1, 2. (a) Nkaambo nzi ncotuteelede kugambwa ikuti naa twalibilika? (Amubone cifwanikiso icili kumatalikilo aacibalo.) (b) Ncinzi ncotutiilange-lange mucibalo eeci?

TUPONA muziindi zikatazya kapati. Saatani Diabolosi ulinyemede kapati alimwi “uyaabweendeenda mbuli syuumbwa wabutambo uuvwuluma, uyandaula muntu ngwatiimene buumbulu.” (1Pet. 5:8; Ciy. 12:17) Aboobo tacigambyi kuti ziindi zimwi andiswe tobabelesi ba Leza inga tulalibilika. Alimwi buya, zimwi ziindi, babelesi ba Jehova Leza bakaindi ibakali kumuyoowa, mbuli Mwami Davida, abalo bakali ‘kulibilika.’ (Int. 13:2) Kunze lyaboobo, amuyeeye kuti mwaapostolo Paulo wakali “kulibilika kujatikizya mbungano zyoonse.” (2Kor. 11:28) Pele ino ncinzi ncotukonzya kucita ikuti naa twalibilika kapati?

² Taateesu wakujulu siluyando wakabagwasya babelesi bakwe kaindi, alimwi mazuba aano ulapa kuti cikonzyeke kulindiswe kujana lugwasyo luyandika kuzintu zitukatazya naa zitupa kulibilika. Bbaibbele litukulwaizya kuti: “Kamuwaala makatazyo aanu oonse [“izimupa kulibilika,” bupanduluzi buyungizyidwe] kulinguwe, nkaambo ulamubikkila maano.” (1Pet. 5:7) Pele ino mbuti mbomukonzya kucita oobo? Atulange-lange nzila zyone mbomukonzya kucita oobo—kwiinda mukupaila kuzwa ansi amoyo, kubala Jwi lya Leza akuzinzibala  kuyeeya alindilyo, kulomba lugwasyo lwamuuya wa Jehova, alimwi akubandika zili kumoyo amuntu ngomusyoma kapati. Ciindi notulanga-langa nzila zyone eezyi, amubone naa inga mwazizyiba nzila zigwasya nzyomukonzya kubelesya.

3. Ino mbuti mbomukonzya ‘kuwaala mukuli wanu uuminya mumaanza aa Jehova’ kwiinda mumupailo?

³ Ntaamu yakusaanguna njotukonzya kubweza nkupaila kuli Jehova camoyo woonse. Ikuti naa mwajanika mubukkale ibumupa kuyoowa alimwi akulibilika kapati, amupaile kuli Taateesu wakujulu siluyando kuzwa ansi amoyo. Sintembauzyo Davida wakakombelezya Jehova kuti: “Komvwa mupailo wangu, O Leza.” Mpoonya muntembauzyo njemunya eeyo, wakaamba kuti: “Kowaala mukuli wako uuminya mumaanza aa Jehova, eelyo walo uyookulanganya.” (Int. 55:1, 22) Mwamana kucita zyoonse nzyomukonzya kutegwa mumanizye penzi limwi, ikupaila camoyo woonse kulakonzya kumugwasya kuleka kulibilika. Pele ino mbuti mupailo mboukonzya kumugwasya kutegwa mutazundwi amizeezo iilibilisya alimwi akutanyema?—Int. 94:18, 19, bupanduluzi buyungizyidwe.

4. Ciindi notulibilikide, nkaambo nzi mupailo ncouyandika kapati?

⁴ Amubale Bafilipi 4:6, 7. Jehova ulakonzya kuyiingula mipailo yesu yakukombelezya njotupaila kuzwa ansi amoyo alimwi cakutaleka. Munzila nzi? Kwiinda mukutupa moyo uukkalikene walo uukonzya kutupa kuliiba mumizeezo ciindi notukatazyidwe mumoyo. Bantu banji inga bakazumina kaambo aaka ciindi nobayeeya izyakabacitikila mubuumi. Ciindi nobakalibilikide akukopana mumizeezo, Leza wakabagwasya kuba aluumuno lunji lwalo bantu ndobatakonzyi kumvwisya. Andinywe eeci inga camucitikila. Aboobo, “luumuno lwa Leza” lulakonzya kumugwasya kuzunda buyumu-yumu mbomukonzya kujana. Tulakonzya kucisyoma cakumaninina cisyomezyo ca Jehova cakuti: “Utalibiliki pe, nkaambo ndime Leza wako. Ndilakuyumya, inzya ndilakugwasya.”—Is. 41:10.

5. Mbuti Jwi lya Leza mbolikonzya kutupa kuba aluumuno lwamumizeezo?

⁵ Nzila yabili yakuba aluumuno lwamumizeezo, nkubala zibalo zyamu Bbaibbele akuzinzibala kuyeeya alinzizyo. Ino nkaambo nzi eeci ncociyandika kapati? Ibbaibbele lilijisi busolozi bwakumuuya ibukonzya kumugwasya kucesya naa kuzunda kulibilika. Mutalubi kuti Jwi lya Leza lilagwasya alimwi lilakatalusya nkaambo lijisi majwi aabusongo aa Mulengi. Ciindi nomuzinzibala kuyeeya abusongo bwa Leza—syikati naa masiku—mpoonya akulanga-langa nzila mbomukonzya kubelesya busolozi bwamu Bbaibbele, muyooyumizyigwa kapati. Jehova cacigaminina wakaamba kuti kubala Jwi lyakwe kuli mbokuswaangene ‘akuyuma akuba sicamba’ alimwi ‘akutayoowa naa kukankama.’—Jos. 1:7-9.

6. Ino majwi aa Jesu inga amugwasya buti?

⁶ Mu Jwi lya Leza, tujana majwi aa Jesu aawumbulizya. Majwi aakwe alimwi anjiisyo zyakwe zyakali kubakatalusya bantu mbaakali kukambaukila. Bantu banji bakali kuboola kulinguwe nkaambo wakali kuumbulizya bantu bapengede mumyoyo alimwi akuumbulizya bantu batyompedwe. (Amubale Matayo 11:28-30.) Wakali kubikkila maano mbobakali kulimvwa bantu, nzyobakali kuyandika kumuuya alimwi akumubili. (Mk. 6:30-32) Cisyomezyo ca Jesu cakuti unootulanganya cicibeleka amazuba aano. Jesu ulakonzya kumulanganya mbubwenya mbwaakali kulanganya baapostolo mbaakali kweenda limwi. Tamweelede kuba antoomwe buya a Jesu cacigaminina kutegwa mugwasyigwe anguwe. Mbwali Mwami wakujulu, Jesu ucizumanana kuba alweetelelo alimwi akulutondezya. Aboobo ciindi nomulibilikide, ulakonzya ‘kumugwasya’ calubomba alimwi ‘akucita oobo aciindi ceelede.’  Inzya, Jesu ulakonzya kumugwasya kulwana mapenzi alimwi ulakonzya kumupa bulangizi abusicamba.—Heb. 2:17, 18; 4:16.

7. Ino muyoogwasyigwa buti ciindi Leza naingula nomumulomba muuya uusalala?

⁷ Jesu wakasyomezya kuti Taateesu uuli kujulu kunyina nakonzya kukakilwa kubapa muuya uusalala aabo ibamulomba. (Lk. 11:10-13) Eeci cituleta kukaambo katatu, ikayandika kapati mbomukonzya kumana kulibilika—mucelo wamuuya. Ibube bubotu oobu ibuboola akaambo kanguzu zya Leza zibeleka, butondezya bwini mbwabede Leza singuzuzyoonse. (Amubale Bagalatiya 5:22, 23; Kol. 3:10) Mbomuyaabutondezya zibeela zyamucelo wamuuya eezyo, muyoozumanana kuba azilongwe zibotu. Aboobo, muyoojana kuti zintu izyali kukonzya kumupa kulibilika tazicitiki. Amweezyeezye asyoonto zibeela zyamucelo wamuuya mbozikonzya kumugwasya.

8-12. Ino mucelo wamuuya wa Leza inga wamugwasya buti kulwana naa kweeleba bukkale bukatazya kapati?

⁸ “Luyando, lukkomano, luumuno.” Ciindi nomusolekesya kubalemeka bantu bamwi, cakutadooneka eeci ciyoomugwasya kuzunda tumpenda tumwi ntomujisi. Ino inga caba buti oobu? Ciindi nomutondezya luyando lwabunyina alimwi abulemu, muyakweeleba zintu zikonzya kuleta kulibilika.—Rom. 12:10.

⁹ “Kukkazika moyo, luzyalo, bubotu.” Mulakonzya kuba azilongwe zili kabotu kwiinda mukutobela lulayo oolu lwakuti: “Amufwidilane luzyalo, mube amoyo mutete walubomba, akulekelelana camoyo woonse.” (Ef. 4:32) Kwiinda mukucita boobo, mulakonzya kweeleba bukkale ibukonzya kupa kuti kube kulibilika. Kuyungizya waawo, mulakonzya kubuzunda buyumuyumu ibuboola akaambo kakutalondoka.

¹⁰ “Lusyomo.” Mazuba aano, kulibilika kulaboola kanji-kanji akaambo kamali alimwi azintu zyakumubili. (Tus. 18:11) Aboobo, ikuba alusyomo luyumu mubusolozi bwa Jehova bwaluyando kulakonzya kumugwasya kuliyumya naa kweeleba kulibilika kuli boobo. Ino eeci inga cakonzyeka buti? Mulakonzya kukweeleba kulibilika kapati kwiinda mukutobela lulayo lwamwaapostolo Paulo ilwakasololelwa amuuya ‘ilwakukkutila azintu nzyotujisi lino.’ Paulo uyungizya kuti: “Nkaambo [Leza] wakaamba kuti: ‘Ziyume zitete, tandikakusiyi pe alimwi tandikakulekelezyi pe.’ Kutegwa tube basicamba akwaamba kuti: ‘Jehova ngomugwasyi wangu; tandikooyoowa pe. Ino muntu inga wandityani?’”—Heb. 13:5, 6.

¹¹ “Kubomba moyo, kulilesya.” Amuyeeye buyo mbocinga cagwasya kutondezya bube buli boobu. Kucita boobu, kuyoomugwasya kweeleba micito iikonzya kumupa kulibilika lwanu kumugama, alimwi muyoogwasyigwa kwiinda mukweeleba “bukali, kunyema, kubwenta alimwi amajwi aakusampaula.”—Ef. 4:31.

¹² Cakutadooneka, mweelede kulicesya kutegwa mweendelezyegwe ‘ajanza lya Leza lyanguzu’ alimwi ‘akuwaala makatazyo aanu oonse kulinguwe.’ (1Pet. 5:6, 7) Pele ciindi nomweenda cakulicesya, muyoopona buumi mbwakkomanina Leza alimwi uyoomugwasya. (Mik. 6:8) Kwiinda mukuzyiba nguzu zyanu mpozigolela alimwi akuzilanga munzila yeelede zintu, tamukasiki aciimo cakugolelwa maano akaambo kakulibilika nkaambo munoosyoma Leza.

13. Ino ncinzi ncaakali kupandulula Jesu naakati: “Mutanoolibiliki”?

¹³ Kulugwalo lwa Matayo 6:34 (amubale), tujana lulayo lwa Jesu luyandika kapati lwakuti: “Mutanoolibiliki.” Nokuba boobo, cilakonzya kuba cintu ciyumu kutobela lulayo oolu. Ino ncinzi Jesu ncaakali kupandulula naakati: “Mutanoolibiliki”? Cakutadooneka, tanaakali kupandulula kuti mubelesi wa Leza aciindi cimwi mubuumi takonzyi kulibilika, kayi twaabona kale majwi ngaakaamba Davida alimwi a Paulo kujatikizya makani aaya. Pele Jesu wakali kugwasya  basikwiiya bakwe kubona kuti kulibilika kapati naa cakuzwa munzila takukonzyi kumana mapenzi pe. Buzuba bumwi abumwi bulijisi makatazyo aambubo, aboobo Banakristo tabeelede kuyungizya kulibilika kujatikizya zintu izyakainda kale naa zintu ziboola kumbele atala amapenzi ngobajisi kale. Ino inga mwalutobela buti lulayo lwa Jesu alimwi akwaangununwa kupenzi lyakulibilika ikumanina maano?

14. Mbuti mbomukonzya kulilwana penzi lyakulibilika kujatikizya zintu nzyomwakali kucita kaindi?

¹⁴ Kulibilika kumwi inga kwaboola akaambo kakulezya naa micito muntu njaakali kucita kaindi. Ulakonzya kulimvwa kuusa akaambo kazintu nzyaakali kucita kaindi, nokuba kuti kwainda myaka minji. Zimwi ziindi, Mwami Davida wakali kulimvwa kuti ‘milandu yakwe yakamuvwulila atala aamutwe wakwe.’ Wakalyaambilila kuti: “Moyo wangu uupengede kapati wandipa kutongela.” (Int. 38:3, 4, 8, 18) Mubukkale oobo, ino ncintu nzi ciyandika ncaakeelede kucita Davida? Ino ncinzi ncaakacita? Wakasyoma muluse alimwi amukulekelela kwa Jehova. Cakusinizya wakati: “Ulikkomene ooyo wajatilwa mulandu wakwe.”—Amubale Intembauzyo 32:1-3, 5.

15. (a) Nkaambo nzi ncomuteelede kulibilika kujatikizya zintu zicitika mubuumi bwanu? (b) Nintaamu nzi zyeelede nzyomukonzya kubweza kutegwa mucesye kulibilika? (Amubone kabbokesi kakuti “ Nzila Zimwi Zigwasya Kucesya Kulibilika.”)

¹⁵ Zimwi ziindi mulakonzya kulibilika kujatikizya zintu zicitika mubuumi bwanu. Mucikozyanyo, ciindi Davida naakalemba Intembauzyo 55, wakaliyoowede akaambo kakuti buumi bwakwe bwakali muntenda. (Int. 55:2-5) Nokuba boobo, tanaakalekela kulibilika kuti kumupe kuleka kusyoma Jehova. Davida wakapaila cakutaleka kujatikizya mapenzi ngaakajisi, pele alimwi wakabona mbocakali kuyandika kubweza ntaamu zigwasya kutegwa alwane zintu izyakali kumupa kulibilika. (2Sam. 15:30-34) Amwiiye ciiyo kuli Davida. Muciindi cakulekela kulibilika kuti kumupe kugolelwa maano, amubweze ntaamu zyeelede kutegwa mulwane penzi limwi, mpoonya mwamana kucita boobo, calusyomo amwaasiye mumaanza aa Jehova makani aayo.

16. Ino bupanduluzi bwazina lya Leza inga bwaluyumya buti lusyomo lwanu?

¹⁶ Ikuciindizya kulibilika kanji-kanji kulaboola ikuti Munakristo kapengana kapati mumizeezo akaambo kazintu ziyeeyelwa kucitika kumbele. Nokuba boobo, tamweelede kulibilika cakwiindilila kujatikizya zintu nzyomutazyi naaceya. Nkaambo nzi? Nkaambo kanji-kanji zintu inga tazisiki aciimo cakubija mbuli mbotwali kuziyeeyela. Kuyungizya waawo, kunyina bukkale ibukonzya kumwaalila kulanganya Leza ooyo ngomuwaalila makatazyo aanu oonse. Izina lyakwe lizyibidwe kuti lyaamba kuti “Upa Kuti Kube.” (Kul. 3:14) Bupanduluzi buyandika kapati bwazina lya Leza butugwasya kusyoma kuti Leza ulakonzya kubona kuti makanze aakwe kujatikizya babelesi bakwe azuzikizyigwa kakunyina akudooneka. Mulakonzya kuba masimpe kuti Leza ulakonzya kubapa bulumbu babelesi bakwe basyomeka alimwi akubagwasya kulwana kulibilika ikuboola akaambo kazintu izyakacitika kaindi, zicitika lino alimwi aziyoocitika kumbele.

17, 18. Mbuti kwaamba zili kumoyo mbokukonzya kumugwasya kulwana kulibilika?

¹⁷ Nzila yane iikonzya kumugwasya kucesya kulibilika nkubandika, nkokuti kwaambila muntu ngomusyoma zili kumoyo. Muntu ngomukwetene limwi, mulongwe ngomumvwana kapati, naa mwaalu mumbungano inga wamugwasya kuzilanga munzila yeelede zintu zimupa kulibilika. “Zintu nzyalibilika muntu nzyezipa kuti moyo wakwe utyompwe, pele jwi libotu ndelipa kuti ukkomane.” (Tus. 12:25) Kubandika cakutainda mumbali alimwi akwaamba masimpe kulakonzya kumugwasya kuzyiba mbomukonzya kwaalwana mapenzi aanu. Bbaibbele litwaambila kuti: “Makanze alanyongana ikuti kakunyina kubandika, pele ikuti kakuli basikulaya banji kulaba kuzwidilila.”—Tus. 15:22.

¹⁸ Kuyungizya waawo, Jehova ulabagwasya Banakristo kulwana zintu zibapa kulibilika kwiinda mumiswaangano iicitwa nsondo ansondo. Ookuya mulakonzya kuyanzana abakombinyoko ibamubikkila maano alimwi ibayanda kukulwaizyanya umwi amweenzinyina. (Heb. 10:24, 25) “Kuyumizyanya” kuli boobo kuyoomugwasya kuyuma kumuuya alimwi kuyoopa kuti cimuubaubile kulwana kulibilika kuli koonse.—Rom. 1:12.

19. Ino ncinzi cimupa kuba alusyomo lwakuti cilongwe ncomujisi a Leza ciyoomuyumya?

¹⁹ Atubone mwaalu umwi mumbungano imwi ku Canada mbwaakaiya kubona mbociyandika kuwaala makatazyo aakwe kuli Jehova. Wakajisi mulimo uukatazya kali mwiiyi alimwi wakali kuciswa bulwazi bwakulibilika. Ino mbuti mukwesu ooyu mbwaakacikonzya kuliyumya mumapenzi aaya? Mboobu mbwapandulula: “Cipati kwiinda zyoonse ncondajana ncakuti, ikubeleka canguzu kuyumya cilongwe cangu a Jehova kwandipa nguzu ziinda kutegwa ndiliyumye mumapenzi aaya aandilwana mumizeezo. Lugwasyo kuzwa kubalongwe beni-beni alimwi abakwesu bakumuuya kulayandika kapati muziindi zyamapenzi. Ndilaanguluka kumwaambila mukaintu wangu cakutasisa kujatikizya mbondilimvwa. Baalu beenzuma alimwi amulangizi wesu wabbazu bakandigwasya kapati kuzilanga munzila yeelede zintu. Kuyungizya waawo, ndakaunka kucibbadela kuyoosilikwa, ndakacinca kujatikizya mbondakali kucibelesya ciindi cangu alimwi ndakali kujana ciindi cakulyookezya akunyanyaasya mubili. Buce-buce, ndakatalika kulimvwa kabotu. Ikuti naa kuli zintu nzyonditakonzyi kucita, ndizisiya buyo mumaanza aa Jehova.”

20. (a) Mbuti mbotukonzya kuwaala makatazyo eesu kuli Leza? (b) Ino tuyoobandika nzi mucibalo citobela?

²⁰ Mucibalo eeci, twabona mbociyandika kapati kuwaala makatazyo eesu kuli Leza kwiinda mukupaila camoyo woonse, kubala Jwi lyakwe alimwi akuzinzibala kuyeeya ncolyaamba. Kuyungizya waawo, twalanga-langa mbociyandika kuba amucelo wamuuya wakwe, kubandika izili kumoyo amulongwe ngotusyoma, alimwi akujanika kumiswaangano iiyaka ya Bunakristo. Mucibalo citobela tuyoozumanana kubandika Jehova mbwatugwasya kwiinda mukutupa bulangizi bwakuyooba abulumbu kumbele.—Heb. 11:6.