businsimi bulembwe mu Jwi lyakwe? (Jeremiya 29:11) (Amubone cifwanikiso.)

 ⁴ Mbubonya mbuli muzyali mubotu uuli woonse, Jehova uyanda kuti bana bakwe bakapone buumi bukkomanisya kumbele. (Amubale Jeremiya 29:11.) Pele mukwiindana amuzyali muntunsi uuli woonse, Jehova ulakonzya kwaamba ziyoocitika kumbele alimwi lyoonse nzyaamba zilacitika. Wakasala kuti businsimi bulembwe mu Jwi lyakwe kutegwa tuzizyibile limwi zintu ziyandika kapati kazitanacitika. (Is. 46:10) Businsimi bwamu Bbaibbele ncipego caluyando kuzwa kuli Tateesu wakujulu. Pele mbuti mbomukonzya kuba masimpe kuti businsimi bwamu Bbaibbele buyoozuzikizyigwa ncobeni?

5. Ino ncinzi Kamboni mukubusi ncakonzya kwiiya kuli ceeco cakamucitikila Max?

⁵ Kucikolo, Bakamboni bakubusi inga bazungulukidwe abantu batalilemeki Bbaibbele. Nzyobaamba alimwi akucita, zilakonzya kupa Kamboni mukubusi kutalika kudooneka. Amubone cakacitikila mukwesu Max. Wakaamba kuti: “Nindakacili kucikolo, ndakatalika kudooneka naa nzyobakali kundiyiisya bazyali bangu nkasimpe alimwi akuti Bbaibbele lyakasololelwa a Leza.” Ino bazyali bakwe bakacita nzi? Wakaamba kuti: “Bakandeendelezya cakukkazika moyo nokuba kuti ndakalizyi kuti bakalilibilikide.” Bazyali ba Max bakayiingula mibuzyo yakwe kwiinda mukubelesya Bbaibbele. Pele awalo Max kuli ncaakacita. Wakaamba kuti: “Ndakatalika kuliyiisya businsimi bwamu Bbaibbele alimwi akubandika nzyondakali kwiiya mu Bbaibbele abamusela wangu.” Ino ncinzi cakazwa mpawo? Max wakaamba kuti: “Kuzwa leelyo, ndakasyoma cakumaninina kuti Bbaibbele lyakasololelwa a Leza!”

6. Ncinzi ncomweelede kucita ikuti kamudooneka? Alimwi nkaambo nzi?

⁶ Ikuti mbubwenya mbuli Max mwatalika kudooneka ikuti naa ncobeni Bbaibbele lijisi kasimpe, mutatyompwi pe. Pele mweelede kubweza ntaamu cakufwambaana. Kudooneka kuli mbuli nkalaya. Ikuti tiikwalanganizyigwa, asyoonto-syoonto kulakonzya kunyonyoona cintu ciyandika kapati. Kutegwa mugusye kudooneka kwalo kukonzya kunyonganya lusyomo lwanu, mweelede kulibuzya kuti, ‘Sena ndilazisyoma nzyolyaamba Bbaibbele kujatikizya ziyoocitika kumbele?’ Ikuti kamucidooneka, nkokuti mweelede kwiiya businsimi bwamu Bbaibbele bwalo ibwakazuzikizyigwa kale. Amubone mbomukonzya kucita oobo.

7. Ino Daniele wakatusiila cikozyanyo nzi caboola kukwiiya businsimi? (Daniele 12:10) (Amubone cifwanikiso)

⁷ Daniele wakatusiila cikozyanyo cibotu cambotweelede kubwiiya businsimi. Wakali kubwiiya businsimi kajisi makanze mabotu, nkokuti kutegwa azyibe kasimpe. Daniele alimwi wakali kulicesya. Wakalizyi kuti Jehova ulabapa kumvwisya aabo ibamuzyi alimwi ibapona kweelana azyeelelo zyakwe zisalala. (Dan. 2:27, 28; Amubale Daniele 12:10.) Wakatondezya kuti wakali kulicesya kwiinda mukusyoma Jehova kutegwa amugwasye. (Dan. 2:18) Daniele alimwi wakali kuvwuntauzya cakulomya. Wakali kuvwuntauzya mu Magwalo aakasololelwa a Leza alo aakaliko muciindi ncaakali kupona. (Jer. 25:11, 12; Dan. 9:2) Ino mbuti mbomukonzya kumwiiya Daniele?

8. Nkaambo nzi bamwi ncobakakila kusyoma kuti businsimi bwamu Bbaibbele bulazuzikizyigwa ncobeni? Pele ino ncinzi ncotweelede kucita?

 ⁸ Amwaalingule makanze ngomujisi. Sena kuyanda kuzyiba kasimpe nkakaambo ikamukulwaizya kwiiya businsimi bwamu Bbaibbele? Ikuti naa mbocibede oobo, nkokuti Jehova uyoomugwasya. (Joh. 4:23, 24; 14:16, 17) Nokuba boobo, bantu bamwi inga baiya businsimi bwamu Bbaibbele akaambo katwaambo tumwi. Bamwi balacita oobo kutegwa bajane bumboni butondezya kuti Bbaibbele kunyina nolyakasololelwa a Leza. Bayeeya kuti, ikuti Bbaibbele kalitazwi kuli Leza nkokuti balakonzya kulisalila ciluzi acitaluzi. Nokuba boobo, tweelede kuliiya katujisi makanze aali kabotu. Kuyungizya waawo, kuli bube abumwi buyandika kapati mbotweelede kuba ambubo kutegwa tubumvwisye businsimi bwamu Bbaibbele.

9. Mbube nzi mbotweelede kuba ambubo kutegwa tubumvwisye businsimi bwamu Bbaibbele? Amupandulule.

⁹ Amulicesye. Jehova usyomezya kubagwasya aabo balicesya. (Jak. 4:6) Aboobo tweelede kumulomba kutegwa atugwasye kubumvwisya businsimi bwamu Bbaibbele. Kuti katulicesya, tuyoozumina kuti tuyandika lugwasyo lwa Jehova kwiinda mumuzike uusyomeka ngwabelesya kutupa cakulya cakumuuya aciindi ceelede. (Lk. 12:42) Jehova ngu Leza uucita zintu kweelana abubambe, aboobo cileelela kuti ubelesya buyo nzila yomwe kutegwa atugwasye kukamvwisya kasimpe ikajanika mu Jwi lyakwe.—1Kor. 14:33; Ef. 4:4-6

10. Ino ncinzi ncomwiiya kucakuluula camucizyi Esther?

¹⁰ Amuvwuntauzye cakulomya. Amutalike kwiinda mukuvwuntauzya businsimi bumukkomanisya kapati. Oobo mbwaakacita mucizyi Esther. Wakali kubukkomanina businsimi bwaamba kujatikizya kuboola kwa Mesiya. Wakaamba kuti: “Nondakali amyaka iili 15, ndakatalika kuvwuntauzya kutegwa ndijane bumboni bwakuti businsimi obuya bwakalembwa katanaboola Jesu.” Ncaakajana ciindi naakali kubala mabbuku aakazwa mu-Lwaanje Lutajisi Buumi cakamupa kuti aleke kudooneka. Wakaamba kuti: “Mabbuku amwi akalembwa katanaboola Jesu, aboobo majwi aabusinsimi aakali mumo akeelede kuzwa kuli Leza.” Mucizyi Esther wakazumina kuti, “Ndakeelede kubala cakwiinduluka-induluka kutegwa ndizimvwisye nzyondakali kubala.” Pele ulikkomene akaambo kancaakacita. Naakamana kubuvwuntauzya cakulomya businsimi bwamu Bbaibbele buli mbobubede, wakaamba kuti: “Ndakalibonena kuti nzyolyaamba Bbaibbele nzyamasimpe!”

11. Nkaambo nzi ncocigwasya kusinizya kuti Bbaibbele lyaamba zyamasimpe?

¹¹ Ciindi notubona mbobwakazuzikizyigwa businsimi bumwi buli mu Jwi lya Leza, tuyoomusyoma kapati Jehova alimwi abusolozi buli boonse mbwatupa. Kuyungizya waawo, businsimi bwamu Bbaibbele bulatwaambila kujatikizya bulangizi bwesu bwakumbele. Aboobo ciindi notubwiiya, tulazumanana kuzilanga kabotu zintu nokuba kuti tujisi mapenzi. Lino atulange-lange businsimi bobilo bwakalembwa a Daniele ibuli mukuzuzikizyigwa mazuba aano. Ikubumvwisya businsimi oobu kulakonzya kutugwasya kusala cabusongo.

12. Ino zimpata ‘zyabutale buvwelene abulongo butete’ ziiminina nzi? (Daniele 2:41-43)

¹² Amubale Daniele 2:41-43. Muciloto Daniele ncaakapandulwida Mwami Nebukadinezara, zimpata zyacibumbwa nzyaakabona mwami zyakali ‘zyabutale buvwelene abulongo butete.’ Kwiinda mukweezyanisya businsimi oobu abusinsimi bumwi buli mubbuku lya Daniele alimwi a Ciyubunuzyo, tulakonzya kwaamba kuti zimpata ziiminina bulelo bwanyika yoonse bwa Anglo-America. Kujatikizya bulelo oobu bwanyika yoonse, Daniele wakaamba kuti “bwami oobo bunooli buyumu aciindi nciconya bunooli buteteete.” Nkaambo nzi ncobunooli buteteete? Akaambo kakuti bantu-bantu buyo ibaimininwa abulongo butete, bapa kuti bubule nguzu zyakuyuma mbuli butale. b

13. Makani nzi aayandika kapati ngotwiiya akaambo kakuti tulabumvwisya businsimi oobu?

¹³ Kuli makani aayandika kapati ngotukonzya kwiiya kucibumbwa ncaakapandulula Daniele. Tulakonzya kwiiya zinji ikwaambisya kuzimpata zyacibumbwa. Kusaanguna, Bulelo Bweendelezya Nyika Yoonse bwa Anglo-America bwalitondezya kuti bulijisi nguzu. Mucikozyanyo, bwakajisi lubazu lupati mukuzunda lya Nkondo Yakusaanguna alimwi a Yabili Yanyika Yoonse. Nokuba boobo, nguzu zyabulelo oobu bwanyika yoonse zyaceya alimwi zilazumanana kuceya akaambo kakuti basicisi balalwana mulicabo alimwi balwana mfwulumende. Cabili, bulelo oobu bwanyika yoonse mbobunooli bwamamanino kweendeelezya, Bwami bwa Leza kabutanaanyonyoona mami oonse aabantu. Nokuba kuti zimwi ziindi masi amwi alakonzya kubukazya Bulelo Bweendelezya Nyika Yoonse bwa Anglo-America, kunyina pe nayoocikonzya kubunjilila busena. Tulizyi oobu akaambo kakuti “bbwe” lyalo iliiminina Bwami bwa Leza liyoopwayaula zimpata, nkokuti cibeela cacibumbwa ciiminina Anglo-America.—Dan. 2:34, 35, 44, 45.

14. Ino mbuti kumvwisya businsimi bujatikizya zimpata zyabutale abulongo mbokukonzya kutugwasya kusala cabusongo?

¹⁴ Sena mulasyoma ncobeni kuti businsimi bwa Daniele bujatikizya zimpata zyabutale abulongo mbwamasimpe? Ikuti naa mulasyoma, nkokuti eeci cilabujatikizya buumi mbomupona. Tamukabikkili kapati maano kusola kujana mali manji naa zintu zinji zyakumubili akaambo kakuti mulizyi kuti lino-lino nyika eeyi mbyaabi ilanyonyoonwa. (Lk. 12:16-21; 1Joh. 2:15-17) Kunze lyaboobo, kubumvwisya businsimi oobu kuyoomugwasya kubona kaambo mulimo wakukambauka akuyiisya ncouyandika kapati. (Mt. 6:33; 28:18-20) Mbwaanga twamana kulanga-langa businsimi oobu, cilayandika kapati kulibuzya kuti, ‘Sena zyakusala zyangu zilatondezya kuti ndilasyoma ncobeni kuti Bwami bwa Leza lino-lino buyoonyonyoona mami oonse aabantu?’

15. Ino nguni “mwami wakunyika” alimwi ‘amwami wakumusanza’ mazuba aano? (Daniele 11:40)

¹⁵ Amubale Daniele 11:40. Bbuku lya Daniele candaano 11 lyaamba kujatikizya bami bobilo naa mfwulumende zyamunyika zyalo izizundana akaambo kakuti aimwi iyanda kuba mfwulumende iilaanguzu kapati munyika yoonse. Kwiinda mukweezyanisya businsimi oobu abusinsimi bumbi bwamu Bbaibbele, tujana kuti “mwami wakunyika” ngu Russia abeenzinyina mpoonya “mwami wakumusanza” Mbulelo Bweendelezya Nyika Yoonse bwa Anglo-America. c

16. Mbuyumuyumu nzi mbobajana bakwesu ibakkala mumasena aayendelezyegwa ‘amwami wakunyika’?

 ¹⁶ Bantu ba Leza ibali mumasena aayendelezyegwa ‘amwami wakunyika’ bali mukupenzyegwa. Bakamboni bamwi balaumwa akuwaalwa muntolongo akaambo kalusyomo lwabo. Muciindi cakubapa kuyoowa bakwesu abacizyi, micito ‘yamwami wakunyika’ yaile kuyumya lusyomo lwabo. Nkaambo nzi? Akaambo kakuti balizyi kuti kupenzyegwa kwabantu ba Leza kuzuzikizya businsimi ibuli mubbuku lya Daniele. d (Dan. 11:41) Kuzyiba makani aaya kulakonzya kutugwasya andiswe kuyumya bulangizi bwesu alimwi akuzumanana kusyomeka kuli Jehova.

17. Ino mbuyumuyumu nzi mbobajana bakwesu ibakkala mumasena aayendelezyegwa ‘amwami wakumusanza’?

¹⁷ Kaindi, “mwami wakumusanza” awalo wakali kubapenzya bantu ba Jehova. Mucikozyanyo, lya Nkondo Yanyika Yoonse Yakusaanguna alimwi a Yabili, bakwesu banji bakaangwa akaambo kakutatola lubazu mutwaambo twacisi alimwi bana ba Bakamboni bakali kutandwa kuzikolo akaambo katwaambo ntomunya. Nokuba  boobo, kwamyaka misyoonto yainda, babelesi ba Jehova ibakkala mumasena aayendelezyegwa amwami wakumusanza basunkwa munzila zitali zyacigaminina. Mucikozyanyo, ciindi nokuli kuvwoota, Munakristo ulakonzya kusunkwa kutalika kuyanda cipani cimwi camapolitikisi kwiinda zimbi. Takonzyi kusika antaamu yakuunka kuyoovwoota, pele mumoyo ulakonzya kutalika kulombozya kuti kubota cipani cimwi cizwidilile. Eelo kaka cilayandika kapati kutatola lubazu mutwaambo twacisi ikutali buyo mumicito pele amumoyo wesu!—Joh. 15:18, 19; 18:36.

18. Ino tucita buti kujatikizya kutonkana kuli akati ‘kamwami wakunyika’ alimwi ‘amwami wakumusanza’? (Amubone cifwanikiso)

¹⁸ Aabo ibatajisi lusyomo mubusinsimi bwamu Bbaibbele balakonzya kutalika kulibilika kapati ciindi nobabona ‘mwami wakunyika katonkana amwami wakumusanza’. (Dan. 11:40.) Bami aaba bobilo balijisi zilwanyo zyanyukkiliya zyalo zikonzya kujaya zilenge zyoonse zipona anyika. Pele tulizyi kuti Jehova takazumizyi cintu cili boobu kucitika. (Is. 45:18) Aboobo, muciindi cakutalika kulibilika kujatikizya zyakumbele, kutonkana ‘kwamwami wakunyika’ alimwi ‘amwami wakumusanza’ kuyumya lusyomo lwesu. Kutondezya kuti mamanino abweende bwazintu obuno aali afwaafwi.

19. Ncinzi ncotweelede kuzyiba kujatikizya businsimi bwamu Bbaibbele?

¹⁹ Tatuzyi Businsimi bumwi bwamu Bbaibbele mbobuyoozuzikizyigwa. Naba musinsimi Daniele tanaakali kuzimvwisya ncozyakali kwaamba zintu zimwi nzyaakalemba. (Dan. 12:8, 9) Pele ikutazyiba bwini mbobuyoozuzikizyigwa businsimi bumwi tacaambi kuti tabukazuzikizyigwi pe. Cakutadooneka, tulakonzya kuba alusyomo lwakuti Jehova uyootuyubunwida nzyotweelede kuzyiba aciindi ceelede, mbubwenya mbwaakacita musyule.—Am. 3:7.

20. Ino mbusinsimi nzi bukkomanisya bwamu Bbaibbele ibuyoozuzikizyigwa lino-lino? Alimwi ino ncinzi ncotweelede kuzumanana kucita?

²⁰ Kuyooba kwaambilizya kwakuti “luumuno akuliiba”. (1Tes. 5:3) Mpoonya beendelezi bamunyika bayoobukila bukombi bwakubeja akubunyonyoona. (Ciy. 17:16, 17) Kumane bayoolwana bantu ba Leza. (Ezk. 38:18, 19) Zintu eezyi ziyoosololela kunkondo ya Amagedoni. (Ciy. 16:14, 16) Tulijisi lusyomo lwakuti lino-lino zintu eezyi ziyoocitika. Notucilindila ciindi eeco, atuzumanane kutondezya kulumba kwesu kuli Taatesu wakujulu kwiinda mukubikkila maano kubusinsimi bwamu Bbaibbele akugwasya bamwi kucita mbubwenya oobo.