Sena inga mwaingula mibuzyo eeyi iitobela kuzwa mumamagazini aa Ngazi Yamulindizi aamu 2019?

Ino caamba nzi cisyomezyo ca Leza eeci: “Kunyina cilwanyo cipangilwa kulwana nduwe iciyoozwidilila”? (Is. 54:17)

Tulakonzya kusyoma kuti Leza uyootukwabilila kuzintu zikonzya kutunyonyoona mbuli ‘bukali bwabantu basilunya.’ (Is. 25:4, 5) Basinkondoma kunyina nobayoozwidilila kutuletela mapenzi aatamani.—w19.01, peeji 6-7.

Mbuti Leza mbwaakabeendelezya bana Kanana alimwi abana Israyeli basiluleyo mbokutondezya bululami bwakwe?

Leza wakababeteka aabo ibakali kucita micito yakoonana iisesemya naa kupenzya bamakaintu alimwi abana. Pele wakali kubalongezya bantu aabo ibakali kumumvwida alimwi akweendelezya bamwi cabululami.—w19.02, peeji 22-23.

Ino ncinzi ncotukonzya kucita ikuti muntu uutali musyomi wasala kutwiiminina mumupailo?

Inga twasala kuumuna buyo alimwi akucita oobo cabulemu, pele tatweelede kwaamba kuti “ameni” naa kujatana maanza abaabo ibajanika. Tulakonzya kusala kulipailila cakaumuumu.—w19.03, peeji 31.

Ino mapati buti makani aakutundulula bana?

Nkubisizya sikutundululwa, mbungano, beendelezi bamfwulumende alimwi a Leza. Ooko ikuli milawo yamfwulumende iijatikizya kwaambila beendelezi bamfwulumende ikuti naa kakuli makani aakutundulula, baalu beelede kwiitobela milawo eeyo.—w19.05, peeji 9-10.

Mbuti mbomukonzya kucinca naa kubukulusya mizeezo iimweendelezya lyoonse?

Nzeezyi zintu iziyandika kapati: Amubandike a Jehova mumupailo. Amuzinzibale kuyeeya kamujisi makanze aakulilingula lwanu nobeni. Amusale balongwe ibali kabotu.—w19.06, peeji 11.

Ncinzi ncotweelede kucita lino kutegwa tulibambile kupenzyegwa?

Tweelede kuyumya cilongwe cesu a Jehova. Tweelede kuba alusyomo lwakuti Jehova ulatuyanda alimwi kunyina nayootulekelazya. Amulibale Bbaibbele buzuba abuzuba alimwi akupaila lyoonse. Amube alusyomo lwakuti zilongezyo zya Bwami ziyoozuzikizyigwa. Amwaapete magwalo ngomuyandisya alimwi anyimbo izitembaula Jehova.—w19.07, peeji 2-4.

Ncinzi ncotukonzya kucita kutegwa tubagwasye banamukwasyi kuti bakafwutuke?

Cilayandika kapati kututondezya lweetelelo, cikozyanyo cesu cibotu ceelede kupa bumboni, alimwi amukkazike moyo akubelesya bupampu.—w19.08, peeji 15-17.

Mbuti mbotukatalusyigwa, kweelana ambwaakasyomezya Jesu kulugwalo lwa Matayo 11:28?

Tulijisi beendelezi basiluyando Banakristo, balongwe ibali kabotu, alimwi amulimo wiinda kubota.—w19.09, peeji 23.

Mbuti Leza mbwakonzya kutupa kukanza alimwi anguzu zyakucita zintu? (Flp. 2:13)

Notubala Jwi lya Leza alimwi akuzinzibala kuyeeya nzyotubala, Leza ulakonzya kutupa nguzu, kutupa kuti tukanze kucita kuyanda kwakwe alimwi anguzu zyakucita zintu. Muuya wakwe ulakonzya kutugwasya kuzicita kabotu zintu nzyotuzyi kale.—w19.10, peeji 21.

Ino nintaamu nzi zyabusongo nzyotweelede kubweza katutanasala cintu cipati?

Amubone ntaamu zyosanwe: Amuvwuntauzye cakulomya. Amupaile kulomba busongo. Amwaalange-lange makanze aanu. Amwaambe cacigaminina. Amuzilange munzila yeelede zintu.—w19.11, peeji 27-29.

Sena njiisyo yakuti kuli cintu cizumanana kupona muntu afwa iliswaangene ancaakaambila Eva Saatani?

Peepe. Saatani wakaambila Eva kuti tanaakali kuyoofwa, ikutali kuti mubili wakwe wakali kuyoofwa pele muuya wakwe wakali kuyoozumanana kupona kubusena bumbi. Kunyina njiisyo yakubeja iyakasyaala ciindi ca Zambangulwe. Njiisyo yakuti kuli cintu cizumanana kupona muntu afwa ilangilwa kuti yakatalika Leza katanamwaya bantu ibakali kuyaka ngazi ya Babelo.—w19.12, peeji 15.