Peepe. Ncaakalemba Davida aawa ncamasimpe alimwi cililuzi.

Amubone ncaakalemba mukapango aaka alimwi atupango tukozyenye naakati: “Ndinakwiimba nyimbo zyakutembaula zina lyako lyoonse mane kukabe kutamani nendizuzikizya zikonke zyangu buzuba abuzuba.” “Ndilakutembaula amoyo wangu woonse, O Jehova Leza wangu, alimwi ndinoolemeka zina lyako lyoonse mane kukabe kutamani.” “Ndinootembaula zina lyako lyoonse alyoonse mane kukabe kutamani.”—Int. 61:8; 86:12; 145:1, 2.

Ciindi Davida naakalemba majwi aaya, tanaakali kuyeeya kuti takafwi pe. Wakalizyi ncaakaamba Jehova kuti cibi muntu ncajisi cisololela kulufwu alimwi Davida wakazumina kuti wakajisi cibi. (Matl. 3:3, 17-19; Int. 51:4, 5) Wakalizyi kuti nobaba baalumi Leza mbaakali kukkomanina, mbuli Abrahamu, Izaka a Jakobo bakafwa. Kunze lyaboobo, Davida wakalizyi kuti awalo wakali kuyoofwa. (Int. 37:25; 39:4) Pele majwi aakwe aajanika ku Intembauzyo 61:8 atondezya mbwaakali kuyandisisya alimwi amakanze ngaakajisi aakutembaula Leza mane kukabe kutamani, nkokuti, ciindi coonse Davida ncaakali kupona.—2Sam. 7:12.

Davida zimwi ziindi wakalemba zintu zyakamucitikila mubuumi bwakwe, kweelana ambotukonzya kubona mututwe twamakani tuli ku Intembauzyo 18, 51, alimwi a 52. Ku Intembauzyo 23, Davida wakapandulula Jehova kuti mweembezi uupa busolozi, kukatalukwa alimwi alukwabililo. Davida wakali mweembezi iwakali kucita mbubwenya. Alimwi wakali kuyanda kubelekela Leza ‘mazuba oonse aabuumi bwakwe.’—Int. 23:6.

Alimwi amuyeeye kuti Jehova nguwakasololela Davida kulemba zintu zyoonse nzyaakalemba. Nzyaakalemba zyakali kubikkilizya businsimi bujatikizya zintu izyakali kuyoocitika kumbele. Mucikozyanyo, ku Intembauzyo 110, Davida wakalemba ciindi Mwami wakwe naakali ‘kuyookkala kujanza lya Leza lyalulyo’ kujulu alimwi akutambula nguzu zinji kapati. Kutegwa acite nzi? Kutegwa azunde basinkondonyina Leza alimwi “uyoobeteka akwaapa mulandu masi” aanyika. Davida wakali umwi wabamakaapanyina Jesu, ooyo iwakali Mesiya. Ooyu Mesiya iwakali kuyoolela kujulu alimwi wakali kuyooba “mupaizi lyoonse mane kukabe kutamani.” (Int. 110:1-6) Jesu wakasinizya kuti businsimi bujanika ku Intembauzyo 110 bwakali kwaamba nguwe akuti bwakali kuyoozuzikizyigwa kumbele.—Mt. 22:41-45.

Inzya, Davida wakasololelwa amuuya kulemba kujatikizya ciindi ncaakapona alimwi aciindi cakumbele nayoobusyigwa akuyooba acoolwe cakutembaula Jehova mane kukabe kutamani. Eeci cilatugwasya kubona kuti Intembauzyo 37:10, 11, 29 ilakonzya kupandulula bukkale ibwakaliko mu Israyeli yansiku alimwi abukkale ibuyooba munyika yoonse kumbele ciindi Leza aakuzuzikizya zisyomezyo zyakwe.—Amubone muncali 8 mucibalo cakuti “Uyooba Andime mu Paradaiso” mumagazini eeyi.

Aboobo Intembauzyo 61:8 alimwi atupango tukozyenye tutondezya kuti Davida wakali kuyanda kutembaula Jehova mu Israyeli yansiku kusikila kulufwu lwakwe. Alimwi tutondezya kuti Davida uyoocikonzya kucita boobo kumbele ciindi Jehova aakumubusya.