Sena mwakazibala cakulomya zibalo zili mu Ngazi Yamulindizi yamwaka uuno? Amubone naa inga mwayiingula mibuzyo eeyi iitobela:

Ino tweelede kubabona buti Banakristo bananike?

Tulalumba kujatikizya lusyomo lwabo; nokuba boobo, tatuciindizyi kubabikkila maano. Tulakutantamuka kuciindizya ‘kulumbaizya bantu.’ (Jud. 16) Tatweelede kubabuzya mibuzyo iijatikizya bulangizi bwabo.—w20.01, peeji 29.

Ncinzi cimupa kusyoma kuti Jehova ulamubikkila maano?

Bbaibbele lyaamba kuti wakamubona nociba ciindi kamutanazyalwa. Alimwi ulaiswiilila mipailo yanu. Ulizyi nzyomuyeeya alimwi nzyomucita zilakonzya kumukkomanisya naa kumupa kuusa. (1Mak. 28:9; Tus. 27:11) Jehova ngowakamukwela kulinguwe.—w20.02, peeji 12.

Nzikozyanyo nzi zitondezyo ciindi notweelede kwaambaula alimwi anotweelede kuumuna?

Tulakkomana kwaamba kujatikizya Jehova. Tulaambaula ciindi notubona muntu umwi kacita cintu icikonzya kumupa kucita cibi cipati. Baalu balaambaula kupa lulayo ikuti kwayandika kucita oobo. Tulaumuna kutegwa tutabuzyi naa kuyubununa makani aajatikizya mboucitwa mulimo wesu muzisi moulesyedwe. Tatuyubununi makani aamaseseke.—w20.03, peeji 20-21.

Mbuti cikwikwi icili ku Joeli caandaano 2 mbociindene aceeco icili ku Ciyubunuzyo caandaano 9?

Joeli 2:20-29 yaamba kuti Leza cikwikwi uyoocitandila kulamfwu alimwi usyomezya kujola zintu nzibakasweekelwa akaambo kancico. Kuzwa waawo, Leza uyootila muuya wakwe. Eeci cakazuzikizyigwa ciindi bana Babuloni nobakasaala bana Israyeli alimwi akumbele. Ciyubunuzyo 9:1-11 yaamba bananike ibali mbuli cikwikwi mumazuba eesu ibaambilizya mbeta zya Leza kubweende bwazintu oobu bubyaabi, calo cipa kuti boonse aabo ibali kulubazu lwanyika eeyi balimvwe bubi.—w20.04, peeji 3-6.

Ino nguni mwami wakunyika mazuba aano?

Russia alimwi abeenzinyina. Babalwana bantu ba Leza cacigaminina, bakalesya mulimo wakukambauka alimwi akupenzya Bakamboni. Mwami wakunyika wali kuzundana amwami wakumusanza.—w20.05, peeji 13.

Sena bube ibuli fwuka ibwaambidwe kulugwalo lwa Bagalatiya 5:22, 23 mbobube bulikke bwacibeela ‘camucelo wamuuya’?

Peepe. Muuya uusalala ulakonzya kutugwasya kuba abube bumwi bubotu, mbuli bululami. (Ef. 5:8, 9)—w20.06, peeji 17.

Ino nintenda nzi imwi iliko kwiinda mukubikka mafwoto aanu aintaneti?

Nzyomubikka aintaneti zipa bamwi kumubona kuti mulalisumpula alimwi tamulicesyi.—w20.07, peeji 6-7.

Ncinzi bakambausi Banakristo ncobakonzya kwiiya kubazubi banswi bazwidilide?

Balajana ciindi cibotu cakuzuba nswi alimwi akuunka kumasena nkozijanika. Balayiisyigwa kubelesya zibelesyo zyeelede. Alimwi balabeleka cabusicamba nomuba mubukkale bukatazya. Andiswe tulakonzya kucita oobo mumulimo wesu.—w20.09, peeji 5.

Ino ninzila nzi zimwi mbotukonzya kugwasya basikwiiya Bbaibbele kukomezya luyando ndobajisi kuli Jehova

Inga twabakulwaizya kubala Bbaibbele abuzuba alimwi akuzinzibala kuyeeya nzyobabala. Alimwi tulakonzya kubayiisya kupaila.—w20.11, peeji 4.

Ino mbaani babikkilizyidwe mumajwi aakuti: “Muli Kristo boonse bayoopegwa buumi”?—1Kor. 15:22.

Mwaapostolo Paulo tanaakali kwaamba kuti bantu boonse bayoobusyigwa. Wakali kwaamba Banakristo bananike aabo ‘ibakasalazyigwa kuba basikwiiya ba Kristo Jesu.’ (1Kor. 1:2; 15:18)—w20.12, peeji 5-6.

Ino bananike bayoocita nzi ‘baakusandulwa mukulaba kwaliso, muciindi cakulila kwamweembo wamamanino’?—1Kor. 15:51-53.

Bayoosangana Kristo mukweembela bantu ankoli yabutale. (Ciy. 2:26, 27)—w20.12, peeji 12-13.