1. Ino nkaambo nzi kubbapatizyigwa ncoili ntaamu iyandika kapati? (Amubone cifwanikiso icili kumatalikilo aacibalo.)

BANTU banji ibaiya Bbaibbele balabbapatizyigwa mwaka amwaka. Bunji bwabo mbakubusi alimwi abana ibacili baniini. Kweelede kuti bakakomenena mukasimpe. Sena muli umwi wambabo? Kuti naa mboobo, mulalumbwa kapati. Kubbapatizyigwa ncintu ciyandika ku Banakristo, alimwi nintaamu iyandika kapati kutegwa mukafwutuke.—Mt. 28:19, 20; 1Pet. 3:21.

2. Ino nkaambo nzi ntaamu yakulyaaba ncoiteelede kuyoowegwa naa kweelebwa?

² Nokuba kuti kubbapatizyigwa kulakonzya kuleta zilongezyo zinji, alimwi kulabikkilizya amukuli. Munzila nzi? Mubuzuba mbomwakabbapatizyigwa, mwakaingula kuti inzya kumubuzyo wakuti, “Kwiinda mucipaizyo ca Jesu Kristo, sena mweempwa zibi zyanu akulyaaba kuli Jehova kuti mucite kuyanda kwakwe?” Kubbapatizyigwa kwanu kutondezya kulyaaba kwanu. Ncikonke ncomwakasyomezya kuzwa ansi amoyo kuli Jehova kuti munoomuyanda alimwi munoobikka kuyanda kwakwe mubusena bwakusaanguna kwiinda zintu zyoonse. Ooku  nkulyaaba kupati. Sena mweelede kuusa akaambo kakulyaaba ooku? Peepe, tamweelede naaceya. Kulibikka mumaanza aa Jehova kunyina nocilubide pe. Amulange-lange nzila iimbi! Muntu uulitantamuna kuli Jehova uli ansi abweendelezi bwa Saatani. Diabolosi tayandi kuti mukafwutuke. Mubwini, ulakonzya kukkomana kuti mwasweekelwa buumi butamani kutegwa mube kulubazu lwakwe mukukaka bweendelezi bwa Jehova.

3. Ino nzilongezyo nzi ziboola akaambo kakulyaaba kwanu kuli Jehova?

³ Mukwiindana akugwasyilizya Saatani, amulange-lange zilongezyo nzyomujisi mbuli Munakristo ulyaabide alimwi ubbapatizyidwe. Mbwaanga lino mwakaaba buumi bwanu kuli Jehova, mulakonzya kwaamba cakusinizya kwiinda kaindi kuti: “Jehova uli kulubazu lwangu; tandikooyoowa pe. Ino muntu inga wandityani?” (Int. 118:6) Tamukonzyi kuba acoolwe cipati mubuumi kwiinda kuba kulubazu lwa Leza alimwi akukkomaninwa anguwe.

4, 5. (a) Ino muunzila nzi kulyaaba mbouli mukuli wanu kumugama? (b) Ino mbuyumuyumu nzi ibutali bweenzu kubakubusi?

⁴ Mbomuli Munakristo uubbapatizyidwe, cilongwe canu a Jehova tacili mbuli lubono lwamukwasyi ndomukonzya kukona buyo. Mukwiimpana, lino mukuli wanu kutegwa mukafwutuke, nokuba kuti mucikkala abazyali banu. Ino nkaambo nzi ncociyandika kukayeeya kaambo aaka? Akaambo kakuti talili lyoonse nomukonzya kuzyibila limwi buyumuyumu mbomuyoojana kumbele. Mucikozyanyo, ikuti mwakabbapatizyigwa kamucili baniini kapati, kulangilwa kuti mbomulimvwa alimwi azintu zimukatazya ziyoocinca mwaakukubuka. Musimbi umwi mukubusi wakaamba boobu: “Kanji-kanji mwana muniini takonzyi kulimvwa bubi kuti ngu Kamboni wa Jehova akaambo buyo kakuti tanaalya kkekke kucikolo yakusekelela kuzyalwa. Pele mumyaka buyo misyoonto ciindi muzeezo wakuyanda koonana noukomena, weelede kusinizya ncobeni kuti kumvwida milawo ya Jehova nkokusala kwiinda kubota lyoonse.”

⁵ Nokuba boobo, kusikilwa buyumuyumu mbobatazyibide tacili ceenzu kubakubusi. Nobaba baabo ibakabbapatizyigwa kabali bapati balajana masunko ngobatali kulangila aasunka lusyomo lwabo. Masunko aali boobo alakonzya kujatikizya cikwati, kuciswa, naa mulimo. Mubwini, muntu uuli woonse tacikwe makani naa ujisi myaka yongaye, uyoosikilwa bukkale buyanda kuti asyomeke kuli Jehova.—Jak. 1:12-14.

6. (a) Ino muunzila nzi kulyaaba kwanu kuli Jehova mocili cisyomezyo ncomweelede kuzuzikizya ziyume zitete? (b) Ino ncinzi ncomukonzya kwiiya kulugwalo lwa Bafilipi 4:11-13?

⁶ Ikutegwa mugwasyigwe kuzumanana kusyomeka mubukkale buli boonse, tamweelede kuluba kuti cisyomezyo canu kuli Jehova mweelede kucizuzikizya ziyume zitete. Eeci caamba kuti mwakamwaambila Mweendelezi wabubumbo boonse kuti muyoozumanana kumubelekela nokuba kuti balongwe banu naa bazyali banu bacileka kucita oobo. (Int. 27:10) Mubukkale boonse, mulakonzya kulomba nguzu kuli Jehova kutegwa amugwasye kupona kweelana akulyaaba kwanu.—Amubale Bafilipi 4:11-13.

7. Ino caamba nzi kubelekela lufwutuko lwanu “cakuyoowa akukankama”?

⁷ Jehova uyanda kuti mube balongwe bakwe. Pele kutegwa muzumanane kuba mucilongwe eeco alimwi akubelekela lufwutuko lwanu kuyandika kubeleka canguzu. Mubwini, lugwalo lwa Bafilipi 2:12 lwaamba kuti: “Amuzumanane kubelekela lufwutuko lwanu cakuyoowa akukankama.” Majwi aayo atondezya kuti mweelede kulanga-langa mbomuyoozumanana acilongwe canu a Jehova akuzumanana kusyomeka kulinguwe tacikwe makani abuyumuyumu mbomuyoojana. Tamukonzyi kuciindizya kulisyoma. Nobaba babelesi ba Leza bakaindi bamwi bakaleya. Aboobo, ino nintaamu nzi nzyomukonzya kubweza kutegwa mubelekele lufwutuko lwanu?

8. Ino ciiyo canu nobeni cibikkilizya nzi, alimwi ino nkaambo nzi ncociyandika kapati?

⁸ Cilongwe a Jehova cijatikizya mbazu zyobilo—kumuswiilila alimwi akubandika anguwe. Ciiyo cesu ca Bbaibbele nenzila iiyandika kapati njotukonzya kumuswiilila Jehova. Eeci cilabikkilizya akujana luzyibo kwiinda mukubala akuzinzibala kuyeeya Jwi lya Leza alimwi amabbuku aamba zyamu Bbaibbele. Ciindi nomucita boobo, amuyeeye kuti kwiiya Bbaibbele tacili cintu cicitwa mbuli kuti muli kucikolo. Taceelede kuba mbuli kuti muyanda buyo kupeta twaambo kutegwa mukacite kabotu mumusunko wakucikolo. Kwiiya ikugwasya kapati kuli mbuli kuba mulweendo lulamfwu momuyanda kuzyiba zintu zipya kujatikizya bube bwa Jehova. Kucita boobo kuyoomugwasya kuswena kuli Leza, alimwi awalo uyooswena kulindinywe.—Jak. 4:8.

9. Ino nzibelesyo nzi izyamugwasya muciiyo canu nobeni?

⁹ Mbunga ya Jehova yapa zibelesyo izili mbozibede kumugwasya kutegwa mube apulogilamu yakwiiya iigwasya. Mucikozyanyo, cibeela cakuti “Cibeela Cijatikizya Kwiiya Bbaibbele” icijanika acibeela ca “Bakubusi” a jw.org cilakonzya kumugwasya kwiiya ziiyo zigwasya muzintu izyakacitika zilembedwe mu Bbaibbele. Alimwi a jw.org, zibalo zigwasya kwiiya zyakuti, “Ino Ncinzi Cini Ncoliyiisya Bbaibbele?” zilakonzya kumugwasya kusinizya kujatikizya nzyomusyoma. Zibalo zigwasya kwiiya eezyo zilakonzya kumugwasya kwiiya mbomukonzya kupandulula nzyomusyoma kuli bamwi. Nzila zimwi zyakwiiya zilakonzya kujanwa mucibalo cakuti “Bakubusi Balabuzya . . . Ino mbuti mbondikonzya kukukkomanina kubala Bbaibbele?” mumagazini ya Sinsimuka! yamu July 2009. Kwiiya akuzinzibala kuyeeya kulijisi mulimo mupati mukubelekela lufwutuko lwanu.—Amubale Intembauzyo 119:105.

10. Ino nkaambo nzi mupailo ncouyandika kapati ku Munakristo uubbapatizyidwe?

¹⁰ Nokuba kuti ciiyo canu nobeni ninzila imwi motuswiilila kuli Jehova, mupailo ninzila njotwaambaula kulinguwe. Munakristo tayelede kubona mupailo kuba cilengwa citajisi mulimo, naa kuba ‘coolwe munzila yamasalamuzi’ kutegwa ayungizye coolwe cakuzwidilila mucintu ncayanda kucita. Muciindi caboobo, mupailo nkubandika ncobeni a Mulengi wesu. Jehova uyanda kumvwa kulindinywe. (Amubale Bafilipi 4:6.) Ciindi nomulimvwa kulibilika kuli koonse, lulayo lwamu Bbaibbele lwabusongo lukulwaizya  ‘kuwaala mukuli wanu uuminya mumaanza aa Jehova.’ (Int. 55:22) Sena mubwini mulacisyoma eeco? Kuli bakwesu abacizyi banji ibakonzya kusinizya kulindinywe kuti cakabagwasya. Cilakonzya kumugwasya andinywe!

11. Ino nkaambo nzi ncomweelede kumulumba Jehova lyoonse?

¹¹ Mupailo umupa coolwe cakucita zinji ikutali buyo kulomba Jehova kuti amugwasye. Ibbaibbele lyaamba kuti: “Amutondezye kuti mulalumba.” (Kol. 3:15) Zimwi ziindi tulakonzya kutalika kwaabikkila kapati maano mapenzi eesu cakuti inga twatalika kuubya-ubya zilongezyo zinji nzyotujisi. Ino mbuti kuti buzuba bumwi abumwi mwayeeya kujatikizya zintu noziba zyotatwe buyo nzyomunga mwatondezya kuti mulalumba? Mpoonya amumulumbe Jehova mumupailo kujatikizya zilongezyo eezyo. Mukubusi wazina lya Abigail iwakabbapatizyigwa kajisi myaka iili 12 wakaamba boobu: “Ndilimvwa kuti tweelede kumulumba kapati Jehova kwiinda muntu uli woonse mububumbo. Tweelede kumulumba ciindi cili coonse akaambo kazipego nzyatupa. Aciindi cimwi ndakamvwa kuyeezya kubotu kapati kwakuti: Ikuti naa juunza twabuka katujisi buyo zintu nzyotwamulumba Jehova buzuba bwasunu, ino tunoojisi zintu zinji buti?” *

12, 13. Ino nkaambo nzi ncociyandika kuyeeya mbomwabulabila bubotu bwa Jehova nywebo lwanu kumugama?

¹² Mwami Davida wansiku, iwakavwunwa kumasunko manji aakatazya kapati, wakaamba majwi aaya mulwiimbo: “Amulabile mubone kuti Jehova mubotu; ulikkomene muntu uuyubila mulinguwe.” (Int. 34:8) Kaambo aaka katondezya mbozigwasya zintu zikonzya kumucitikila mubuumi. Ciindi nomubala Bbaibbele alimwi amabbuku eesu alimwi aciindi nomujanika kumiswaangano ya Bunakristo, mulamvwa zyakuluula zikulwaizya Leza mbwaakagwasya bamwi kuzumanana kusyomeka. Pele nomuyaabukomena kumuuya, mweelede kubona janza lya Jehova mubuumi bwanu. Ino mbuti nywebo kumugama mbomwakabulabila kale bubotu bwa Jehova?

¹³ Kuli nzila yomwe Banakristo boonse mbobakabulabila kale bubotu bwa Jehova. Nkwiinda mukutambwa kuti baswene kuli Leza a Mwanaakwe. Jesu wakaamba kuti: “Kunyina muntu uukonzya kuboola kulindime ccita kuti wakwelwa a Taata wakandituma.” (Joh. 6:44) Sena mulimvwa kuti majwi aayo alamujatikizya andinywe? Mukubusi ulakonzya kuyeeya kuti, ‘Jehova wakakwela bazyali bangu, mpoonya mebo ndakaile kubatobela.’ Pele ciindi nomwakalyaaba kuli Jehova akubbapatizyigwa, mwakatondezya kuti mwanjila mucilongwe cilibedelede anguwe. Lino mulizyibidwe ncobeni anguwe. Bbaibbele litucenjezya kuti: “Ikuti umwi kamuyanda Leza, ooyu ulizyibidwe anguwe.” (1Kor. 8:3) Amusole lyoonse kulubikkila maano lubazu ndomujisi mumbunga ya Jehova alimwi akulumba.

14, 15. Ino mbuti bukambausi mbobukonzya kumugwasya kuyumya lusyomo lwanu?

¹⁴ Nzila imbi mbomukonzya kubulabila bubotu bwa Jehova nkwiinda mukugwasyilizyigwa anguwe ciindi nomutola lubazu mukwaambila bamwi nzyomusyoma. Mulakonzya kucita oobo nomuli mubukambausi alimwi akucikolo. Bamwi cilabayumina kukambaukila beenzinyina kucikolo. Ambweni mulakonzya kumvwisya kaambo ncocili boobo. Tamuzyi mbobakonzya kwiingula. Cilakonzya kuba cintu ciyumu ikapati ciindi nomwaambaula kubantu banji kwiinda ciindi nomubandika asicikolonyoko omwe kumugama. Ino ncinzi cikonzya kumugwasya?

¹⁵ Cakusaanguna, amuyeeye kujatikizya kaambo kamupa kusinizya kujatikizya zintu nzyomusyoma. Sena zibalo zigwasya kwiiya zijanika a jw.org nkozili mumwaambo wanu? Kuti kamutali masimpe, amujane ciindi cakuzilangaula. Zyakabambwa munzila yakuti kazimugwasya kuyeeya  nzyomusyoma, kaambo ncomuzisyoma, alimwi ambomukonzya kubapandulwida bamwi nzyomusyoma. Ciindi lusyomo lwanu noluli luyumu alimwi anomulibambilide kabotu, muyookulwaizyigwa kupa bumboni kujatikizya zina lya Jehova.—Jer. 20:8, 9.

16. Ino ncinzi cikonzya kumugwasya kwaamba nzyomusyoma cakutawayawaya?

¹⁶ Nokuba boobo, noliba leelyo nomwalibambila, mulakonzya kuwayawaya kwaamba nzyomusyoma cabusicamba. Mucizyi uujisi myaka iili 18, iwakabbapatizyigwa amyaka iili 13 wakaamba kuti, “Ndilizyizyi nzyondisyoma, pele zimwi ziindi inga ndijisi penzi kujatikizya mbondikonzya kwaamba zili mumizeezo yangu.” Ino mbuti mbwacikonzya kulwana penzi eeli? Waamba kuti, “Inga ndilasola kubandika cakulikwaya. Basicikoloma balalikwaya kwaamba kujatikizya zintu nzyobacita. Ndeelede kwaanguluka andime kwaamba nzyondicita. Aboobo ndilaamba cintu cimwi mbuli kuti nkaano, mucikozyanyo mbuli kwaamba kuti, ‘Buzuba bumwi ndakali kuyiisya Bbaibbele, mpoonya . . . ’ Kumane ndilazumanana kwaamba kaambo kapati mukaano kangu. Nokuba kuti kaambo kakumatalikilo inga takaswaangene a Bbaibbele, kanji-kanji bamwi inga bayanda kumvwa ncondicita ciindi nondiyiisya Bbaibbele. Zimwi ziindi balabuzya mibuzyo kujatikizya makani aayo. Ciindi nondizumanana kubelesya nzila eeyi, cilauba-uba. Mpoonya ndilimvwa kabotu kapati lyoonse!”

17. Ino mbomulubona lusyomo lwanu inga camugwasya buti kutegwa mwaambile bamwi?

¹⁷ Ciindi nomutondezya bulemu kuli bamwi alimwi anomutondezya kuti mulabayanda, kulalangilwa kuti balakonzya kwiingula kabotu. Olivia uujisi myaka yakuzyalwa iili 17 iwakabbapatizyigwa kacili muniini wakaamba kuti: “Lyoonse ndali kuyoowa kubikkilizya Bbaibbele mumubandi nkaambo bantu inga babona mbuli kuti ndilaciindizya.” Mpoonya wakatalika kuzibona bumbi zintu. Muciindi cakubikkila kapati maano kukuyoowa kwakwe, Olivia wakayeeya kuti: “Bakubusi banji tabazyi cintu cili coonse kujatikizya Bakamboni ba Jehova. Ndendiswe Bakamboni balikke mbobazyi. Aboobo mbotucita zintu cilakonzya kupa kuti baingule kabotu naa pe. Ino mbuti kuti katujisi nsoni naa kuyoowa naa kacitukatazya buya kwaamba kujatikizya lusyomo lwesu, naa ino mbuti kuti katukankama ciindi notwaambaula? Inga capa kuti babone mbuli kuti tatukkomene kuba Bakamboni. Ambweni buya balakonzya kutatwiingula kabotu akaambo kakuti tatuzisyomi nzyotwaamba. Aboobo, kuti katwaambaula cakukkazika moyo alimwi cakusinizya kujatikizya nzyotusyoma, mubandi kauli buyo kabotu, kulalangilwa kuti bayootulemeka.”

18. Ino ncinzi cijatikizyidwe mukubelekela lufwutuko lwanu?

¹⁸ Mbubwenya mbotwabona, kubelekela lufwutuko lwanu mukuli mupati. Zintu zimwi izijatikizyidwe nkubala Jwi lya Leza alimwi akuzinzibala kuyeeya kujatikizya nzyomubala, kupaila kuli Jehova, alimwi akuyeeya nzila Jehova mbwaamulongezya nywebo kumugama. Kusungwaala mumbazu eezyi kuyooyumya lusyomo lwanu kucoolwe ncomujisi cakuba mucilongwe a Jehova. Kucita boobo alimwi kuyoomukulwaizya kwaamba nzyomusyoma cabusicamba.—Amubale Intembauzyo 73:28.

19. Ino nkaambo nzi kusoleka kwanu nkomucita kutegwa mukafwutuke ncokugwasya?

¹⁹ Jesu wakaamba kuti: “Ikuti umwi kayanda kunditobela, aliimye akunyamuna cisamu cakwe cakupenzyezya akuzumanana kunditobela.” (Mt. 16:24) Masimpe, kuba sikwiiya—kubikkilizya kulyaaba alimwi akubbapatizyigwa—mukuli wanu mupati mbomuli Banakristo. Pele, usololela kuzilongezyo zinji lino alimwi akubuumi butamani munyika mpya ya Leza. Aboobo, mulijisi twaambo tunji tweelede kumupa kuzumanana kubelekela lufwutuko lwanu!