Peepe, kapango aaka takaambi boobo. Muciindi caboobo, kaamba muntu uujisi mapenzi manji pele ulaliyumya.

Atulange-lange makani aayengelede kapango aaka: “Utayubilili afwaafwi aŋanda yamululami kojisi makanze mabi; utanyonyooni busena bwakwe bwakulyookezyela. Nkaambo mululami ulakonzya kuwa ziindi zili ciloba, nokuba boobo ulanyamuka alimwi, pele ibabi balalebwa amapenzi. Ikuti sinkondonyoko wawa, utasekeleli pe, alimwi ikuti naa walebwa, moyo wako utakkomani pe.”—Tus. 24:15-17.

Bantu bamwi bayeeya kuti kapango 16 kaamba muntu wabisya pele iweempwa akubambulula cilongwe cakwe a Leza. Basololi babukombi bobilo bana Britain bakalemba kuti,“bakambausi bakaindi alimwi abamazuba aano bali kukabelesya munzila eeyi kapango aaka. Basololi aaba bakayungizya kwaamba kuti, kuyeeya kuli boobu inga kwapandulula kuti “muntu uuli kabotu ulakonzya kucita . . . cibi cipati, pele taleki kumuyanda Leza, alimwi uleempwa lyoonse.” Muzeezo ooyu inga waukkomanina muntu uutayandi kuleka kucita cibi cimwi. Ulakonzya kuyeeya kuti, nokuba kuti ulabisya cakwiinduluka-induluka, Leza unoomulekelela lyoonse.

Pele kapango 16 tabusyi mbokaamba oobo.

Ibbala lya Chihebrayo ilyaamba “kuwa” alimwi akuti “wawa” mutupango 16 a 17 lilakonzya kubelesyegwa munzila zinji. Lilakonzya kwaamba kuwa kwini, mucikozyanyo, munyama wawa mumugwagwa, muntu wawa kuzwa aciluli, naa kuti kantu kamwi kawida ansi. (Dt. 22:4, 8; Am. 9:9) Alimwi bbala eeli lilakonzya kubelesyegwa munzila yamaambilambali, mbubwenya mbolibelesyedwe waawa: “Jehova ulasololela ntaamu zyamuntu ikuti naa nzila yamuntu ooyo yamukonda. Nokuba kuti wawa, takonzyi kulipwaila ansi, nkaambo Jehova ulimujatilide kujanza.”—Int. 37:23, 24.

Nokuba boobo, syaazibwene Edward H. Plumptre wakaamba kuti: “Ibbala lya Chihebrayo lyakuti [“kuwa”] talyaambi kucita cibi.” Alimwi syaazibwene uumbi ukapandulula boobu kapango 16: “Tacigwasyi kweendelezya bantu ba Leza munzila iitali kabotu, nkaambo balo lyoonse balazwidilila, pele bantu babi tabazwidilili pe.”

Zyoonse eezyi zitondezya buyo kuti Tusimpi 24:16 tayaambi kucita cibi, pele yaamba muntu uujisi mapenzi naa buyumuyumu bunji. Mubweende bwazintu oobu bubyaabi, mululami ulakonzya kuciswa naa kuba amapenzi aambi buyo. Ulakonzya kupenzyegwa amfwulumende akaambo kalusyomo lwakwe. Pele ulakonzya kusyoma kuti Leza ngomugwasyi wakwe alimwi akuti unoomugwasya kuliyumya kutegwa azwidilile. “Amuyeeye buyo ziindi zinji nzyomwakabona zintu kazibeendela kabotu babelesi ba Leza.” Nkaambo nzi ncocili boobo? Nkaambo tulijisi lusyomo lwakuti “Jehova ulabajatilila boonse aabo bayanda kuwa alimwi ulababusya boonse aabo bavwunteme akaambo kakulemenwa.”—Int. 41:1-3; 145:14-19.

Aboobo, “muntu mululami” takkomani ciindi bamwi nobanjila mumapenzi. Muciindi caboobo, ulaumbulizyigwa kwiinda mukuzyiba kuti “zintu ziyoobeendela kabotu aabo bayoowa Leza mwini-mwini, akaambo kakuti balamuyoowa.”—Muk. 8:11-13; Job. 31:3-6; Int. 27:5, 6.