1. Kakusyeede asyoonto kuti Jesu afwe, ino wakacaambila nzi cigwebenga ncobakali limwi? (Luka 23:39-43)

 JESU alimwi azigwebenga zyobilo nzyaakali limwi bakapenga kapati ciindi nobakali kuyaabufwa asyoonto-syoonto. (Lk. 23:32, 33) Cilisalede kuti zigwebenga eezyi kunyina wakali sikwiiya wa Jesu pe, kayi zyakali kumusampaula Jesu. (Mt. 27:44; Mk. 15:32) Pele cigwebenga comwe cakacinca mizeezo. Cakaamba kuti: “Jesu, ukandiyeeye waakunjila mu Bwami bwako.” Jesu wakaciingula kuti: “Ncobeni sunu ndikwaambila kuti, uyooba andime mu Paradaiso.” (Amubale Luka 23:39-43.) Kunyina bumboni butondezya kuti cigwebenga eeci cakautambula mulumbe wa “Bwami bwakujulu,” ngwaakakambauka Jesu mumulimo wakwe. Alimwi kunyina naakaamba kuti muntu ooyu uyakunjila mu Bwami bwakujulu. (Mt. 4:17) Jesu wakali kwaamba zya Paradaiso yakumbele anyika. Nkaambo nzi ncotukonzya kwaamba boobo?

2. Ncinzi citondezya kuti cigwebenga icakasanduka wakali mu Juda?

² Kweelede kuti cigwebenga icakasanduka wakali mu Juda. Kayi cakaambila ceenzinyina kuti: “Mbokunga lino wapegwa cisubulo comwe anguwe, sena tomuyoowi Leza naaceya?” (Lk. 23:40) Ba Juda bakali kukomba Leza omwe, kakuli bamasi bakali kusyoma baleza banji. (Kul. 20:2, 3; 1Kor. 8:5, 6) Kuti zigwebenga eezyi nozyakali zyamasi, nkokuti nocakabuzya kuti, “Sena tobayoowi baleza naaceya?” Kuyungizya waawo, Jesu wakatumwa, kutali kuli bamasi, pele “kumbelele zisweekede zyamuŋanda ya Israyeli.” (Mt. 15:24) Leza wakazyibya bana Israyeli kuti wakali kuyoobabusya bafwide. Kweelede kuti cigwebenga icakeempwa cakalaazyi makani aaya, alimwi majwi ngocakaamba atondezya kuti, cakali kusyoma kuti Jehova wakali  kuyoomubusya Jesu kutegwa akeendelezye mu Bwami bwa Leza. Awalo mwaalumi ooyu kweelede kuti wakali kulangila kuti Leza wakali kuyoomubusya.

3. Ncinzi cilangilwa kuti ncecakaboola mumizeezo yacigwebenga icakeempwa ciindi Jesu naakaamba zya Paradaiso? Amupandulule. (Matalikilo 2:15)

³ Mbwaanga wakali mu Juda, cigwebenga icakeempwa kweelede kuti cakalibazyi ba Adamu a Eva alimwi akuti Jehova wakababikkide mu Paradaiso. Aboobo kweelede kuti cigwebenga cakayeeya kuti Paradaiso njaakaamba Jesu wakali muunda weebeka aano anyika.—Amubale Matalikilo 2:15.

4. Ino majwi Jesu ngaakaambila cigwebenga ayelede kutupa kuyeeya nzi?

⁴ Majwi Jesu ngaakaambila cigwebenga ayelede kutupa kuyeeya mbobunoobede buumi mu Paradaiso. Mubwini tulakonzya kwiiya kujatikizya Paradaiso kuzwa kubulelo bwaluumuno bwa Mwami Solomoni. Alimwi tweelede kulangila kuti Jesu, imupati kwiinda Solomoni uyoobeleka antoomwe abasikulelanyina kuleta zilongezyo zibotu aano anyika. (Mt. 12:42) Cakutadooneka, kweelede kuti ‘bambelele zimbi’ balayandisisya kuzyiba ncobeelede kucita kutegwa beelele kuyoopona kukabe kutamani munyika ya Paradaiso.—Joh. 10:16.

5. Ino muyeeya kuti bunooli buti buumi mu Paradaiso?

⁵ Ncinzi ciboola mumizeezo yanu mwayeeya kujatikizya buumi mu Paradaiso? Ambweni inga muyeeya paakki mbotu, mbuli muunda wa Edeni. (Matl. 2:7-9) Mulakonzya kuyeeya businsimi bwakalembwa a Mika bwaamba kuti bantu ba Leza “bayookkala umwi aumwi munsi lyamusaansa wakwe amunsi lyamukuyu wakwe.” (Mik. 4:3, 4) Mulakonzya kuyeeya bumboni bujanika mu Bbaibbele butondezya kuti kunooli zyakulya zinji. (Int. 72:16; Is. 65:21, 22) Aboobo mulakonzya kweezyeezya kuti muli mumuunda weebeka, mulikkede atebulu lizwide budodoodo bwazyakulya. Mulakonzya kweezyeezya kuyoya muya uununkila zisyango alimwi amaluba-luba. Alimwi buya mulakonzya kwaamvwa majwi aabalongwe abanamukwasyi kubikkilizya abaabo bayoobusyigwa kabaseka-seka alimwi akuyanzana calukkomano. Zyoonse eezyi tazili ziloto biyo pe. Tacidoonekwi buya kuti zintu zili boobu ziyoocitika aano anyika. Nokuba boobo, buumi mu Paradaiso buyoobikkilizya amulimo uukatalusya.

6. Ino tunoocita nzi mu Paradaiso? (Amubone cifwanikiso.)

⁶ Jehova wakatulenga munzila yakuti katwiikkomanina milimo yesu. (Muk. 2:24) Tunoojisi zintu zinji zyakucita mu Bulelo bwa Kristo bwa Myaka Iili 1,000. Aabo ibayoofwutuka lyamapenzi mapati, alimwi abaabo bayoobusyigwa, bayooyandika zisani, zyakulya alimwi amasena akukkala. Kutegwa tubape zintu eezyi, tuyooyandika kubeleka  milimo minji iikatalusya. Mbubwenya ba Adamu a Eva mbobakali kulima mumuunda wabo, andiswe tunoojisi coolwe cakulima mu Paradaiso anyika. Alimwi amweezyeezye buyo mbocinookkomanisya kuyiisya mamiliyoni aabantu bayoobusyigwa, aabo batazyi makani manji aajatikizya Jehova, makanze aakwe alimwi akugwasya bantu basyomeka ibakali kupona Jesu katanaboola anyika.

7. Makani nzi ngotukonzya kusyoma, alimwi nkaambo nzi?

⁷ Tulasyoma kuti mu Paradaiso iiboola, kunooli luumuno, tunoojisi zyoonse nzyotuyanda, alimwi akucizyiba kucita zintu. Nkaambo nzi? Nkaambo Jehova watutondezya kale buumi mbobunoobede lyabulelo bwa Mwanaakwe. Tulakonzya kucibona eeci mucibalo caamba zyabulelo bwa Mwami Solomoni.

8. Mbuti majwi aali ku Intembauzyo 37:10, 11, 29 mbwaakazuzikizyigwa kaindi? (Amubone cibalo cijisi mutwe wakuti “Mibuzyo Yabasikubala” icili mumagazini eeyi.)

⁸ Mwami Davida wakasololelwa amuuya kulemba kujatikizya buumi mbobunoobede ciindi mwami musongo alimwi uusyomeka aakukkala acuuno cabwami. (Amubale Intembauzyo 37:10, 11, 29.) Kanji-kanji tulabala Intembauzyo 37:11 ciindi notubandika abamwi kujatikizya Paradaiso iiboola. Tulijsi twaambo tulimvwisya nkaambo Jesu mu Mulumbe wakwe Waacilundu wakaazubulula majwi aali mukapango aaka, kutondezya kuti ayoozuzikizyigwa kumbele. (Mt. 5:5) Pele awalo Davida wakatondezya mbobunoobede buumi mumazuba aa Mwami Solomoni. Ciindi Solomoni naakali kweendelezya mu Israyeli, bantu ba Leza bakalikkomene aluumuno lwaalubazu alimwi akuzwidilila munyika “iikunka buci amukupa.” Leza wakaamba kuti: “Ikuti mwazumanana kubamba mbeta zyangu . . . , ndiyoomupa luumuno munyika alimwi muyoolala kakunyina uumuyoosya.” (Lev. 20:24; 26:3, 6) Zisyomezyo eezyi zyakazuzikizyigwa mubulelo bwa Solomoni. (1Mak. 22:9; 29:26-28) Alimwi kwakali bulangizi bwakuti ibantu babi ibakali kukomba baleza bakubeja “tabakabi limbi pe.” (Int. 37:10) Aboobo, majwi  aajanika mu Intembauzyo 37:10, 11, 29 akazuzikizyigwa kaindi alimwi ayoozuzikizyigwa kumbele.

9. Ncinzi ncaakaamba mwami mukaintu waku Sheba kujatikizya bulelo bwa Mwami Solomoni?

⁹ Makani aajatikizya luumuno alimwi akuzwidilila kwabana Israyeli mubulelo bwa Solomoni akasika kumwami mukaintu waku Sheba. Ooyu mukaintu uulemekwa wakeenda musinzo mulamfwu kuboola ku Jerusalemu kutegwa alibonene bukkale mbobwakabede. (1Bam. 10:1) Naakamana kulanga-langa bwami bwa Solomoni, wakaamba kuti: “Nzyondakaambilwa tazisiki akucisela pe. . . . Bali acoolwe bantu bako alimwi bali acoolwe babelesi bako ibaima kumbele lyako lyoonse kabaswiilila busongo bwako!” (1Bam. 10:6-8) Pele bukkale mubulelo bwa Solomoni cakali citondezyo buyo cazintu Jehova nzyayoocita mubulelo bwa Mwanaakwe, Jesu.

10. Muunzila nzi Jesu mwasumpukide kwiinda Solomoni?

¹⁰ Jesu ulisumpukide kapati kwiinda Solomoni. Solomoni tanaakalondokede alimwi tanaakasala kabotu munzila zinji calo kumbele cakaleta mapenzi kubantu ba Leza. Kulubazu lumwi, Jesu Muleli uulondokede uutakonzyi kulubizya. (Lk. 1:32; Heb. 4:14, 15) Jesu wakazwidilila mumasunko aakatazya kapati ngaakamuletela Saatani. Kristo wakatondezya kuti kunyina nayoobisya naa kucita cintu cikonzya kupenzya balelwa bakwe. Eelo kaka ncoolwe cilibedelede kuba a Mwami uuli mbuli nguwe!

11. Ino Jesu unoolela aabani?

¹¹ Jesu uyoobeleka antoomwe abasikulelanyina bali 144,000 kulanganya bantu alimwi akuzuzikizya makanze aa Jehova kujatikizya nyika. (Ciy. 14:1-3) Aaba bakaliyumya kumasunko alimwi amapenzi manji ciindi nobakali kupona aano anyika, aboobo banoobamvwisya kabotu-kabotu aabo banoopona anyika. Ino mulimo nzi wacigaminina ngobanoobeleka basikulelanyina Jesu aaba?

12. Mulimo nzi Jehova ngwaayoopa bali 144,000?

¹² Mulimo ngwapedwe Jesu abasikulelanyina mupati kapati kwiinda yooyo ngwaakapedwe Solomoni. Mwami Solomoni wakali kulanganya bantu banji mucisi buyo comwe. Pele, aabo ibayoolela mu Bwami bwa Leza bayoogwasya bantu kapati aabo ibanoopona munyika yoonse. Eelo kaka ooyu mulimo uulibedelede Jehova ngwaakapa bali 144,000!

13. Mulimo nzi waalubazu ngobanoojisi basikulelanyina Jesu?

¹³ Mbubwenya mbuli Jesu, bali 144,000 bayoobeleka kabali bami alimwi abapaizi. (Ciy. 5:10) Ciindi nobakali kutobela Mulawo wa Musa, bapaizi bakajisi mukuli mupati wakugwasyilizya bantu kuzumanana kupona buumi buli kabotu alimwi akuba acilongwe ciyumu a Jehova. Mbwaanga Mulawo wakali “cimvwule buyo cazintu zibotu ziboola,” nkokuti cileelela kwaamba kuti basikulelanyina Jesu abalo bayoogwasya bantu ba Leza kumubili alimwi akumuuya. (Heb. 10:1) Tweelede kulindila kutegwa tukabone bami aaba abapaizi mbobanoobandika abalelwa ba Bwami ibanooli aano anyika. Kufwumbwa bubambe mbwayoobikka Jehova, tulisinizyide kuti mu Paradaiso iboola, aabo ibanooli waano anyika bayootambula busolozi buyandika.—Ciy. 21:3, 4.

14. Ino ‘bambelele zimbi’ abanabokwabo Kristo baswaangene buti?

¹⁴ Jesu wakaamba baabo mbayoolela limwi kuti ‘nkatanga kaniini.’ (Lk. 12:32) Kunze lyaboobo, wakaamba nkamu yabili kuti ‘nimbelele zimbi.’ Nkamu eezyi zyobilo zipanga  tanga lyomwe likamantene. (Joh. 10:16) Eezyi nkamu zyobilo zibelekela antoomwe, alimwi ziyoozumanana kucita boobo mu Paradaiso. Kuciindi eeco, ‘bakatanga kaniini’ banooli kujulu alimwi ‘bambelele zimbi’ banoojisi bulangizi bwakupona aano anyika kukabe kutamani. Nokuba boobo kuli zintu nzyobeelede kucita ‘bambelele zimbi’ kutegwa beelele kuyoopona mu Paradaiso.

15. (a) Mbuti ‘bambelele zimbi’ mbobabelekela antoomwe abanabokwabo Kristo? (b) Mbuti mbomukonzya kwiiya cikozyanyo camukwesu uutondezyedwe mucifwanikiso? (Amubone cifwanikiso.)

¹⁵ Cigwebenga icakeempwa cakafwa kacitanatondezya cakumaninina kulumba kupati kuli ceeco Kristo ncaakacicitila. Mukwiimpana, swebo ‘tobambelele zimbi’ tulijisi zyoolwe zinji zyakutondezya bwini mbotulimvwa kujatikizya Jesu. Mucikozyanyo, tulatondezya kuti tulamuyanda munzila mbotubeendelezya banabokwabo bananike. Jesu wakaamba kuti uyoobeteka mbelele kweelana ambozyeendelezya banabokwabo. (Mt. 25:31-40) Tulakonzya kubagwasyilizya banabokwabo Kristo kwiinda mukukambauka cabusungu akugwasya bantu kuba basikwiiya. (Mt. 28:18-20) Nkakaambo kaako, tulayanda kwaabelesya kabotu mabbuku aagwasya kwiiya Bbaibbele ngobatupa, mbuli bbuku lyakuti Amupone Kukabe Kutamani! Ikuti naa kunyina ciiyo ca Bbaibbele ncomusololela, inga mwalibikkila mbaakani yakutalisya ziiyo zya Bbaibbele kubantu banji.

16. Ncinzi ncotweelede kucita lino notulibambila kuyoopona mu Bwami bwa Leza?

¹⁶ Tatweelede kulindila buya mane tukanjile mu Paradaiso notuyatukatalike kupona kweelana ambwayanda Jehova. Noliba lino tweelede kusolekesya kusyomeka muŋambawido yesu alimwi akulilemeka kabotu. Alimwi tweelede kusyomeka kuli Jehova, kuli baabo mbotukwetene limwi aku Banakristoma. Kuti katumumvwida Jehova lino munyika mbyaabi eeyi, ciyootuubila kumumvwida mu Paradaiso. Tulakonzya kuba aluzyibo alimwi abube bwalo butondezya kuti tulalibambila kuyoopona munyika eeyo. Amubone cibalo cijisi mutwe wakuti “Sena mulilibambilide ‘Kuyookona Nyika’?” icili mumagazini eeyi.

17. Sena tweelede kuzumanana kuusa akaambo kazibi nzyotwakacita kaindi? Amupandulule.

 ¹⁷ Tweelede kusolekesya kuleka kulipa mulandu akaambo kazibi zipati-pati nzyotwakacita musyule. Masimpe kuti, tatuyandi kubelesya cipaizyo cacinunuzyo kuti “katucita cibi acaali.” (Heb. 10:26-31) Pele tulakonzya kuba masimpe kuti, naa twakeempwa ncobeni kuzibi zipati nzyotwakacita, twakalomba lugwasyo lwa Jehova abaalu, alimwi akucinca bukkale bwesu, nkokuti Jehova wakatulekelela cakumaninina. (Is. 55:7; Mil. 3:19) Amuyeeye majwi Jesu ngaakaambila ba Farisi naakati: “Ndakaboolela kwiita basizibi ikutali bantu baluleme.” (Mt. 9:13) Cipaizyo cacinunuzyo cilaanguzu zyakumana zibi zyesu zyoonse.

18. Ncinzi ncomunga mwayanda kubandika acigwebenga cakajaigwa antoomwe a Jesu?

¹⁸ Sena mulakonzya kweezyeezya kuti muli mu Paradaiso, kamubandika acigwebenga icakaambaula a Jesu? Tacidoonekwi kuti nyoonse nyobilo inga mwaamba mbomulumba kucinunuzyo ca Jesu. Inga mwacilomba kuti cimwaambile zintu zimwi izyakacitika mumawoola aamamanino abuumi bwa Jesu aano anyika alimwi ambocakalimvwide ciindi Jesu naakazumina kulomba kwancico. Mpoonya kulubazu lumwi, acalo cilakonzya kumubuzya mbocakabede kupona mumazuba aamamanino abweende bwazintu bwa Saatani. Eelo kaka cinooli coolwe cipati kwiiya Jwi lya Leza abantu bali boobu!—Ef. 4:22-24.

19. Nkaambo nzi buumi mu Paradaiso ncobutanoolendelezi? (Amubone cifwanikiso icili aacivwumbyo.)

¹⁹ Buumi mu Paradaiso kunyina nobunoolendelezya. Lyoonse kunooli bantu banookkomanisya mbotunoobonana limwi, alimwi tunoocita milimo minji iikkomanisya. Kwiinda zyoonse, abuzuba tunooyungizya luzyibo lujatikizya Taateesu wakujulu akukkomana azintu nzyayootupa. Lyoonse kunooli zintu zinji zyakwiiya kujatikizya Jehova alimwi amakani manji aakwiiya kujatikizya zilenge zyakwe. Bulamfwu bwaciindi ncotunoopona, buyootupa kumuyanda kapati Leza. Eelo kaka tulamulumba Jehova a Jesu akaambo kakutupa cisyomezyo cakuti tulakonzya kupona mu Paradaiso mane kukabe kutamani!