Sena Mulilibambilide ‘Kuyookona Nyika’?
TOONSE tulacikkomanina cisyomezyo ca Jesu cakuti: “Balikkomene babombe myoyo, nkaambo bayookona nyika.” (Mt. 5:5) Bananike bayookona nyika kwiinda mukuba bami balela kujulu antoomwe a Jesu. (Ciy. 5:10; 20:6) Bunji bwa Banakristo bakasimpe mazuba aano balangila kuyookona nyika akupona mane kukabe kutamani kabalondokede, muluumuno, alimwi alukkomano. Kutegwa eeci cikakonzyeke, kuli milimo iiyandika kapati njobeelede kuyoocita. Atulange-lange eeyi yotatwe: beelede kugwasyilizya mukupanga nyika kuba paradaiso, kulanganya alimwi akuyiisya baabo bayoobusyigwa. Alimwi amuyeeye ncomukonzya kucita noliba lino ikutondezya kuti mulayanda kuyootola lubazu mukucita zintu eezyi.
AMULIBAMBILE KUPANGA NYIKA KUBA PARADAISO
Ciindi Jehova naakaambila bantu kuti “muzuzye nyika akuyeendelezya,” wakali kutondezya kuti bumwi buzuba nyika yakali kuyooba paradaiso. (Matl. 1:28) Aabo bajisi bulangizi bwakuyoopona kukabe kutamani beelede kwaatobela malailile aaya. Kumatalikilo nyika taikabi paradaiso, nkaambo muunda wa Edeni tauciko pe. Kunooli mulimo mupati wakucita, ikusalazya masena aayo lino aasofweede. Eelo kaka ooyu unooli mulimo mupati!
Eeci cituyeezya mulimo ngobakajisi bana Israyeli ciindi nobakazwa mubuzike ku Babuloni. Nyika tiiyakali kukkalwa amuntu myaka iili 70. Pele Isaya wakasinsima kuti kwiinda mukulongezyegwa a Jehova, bana Israyeli bakali kuyakwiibukulusya. Businsimi bwaamba kuti: “Uyoopa kuti nkanda yakwe ibe mbuli Edeni acibanda cakwe camucimpayuma uyoocipa kuba mbuli muunda wa Jehova.” (Is. 51:3) Bana Israyeli bakazwidilila. Mbubwenya buyo, kwiinda mukulongezyegwa a Jehova, aabo bayookona nyika bayoozwidilila mukupanga nyika kuba Paradaiso. Andinywe mulakonzya kuzwidilila noliba lino ikutondezya kuti mulayanda kutola lubazu mumulimo ooyu.
Nzila imwi mbomukonzya kucita boobo, nkwiinda mukusolekesya kusalazya ŋanda yanu akubona kuti ilasalala. Mulakonzya kucita oobo nokuba kuti basimukobonyoko tabaciti oobo. Alimwi mulakonzya kugwasyilizya kwiinda mukusalazya Ŋanda ya Bwami alimwi a Busena Bwakucitila Miswaangano Mipati. Kuti bukkale bwanu kabuzumizya, andinywe inga mwalembela kuyoogwasyilizya nokwacitika ntenda. Mwacita boobu muyootondezya kuti mulayanda kugwasyilizya nokwayandika kucita boobo. Amulibuzye kuti, ‘Sena kuli mulimo ngondikonzya kwiiya kuti ndalongezyegwa kuyookona nyika?’
SENA MULILIBAMBILIDE KUYOOGWASYA BAABO BAYOOBUSYIGWA?
Mbwaakamana buyo kubusya mwana musimbi wa Jairo, Jesu wakabaambila kuti bamupe cakulya mwana musimbi ooyo. (Mk. 5:42, 43) Ooyu tiiwakali mulimo muyumu pe kumulanganya mwana ooyu uujisi myaka iili 12. Nokuba boobo, amweezeezye buyo mulimo uunooliko ciindi Jesu aakuzuzikizya cisyomezyo cakwe cakuti “boonse ibali muzyuumbwe nobayoomvwa ijwi lyakwe akuzwa mulinzizyo.” (Joh. 5:28, 29) Nokuba kuti Bbaibbele talyaambi twaambo tunji kujatikizya makani aaya, tulakonzya kweezyeezya kuti aabo bayoobusyigwa bayooyandika zyakulya, kwakukkala alimwi azisani. Noliba lino, sena mulakonzya kutondezya kuti mulilibambilide kuyoogwasya? Njeeyi mibuzyo njomweelede kulanga-langa.
Ncinzi ncomukonzya kucita lino ikutondezya kuti mulibambilide kuyookona nyika?
Ciindi nokwaambilizyigwa kuti mulangizi wabbazu uyooswaya mbungano yanu, sena mulalyaaba kumutamba kucakulya? Ciindi aabo ibakali kubeleka mulimo waciindi coonse waalubazu nobatumwa kuzwa mu Beteli kuti bakabeleke kabali bapainiya naa aabo ibakali mumulimo wamubbazu nobacileka mulimo wakweendeenda, sena inga mwalyaaba kubajanina kwakukkala? Kuti naa muswaangano wacooko naa waalubazu uyoocitilwa mubusena momukkala, sena inga mwalyaaba kubeleka kautanatalika naa kulyaaba kutambula beenzu?
AMULIBAMBILE KUYOOYIISYA BAABO IBAYOOBUSYIGWA
Kweelana a Milimo 24:15, tulangila kuti mabbiliyoni aabantu ayoobusyigwa. Bunji bwabo mbaabo ibatakapegwa coolwe cakuzyiba Jehova. Bayoopegwa coolwe eeci baakumana kubusyigwa. a Babelesi ba Leza basyomeka bayootola lubazu mumulimo ooyu wakuyiisya. (Is. 11:9) Ba Charlotte, balo ibakakambaukila ku Europe, South America, alimwi amu Africa balaulangila mulimo ooyu. Calukkomano baamba kuti: “Ndilacilangila coolwe cakuyiisya baabo bayoobusyigwa. Ciindi nondiyeeya kujatikizya muntu umwi iwakali kupona kaindi, kanji-kanji inga ndiyeeya kuti: ‘Kubota muntu ooyu naakalimuzyi Jehova, ambweni buumi bwakwe nobwakacinca.’ Eelo kaka ndilalangila kuyakwaambila baabo bayoobusyigwa kujatikizya Jehova alimwi abuumi mbobwakali kunoocinca kuti nobakaba acoolwe cakumubelekela.”
Nobaba babelesi ba Jehova basyomeka ibakali kupona Jesu katanaboola anyika bayooba acoolwe cakwiiya zinji. Amweezyeezye buyo mbocinooli coolwe cipati kupandulwida Daniele kujatikizya businsimi mbwaakalemba pele katabumvwisyi. (Dan. 12:8) Naa mbuti kujatikizya kuyiisya Rute a Naomi kubatondezya mukwasyi wabo mbowakali mumulongo wamikwasyi mwaakazyalilwa Mesiya? Eelo kaka cinookkomanisya kapati kutola lubazu mupulogilamu yakuyiisya bantu, kakutakwe kulibilika akunyonganyizyigwa anyika mbyaabi!
Mbuti mbomukonzya kutondezya kuti mulilibambilide kutola lubazu mupulogilamu yakuyiisya eeyi? Nzila imwi iizizyilwe nkusolekesya kusumpula nzila zyesu zyakuyiisya alimwi akutola lubazu cakusitikila mumulimo wakuyiisya uucitwa nyika yoonse. (Mt. 24:14) Nokuba kuti mwacembaala alimwi abukkale tazimuzumizyi kucita zinji aciindi ecino, kusolekesya kwanu kulakonzya kutondezya kuti mulilibambilide kuyooyiisya baabo bayoobusyigwa.
Inzya, mubuzyo uuyandika kapati ngwakuti, Sena mulalangila ncobeni kuyookona nyika? Sena mulikkomene kubulangizi bwakuyoobambulula nyika, kulanganya alimwi akuyiisya baabo bayoobusyigwa? Mulakonzya kutondezya kuti mulilibambilide lino kwiinda mukucita milimo iikozyenye ayeeyo njomulangila ciindi mwaakukona nyika!
a Amubone cibalo cijisi mutwe wakuti “Ibapa Bantu Banji Kululama” mu Ngazi Yamulindizi yamu September 2022.
