1. Ino kuzinzibala kuyeeya cisyomezyo ca Jehova cabuumi butamani kutujatikizya buti?

 JEHOVA usyomezya kuti aabo bamumvwida bayooba ‘abuumi butamani.’ (Rom. 6:23) Ciindi notuzinzibala kuyeeya ncaakatusyomezya Jehova, luyando ndotujisi kulinguwe lulayuma kapati. Amukayeeye buyo kaambo aaka: Taateesu wakujulu ulatuyanda kapati cakuti kunyina notuyakwaandaanizyigwa kulinguwe.

2. Mbuti cisyomezyo cabuumi butamani mbocitugwasya?

² Cisyomezyo ca Leza cabuumi butamani citugwasya kuliyumya mumasunko aatulwana lino. Nokuba kuti basinkondoma inga batukonga kutujaya, tatukaleki kubelekela Jehova. Nkaambo nzi? Kaambo kamwi nkakuti, tulizyi kuti nokuba kuti twafwa katusyomeka kuli Jehova, uyootubusya akutupa bulangizi bwakutafwa alimwi. (Joh. 5:28, 29; 1Kor. 15:55-58; Heb. 2:15) Nkaambo nzi ncotukonzya kuba masimpe kuti cilakonzyeka kulindiswe kupona kukabe kutamani? Amubone twaambo ootu tutobela.

3. Nkaambo nzi ncotukonzya kuba masimpe kuti Jehova ulakonzya kutubamba katuli baumi mane kukabe kutamani? (Intembauzyo 102:12, 24, 27)

³ Tulizyi kuti Jehova ulakonzya kutubamba katuli baumi mane kukabe kutamani nkaambo ngo Kasensa kabuumi alimwi ulapona lyoonse. (Int. 36:9) Amubone zibalo zisyoonto buyo zyamu Bbaibbele zitondezya kuti Jehova waliko lyoonse alimwi unooliko lyoonse. Ku Intembauzyo 90:2 tubala kuti Jehova waliko “kuzwa lili alili.” Ku Intembauzyo 102 tujana kaambo kakozyenye. (Amubale Intembauzyo 102:12, 24, 27.) Mpoonya musinsimi Habakuku wakalemba boobu kujatikizya Taateesu wakujulu: “O Jehova, sena yebo tonooliko kuzwa lili  alili? O Leza wangu, Uusalala wangu, yebo tofwi pe.”—Hab. 1:12.

4. Sena tweelede kulibilika ikuti naa kacitukatazya kukamvwisya kaambo kakuti Jehova waliko lyoonse? Amupandulule.

⁴ Sena cilamukatazya kukamvwisya kaambo kakuti Jehova waliko ‘lyoonse alyoonse’? (Is. 40:28) Eeci tacili ceenzu pe. Elihu wakaamba boobu kujatikizya Leza: “Mweelwe wamyaka yakwe tuukonzyi kuzyibwa pe.” (Job. 36:26) Pele kutamvwisya cimwi cintu tacaambi kuti cintu eeco tacili camasimpe. Mucikozyanyo, nokuba kuti tatukonzyi kumvwisya mboubeleka mumuni, sena eeci caamba kuti mumuni tuuko? Peepe. Mbubwenya buyo, swebo tobantu tatukonzyi kumvwisya mbocikonzyeka kuti Jehova waliko lyoonse alimwi akuti unooliko lyoonse. Pele eeci tacaambi kuti Leza taponi lyoonse mane kukabe kutamani. Kasimpe kajatikizya Mulengi takayeeme aakuti naa swebo tulamvwisya naa pe. (Rom. 11:33-36) Alimwi buya wakaliko bubumbo kabutanabako, kubikkilizya zuba anyenyeezi. Jehova utusyomezya kuti “ngo Mulengi wanyika kwiinda munguzu zyakwe.” Inzya, wakaliko ‘katanatandabula majulu.’ (Jer. 51:15; Mil. 17:24) Nkaambo nzi akambi ikatupa kusyoma kuti cilakonzyeka kupona kukabe kutamani?

5. Ino banabukwetene bakusaanguna bakajisi bulangizi nzi?

⁵ Jehova wakalenga zintu zipona anyika kuti kazipona kwaciindi cili mbocibede, pele bantu wakabalenga munzila iindene. Wakabapa bulangizi bulibedelede bwakupona kakunyina kufwa. Nokuba boobo, Jehova wakacenjezya Adamu kuti: “Pele cisamu cakuzyiba bubotu abubi, toyelede kulya kulincico pe, nkaambo mubuzuba mboyoolya kulincico, ncobeni uyoofwa.” (Matl. 2:17) Ikuti ba Adamu a Eva nobakamumvwida Jehova, nobatakafwa pe. Cileelela kusyoma kuti aciindi cimwi kumbele, Jehova naakabazumizya kulya “kucisamu cabuumi.” Eeci cakali kwaamba kuti wakali kuyoobapa cisyomezyo cakuti ‘bayoopona kukabe kutamani.” b—Matl. 3:22.

6-7. (a) Ncinzi acimbi citondezya kuti bantu tiibakalengwa kuti kabafwa? (b) Ncinzi ncomulombozya kuyoocita? (Amubone zifwanikiso.)

⁶ Cilakkomanisya kuti basikuvwuntauzya bamwi balatondezya bumboni buyeeme asayaansi bwakuti bongo bwesu bulakonzya kuyobola makani manji kapati kwiinda ngotukonzya kuyobola mubuumi bwesu oobu. Mu 2010 cibalo cimwi mumagazini yakuti  Scientific American Mind cakaamba kuti kweelana abuvwuntauzi bumwi ibwakacitwa, bongo bwesu bulakonzya kuyobola makani aayelene amapulogilamu aa TV aakalekkoodwa, alo aakonzya kutondezyegwa kwamawoola aali 3 miliyoni naa myaka iili 300. Alimwi ambweni buya bongo bwesu bulakonzya kuyobola makani aayinda waawo. Nokuba boobo, eeci citondezya kuti Jehova wakapanga bongo bwesu kuti kabuyobola makani manji kwiinda ngotukonzya kujana mumyaka buyo iili 70 naa 80.—Int. 90:10.

⁷ Alimwi Jehova wakabikka kulombozya kupati mulindiswe kwakuzumanana kupona. Bbaibbele lyaamba boobu kujatikizya bantu kuti, Leza ‘wakabikka buumi butamani mumyoyo yabo.’ (Muk. 3:11) Aaka nkakaambo kamwi katupa kubona lufwu kuti ngusinkondo. (1Kor. 15:26) Ikuti naa twaciswa kapati, sena inga tukkala buyo taandabale akulindila lufwu? Peepe. Kanji-kanji inga tulaunka kucibbadela ambweni akunywa musamu kutegwa tupone kubulwazi oobo. Alimwi buya, tulacita zyoonse nzyotukonzya kutegwa tutafwi. Ciindi muyandwa wesu nafwa, kufwumbwa naa muntu ooyo mwana naa mupati, tulausa kapati kwaciindi cilamfwu. (Joh. 11:32, 33) Masimpe, tulakonzya kuzumanana kwiiya mane kukabe kutamani alimwi tulakulombozya kapati kupona kukabe kutamani nkaambo Mulengi siluyando mbwaakatulenga oobo. Cilisalede kuti, uyoopa kuti cikonzyeke kulindiswe kupona mane kukabe kutamani. Pele tulijisi twaambo atumbi tutupa kusyoma kuti tulakonzya kupona mane kukabe kutamani. Lino tulabandika zintu nzyaakacita Jehova kaindi alimwi anzyali mukucita lino zisinizya kuti tanaakacinca makanze aakwe aakumatalikilo.

8. Kujatikizya makanze aa Jehova kulindiswe, ncisyomezyo nzi ncotujana ku Isaya 55:11?

⁸ Nokuba kuti Adamu a Eva bakabisya akuletela bana babo lufwu, Jehova kunyina naakacinca mizeezo yakwe kujatikizya makanze aakwe. (Amubale Isaya 55:11.) Makanze aakwe acili aakupa bantu basyomeka coolwe cakupona kukabe kutamani. Tulizyi oobo akaambo kazintu Jehova nzyaakaamba akucita kutegwa azuzikizye makanze aakwe.

9. Ncinzi Leza ncaakasyomezya? (Daniele 12:2, 13)

⁹ Jehova wakasyomezya kuti uyoobabusya bafwide alimwi akubapa coolwe cakupona kukabe kutamani. (Mil. 24:15; Tit. 1:1, 2) Mwaalumi uusyomeka Jobu wakalisinizyide kuti Jehova ulayandisisya kuyoobabusya bafwide. (Job. 14:14, 15) Musinsimi Daniele wakalizyi kuti bantu bajisi bulangizi bwakuyoobusyigwa kabajisi coolwe cakupona kukabe kutamani. (Int. 37:29; amubale Daniele 12:2, 13.) Abalo ba Juda kuciindi ca Jesu bakalizyi kuti Jehova ulakonzya kupa babelesi bakwe basyomeka “buumi butamani.” (Lk. 10:25; 18:18) Cakwiinduluka-induluka Jesu wakacaamba cisyomezyo eeci, alimwi walo kumugama wakabusyigwa a Bausyi.—Mt. 19:29; 22:31, 32; Lk. 18:30; Joh. 11:25.

10. Ino bubuke ibwakacitika kaindi businizya nzi? (Amubone cifwanikiso.)

¹⁰ Jehova ngo Sikutupa Buumi alimwi ulijisi nguzu zyakubusya bantu. Wakamupa nguzu musinsimi Elija zyakubusya mwana musankwa wamukamufwu waku Zarefati. (1Bam. 17:21-23) Kumbele kwiinda mukugwasyigwa a Leza, musinsimi Elisha wakabusya mwana musankwa wamukaintu waku Sunemu. (2Bam. 4:18-20, 34-37) Bubuke oobo alimwi abumwi businizya kuti Jehova ulijisi nguzu zyakubusya bantu. Naakali anyika, Jesu wakatondezya kuti Bausyi bakamupa nguzu zili boobu. (Joh. 11:23-25, 43, 44) Lino Jesu uli kujulu alimwi wakapegwa “nguzu zyoonse kujulu alimwi aanyika.” Aboobo, ulakonzya kuzuzikizya cisyomezyo cakuti “aabo boonse ibali muzyuumbwe” bayoobusyigwa kubuumi kabajisi bulangizi bwakuzumanana kupona kukabe kutamani.—Mt. 28:18; Joh. 5:25-29.

11. Mbuti cinunuzyo mbocipa kuti cikonzyeke kulindiswe kupona kukabe kutamani?

¹¹ Nkaambo nzi Jehova ncaakalekela Mwanaakwe uuyandwa kufwa lufwu lucisa kapati? Jesu wakakayubununa kaambo aaka naakaamba kuti: “Leza wakaiyanda kapati nyika cakuti wakapa Mwanaakwe simuzyalwaalikke, kutegwa muntu uuli woonse uumusyoma atanyonyoonwi, pele abe abuumi butamani.” (Joh. 3:16) Kwiinda mukwaaba Mwanaakwe kacili cinunuzyo cakuvwumba zibi zyesu, Leza ulapa kuti cikonzyeke kulindiswe kuba abuumi butamani. (Mt. 20:28) Mwaapostolo Paulo wakacipandulula boobu cibeela eeci ciyandika kapati camakanze aa Leza ciindi naakalemba kuti: “Mbwaanga lufwu lwakaboola kwiinda mumuntu omwe, abwalo bubuke bwabafwu bulaboola kwiinda mumuntu omwe. Nkaambo mbubonya muli Adamu boonse balafwa, mbubonya buyo muli Kristo boonse bayoopegwa buumi.”—1Kor. 15:21, 22.

12. Mbuti Bwami mbobuyoogwasya kuzuzikizya makanze Jehova ngajisi kulindiswe?

¹² Jesu wakayiisya basikumutobela kupailila Bwami bwa Leza kuti buboole akuti kuyanda kwa Leza kucitwe ansi aano. (Mt. 6:9, 10) Cibeela cimwi camakanze aa Leza ncakuti bantu bakapone kukabe kutamani anyika. Kutegwa eeci cizuzikizyigwe, Jehova wakasala Mwanaakwe kuba Mwami wa Bwami Bwabu Mesiya. Leza wali kuyobolola ba 144,000 kuzwa anyika, kuti bakabeleke a Jesu mukuzuzikizya kuyanda kwa Leza.—Ciy. 5:9, 10.

13. Ino ncinzi Jehova ncali mukucita lino, alimwi mbuti mbocimujatikizya eeci?

 ¹³ Jehova lino uli mukuyobolola “nkamu mpati” yabantu alimwi akubayiisya kabali balelwa ba Bwami bwakwe. (Ciy. 7:9, 10; Jak. 2:8) Nokuba kuti mazuba aano tupona munyika bantu mobatakamantene akaambo kakuyoowa alimwi ankondo, aabo ibali munkamu eeyi balasolekesya kutantamuka kusulaikana koonse ikucitika akaambo kacisi, musyobo alimwi abantu. Munzila yamaambila mbali, bali mukufwula mapanga aabo kuba maamba aakulimya. (Mik. 4:3) Muciindi cakutola lubazu munkondo izipa kuti bantu banji bajaigwe, bankamu mpati bagwasya bantu kujana “buumi bwini-bwini” kwiinda mukubayiisya kujatikizya Leza mwini-mwini amakanze aakwe. (1Tim. 6:19) Banamukwasyi balakonzya kubabukila naa balakonzya kujana penzi lyakusweekelwa mali akaambo kakuba kulubazu lwa Bwami bwa Leza, pele Jehova ubona masimpe kuti balijisi zintu nzyobayandika. (Mt. 6:25, 30-33; Lk. 18:29, 30) Twaambo ootu tutupa kusyoma kuti Bwami bwa Leza nkobuli ncobeni akuti buyoozumanana kuzuzikizya makanze aa Jehova.

14-15. Mbuti cisyomezyo ca Jehova cakulumana lufwu kukabe kutamani mbociyoozuzikizyigwa?

¹⁴ Jesu lino Mwami wa Bwami bwa Leza kujulu alimwi uyoozuzikizya zisyomezyo zyoonse  nzyaakatusyomezya Jehova. (2Kor. 1:20) Kuzwa mu 1914, Jesu wali kuyaabuzunda basinkondonyina. (Int. 110:1, 2) Lino-lino, Jesu abaabo mbayoolela limwi bayoomanizya kuzunda alimwi bayoonyonyoona basizibi.—Ciy. 6:2.

¹⁵ Lya Bulelo bwa Myaka Iili 1,000, bafwu bayoobusyigwa aboobo bantu bamvwida bayoogwasyigwa kutegwa balondoke. Waakwiinda musunko wamamanino, aabo Jehova mbayoobeteka kuti baliluleme “bayookona nyika, alimwi bayookkala alinjiyo lyoonse mane kukabe kutamani.” (Int. 37:10, 11, 29) Cikondelezya ncakuti, “sinkondo wamamanino uuyoonyonyoonwa, ndufwu.”—1Kor. 15:26.

16. Ino nkaambo nzi kapati ikeelede kutupa kumubelekela Jehova?

¹⁶ Kweelana ambotwabona, bulangizi mbotujisi bwakupona kukabe kutamani buyeeme kapati aa Jwi lya Leza. Bulangizi oobu bulakonzya kutugwasya kuzumanana kusyomeka muziindi eezyi zikatazya zyamazuba aamamanino. Pele kutegwa tumukkomanisye Jehova, iceelede kutukulwaizya takuli buyo kulombozya kuzumanana kupona. Kaambo kapati ikeelede kutupa kuzumanana kusyomeka kuli Jehova a Jesu nkakuti tulabayanda kapati. (2Kor. 5:14, 15) Luyando oolu lutukulwaizya kubaiya alimwi akwaambila bamwi bulangizi mbotujisi. (Rom. 10:13-15) Mbotuyaabwiiya kutaliyanda alimwi akuba baabi, tuba bantu aabo Jehova mbayanda kuba balongwe bakwe mane kukabe kutamani.—Heb. 13:16.

17. Ino mukuli nzi ngotujisi? (Matayo 7:13, 14)

¹⁷ Sena tuyooba akati kabaabo ibayooba abuumi butamani? Jehova wakatujalwida mulyango kutegwa tube acoolwe eeco. Lino ciyeeme alindiswe kuzumanana kweenda munzila iisololela kubuumi. (Amubale Matayo 7:13, 14.) Ino buumi bunooli buti ciindi twaakupona kukabe kutamani? Tuyoobandika bwiinguzi kumubuzyo ooyu mucibalo citobela.