Sena cakamukkomanisya kubala mamagazini aa Ngazi Yamulindizi aalino-lino? Amubone naa inga mwayiingula mibuzyo eeyi iitobela:

Mbumboni nzi bwamu Magwalo ibuliko butondezya kuti Leza ulatweetelela?

Ciindi bana Israyeli bansiku nobakali bazike ku Egepita, Leza wakalaazyi mapenzi aabo. (Kul. 3:7; Is. 63:9) Twakalengwa mucinkozya ca Leza, aboobo tulakonzya kuba alweetelelo. Ulatweetelela nociba ciindi notulimvwa kuti tatuyandiki luyando lwakwe.—wp18.3, peeji 8-9.

Ino mbuti njiisyo zya Jesu mbozyakabagwasya bantu kulwana penzi lyakusalulula?

Ba Juda banji muciindi ca Jesu bakali kusalulula. Jesu wakakankaizya kaambo kulicesya ncokuyandika alimwi wakaamba kuti kulisumpula akaambo kamubala nkubi. Wakaambila basikumutobela kuti beelede kubona umwi aumwi wabo mbuli mukwesu amucizyi.—w18.06, peeji 9-10.

Ncinzi ncotwiiya kukaambo kakapa kuti Leza atamuzumizyi Musa kunjila Munyika Yakasyomezyedwe?

Musa wakajisi cilongwe ciyumu a Jehova. (Dt. 34:10) Nokwakainda myaka iili 40, kabali kumamanino aalweendo lwabo kuya munkanda, bantu bakatongooka alimwi kujatikizya kubula maanzi. Leza wakaambila Musa kuti aambaule kundomba. Muciindi caboobo, Musa wakauma ndomba. Kweelede kuti Jehova wakanyema akaambo kakuti Musa tanaakatobela malailile ngaakamulailila naa kuti Musa tanaakatondezya bulemu kuli Leza akaambo kamaleele. (My. 20:6-12) Eeci ceelede kutuyiisya mbuli mbociyandika kapati kumvwida Jehova alimwi akumupa bulemu.—w18.07, peeji 13-14.

Ino inga kwaba buti kulubizya ikuti katubeteka kweelana ambwalibonya muntu?

Kuli zibeela zyotatwe kanji-kanji iziyunga bantu kweelana anzyobabona ameso: musyobo, buvwubi, alimwi aciimo. Cilayandika kapati kusola kubona bamwi munzila yakutasalulula mbubwenya mbwababona Leza! (Mil. 10:34, 35)—w18.08, peeji 8-12.

Ino ninzila nzi zimwi Banakristo bacembeede mobagwasyilizya bamwi?

Munakristo uucembeede iwacinca mulimo ngwaali kubeleka ulazumanana kukkomaninwa a Leza alimwi ulakonzya kucita zinji kugwasya bamwi. Ulakonzya kugwasya mwaalumi uutasyomi uukwete Kamboni, kugwasya uutacisungweede, kusololela ziiyo zya Bbaibbele alimwi akuyungizya mulimo wakwe.—w18.09, peeji 8-11.

Ino nzibelesyo nzi Banakristo nzyobabelesya kapati mukuyiisya?

Kuli tukkaadi twaa jw.org alimwi atupepa twakutamba bantu. Alimwi kuli matulakiti aali lusele aabambidwe kabotu alimwi Ngazi Yamulindizi a Sinsimuka! zilibikkilizyidwe. Zibelesyo eezyi zilabikkilizya amabroshuwa masyoonto, mabbuku obilo aabelesyegwa kuyiisya, mavidiyo one aayandika kapati, kubikkilizya ayakuti Nkaambo Nzi Ncomweelede Kwiiya Bbaibbele?​—w18.10, peeji 16.

Mbuti Munakristo mbwakonzya ‘kuula kasimpe,’ kweelana alulayo luli kulugwalo lwa Tusimpi 23:23?

Tatubbadeli mali buya kutegwa tujane kasimpe. Nokuba boobo, tweelede kulisungula kwaaba ciindi alimwi anguzu zyesu kutegwa tukajane.—w18.11, peeji 4.

Ncinzi ncotukonzya kwiiya kuli Hosea kujatikizya mbwaakamweendelezya mukaintu wakwe, Gomeri?

Gomeri wakacita bumambe cakwiinduluka-induluka, nokuba boobo Hosea wakamulekelela alimwi tanaakamuleka pe. Ikuti umwi wabanabukwetene Munakristo wacita bwaamu, ooyo uusyomeka inga wamulekelela. Ikuti ooyo uusyomeka watalika alimwi koonana angobakwetene limwi uutasyomeki, kucinoonyina kaambo kamu Magwalo kalimvwisya ikeelede kubapa kulekana.—w18.12, peeji 13.