1, 2. Ino mizeezo nzi iiliko iindene-indene kujatikizya Paradaiso?

BWAKALI bukkale bweenzya misozi. Ciindi basimuswaangano ibakazwa mumasi aambi nobakazwa mubbuwa lyakusobanina bbola nowakamana muswaangaano kudolopo lya Seoul, Korea, Bakamboni bakubusena ooko bakabazinguluka. Bunji bwabo bakali kubbaibbisya, kaboongolola kuti, “Tuyoobonana mu Paradaiso!” Ino muyeeya kuti ni Paradaiso nzi njobakali kwaamba?

² Bantu balaindana-indana mbobaipandulula Paradaiso. Bamwi baamba kuti paradaiso ncintu cakuyeeyela buyo. Bamwi baamba kuti paradaiso mbusena nkobakonzya kujana lukkomano alimwi akukkutila. Mwaalumi uufwide nzala kapati uukkede atebulu lyazyakulya ulakonzya kulimvwa kuti uli muparadaiso. Mukaintu umwi mumwaanda wamyaka wa 19, naakabona kkuti lijisi maluba-luba aamusyokwe manji wakoongolola kuti, “Njeeyi paradaiso!” Busena oobo asunu buciitwa kuti Paradaiso, nokuba kuti bulaakuba acaanda cilampa mamita ainda ku 15 amwaka. Ino nywebo mwiipandulula buti Paradaiso? Sena mulailangila?

3. Mbuti Bbaibbele mbolitupa kuyeeya kujatikizya paradaiso?

³ Bbaibbele lilaamba kujatikizya paradaiso yakaliko kaindi alimwi aparadaiso iiciboola kumbele. Makani aajatikizya Paradaiso akatalika kaindi kwaambwa mu Bbaibbele. Mu Bbaibbele lya Catholic Douay Version, ilyakasandululwa kuzwa muci Latin, lugwalo lwa Matalikilo 2:8 lwaamba kuti: “Kuzwa kumatalikilo Mwami Leza  wakalima paradaiso walukkomano: mwalo mwaakabikka [Adamu] ngwaakalenga.” Malembe aa Chihebrayo alaamba kujatikizya muunda wa Edeni. Edeni waamba “Lukkomano,” alimwi muunda ooyo wakali mubotu ncobeni. Kwakali zyakulya zinji, busena bulibonya kabotu alimwi akukkala muluumuno abanyama banji.—Matl. 1:29-31.

4. Nkaambo nzi ncotukonzya kwaamba muunda wa Edeni kuti nguparadaiso?

⁴ Pa·raʹdei·sos ndibbala lya Chigiliki ilyakasandululwa kubbala lya Chihebrayo lyakuti “muunda.” Bbuku lya Cyclopaedia ilyakalembwa a M’Clintock alimwi a Strong lyaamba kuti ciindi mu Giliki naamvwa bbala lyakuti pa·raʹdei·sos, ulakonzya kweezyeezya paaki mpati iiyeebeka alimwi iikwabilidwe kucintu cili coonse icikonzya kucisa muntu, iijisi masamu mabotu aazyala micelo iindene-indene alimwi atulonga twamaanzi itujisi bwizu mumbali-mbali mwalo balweengu alimwi ambelele mozicelela.—Amweezyanisye a Matalikilo 2:15, 16.

5, 6. Ino mbuti Paradaiso mboyakasweeka, ino cipa kubuzya mibuzyo nzi?

⁵ Leza wakabikka ba Adamu a Eva muparadaiso iili boobu, pele tiibakazumanana kukkala mulinjiyo. Nkaambo nzi? Nkaambo kakuti tiibakamumvwida Leza. Aboobo, balo alimwi abana babo bakasweekelwa Paradaiso. (Matl. 3:23, 24) Nokuba kuti kwakanyina muntu uli woonse, kulibonya kuti muunda ooyu wakaliko kusikila kuciindi ca Zambangulwe mumazuba a Nowa.

⁶ Bamwi balakonzya kulibuzya kuti, ‘Sena kuli mwaalumi uuli woonse, mukaintu, naa mwana uyookkomana mu Paradaiso anyika?’ Ino bumboni butondezya nzi? Kuti naa mulangila kuyoopona abayandwa banu mu Paradaiso, sena bulangizi bwanu kuli mpobuyeeme? Sena mulakonzya kupandulula kaambo Paradaiso ncoiyakuboola ncobeni?

7, 8. (a) Ncisyomezyo nzi Leza ncaakapa Abrahamu? (b) Ino cisyomezyo ca Leza ceelede kuti cakamupa kuyeeya nzi Abrahamu?

⁷ Kulikke nkotukonzya kujana bwiinguzi bweelede muubbuku lyakasololelwa a Mulengi iwakapanga Paradaiso yakusaanguna. Amubone Leza ncaakaambila mulongwe wakwe Abrahamu. Leza wakaamba kuti wakali kuyoovwuzya lunyungu lwa Abrahamu mbubwenya “mbuli musenga wakunkomwe yalwizi.” Alimwi Jehova wakapa cisyomezyo eeci ciyandika kapati: “Kwiinda mulunyungu lwako, masi oonse aamunyika ayoolongezyegwa akaambo kakuti waswiilila jwi lyangu.” (Matl. 22:17, 18) Leza wakaciinduluka cisyomezyo eeco kumwana wa Abrahamu alimwi akumuzyukulu wakwe.—Amubale Matalikilo 26:4; 28:14.

⁸ Mu Bbaibbele kunyina citondezyo cili coonse cakuti Abrahamu wakayeeya kuti bantu bakali kuyoopegwa bulumbu bwamamanino bwaparadaiso yakujulu. Aboobo ciindi Leza naakaamba kuti “masi oonse aamunyika” ayoolongezyegwa, kweelede kuti Abrahamu wakayeeya kujatikizya zilongezyo anyika. Cisyomezyo cakali kuzwa kuli Leza, aboobo cakali kutondezya bukkale bubotu ‘kumasi oonse aamunyika.’ Sena kuli zintu azimbi izyakacitika akati kabantu ba Leza izisinizya kaambo aako?

9, 10. Ino zisyomezyo nzi zyakumbele izyakapa bulangizi bwazilongezyo ziboola?

⁹ Davida, umwi waluzubo lwa Abrahamu, wakaamba kujatikizya ciindi cakumbele “bantu babi” alimwi ‘abasimucita zibi’ nobayoonyonyoonwa. Ino ncinzi ciyoocitika? “Bantu babi tabakabi limbi pe.” (Int. 37:1, 2, 10) Muciindi caboobo, “babombe myoyo bayookona nyika, eelyo bayoobotelwa kapati muluumuno lunji.” Davida alimwi wakasololelwa amuuya kulemba kuti: “Balulami bayookona nyika, alimwi bayookkala alinjiyo lyoonse mane kukabe kutamani.” (Int. 37:11, 29; 2Sam. 23:2) Ino muyeeya kuti zisyomezyo eezyo zyakabajatikizya buti bantu ibakali kuyanda kucita kuyanda kwa Leza? Bakali kukonzya kuba abulangizi bwakuti, ikuti naa bantu balulami bakali kuyookkala anyika, nkokuti mukuya kwaciindi paradaiso iili mbuli muunda wa Edeni yakali kuyoobukulusyigwa.

¹⁰ Mukuya kwaciindi, bunji bwabana Israyeli ibakali kulitaminina kuti babelekela Jehova bakamukaka  walo alimwi abukombi busalala. Aboobo Leza wakazumizya bana Babuloni kulwana bantu bakwe, kunyonyoona nyika yabo alimwi bunji bwabo bakatolwa mubuzike. (2Mak. 36:15-21; Jer. 4:22-27) Nokuba boobo, basinsimi ba Leza bakasinsima kuti yaakwiinda myaka iili 70, bantu bakwe bakali kuyoopiluka kumunzi wabo. Businsimi oobo bwakazuzikizyigwa. Pele alimwi kuli ncobwaamba kulindiswe. Ciindi notulanga-langa bumwi bwambubo, amuyeeye kuti tulabikkila kapati maano kuparadaiso yakumbele anyika.

11. Ino lugwalo lwa Isaya 11:6-9 lwakazuzikizyigwa buti, pele ino mubuzyo nzi ngotukonzya kubuzya?

¹¹ Amubale Isaya 11:6-9. Leza wakasinsima kwiinda muli Isaya kuti, bantu bakwe baakujoka kunyika yabo, tiibakali kuyoolwana azintu zibyaabi; alimwi kunyina nobakali kuyakuyoowa kulwanwa abanyama naa bantu ibali mbuli banyama. Bana abapati bakali kuyookwabililwa. Sena eeci tacimupi kuyeeya bukkale mbuli boobo Leza mbwaakabambide mumuunda wa Edeni? (Is. 51:3) Alimwi businsimi oobu kwiinda muli Isaya bwakaamba kuti nyika yoonse, kutali buyo cisi ca Israyeli, yakali ‘kuyoozula luzyibo lwa Jehova mbubonya maanzi mbwaazuzya lwizi.’ Ino eeci ciyoocitika lili?

12. (a) Ino nzilongezyo nzi nzyobakajana aabo ibakapiluka kuzwa mubuzike ku Babuloni? (b) Ino ncinzi citondezya kuti lugwalo lwa Isaya 35:5-10 lujisi kuzuzikizyigwa akumbi?

¹² Amubale Isaya 35:5-10. Isaya wakayungizya kukankaizya kuti aabo ibakali kuyoopiluka tiibakali kuyookongwa abanyama naa bantu. Nyika yabo yakali kuyoozyala micelo minji, nkaambo kwakali kuyooba maanzi manji, mbubwenya buyo mbuli muunda wa Edeni mbowakajisi maanzi manji. (Matl. 2:10-14; Jer. 31:12) Sena nkokwakali kuyooba kuzuzikizyigwa kulikke ooku? Kwiina bumboni butondezya kuti aabo ibakali kuyoopiluka kuzwa mubuzike bakali kuyooponesyegwa camaleele. Mucikozyanyo, boofwu kunyina nobakatalika kubona alimwi. Aboobo Leza wakali kutondezya kuti kuponesyegwa kwini-kwini kwakali kuyooba kumbele.

13, 14. Ino mbuti aabo ibakali baange kaindi mbobakabona kuzuzikizyigwa kwalugwalo lwa Isaya 65:21-23? Alimwi ino ncibeela cili cabusinsimi oobu ciyandika kuzuzikizyigwa? (Amubone cifwanikiso icili kumatalikilo aacibalo.)

¹³ Amubale Isaya 65:21-23. Ba Juda nobakapiluka tiibakajana maanda mabotu; kunyina nobakajana myuunda yamasaansa iilimidwe. Pele kwakali kuyooba kucinca ciindi Leza naakali kuyoobalongezya. Eelo kaka cakali kuyookkomanisya kulimbabo kuyaka maanda akukkala mulingawo! Bakali kukonzya kusyanga zisyango alimwi akukkomana amicelo mibotu.

¹⁴ Amubone kaambo kayandika kapati kali mubusinsimi oobu. Sena ciyoosika ciindi mazuba eesu ‘nayooba mbuli mazuba aacisamu’? Zisamu zimwi zilapona kwamyaka minji kapati. Bantu bakeelede kuti kabajisi buumi bubotu kutegwa bapone kwaciindi cilamfwu boobo. Ikuti nobakacikonzya kukkala mubukkale Isaya mbwaakasinsima, nocakazuzikizyigwa ncobakali kulombozya, nkokuti paradaiso! Pele businsimi oobo buyoozuzikizyigwa!

15. Mbuti mbomunga mwazipandulula mubufwaafwi zilongezyo zimwi izyaambidwe mubbuku lya Isaya?

¹⁵ Amuyeeye kujatikizya businsimi bwabandikwa mbobwaamba zyaparadaiso yakumbele; Bantu bamunyika yoonse bayoolongezyegwa a Leza. Kunyina muntu uyoolwanwa abanyama naa bantu ibali mbuli banyama. Boofwu, basinke matwi alimwi abalema bayooponesyegwa. Bantu bayooyaka maanda aabo alimwi bayookkomana kulima zyakulya zibotu. Bayoopona kwaciindi cilamfwu kwiinda zisamu. Masimpe, tulajana zitondezyo mu Bbaibbele zyakuti buumi buli boobu nkobuli kumbele. Nokuba boobo, bamwi balakonzya kwaamba kuti businsimi oobu tabwaambi kuti kuyooba paradaiso anyika. Ino inga mwaingula buti? Ino nkaambo nzi kalimvwisya ikamupa kulangila kuparadaiso iini-ini anyika? Muntu mupati kwiinda iwakaponede wakapa kaambo kalimvwisya.

16, 17. Muubukkale buli buti Jesu mwaakaamba kujatikizya Paradaiso?

¹⁶ Nokuba kuti wakanyina mulandu, Jesu wakapenzyegwa  akwaanzikwa acisamu kutegwa afwe, kumabazu aakwe kwakali ba Juda bobilo izyakali zigwebenga. Katanafwa, umwi wazigwebenga eezyi wakazumina kuti Jesu wakali mwami alimwi wakalomba kuti: “Jesu, ukandiyeeye waakunjila mu Bwami bwako.” (Lk. 23:39-42) Buumi bwanu bwakumbele bulibikkilizyidwe mubwiinguzi bwa Jesu ibuli kulugwalo lwa Luka 23:43. Basyaabusongo bamwi mazuba aano bapa bupanduluzi oobu bwabbala abbala: “Ncobeni ndakwaambila kuti, sunu uyooba andime mu Paradaiso.” Amubikkile maano kubbala lyakuti “sunu.” Ino ncinzi ncaakali kutondezya aawa Jesu? Kuli mizeezo iindene-indene.

¹⁷ Mumyaambo minji mazuba aano, makoma alabelesyegwa kutegwa atondezye naa kusalazya bupanduluzi bwakaambo. Pele mumalembe aa Chigiliki aakusaanguna aaliko, kanji-kanji twaandaanyo tiitwakali kubelesyegwa. Aboobo kulakonzya kuba mubuzyo wakuti: Sena Jesu wakali kwaamba kuti, “Ndakwaambila, sunu uyooba andime mu Paradaiso”? Naa wakali kwaamba kuti, “Ndakwaambila sunu, uyooba andime mu Paradaiso”? Basanduluzi balakonzya kubikka kakoma kweelana ancobayeeya kujatikizya ncaakali kupandulula Jesu, alimwi mulakonzya kubujana busanduluzi oobo bobilo muma Bbaibbele aadumide mazuba aano.

18, 19. Ncinzi ncotukonzya kwaamba kujatikizya ncaakali kupandulula Jesu?

¹⁸ Nokuba boobo, amuyeeye kuti Jesu wakaambilide basikumutobela kuti: “Mwanaamuntu uyooba mukati kanyika kwamazuba otatwe isyikati amasiku.” Alimwi wakaamba kuti: “Mwanaamuntu uyakwaabwa mumaanza aabantu, eelyo bayoomujaya, mpoonya mubuzuba bwatatu, uyoobusyigwa.” (Mt. 12:40; 16:21; 17:22, 23; Mk. 10:34) Mwaapostolo Petro wakaamba kuti eeci cakacitika. (Mil. 10:39, 40) Aboobo Jesu kunyina naakaunka mu Paradaiso iili yoonse mubuzuba walo alimwi acigwebenga mbobakafwa. Jesu wakali “mu Cuumbwe [naa “Cikkalilo Cabafwu”]” kwamazuba aali mbwaabede, kusikila Leza naakamubusya.—Mil. 2:31, 32; bupanduluzi buyungizyidwe. *

¹⁹ Aboobo tulakonzya kubona kuti cisyomezyo ca Jesu kucigwebenga cakatalika amajwi aakuti: “Ncobeni sunu ndikwaambila kuti.” Kwaamba munzila eeyi kwakalidumide nokuba kuciindi ca Musa. Wakaamba kuti: “Aaya majwi ngondimulailila sunu ayelede kuba mumyoyo yanu.”—Dt. 6:6; 7:11; 8:1, 19; 30:15.

20. Ncinzi citondezya kuti kumvwisya kwesu kujatikizya ncaakaamba Jesu kuliluzi?

²⁰ Musanduluzi wa Bbaibbele waku Middle East wakaamba kuti: “Kaambo kapati mumajwi aaya kali abbala lyakuti ‘sunu’ alimwi ayelede kubalwa kuti, ‘Ncobeni sunu ndikwaambila kuti, uyooba andime mu Paradaiso.’ Cisyomezyo eeci cakaambwa mubuzuba oobo pele cakeelede kuyoozuzikizyigwa kumbele.” Musanduluzi wakaamba kuti oobu mbobaamba bantu bakubusena oobo ikupandulula kuti “cisyomezyo cakaambwa mubuzuba bumwi alimwi akuti cakali kuyoozuzikizyigwa kumbele.” Nkakaambo kaako busanduluzi bwa Bbaibbele lyaci Syriac ilyakalembwa mumwaanda wamyaka wasanu bwaamba kuti: “Ameni, ndakwaambila sunu kuti uyooba andime mu Muunda wa Edeni.” Cisyomezyo eeci ceelede kutukulwaizya toonse.

21. Ncoolwe nzi catakapegwa kucigwebenga, alimwi nkaambo nzi?

²¹ Cigwebenga icakali afwaafwi kufwa tiicakazyi kuti Jesu wakapangide cizuminano abaapostolo bakwe basyomeka kuti bayooba anguwe mu Bwami bwakujulu. (Lk. 22:29) Kuyungizya waawo, cigwebenga eeco kunyina nocakabbapatizyidwe. (Joh. 3:3-6, 12) Aboobo tulakonzya kwaamba kuti cisyomezyo ca Jesu ni Paradaiso anyika.  Nokwakainda myaka, mwaapostolo Paulo wakaamba kujatikizya cilengaano camwaalumi “wakakwempelwa muparadaiso.” (2Kor. 12:1-4) Mukwiimpana acigwebenga icakali afwaafwi kufwa, Paulo alimwi abaapostolo bamwi basyomeka bakasalwa kutegwa bakaunke kujulu kuyooba antoomwe a Jesu mu Bwami. Nokuba boobo, Paulo wakali kwaamba kujatikizya cintu cimwi cakali kuyoocitika kumbele, nkokuti “paradaiso” yakumbele. * Sena eeci cakali kubikkilizya anyika? Alimwi sena mulakonzya kuyoojanika?

22, 23. Ncinzi ncomukonzya kulangila?

²² Amuzyibe kuti Davida wakabonena limwi ciindi ‘balulami nobakali kuyookona nyika.’ (Int. 37:29; 2Pet. 3:13) Davida wakali kwaamba ciindi bantu anyika nobayookkala kweelana anzila zya Leza ziluleme. Businsimi ibuli kuli Isaya 65:22 bwaamba kuti: “Mazuba aabantu bangu ayooba mbuli mazuba aacisamu.” Eeci caamba kuti bantu bayoopona myaka minji kapati. Sena mulacilangila eeco? Inzya, kayi kweelana alugwalo lwa Ciyubunuzyo 21:1-4, Leza uyoobalongezya bantu alimwi cimwi cazilongezyo ncakuti “lufwu talukabi limbi.”

²³ Ncolituyiisya Bbaibbele kujatikizya Paradaiso cilasalala. Ba Adamu a Eva bakacisowa coolwe cakupona kukabe kutamani mu Paradaiso, pele nyika iyooba Paradaiso alimwi. Kweelana ambwaakasyomezya Leza, bantu bali munyika bayoolongezyegwa. Kwiinda mukusololelwa amuuya, Davida wakaamba kuti babombe myoyo alimwi abalulami bayookona nyika alimwi akukkala mulinjiyo lyoonse mane kukabe kutamani. Businsimi ibuli mubbuku lya Isaya butupa kulangila ciindi notuyookkomana abuumi buli kabotu mu Paradaiso yeebeka anyika. Ino ndilili nociyoocitika eeco? Ciindi cisyomezyo ca Jesu kucigwebenga nociyoozuzikizyigwa. Mulakonzya kuyoojanika mu Paradaiso eeyo. Aciindi eeco, majwi aakaambwa abakwesu alimwi abacizyi kumuswaangano ku Korea aakuti: “Tuyoobonana mu Paradaiso!” ayoozuzikizyigwa.