Sena cakamukkomanisya kubala mamagazini aa Ngazi Yamulindizi aalino-lino? Amubone naa inga mwayiingula mibuzyo eeyi iitobela:

Ciindi nobagwasya bana babo munzila yakumuuya, ino nkaambo nzi bazyali bazangalisi ncobeelede kwaabikkila maano makani amwaambo?

Cakutadooneka, bana bayoowiiya mwaambo uubelesyegwa mucisi momubede ciindi nobali kucikolo alimwi anobali kumasena nkobajanika-janika. Cilakonzya kugwasya ikuti mwana wazyiba myaambo minji. Bazyali beelede kubona kujatikizya bana nkobakonzya kukajatisya kasimpe alimwi akuyaambele kumuuya, naa nkuyanzana ambungano iibelesya mwaambo uubelesyegwa mucisi naa eeyo iibelesya mwaambo wabazangalisi. Bazyali Banakristo babikka ziyandika zyakumuuya zyabana babo mubusena bwakusaanguna kwiinda nzyobayanda.—w17.05, pp. 9-11.

Ciindi Jesu naakabuzya Petro kuti: “Sena ulandiyanda kwiinda zyeezyi?” ino wakali kwaamba nzi naakaamba kuti “zyeezyi”? (Joh. 21:15)

Kuboneka kuti Jesu wakali kwaamba nswi nzyobakazwa aakuzuba naa mulimo wakuzuba nswi. Naakafwa Jesu, Petro wakajokela kumulimo wakwe wakaindi—kuzuba nswi. Banakristo beelede kulanga-langa akubona busena mulimo wakumubili mbobujisi mumoyo wabo.—w17.05, pp. 22-23.

Ino nkaambo nzi Abrahamu ncaakaambila mukaintu wakwe kuti aambe kuti wakali mucizyi wakwe? (Matl. 12:10-13)

Mubwini, Sara wakali mucizyi wa Abrahamu. Ikuti Sara naakaamba kuti wakali mukaintu wakwe, Abrahamu naakajaigwa alimwi eeci cakali kukonzya kupa kuti lunyungu ndwaakamusyomezya Leza lutabi.—wp17.3, pp. 14-15.

Ino ninzila nzi mpya Elias Hutter njaakabelesya kutegwa agwasye baabo ibakali kuyanda kwiiya Chihebrayo?

Wakali kuyanda kugwasya basicikolo kwiindanya akati kabbala lini lya Chihebrayo mu Bbaibbele alimwi atukumbatizyo twamabala ituli toonse twakajatikizyidwe. Aboobo mabala eeni wakali kwaasizya mpoonya tukumbatizyo tanaakali kutusizya. Nzila njemunya eeyi iigwasya ilajanika mubupanduluzi buyungizyidwe mu Bbaibbele lya New World Translation of the Holy Scriptures—With References.—wp17.4, pp. 11-12.

Ino twaambo nzi tujatikizya Munakristo mbwayelede kukubona kuba antobolo muŋanda kutegwa kalikwabilila kubantu bakonzya kumulwana?

Twaambo tumbi ntootu: Leza buumi ububona kuti bulisetekene. Jesu kunyina naakaambila basikumutobela bakwe kubweza panga kutegwa balikwabilile.(Lk. 22:36, 38) Tuyakwaafwula mapanga eesu kuba maamba aakulimya. Buumi bulayandika kapati kwiinda zintu zyakumubili. Tulaalemeka manjezyeezya abamwi, alimwi tuyanda kuba cikozyanyo cibotu. (2Kor. 4:2)—w17.07, pp. 31-32.

Ino nkaambo nzi makani ngaakalemba Matayo kujatikizya buumi bwa Jesu naakacili mwana ncaayimpene ayaayo ngaakalemba Luka?

Makani ngaakalemba Matayo ayeeme kapati azintu izyakali kujatikizya Josefa, mbuli mbwaakalimvwa ciindi naakamvwa kuti Mariya ulaada alimwi amilumbe kuzwa kuli Leza yakutijila ku Egepita mpoonya akujokela alimwi. Makani aa Luka aamba kapati kujatikizya Mariya, mucikozyanyo, mbwaakaswaya Elizabeta alimwi ambwaakalimvwa ciindi Jesu naakacaala kutempele.—w17.08, p. 32.

Ino Bbaibbele lyacikonzya kubako lyoonse nokuba kuti kwali zintu nzi?

Bupanduluzi bwamabala alimwi amajwi aabelesyedwe mu Bbaibbele ali kucinca mukuya kwaciindi. Ikucinca kwabulelo zimwi ziindi kwali kuujatikizya mwaambo uubelesyegwa kapati. Kwali kukazyigwa kumulimo wakusandulula Bbaibbele mumyaambo iibelesyegwa.—w17.09, pp. 19-21.

Sena tulijisi mungelo uutukwabilila?

Peepe. Jesu wakaamba kujatikizya bangelo babasikwiiya bakwe ibakali kulanga kubusyu bwa Leza. (Mt. 18:10) Wakali kwaamba kuti bangelo balabayanda basikwiiya bakwe, kutali kuti camaleele bangelo balamukwabilila umwi aumwi wabo.—wp17.5, p. 5.

Ino nguuli musyobo waluyando wiinda kusumpuka?

Ciindi noluyeeme anjiisyo ziluleme, luyando lwa a gaʹpe ngomusyobo waluyando wiinda kusumpuka. Lulakonzya kubikkilizya kubayanda bamwi. Pele luyando oolu lutondezya zyeelelo zisumpukide, mbuli milimo yaluyando lwini-lwini iicitilwa bamwi kutegwa bagwasyigwe.—w17.10, p. 7.