1, 2. Ciindi notusala zyakucita mubuumi, nkaambo nzi ncocili cabusongo kuswiilila Mulengi wesu? (Amubone zifwanikiso izili kumatalikilo aacibalo.)

IKUTI naa muli mukubusi, kweelede kuti mwakatambula lulayo lwiindene-indene kujatikizya buumi bwanu bwakumbele. Bamayi, basikupa lulayo, naa bamwi buyo bakamukulwaizya kuba alwiiyo lwaatala alimwi akujana mulimo uuvwolwa mali manji. Nokuba boobo, Jehova umupa lulayo lwiindene aloolo lwamunyika. Alimwi ulayanda kuti kamubikkila maano kucikolo kutegwa mwaakumanizya mukacikonzye kujana zintu nzyomuyandika kumubili. (Kol. 3:23) Pele ciindi nomusala nzyomuyanda kuyoocita mubuumi, ulamupa njiisyo zikonzya kumugwasya kupona munzila iiyoomukkomanisya mumazuba aano aamamanino.—Mt. 24:14.

² Kamuyeeya kuti Jehova ulizyi zintu zyoonse. Ulizyi iziyoocitika kumbele alimwi ulizyi kabotu-kabotu mbwaali afwaafwi mamanino aabweende bwazintu oobu. (Is. 46:10; Mt. 24:3, 36) Ulituzyi, alimwi ulizyi azintu zikonzya kutupa kukkomana akukkutila alimwi ulizyi azintu zikonzya kutupa kutyompwa akutakkomana. Aboobo nokuba kuti lulayo lwabantu inga kalulibonya mbuli kuti luli kabotu, pele  kuti kalutazwi mu Jwi lya Leza, nkokuti taluli kabotu.—Tus. 19:21.

3, 4. Mbuti kutobela lulayo lutali kabotu mbokwakabajatikizya ba Adamu a Eva alimwi abana babo?

³ Lulayo lutali kabotu lwakatalika kaindi. Saatani ngowakasaanguna kupa bantu lulayo lutali kabotu. Wakaambila Eva kuti walo alimwi a Adamu bakali kuyookkomana kapati ikuti kabalisalila nzyobayanda kucita mubuumi. (Matl. 3:1-6) Nokuba boobo, mubwini makanze aa Saatani akali mabi. Wakali kuyanda kuti ba Adamu a Eva alimwi abana mbobakali kuyoozyala, kabamumvwida alimwi akukomba nguwe muciindi cakukomba Jehova. Pele ino ncinzi ncaakabacitila? Jehova ngowakabapede zintu zyoonse nzyobakajisi, nkokuti kubaswaanganya antoomwe, kubapa muunda mubotu kauli munzi wabo alimwi amibili yabo iilondokede iyakali kunoopona mane kukabe kutamani.

⁴ Cuusisya ncakuti, ba Adamu a Eva tiibakamumvwida Leza, bakalizandula kulinguwe. Cakatobela, kweelana ambomuzyi, mapenzi. Mbubwenya mbuli maluba aatyolwa kucisamu, asyoonto-syoonto alatalika kuneta alimwi akuyuma. Bana babo abalo bakatalika kupenga akaambo kacibi. (Rom. 5:12) Nokuba boobo, bantu banji basala kutamumvwida Leza. Bayanda kuti kabapona buumi mbobayanda. (Ef. 2:1-3) Akaambo kaceeci, zicitika zilatondezya caantangalala kuti “kunyina busongo . . . mukukazya Jehova.”—Tus. 21:30.

5. Ndusyomo nzi ndwaakajisi Leza mubantu bakwe, alimwi sena wakaliluzi?

⁵ Nokuba boobo, Jehova wakalizyi kuti bantu bamwi, kubikkilizya abakubusi banji, bakali kuyoomuyandaula alimwi akumubelekela. (Int. 103:17, 18; 110:3) Eelo kaka ulabayanda kapati bakubusi aaba! Sena muli akati kabakubusi aaba? Ikuti mbocibede oobo, tacidoonekwi buya kuti mulikkomene kapati akaambo ‘kazintu zibotu’ zinji nzyamupa Jehova. (Amubale Intembauzyo 103:5; Tus. 10:22) Mbubwenya mbotutiibone, ‘zintu zibotu’ eezyi zibikkilizya cakulya cakumuuya cinji, balongwe bali kabotu, mbaakani zigwasya alimwi alwaanguluko lwini-lwini.

6. Nkaambo nzi ncomweelede kubikkila maano kuzintu nzyomuyandika kumuuya, alimwi ino mbuti Jehova mbwamupa zintu eezyi?

⁶ Mukwiimpana abanyama, muyandika lugwasyo lwakumuuya, oolo lwalo lukonzya kupegwa buyo a Mulengi wanu. (Mt. 4:4) Ciindi nomumuswiilila, mulaba amaano, busongo alimwi alukkomano. Jesu wakaamba kuti: “Balikkomene aabo bazyi kuti bayandika kusololelwa a Leza.” (Mt. 5:3) Leza ulamugwasya kumuuya kwiinda mu Jwi lyakwe alimwi ulamupa cakulya cakumuuya cinji kwiinda ‘mumuzike uusyomeka alimwi uucenjede.’ (Mt. 24:45) Eelo kaka tulakkomana kapati acakulya cakumuuya cinji icijisi busani!—Is. 65:13, 14.

7. Ino cakulya cakumuuya ncapa Leza cigwasya buti?

⁷ Cakulya cakumuuya ciyoomupa kuba basongo alimwi akuyeeya kabotu, calo icikonzya kumukwabilila munzila zinji. (Amubale Tusimpi 2:10-14.) Mucikozyanyo, bube oobu buyoomugwasya kuzyiba njiisyo zyakubeja, mbuli yakuti kunyina Mulengi. Buyoomukwabilila kububeji bwakuti kuba amali manji alimwi azintu zinji zyakumubili nzezikonzya kumuletela lukkomano. Alimwi buyoomugwasya kuzyiba alimwi akukaka kulombozya kubyaabi ikukonzya kumuletela mapenzi. Aboobo amuzumanane kuyandaula busongo bwa Leza akuyeeya kabotu alimwi akububona kuti mbube buyandika kapati! Ciindi nomuyandaula bube oobu buyandika kapati, muyoolibonena nobeni kuti Jehova ulamuyanda alimwi uyanda kuti kamupona kabotu.—Int. 34:8; Is. 48:17, 18.

8. Nkaambo nzi ncomweelede kuswena kuli Leza lino, alimwi ino mbuti eeci mbociyoomugwasya kumbele?

⁸ Ino-ino, nyika ya Saatani iyoonyonyoonwa,  alimwi Jehova alikke nguunooli mukwabilizi wesu. Mubwini, ciindi ciyoosika notuyoolangila kulinguwe kutegwa atupe cakulya cakumubili ncotunooyandika ciindi aciindi! (Hab. 3:2, 12-19) Inzya, ecino nceciindi cakuswena kuli Taateesu wakujulu alimwi akuyumya lusyomo lwenu mulinguwe. (2Pet. 2:9) Kuti mwacita oobo, nkokuti tacikwe makani aziyoomucitikila, muyoolimvwa mbwaakalimvwa sintembauzyo Davida, iwakalemba kuti: “Ndibikkide Jehova kumbele lyangu ciindi coonse. Akaambo kakuti uli kujanza lyangu lyalulyo, tandikazungaanizyigwi pe.”—Int. 16:8.

9. (a) Kweelana alugwalo lwa Johane 6:44, ino ncinzi Jehova ncacita? (b) Ncintu nzi cilibedelede icicitika ciindi nomuswaangana a Bakamboni bambi?

⁹ Jehova ulabakwela aabo mbazumizya kuba bamukwasyi wakwe wakumuuya, aabo babombe myoyo ulabaleta mubukombi bwakasimpe. (Amubale Johane 6:44.) Nomuswaangana ciindi cakusaanguna amuntu umwi uutali mukasimpe, sena kuli cili coonse ncomuzyi kujatikizya muntu ooyo? Ambweni inga mwazyiba buyo zina lyakwe alimwi akubona buyo mbwalibonya, nkokuti mulazyiba buyo zintu zisyoonto kujatikizya muntu ooyo. Pele tacikonzyi kuba boobo ciindi nomuswaangana amuntu umwi uumuzyi alimwi uumuyanda Jehova. Nokuba kuti muntu ooyo muliindene mbomwakakomezyegwa, muliindene zisi, mwaambo, naa bukkale, inga mwazyiba kale zinji kujatikizya nguwe alimwi awalo ulazyiba zinji kujatikizya ndinywe!

10, 11. Ncoolwe nzi ncobajisi bantu ba Jehova, alimwi ino eeci citugwasya buti?

¹⁰ Mucikozyanyo, cakufwambaana mulauzyiba “mwaambo” wanu nyoonse, nkokuti “mwaambo uusalala” wakasimpe. (Zef. 3:9) Aboobo mulazyiba aumwi nzyasyoma kujatikizya Leza, zyeelelo zyakulilemeka alimwi abulangizi bwakumbele, ikwaamba buyo zisyoonto. Kuyungizya waawo, eezyo nzyezintu ziyandika kapati nzyotweelede kuzyiba kujatikizya muntu umwi, nkokuti zintu zipa kuti kube kusyoma umwi amweenzinyina. Alimwi zipa kuti kube cilongwe cibotu alimwi icitamani.

¹¹ Takuli kuciindizya buya kwaamba kuti mbomuli bakombi ba Jehova, mulijisi balongwe babotu kapati ibasyomeka alimwi balajanika munyika yoonse mboizulwa. Nkuti buyo ibanji  tamunabonana! Ino mbaani bambi kunze lyabantu ba Jehova ibajisi cipego eeci ciyandisi?

12. Nimbaakani nzi zibotu nzyomukonzya kulibikkila?

¹² Amubale Mukambausi 11:9–12:1. Sena mulijisi mbaakani yakumuuya yomwe naa kwiinda waawo njomuli mukubelekela mpawo? Ambweni musola kubala zibeela zyamu Bbaibbele buzuba abuzuba. Naa ambweni musola kuyungizya luzyibo lwanu mukwaambaula alimwi amukuyiisya. Kufwumbwa mbocibede, ciindi nomuzwidilila, naa ciindi bamwi nobabona kuyaambele kwanu alimwi akumulumbaizya, ino mulimvwa buti? Cakutadooneka mulimvwa kuzwidilila alimwi akukkomana kapati. Alimwi muleelede kulimvwa boobo nkaambo mubikka kuyanda kwa Leza mubusena bwakusaanguna, ikwiiya Jesu.—Int. 40:8; Tus. 27:11.

13. Ikwiindana ambaakani zyakumubili, ncinzi cipa kuti kubelekela Leza kube cintu caalubazu alimwi cilibedelede?

¹³ Kwiinda mukubikkila maano kumbaakani zyakumuuya, mucita mulimo uukatalusya kapati akaambo kakuti tauli wabuyo pe. Mwaapostolo Paulo wakati: “Amukakatile, mutazungaani pe, lyoonse amube azintu zinji zyakucita mumulimo wa Mwami, mbokunga mulizyi kuti kubeleka kwanu nkomubelekela Mwami takuli kwabuyo pe.” (1Kor. 15:58) Mukwiimpana, kupona buumi bwakubikkila maano kumbaakani zyakumubili, nokuba kuti mbaakani eezyi zilakonzya kuzwidilila, kanji-kanji buumi oobo bunyina mpindu. (Lk. 9:25) Muntu umwi iwakaasinizya makani aaya lwakwe mwini alimwi akulindiswe, wakali Mwami Solomoni.—Rom. 15:4.

14. Ino ncinzi ncomukonzya kwiiya kuli Solomoni kujatikizya mbwaakasola kucita zintu zyakulikondelezya?

¹⁴ Solomoni, walo iwakavwubide kapati alimwi iwakajisi nguzu wakayanda ‘kusola zyakulikondelezya, kutegwa abone naa kuli bubotu buliko.’ (Muk. 2:1-10) Wakayaka maanda, wakalima myuunda alimwi akupanga mabuwa aakulyookezyela, alimwi wakacita kufwumbwa ncaakali kuyanda. Ino wakalimvwa buti naakamanizya kucita zintu zyoonse eezyi? Sena wakakkutila? Sena wakakkomana? Bwiinguzi bulisalede. Solomoni mwini kumugama ulatwaambila. Wakalemba kuti: “Nindakakkala ansi kuyeeya milimo yangu yoonse njondakacita amaanza aangu . . . , ndakabona kuti zyoonse zyakali zyabuyo . . . Kunyina cintu nociba comwe cakalaampindu ncobeni.” (Muk. 2:11) Eelo kaka nciiyo cibotu kapati eeci! Sena muyoociiya?

15. Nkaambo nzi lusyomo ncoluyandika kapati, alimwi ino luleta bubotu nzi kweelana ambokwaambidwe kulugwalo lwa Intembauzyo 32:8?

¹⁵ Jehova uyanda kumukwabilila kuzintu zibyaabi zikonzya kumucitikila akaambo kakucita zintu munzila iiteelede. Masimpe, muyandika lusyomo kutegwa mumumvwide Leza alimwi akubikka kuyanda kwakwe mubusena bwakusaanguna mubuumi bwenu. Lusyomo luli boobu lulayandika kapati alimwi kunyina noluletela kutyompwa. Inzya, Jehova kunyina nayooluluba “luyando ndomwakatondezya kuzina lyakwe.” (Heb. 6:10) Aboobo amubeleke canguzu kutegwa mube alusyomo luyumu, mpoonya muyoolibonena nobeni kuti Taateesu wakujulu ulamubikkila maano kapati.—Amubale Intembauzyo 32:8.

16. Nkaambo nzi lwaanguluko ncotweelede kulubona kuba cintu ciyandika kapati alimwi akulubelesya cabusongo?

¹⁶ Paulo wakalemba kuti: “Ooko kuli muuya wa Jehova, kuli lwaanguluko.” (2Kor. 3:17) Inzya, Jehova ulaluyanda lwaanguluko, alimwi uyanda kuti katuluyanda andiswe. Nokuba boobo, aciindi nciconya, uyanda kuti katulubelesya kabotu lwaanguluko lwesu, kucita boobo kuyootukwabilila. Ambweni kuli bakubusi bamwi mbomuzyi ibeebelela zintu ziletela muzeezo wakoonana  naa aabo ibatalilemeki mumakani aakoonana, ibasobana zisobano zikonzya kubanjizya muntenda, naa ibabelesya misamu iikola alimwi akunywa bukoko cakwiindilizya. Kumatalikilo, balakonzya kukkomana kucita zintu eezyi. Pele kanji-kanji zitobela nzibi, ambweni balakonzya kuciswa, kwaalilwa kucileka kucita zintu eezyi naa ambweni akufwa buya. (Gal. 6:7, 8) Cakutadooneka, “lwaanguluko” lwabo ndwakulyeena.—Tit. 3:3.

17, 18. (a) Mbuti kumvwida Leza mbokuletela lwaanguluko? (b) Mbuti lwaanguluko ndobakajisi kumatalikilo ba Adamu a Eva mbolwiindene alwabantu mazuba aano?

¹⁷ Mukwiimpana, ino bali bongaye bantu mbomuzyi ibakaciswa akaambo kakuti bakatobela zyeelelo zyamu Bbaibbele? Cakutadooneka, kumvwida Jehova kupa kupona buumi bubotu alimwi alwaanguluko lwini-lwini. (Int. 19:7-11) Ciinda kubota kapati ncakuti, ciindi nomubelesya lwaanguluko lwanu cabusongo, nkokuti kweelana amilawo ya Leza iilondokede alimwi azyeelelo, mutondezya Leza alimwi abazyali banu kuti muleelela kupegwa lwaanguluko lwiinda waawo. Mubwini, makanze aa Leza ikupa babelesi bakwe basyomeka lwaanguluko lwini-lwini, mu Bbaibbele ilupandululwa kuti “lwaanguluko lwabulemu bwabana ba Leza.”—Rom. 8:21.

¹⁸ Ba Adamu a Eva bakalijisi lwaanguluko luli boobu. Mumuunda wa Edeni, ino Leza wakabakasya kucita zintu zyongaye? Comwe buyo. Tiibakeelede kulya micelo yamucisamu comwe. (Matl. 2:9, 17) Sena inga mwaamba kuti ndunya naa tabuli bululami kulesyegwa kucita cintu comwe buyo? Peepe! Amuceezyanisye amilawo minji kapati iibambwa aabantu yalo bantu njobasinikizyigwa kuzyiba akutobela.

19. Muunzila nzi motuyiisyigwa kuba bantu bajisi lwaanguluko?

¹⁹ Jehova ulabalanganya cabusongo babelesi bakwe. Muciindi cakutupa milawo minji kapati, cakukkazika moyo ulatuyiisya mulawo waluyando. Uyanda kuti katupona kweelana azyeelelo zyakwe alimwi akusulaika cibi. (Rom. 12:9) Mulumbe wa Jesu waa Cilundu ncikozyanyo cibotu cakuyiisya kwa Leza nkaambo ulaamba cipa kuti bantu kabacita zibi. (Mt. 5:27, 28) Mbwali Mwami wa Bwami bwa Leza, Kristo uyoozumanana kutuyiisya munyika mpya kutegwa bululami alimwi abubi katububona mbuli mbwabubona. (Heb. 1:9) Alimwi uyoopa kuti tulondoke kumubili amumizeezo. Amuciyeeyele buyo, kunyina nomuyoolubizya limbi naa kupenga akaambo kacibi. Mpoonya kumamanino, muyooba “alwaanguluko lwabulemu” oolo Jehova ndwaakamusyomezya.

20. (a) Mbuti Jehova mbwalubelesya lwaanguluko lwakwe? (b) Ino inga mwagwasyigwa buti acikozyanyo ca Leza?

²⁰ Nokuba boobo, kunyina notuyooba alwaanguluko cakumaninina. Lwaanguluko lwesu lunooyendelezyegwa aluyando lwesu kuli Leza alimwi akubantuma. Mubwini, Jehova uyanda kuti twiiye nguwe. Ulijisi lwaanguluko lutagoli; pele, wakasala kuti kasololelwa aluyando ciindi nayendelezya zilenge zyakwe. (1Joh. 4:7, 8) Aboobo cileelela kubona kuti tulakonzya kuba alwaanguluko lwini-lwini ciindi notumwiiya Leza.

21. (a) Ino Davida wakalimvwa buti kujatikizya Jehova? (b) Ncinzi ncotuyoolanga-langa mucibalo citobela?

²¹ Sena mulalumba akaambo ‘kazintu zibotu’ zinji Jehova nzyamupa, mbuli cakulya cakumuuya cinji kapati, balongwe bali kabotu, mbaakani zigwasya alimwi abulangizi bwakuba alwaanguluko lwini-lwini? (Int. 103:5) Ikuti naa mulacita oobo, majwi mabotu aali kulugwalo lwa Intembauzyo 16:11 aabe aanu andinywe: “Yebo ulandipa kuzyiba nzila yabuumi. Kumbele lyako kuli kukondwa kutaambiki; kujanza lyako lyalulyo kuli lukkomano mane kukabe kutamani.” Mucibalo citobela tuyoolanga-langa mbono zyakumuuya zimbi izijanika kulugwalo lwa Intembauzyo 16. Ziyootondezya twaambo tuyandika kapati kutegwa mube abuumi bukkomanisya kapati.