SENA muli bantu balumba? Ooyu mubuzyo ngotweelede kubikkila maano toonse. Bbaibbele lyakasinsima kuti mumazuba ngotupona, bantu banji ‘tabanoolumbi.’ (2Tim. 3:2) Ambweni kuli bantu mbomuzyi ibayanda buyo kuti bamwi kababacitila zintu naa kubapa zintu. Ambweni balimvwa kuti tabeelede kulumba kujatikizya zintu nzyobapegwa. Mubwini mulazumina kuti tacikkomanisyi kuba akati kabantu bali boobu.

Mukwiimpana, babelesi ba Jehova baambilwa kuti: “Amutondezye kuti mulalumba.” Tweelede ‘kulumba kujatikizya zintu zyoonse.’ (Kol. 3:15; 1Tes. 5:18) Mubwini, cilakonzya kutugwasya kapati kutondezya muuya wakulumba. Kuli twaambo tuli mbotubede tupa kuti kacili boobo.

Kaambo kamwi kapati ikeelede kutupa kuba amuuya wakulumba nkakuti, muuya ooyu utugwasya kulimvwa kabotu. Kanji-kanji muntu uulumba ulalangilwa kulimvwa kabotu alimwi ayooyo uulumbwa awalo ulalimvwa kabotu. Nkaambo nzi kulumba ncokutupa kuti swebo alimwi abamwi katulimvwa kabotu? Amubone cikozyanyo eeci: Ikuti naa mwabona kuti bamwi balilisungwide kumucitila cintu cimwi, sena eeci tacitondezyi kuti mulayandika kapati kulimbabo? Balamubikkila maano. Ciindi nomubona kuti balamubikkila maano, cimupa kulimvwa kabotu. Inga tweezyeezya buyo, kweelede kuti oobo mbwaakalimvwa Rute. Boazi wakatondezya bwaabi kuli Rute. Cakutadooneka, Rute wakakkomana kapati kubona kuti muntu umwi wakamubikkila maano.—Rut. 2:10-13.

Cileelela kapati kumulumba Leza. Cakutadooneka, kweelede kuti zimwi ziindi mulayeeya kujatikizya zipego zinji zyakumuuya alimwi azyakumubili nzyapede kale Leza alimwi azyeezyo nzyazumanana kupa. (Dt. 8:17, 18; Mil. 14:17) Pele muciindi cakuyeeya buyo asyoonto kujatikizya bubotu bwa Leza, sena inga tiimwajana ciindi cinji cakuzinzibala kuyeeya zilongezyo zinji eezyo Leza nzyaakamupa nywebo alimwi abayandwa banu? Kuzinzibala kuyeeya bwaabi bwa Mulengi wanu kuyoomugwasya kuzumanana kumulumba alimwi akumupa kubona mbwamuyanda kapati ambwamulumba.—1Joh. 4:9.

Pele tamweelede kugolela buyo aakuyeeya bwaabi bwakwe alimwi akuzinzibala kuyeeya zilongezyo nzyamupa; mweelede kumulumba Jehova akaambo kabubotu bwakwe. (Int. 100:4, 5) Kwaambwa kuti, “kulumba ncintu cimwi ciyandika kapati icipa bantu kukkomana.”

Kaambo kambi ikatondezya kuti kulumba kulayandika kapati nkakuti, kuyumya zilongwe. Toonse tulayanda kulumbwa. Ikuti mwamulumba muntu umwi kuzwa ansi aamoyo akaambo kaluzyalo ndwaatondezya, muyooba acilongwe ciyumu anguwe. (Rom. 16:3, 4) Kuyungizya waawo, bantu balumba balakonzya kuba amuuya wakugwasya bamwi. Balabona ciindi bamwi nobabagwasya, mpoonya abalo balakulwaizyigwa kugwasya bamwi. Masimpe, kugwasya bamwi kuletela lukkomano. Eeci cileendelana amajwi ngaakaamba Jesu aakuti: “Kupa kulakkomanisya kapati kwiinda kupegwa.”—Mil. 20:35.

Ba Robert Emmons, bagwasyilizyi babapati-pati ku University of California ibavwuntauzya makani aajatikizya kulumba bakaamba kuti: “Kutegwa katulumba, tweelede kuzyiba kuti toonse tuyandika lugwasyo kuzwa kuli bamwi. Zimwi ziindi tulabagwasya alimwi zimwi ziindi abalo balatugwasya.” Kutegwa tuzumanane kupona alimwi akuba alukkomano, tulagwasyigwa abamwi munzila zinji. Mucikozyanyo, balakonzya kutupa cakulya naa kutugwasyilizya mubusilisi. (1Kor. 12:21) Muntu uulumba ulatondezya kulumba kuzintu nzyobamucitila  bamwi. Aboobo sena mulijisi cilengwa cakutondezya kulumba kuzintu nzyobamucitila bamwi?

Ikaambo kamwi ncociyandika kuba amuuya wakulumba nkakuti ulamugwasya kubikkila maano kuzintu zibotu kutali zibi. Munzila iikonzyenye, mizeezo yanu ibeleka mbuli nsefa. Ilamugwasya kubikkila maano kuzintu zibotu kutali zibi. Mulakonzya kutalika kubona zintu munzila iili kabotu akutabikkila kapati maano kumapenzi. Ciindi nomuzumanana kulumba, muyoobona kuti kuli bubotu bunji ibujanika kwiinda mukucita boobo, calo iciyoomupa kuti muzumanane kulumba. Kuba amuuya wakulumba kuyoomugwasya kucita ceeco ncaakaamba mwaapostolo Paulo naakati: “Lyoonse amukondwe mu Mwami.”—Flp. 4:4.

Kulumba kulamugwasya kutabikkila kapati maano kuzintu izitali kabotu. Cilakatazya kulumba kuti kumwi katumvwa munyono, kuusa naa kunyema. Alimwi bantu balumba tabayandisyi kapati zintu zyakumubili. Balakkomana azintu nzyobajisi kale alimwi tababikkili maano kukuyandaula zimbi ziyungizyidwe.—Flp. 4:12.

Mbomuli Banakristo, mulizyi kuti ncayanda Saatani ncakuti mulimvwe kuusa alimwi akutyompwa akaambo kabuyumuyumu mbomujana mumazuba aaya aakumamanino. Inga wakkomana kuti naa mwaba amuuya mubyaabi wakutongooka. Ikuba amuuya uuli boobo kulakonzya kumupa kutazwidilila mumulimo wakukambauka makani mabotu. Alimwi buya, kulumba kuleendelana amucelo wamuuya, kulabikkilizya alukkomano iluboola akaambo kazintu zibotu eezyo Leza nzyamupede alimwi akuba alusyomo muzisyomezyo zyakwe zyoonse.—Gal. 5:22, 23.

Mbomuli umwi wabantu ba Jehova, cakutadooneka mulaazumina makani aambwa mucibalo eeci kujatikizya kulumba. Nokuba boobo, mulizyi kuti muuya wakulumba alimwi akuzilanga munzila yeelede zintu taulibooleli buyo. Pele eeco taceelede kumutyompya pe. Mulakonzya kuba amuuya wakulumba alimwi akuzumanana kuba anguwo. Munzila nzi? Amujane ciindi buzuba abuzuba cakuyeeya zintu zimwi mubuumi bwanu izyeelede kumupa kulumba. Ikuti naa mwazumanana kucita boobo, muyooba acilengwa cakulumba. Eeci ciyoomupa kukkomana kapati kwiinda baabo ibabikkila buyo maano kumapenzi aamubuumi. Amubikkile maano kuzintu zibotu eezyo Leza alimwi abantu bamwi nzyobamucitila, zyalo izimukulwaizya alimwi akumupa kukkomana. Ambweni inga mwatalika kuzilemba buya mubbuku. Mulakonzya kulemba zintu zyobilo naa zyotatwe izyamupa kukkomana buzuba oobo.

Basikuvwuntauzya bamwi bakajana kuti ciindi notuba acilengwa cakulumba bantu, cilakonzya kucinca mbobubeleka bongo bwesu, calo cikonzya kupa kuti cuube-ube kukkomana mubuumi bwesu. Muntu uulumba ulakkomana kapati. Aboobo amuyeeye buyo zilongezyo nzyomujisi, amukkomane azintu zibotu izimucitikila mubuumi alimwi amube amuuya wakulumba lyoonse! Muciindi cakuba amuuya wakutalumba kuzintu zibotu, “amumulumbe Jehova, nkaambo mubotu.” Inzya, “amulumbe kujatikizya zintu zyoonse.”—1Mak. 16:34; 1Tes. 5:18.