1. Kweelana alugwalo lwa Bahebrayo 12:1, ino ncinzi ncotweelede kucita kutegwa tukasike kumamanino aamuzundano wesu wakubuumi?

 BBAIBBELE likozyanisya buumi bwesu bwa Bunakristo kumuzundano wakubalika. Basikubalika ibacikonzya kuzwidilila akusika kumamanino bayootambula bulumbu bwabuumi butamani. (2Tim. 4:7, 8) Tweelede kucita cili coonse ncotukonzya kutegwa tuzumanane kubalika akaambo kakuti tuli kumamanino kwini kwamuzundano wesu. Mwaapostolo Paulo iwakazwidilila kusikila kumamanino aamuzundano wakwe, wakaamba zintu zimwi zikonzya kutugwasya kutegwa andiswe tuzwidilile. Utulailila kuti ‘tuzisowe zyoonse zitulemena akubalika cakuliyumya mukusiyana nkotubikkilidwe kumbele.’—Amubale Bahebrayo 12:1.

2. Ino caamba nzi ‘kusowa zyoonse zitulemena’?

² Ciindi Paulo naakaamba kuti “atuzisowe zyoonse zitulemena,” sena wakali kupandulula kuti kunyina mukuli uuli woonse Munakristo ngwayelede kunyamuna? Peepe. Pele wakali kupandulula kuti tweelede kusowa cintu cili coonse citayandiki calo cikonzya kutulemena. Cintu eeco cilakonzya kutulemena cakuti inga twacileka buya akubalika. Kutegwa tukacikonzye kuzwidilila, tweelede kuzizyiba zintu zikonzya kutulemena alimwi akuzisowa cakufwambaana. Nokuba boobo, aciindi ncomunya, tatweelede kwiiyumbila ambali mikuli njotweelede kunyamuna nkaambo buyo-buyo tulakonzya kubonwa kuti twaalilwa kubalika mumuzundano. (2Tim. 2:5) Ino mikuli nzi njotweelede kunyamuna?

3. (a) Kweelana a Bagalatiya 6:5, ino ncinzi ncotweelede kunyamuna? (b) Ino ncinzi ncotutiibandike mucibalo eeci? Alimwi nkaambo nzi?

³ Amubale Bagalatiya 6:5. Paulo wakaamba cintu cimwi ncotweelede kunyamuna. Wakalemba kuti “umwi aumwi weelede kunyamuna  mukuli wakwe uumugeme.” Paulo aawa wakali kupandulula cintu Leza ncalangila kuti umwi aumwi wesu acite calo ncatakonzyi kutucitila muntu uumbi. Mucibalo eeci, tulabandika cijatikizyidwe mukunyamuna “mukuli” alimwi tulabona mbotukonzya kuunyamuna. Kunze lyaboobo, tulabona mbotukonzya kucizyiba cintu citayandiki calo cikonzya kutulemena alimwi tulaiya mbotukonzya kucisowa. Kunyamuna mukuli wesu uutugeme alimwi akusowa zintu zitayandiki zyalo zikonzya kutulemena, kuyootugwasya kuzwidilila mukubalika kwesu kwakuunka kubuumi.

4. Nkaambo nzi kuzuzikizya cikonke cesu cakulyaaba ncoutali mukuli uuminya? (Amubone cifwanikiso.)

⁴ Cikonke cesu cakulyaaba. Ciindi notwakalyaaba kuli Jehova, twakakonka kuti tunoomukomba alimwi akucita kuyanda kwakwe. Tweelede kucizuzikizya cikonke eeco. Kuzuzikizya cikonke cesu mukuli mupati, pele tauminyi. Amana buya, Jehova wakatulengela kuti katucita kuyanda kwakwe. (Ciy. 4:11) Jehova wakatulenga aluyandisisyo lwakuyanda kumuzyiba akumukomba alimwi wakatulenga mucinkozya cakwe. Akaambo kaceeci tulacikonzya  kuswena kulinguwe alimwi akukukkomanina kucita kuyanda kwakwe. (Int. 40:8) Kuyungizya waawo, ciindi notucita kuyanda kwa Leza alimwi akutobela Mwanaakwe, ‘tulakatalusyigwa.’—Mt. 11:28-30.

5. Ino ncinzi cikonzya kumugwasya kuzuzikizya cikonke canu? (1 Johane 5:3)

⁵ Mbuti mbomukonzya kuunyamuna mukuli? Kuli zintu zyobilo zikonzya kugwasya. Cakusaanguna, amuzumanane kumuyanda kapati Jehova. Mulakonzya kucita oobo kwiinda mukuzinzibala kuyeeya zintu zyoonse zibotu nzyaakamucitila alimwi azilongezyo nzyamubambilide kumbele. Mbomuyaabumuyanda kapati Jehova, kumumvwida kuyoomuubila. (Amubale 1 Johane 5:3.) Cabili, amumwiiye Jesu. Wakazwidilila mukucita kuyanda kwa Leza akaambo kakuti wakali kupaila kuli Jehova kutegwa amugwasye alimwi wakazumanana kubikkila maano kubulumbu mbwaakali kuyoopegwa. (Heb. 5:7; 12:2) Mbubwenya mbuli Jesu, amupaile kuli Jehova kutegwa amugwasye alimwi amuzumanane kubuyeeya bulangizi bwanu bwabuumi butamani. Nomuzumanana kumuyanda kapati Jehova alimwi akumwiiya Mwanaakwe, muyoocikonzya kucizuzikizya cikonke canu cakulyaaba kuli Jehova.

6. Nkaambo nzi ncotweelede kwiilanganya mikuli yamumukwasyi? (Amubone cifwanikiso.)

⁶ Mukuli ngotujisi wakulanganya mukwasyi wesu. Mumuzundano wesu ooyu wakubuumi, tweelede kuyanda kapati Jehova a Jesu kwiinda mbotubayanda banamukwasyi. (Mt. 10:37) Nokuba boobo, eeci tacaambi kuti tweelede kucileka kwiilanganya mikuli yamumukwasyi mbuli kuti kucita boobo ncecikonzya kupa kuti Leza a Kristo kabatukkomanina. Muciindi caboobo, kutegwa tukkomaninwe a Leza alimwi a Kristo, tweelede kuuzuzikizya mukuli ngotujisi mumukwasyi wesu. (1Tim. 5:4, 8) Ikuti twacita oobo, tunookkomene kapati. Jehova ulizyi kuti mukwasyi ulakonzya kukkomana ikuti mwaalumi amukaintu kabeendelezyanya caluyando abulemu, ciindi bazyali nobabayanda akubayiisya bana babo alimwi abana nobabamvwida bazyali babo.—Ef. 5:33; 6:1, 4.

7. Ino mbuti mbomukonzya kuuzuzikizya mukuli ngomujisi mumukwasyi?

⁷ Mbuti mbomukonzya kuunyamuna mukuli? Kufwumbwa naa muli mulumi, mukaintu naa mwana, amubelesye lulayo lwabusongo ilujanika mu Bbaibbele. Mutanikuciti zintu kweelana ambomulimvwa, zintu mbozicitwa kubusena nkomukkala naa kweelana anzyobaamba basyaabusongo. (Tus. 24:3, 4) Amwaabelesye kabotu mabbuku eesu aamba zyamu Bbaibbele. Alijisi mizeezo mibotu iikonzya kumugwasya kubona mbomukonzya kuzyibelesya njiisyo zyamu Bbaibbele. Mucikozyanyo, mulongo wazibalo zyakuti “Lugwasyo Kumukwasyi” ujisi makani mabotu kapati aabandika mapenzi aagaminide ngobaswaanganya mazuba aano banabukwetene, bazyali alimwi abana. b Amuzumanane kubelesya njiisyo zyamu Bbaibbele nokuba kuti banamukwasyi bamwi tabaciti oobo. Ikuti mwacita oobo, mukwasyi wanu uyoogwasyigwa kapati alimwi muyookkomana akaambo kazilongezyo nzyayoomupa Jehova.—1Pet. 3:1, 2.

8. Ino mbuti nzyotusala mbozikonzya kutujatikizya?

⁸ Mukuli ngotujisi kujatikizya zintu nzyotusala. Jehova wakatupa lwaanguluko lwakulisalila alimwi uyanda kuti katukkomene akaambo kabubotu buboola ciindi notusala kabotu. Pele kunyina natukwabilila kuzintu zibyaabi zikonzya kutucitikila akaambo kakutasala kabotu. (Gal. 6:7, 8) Aboobo ndiswe tweelede kulipa  mulandu kujatikizya zintu zikonzya kuzwa mpawo akaambo kakutasala kabotu naa akaambo kakucita cintu cimwi munzila iitaluzi. Tulakonzya kupenzyegwa amanjezyeezya akaambo kakucita cintu cimwi citali kabotu. Nokuba boobo, kuzyiba kuti ndiswe tujisi mukuli kujatikizya zintu nzyotusala, kweelede kutupa kulyaambilila zibi, kululamika muyandika alimwi akutainduluka kucita zibi. Kucita boobo kulakonzya kutugwasya kuzumanana kubalika mumuzundano wakubuumi.

9. Ncinzi ncomukonzya kucita ikuti naa tiimwakasala kabotu? (Amubone cifwanikiso.)

⁹ Mbuti mbomukonzya kuunyamuna mukuli? Ikuti tiimwakasala kabotu kaindi, ino ncinzi ncomukonzya kucita? Amuzyibe kuti tamukonzyi kucinca zyakacitika kale. Mutasowi ciindi naa kulijaya mumizeezo kutalika kulitondezya kuti mwakaliluzi naa kutalika kupa bamwi mulandu akaambo kakutasala kabotu nkomwakacita. Muciindi caboobo, amukuzumine kulubizya kwanu akucita kufwumbwa ncomukonzya lino kubambulula bukkale oobo. Ikuti mwatalika kulipa mulandu kujatikizya zibi nzyomwakacita, cakulicesya amumusikile mumupailo Jehova, amukuzumine kulubizya kwanu alimwi akumulomba kuti amulekelele. (Int. 25:11; 51:3, 4) Amulilekelele kuli baabo mbomwakalubizyila alimwi akulomba lugwasyo kubaalu ikuti kakuyandika. (Jak. 5:14, 15) Amwiiye kukulubizya kwanu alimwi akutakwiinduluka kulubizya ooko. Ikuti mwacita oobo, mulakonzya kuba alusyomo lwakuti Jehova uyoomutondezya luse alimwi akumugwasya aawo mpomuyandika.—Int. 103:8-13.

10. Nkaambo nzi kulangila zintu nzyotutakonzyi kuzuzikizya ncouli mukuli uuminya? (Bagalatiya 6:4)

¹⁰ Kulangila zintu nzyotutakonzyi kuzuzikizya. Tulakonzya kutyompwa akaambo kazintu nzyotutakonzyi kuzuzikizya ikuti katulyeezyanisya abamwi. (Amubale Bagalatiya 6:4.) Ikuti lyoonse katulyeezyanisya abamwi, tulakonzya kuba amunyono alimwi akubusya mizundano. (Gal. 5:26) Ikuti katulisinikizya kucita nzyobacita bamwi nokuba kuti tatukonzyi kuzikkwanisya, tulakonzya kulinyonganya. Amuyeeye buyo kaambo aaka: Bbaibbele litwaambila kuti cilatyompya kulangila cintu cisumpizyigwa. (Tus. 13:12) Aboobo cilakonzya kututyompya kapati kulangila cintu cimwi ncotutakajani! Kucita boobo kulakonzya kutumana nguzu alimwi akutupa kucileka kubalika mumuzundano wesu wakubuumi.—Tus. 24:10.

11. Ncinzi cikonzya kumupa kukaka kucita zintu nzyomutakonzyi kuzuzikizya?

¹¹ Mbuti mbomukonzya kuusowa mukuli ooyo uuminya? Tamweelede kucita zintu zinji kwiinda aali zyeezyo Jehova nzyalangila kuti inga mwacita. Talangili kuti mumupe nzyomutakonzyi. (2Kor. 8:12) Amuzyibe kuti Jehova kunyina neezyanisya nzyomucita kuzintu nzyobakonzya kucita bamwi. (Mt. 25:20-23) Ulakulumba kubeleka kwanu camoyo woonse, kusyomeka kwanu alimwi akuliyumya kwanu. Cakulibombya amuzumine kuti tamukonzyi kunoocita zyoonse nzyomuyanda akaambo kaciimo, kuciswa naa bukkale bwanu. Mbubonya mbuli Barizilai, amulisungule kukaka, ikuti kuciswa naa ciimo canu kazitamuzumizyi kuubeleka kabotu mulimo ngomwapegwa. (2Sam. 19:35, 36) Mbubwenya mbuli Musa, amuzumine kugwasyigwa abamwi alimwi akupa bamwi milimo ikuti kwayandika. (Kul. 18:21, 22) Kulibombya kuli boobo kuyoomugwasya kutacita zintu nzyomutakonzyi kuzuzikizya zyalo zikonzya kumupa kucileka kubalika mumuzundano wakuunka kubuumi.

12. Sena tweelede kulipa mulandu akaambo kakutasala kabotu kwabamwi? Amupandulule.

¹² Kulipa mulandu akaambo kakwaalilwa kusala kabotu kwabamwi. Tatukonzyi kubasalila zyakucita bamwi; naa kubakwabilila  lyoonse kuzintu zibyaabi zikonzya kubacitikila akaambo kakutasala kabotu. Mucikozyanyo, mwanaanu ulakonzya kusala kucileka kubelekela Jehova. Kusala ooko kulakonzya kubapa kuusa kapati bazyali. Nokuba boobo, bazyali ibalipa mulandu akaambo kakutasala kabotu kwamwanaabo inga balikulika mukuli uuminya. Tauli mukuli Jehova ngwalangila kuti banyamune.—Rom. 14:12.

13. Ncinzi ncakonzya kucita muzyali akaambo kakutasala kabotu kwamwanaakwe?

¹³ Mbuti mbomukonzya kuusowa mukuli ooyo uuminya? Amuyeeye kuti Jehova wakatupa toonse lwaanguluko lwakulisalila. Ulamulekela aumwi kusala ncayanda. Eeci cilabikkilizya akusala kumubelekela. Jehova ulizyi kuti tamuli muzyali uulondokede; ncayanda buyo ncakuti musole kusikila mpomugolela kucita ncomukonzya. Kusala mwana nkwakonzya kucita, mukuli wakwe ikutali wanu. (Tus. 20:11) Nokuba boobo, mulakonzya kuzumanana kuyeeya mpomwatakacita kabotu mbuli muzyali. Ikuti kacili boobo, amumuzyibye Jehova mbomulimvwa akumulomba kuti amulekelele. Ulizyi kuti tamukonzyi kucita jokolo-jokolo kuzintu zyakacitika kale kutegwa mucince bukkale. Alimwi kunyina nalangila kuti mumukwabilile mwanaanu kukutebula nzyaakasyanga. Amuzyibe kuti, ikuti naa mwanaanu wasala kupiluka kuli Jehova, uyoomutambula camaanza obilo.—Lk. 15:18-20.

14. Nkaambo nzi kuciindizya kulipa mulandu ncouli mukuli ngotweelede kusowa?

¹⁴ Kuciindizya kulipa mulandu. Ikuti twabisya, cili buyo kabotu kulipa mulandu. Nokuba boobo, Jehova tayandi kuti katunyamuna mukuli wakuciindizya kulipa mulandu. Pele ooyu mukuli ngotweelede kusowa. Ino mbuti mbotukonzya kuzyiba kuti naa tulaciindizya kulipa mulandu? Ikuti twakalyaambilila zibi zyesu akubweza ntaamu ziyandika kutegwa tutaciinduluki cibi eeco, tulakonzya kuba masimpe kuti Jehova wakatulekelela. (Mil. 3:19) Ikuti naa twakabweza ntaamu eezyo, Jehova tayandi kuti katuzumanana kulipa mulandu. Kayi ulizyi kuti kucita boobo kulakonzya kututyompya.  (Int. 31:10) Ikuti twazumanana kutyompwa, tulakonzya buya akucileka kubalika mumuzundano wakubuumi.—2Kor. 2:7.

15. Ino ncinzi cikonzya kumugwasya kutazumanana kulipa mulandu? (1 Johane 3:19, 20) (Amubone cifwanikiso.)

¹⁵ Mbuti mbomukonzya kuusowa mukuli ooyo uuminya? Ikuti kamuciindizya kulipa mulandu, mweelede kubikkila maano ‘kukulekelela kwancobeni’ Leza nkwatulekelela. (Int. 130:4) Ikuti aabo ibeempwa ncobeni wabalekelela, usyomezya kuti: “cibi cabo tandikaciyeeyi limbi pe.” (Jer. 31:34) Eeci caamba kuti Jehova kunyina nayoomupa mulandu akaambo kazibi zyanu zyakaindi. Aboobo tamweelede kuyeeya kuti buyumuyumu mbomujana ncitondezyo cakuti Jehova kunyina naakamulekelela. Alimwi tamweelede kulipa mulandu akaambo kakuti mwakasweekelwa mikuli imwi njomwakajisi mumbungano. Jehova kunyina nazumanana kuyeeya kujatikizya kulubizya kwanu, aboobo andinywe tamweelede kuzumanana kukuyeeya.—Amubale 1 Johane 3:19, 20.

16. Mbotuli basikubalika, ino ncinzi ncotweelede kuzyiba?

¹⁶ Ciindi notubalika mumuzundano wesu wakubuumi, tweelede ‘kubalika munzila iinga yatupa kuyoojana bulumbu.’ (1Kor. 9:24) Tulakonzya kucita oobo ikuti twazizyiba kabotu zintu nzyotweelede kunyamuna azintu nzyotweelede kusowa. Mucibalo eeci, twabandika buyo zikozyanyo zisyoonto zyazintu nzyotweelede kunyamuna alimwi anzyotweelede kusowa. Pele kucili zimbi zinji. Jesu wakaamba kuti tulakonzya ‘kulengaana akaambo kabulyato, bucakolwa akulibilika azintu zyamubuumi.’ (Lk. 21:34) Magwalo aaya alimwi aambi alakonzya kumugwasya kubona aayandika kubambulula ciindi nomubalika mumuzundano wanu wakuunka kubuumi.

17. Nkaambo nzi ncotusinizyide kuti tulakonzya kuzwidilila mumuzundano wesu wakubuumi?

¹⁷ Tulakonzya kuba alusyomo lwakuti tuyoozwidilila mumuzundano ooyu wakubuumi akaambo kakuti Jehova uyootupa nguzu zyakucikonzya kucita boobo. (Is. 40:29-31) Aboobo mutatyompwi pe! Amwiiye mwaapostolo Paulo iwakabalika cakuliyumya kapati kutegwa atambule bulumbu mbwaakabambilidwe. (Flp. 3:13, 14) Kunyina uukonzya kumwiiminina mumuzundano ooyu, pele kwiinda mukugwasyigwa a Jehova mulakonzya kuzwidilila. Jehova ulakonzya kumugwasya kunyamuna mikuli yanu alimwi akusowa zintu zitayandiki zyalo zikonzya kumulemena. (Int. 68:19) Kwiinda mukugwasyigwa a Jehova, mulakonzya kubalika cakuliyumya akuyootambula bulumbu!