Sena mwakazibala cakulomya zibalo zili mu Ngazi Yamulindizi yamwaka uuno? Amubone naa inga mwayiingula mibuzyo eeyi iitobela:

Mbuti mbotulongezyegwa ciindi notubikka ambali ciindi cakubandika, kuswiilila alimwi akuzinzibala kuyeeya?

Tunoosala kabotu zintu, tunooli bamayi bacibwene, tunoojisi lusyomo luyumu akuyaambele muluyando ndotujisi kuli Jehova.​—w22.01, peeji 30-31.

Ino tuyoogwasyigwa buti ikuti twaiya kusyoma Jehova abaabo mbasalide kusololela?

Eecino nceciindi cakwiiya kusyoma nzila Leza mbwacita zintu kwiinda mukutabudooneka busolozi alimwi akusala kucitwa abaalu. Ciindi aakutalika mapenzi mapati, tunoolibambilide kumvwida nokuba kuti twatambula malailile aalibonya kuti alakatazya kumvwisya naa kutobela.​—w22.02, peeji 4-6.

Ncinzi mungelo ncaakali kupandulula naakaambila Zekariya kujatikizya “cipimyo cakupimya bwiime bwacintu mujanza lya [Mweendelezi] Zerubabeli”? (Zek. 4:8-10)

Cilengaano eeci cakali kukulwaizya bantu ba Leza kuti tempele eelyo ilyakali kulibonya kuba lyaansi ilyakali kuyakwa, lyakali kuyoomana kuyakwa alimwi lyakali kuyooba kweelana azyeelelo zya Leza.​—w22.03, peeji 16-17.

Mbuti mbotukonzya kuba ‘cikozyanyo cibotu mukwaambaula’? (1Tim. 4:12)

Kwiinda mukwaambaula caluzyalo acabulemu mumulimo wamumuunda, kwiimba kuzwa ansi amoyo akwiingula lyoonse lyamiswaangano, kwaamba masimpe alimwi munzila iiyaka bamwi, akweeleba majwi aakusampaula.—w22.04, peeji 6-9.

Nkaambo nzi zibeela zyone zyabanyama (mami) baambidwe ku Daniele caandaano 7 ncozilibonya buyo amunyama omwe kweelana ambokwaambidwe ku Ciyubunuzyo 13:1, 2?

Munyama waambidwe ku Ciyubunuzyo 13 taiminini buyo bwami bomwe bugaminide, mucikozyanyo Roma. Pele wiiminina mfwulumende zyoonse zyali kubeendelezya bantu ba Leza alimwi akubadyaaminina kapati.​—w22.05, peeji 9.

Ino ninzila nzi iiyandika kapati yakutondezya kuti tulabusyoma bululami bwa Leza?

Ikuti naa muntu umwi watusampaula, kutunyemya, naa watucitila cintu cimwi cibyaabi, tulasolekesya kuleka kunyema alimwi amfwundiilili, akulekela Jehova kubeteka cabululami. Uyookugwisya kucisa koonse kuletwa akaambo kacibi.​—w22.06, peeji 10-11.

Ncinzi ncayelede kuyeeya mukwesu iwalombwa kupaila lyamuswaangano?

Ciindi cakupaila taceelede kubelesyegwa kupa lulayo kumbungano naa zyakwaambilizya. Kwaambisya kumatalikilo aamuswaangano, takuyandiki kubelesya “majwi manji.” (Mt. 6:7)​—w22.07, peeji 24-25.

Muunzila nzi “aabo ibakacita zintu zibyaabi” mobayoobusyigwa “kububuke bwalubeta”? (Joh. 5:29)

Tabakacitikilwi lubeta akaambo kazintu nzyobakacita kabatanafwa. Bayoobetekwa kweelana abube alimwi abukkale bwabo mbobayootondezya baakubusyigwa.​—w22.09, peeji 18.

Ino nkukulwaizya nzi nkwaakapa J. F. Rutherford lyamuswaangano wacooko mu September 1922?

Lyamuswaangano ku Cedar Point, Ohio, U.S.A., wakaambilizya kuti: “Mwami ulalela! Nywebo ndinywe baambilizi bakwe. Aboobo mwaambilizye, mwaambilizye, mwaambilizye Mwami abwami bwakwe!”​—w22.10, peeji 3-5.

Ino ninzila nzi zyotatwe Leza mbwatugwasya kuliyumya izitondezyedwe ku Isaya caandaano 30?

Caandaano eeci citondezya kuti (1) ulaswiilila akwiingula mipailo yesu, (2) ulatupa busolozi, alimwi (3) ulatulongezya lino alimwi uyoocita boobo akumbele.​—w22.11, peeji 9.

Nkaambo nzi ncotukonzya kwaamba kuti majwi aali ku Intembauzyo 37:10, 11, 29 akazuzikizyigwa musyule alimwi ayoozuzikizyigwa kumbele?

Majwi aa Davida alapandulula kabotu-kabotu bukkale bubotu ibwakaliko mu Israyeli, mbuli kuciindi cabulelo bwa Solomoni. Jesu wakaamba kujatikizya paradaiso iili kumbele akuzubulula kapango 11. (Mt. 5:5; Lk. 23:43)​—w22.12, peeji 8-10, 14.