1. Nkaambo nzi Abrahamu ncaakazumanana kulangila kuti wakali kuyooba amwana?

 JEHOVA wakasyomezya mulongwe wakwe Abrahamu kuti masi oonse aamunyika akali kuyoolongezyegwa akaambo kalunyungu lwakwe. (Matl. 15:5; 22:18) Akaambo kakuti Abrahamu wakali kumusyoma cakumaninina Leza, wakalisinizyide kuti cisyomezyo cakwe cakali kuyoozuzikizyigwa ncobeni. Nokuba boobo, ciindi Abrahamu naakajisi myaka iili 100 amukaintu wakwe naakali aamyaka iili 90, kunyina nobakajisi mwana. (Matl. 21:​1-7) Pele Bbaibbele lyaamba kuti: “Akaambo kabulangizi [Abrahamu] wakasyoma kuti ulakonzya kuba usyi wamisyobo minji kweelana amajwi aakaambwa.” (Rom. 4:18) Mulizyi kuti ncaakali kulangila Abrahamu cakazuzikizyigwa ncobeni. Wakaba amwana ngwaakali kulangila kwaaciindi cilamfwu, Izaka. Ino lusyomo lwa Abrahamu lwakayeeme aanzi?

2. Nkaambo nzi Abrahamu ncaakasinizyide kuti cisyomezyo ca Jehova cakali kuyoozuzikizyigwa?

² Akaambo kakuti Abrahamu wakalijisi cilongwe ciyumu a Jehova, “wakalisinizyide cakumaninina kuti eezyo nzyaakasyomezya Leza,” zyakali kuyoozuzikizyigwa ncobeni. (Rom. 4:21) Jehova wakamukkomanina Abrahamu akumwaamba kuti mululami akaambo kalusyomo lwakwe. (Jak. 2:23) Mbubwenya mbokutondezyedwe ku Baroma 4:​18, lusyomo lwa Abrahamu lwakaliswaangene abulangizi mbwaakajisi. Lino atulange-lange mwaapostolo Paulo ncaakaamba kujatikizya bulangizi kweelana ambokulembedwe ku Baroma caandaano 5.

3. Ncinzi Paulo ncaakaamba kujatikizya bulangizi?

 ³ Paulo wakaamba kaambo ncotukonzya kuba masimpe kuti ‘bulangizi bwesu tabusololeli kukutyompwa.’ (Rom. 5:5) Alimwi ulatugwasya kumvwisya bulangizi bwesu bwa Bunakristo mbobukonzya kuyuma. Ciindi notulanga-langa Baroma 5:​1-5, amubone bulangizi bwanu bwakumbele mbobwayuma. Alimwi tulabona mbomukonzya kuluyumya lusyomo lwanu kwiinda mbolubede lino. Cakusaanguna atulange-lange bulangizi butaliboteli oobo Paulo mbwaakaamba kuti tabusololeli kukutyompwa.

4. Makani nzi aabandikwa kuba Baroma 5:​1, 2?

⁴ Amubale Baroma 5:​1, 2. Paulo wakalembela mbungano yaku Roma majwi aaya. Bakwesu abacizyi bamumbungano eeyi bakaiya kujatikizya Jehova alimwi a Jesu, bakatondezya lusyomo, mpoonya bakaba Banakristo. Aboobo Leza ‘wakabaamba kuti mbalulami akaambo kalusyomo,’ akubananika amuuya uusalala. Akaambo kaceeci, bakaba abulangizi bubotu kapati.

5. Mbulangizi nzi mbobajisi bananike?

⁵ Kumbele Paulo wakalembela Banakristo bananike baku Efeso kujatikizya bulangizi Leza mbwaakabapa. Bulangizi oobo bwakali kubikkilizya ‘alukono ndobakali kuyoopegwa basalali.’ (Ef. 1:18) Alimwi Paulo wakabaambila bana Kolose nkobakali kuyootambwida bulumbu bwabo. Wakaamba kuti ‘bulangizi mbomubambilidwe kujulu.’ (Kol. 1:​4, 5) Aboobo, Banakristo bananike bajisi bulangizi bwakubusyigwa akupona buumi butamani kujulu kwalo nkobayoolela a Kristo.—1Tes. 4:​13-17; Ciy. 20:6.

6. Ino ncinzi ncaakaamba mukwesu umwi munanike kujatikizya bulangizi bwakwe?

⁶ Banakristo bananike balabukkomanina kapati bulangizi bwabo. Mu 1991 Mukwesu Frederick Franz, wakaamba mbwaakali kulimvwa kujatikizya bulangizi oobu naakati: “Bulangizi bwesu buyoozuzikizyigwa ncobeni, alimwi toonse notuli 144,000 tuyootambula ncaakatusyomezya Leza. Bulumbu bwesu bunooli bubotu citaambiki kwiinda cintu cili coonse ncotujisi.” Naakamana kumubelekela Leza kwamyaka  minji, Mukwesu Franz wakaamba kuti: “[Tucibukkomanina] kapati bulangizi bwesu. . . . Akaambo kakubulindila kwaciindi cilamfwu, capa kuti tubuyande kapati. Tuliyandide kubulindila tacikwe makani naa cilatola myaka yongaye. Lino ndilabukkomanina kapati bulangizi bwesu kwiinda kaindi.”

7-8. Mbulangizi nzi mbobajisi banabunji? (Baroma 8:​20, 21)

⁷ Bunji bwabakombi ba Jehova mazuba aano bajisi bulangizi bwiindene. Bulangizi oobu bulikozyenye aboobo mbwaakajisi Abrahamu ibwakuyoopona buumi butamani anyika mubweendelezi bwa Bwami bwa Leza. (Heb. 11:​8-10, 13) Paulo wakalemba kujatikizya bulangizi oobu butaliboteli. (Amubale Baroma 8:​20, 21.) Ciindi nomwakaiya zisyomezyo zyamu Bbaibbele zyakumbele, ino nceecili cakamukkomanisya kapati? Sena nceeco cakuti bumwi buzuba muyoolondoka? Naa nkuzyiba kuti bayandwa banu bakafwa bayoopona alimwi anyika yaparadaiso? Kweelede kuti eeci cakamupa kuba azintu zinji zyakulangila “akaambo kabulangizi.”

⁸ Kufwumbwa naa tulangila kuyoopona buumi butamani kujulu naa anyika, toonse tulijisi bulangizi butaliboteli bwalo ibutupa kukkomana. Alimwi tulakonzya kubuyumya bulangizi bwesu. Majwi ngaakalemba Paulo alatondezya mbotukonzya kucita oobo. Lino atulange-lange ncaakalemba kujatikizya bulangizi bwesu. Majwi aakwe alatugwasya kuba alusyomo lwakuti zintu nzyotulangila ziyoozuzikizyigwa ncobeni.   

9-10. Kweelana acikozyanyo ca Paulo, ncinzi ncobakonzya kulangila Banakristo? (Baroma 5:3) (Amubone azifwanikiso)

⁹ Amubale Baroma 5:​3, 4. Paulo wakaamba kuti mapenzi alakonzya kuyumya bulangizi bwesu. Kaambo aaka kalakonzya kutugambya. Bwini mbwakuti, basikutobela Kristo boonse balalangilwa kujana mapenzi. Amubone cikozyanyo ca Paulo. Wakaambila baabo ibakali ku Tesalonika kuti: “Notwakali andinywe, twakali kumwaambilila limwi kuti tuyoocitikilwa mapenzi, alimwi eeco ncicacitika.” (1Tes. 3:4) Mpoonya bana Korinto wakabalembela kuti: “Bakwesu tatuyandi kuti kamutaazyi mapenzi  aakatucitikila . . . twakali kuzumbauzya buya kuti naa tulapona.”—2Kor. 1:8; 11:​23-27.

¹⁰ Ncimwi buyo amazuba aano, Banakristo balakonzya kujana mapenzi. (2Tim. 3:12) Mbuti kujatikizya ndinywe? Sena kuli nomwakapenzyegwa kale akaambo kakuba alusyomo muli Jesu alimwi akuba sikumutobela? Ambweni balongwe banu abacibbululu bakamusampaula naa kumweendelezya calunya. Sena kusyomeka muzintu zyoonse kwamuletela mapenzi kumulimo? (Heb. 13:18) Sena mulapenzyegwa amfwulumende akaambo kakuti mwakaambila bamwi nzyomusyoma? Paulo wakaamba kuti tweelede kukkomana tacikwe makani amapenzi ngotukonzya kujana. Nkaambo nzi?

11. Nkaambo nzi ncotweelede kuba amakanze aakuliyumya mumapenzi aali woonse ngotukonzya kujana?

¹¹ Tulakonzya kukkomana nociba ciindi notuli mumapenzi, nkaambo tulizyi kuti eeco citugwasya kuba abube buyandika kapati. Lugwalo lwa Baroma 5:3 lwaamba kuti, “mapenzi apa kuliyumya.” Banakristo boonse bayoojana mapenzi. Aboobo, toonse tweelede kuba amakanze aakuliyumya mumapenzi aali woonse ngotukonzya kujana. Lilikke buyo kuti twacita oobo, ndendilyo notuyoolibonena kuzuzikizyigwa kwabulangizi bwesu. Tatweelede kuba mbuli bantu Jesu mbaakali kwaamba ciindi naakaamba mbuto zyakawida anyika yamabwe. Kumatalikilo, bakaatambula majwi calukkomano, pele nokwakaboola “makatazyo naa kupenzyegwa” bakatyompwa. (Mt. 13:​5, 6, 20, 21) Masimpe kuti kukazyigwa naa mapenzi tazikkomanisyi, pele tulagwasyigwa notuliyumya akuzumanana kumubelekela Jehova. Munzila nzi?

12. Ino tugwasyigwa buti akaambo kakuliyumya mumapenzi?

¹² Sikwiiya Jakobo wakabwaamba bubotu buboola akaambo kakuliyumya mumapenzi. Wakalemba kuti: “Kuliyumya amukulekele kuti kumanizye mulimo wankuko, ikutegwa mulondoke akuzulila mumbazu zyoonse, mutabi acintu cili coonse ncomubula.” (Jak. 1:​2-4) Aboobo, Jakobo wakaamba kuti kuliyumya kulijisi mulimo wankuko naa makanze. Kulakonzya kumugwasya kuba bantu bakkazika moyo kapati, kuba alusyomo luyumu alimwi akumusyoma cakumaninina Leza. Nokuba boobo, kuli nzila ayimbi mbotugwasyigwa kapati akaambo kakuliyumya.

13-14. Ino kuliyumya kutupa kuba anzi? Ino kuswaangene buti abulangizi? (Baroma 5:4)

¹³ Amubale Baroma 5:4. Paulo wakaamba kuti kuliyumya kupa kuba “abukkale mbwakkomanina Leza.” Kuliyumya kwanu kupa kuti Jehova amukkomanine. Pele eeci tacaambi kuti Jehova ulakkomana ciindi nomwajana mapenzi. Ncakkomanina Leza ndinywe ikutali mapenzi aanu. Aboobo kuliyumya kwanu kupa kuti mube abukkale mbwakkomanina. Eelo kaka taciliboteli cilongezyo eeci!—Int. 5:12.

¹⁴ Kamuyeeya kuti Abrahamu wakajana mapenzi alimwi ciindi naakaliyumya, Jehova wakamukkomanina. Jehova wakamwaamba kuti mulongwe wakwe akumubona kuti mululami. (Matl. 15:6; Rom. 4:​13, 22) Eeci andiswe cilakonzya kutucitikila. Jehova tatukkomanini buyo akaambo kakuvwula kwamilimo njotumubelekela naa zyoolwe nzyotujisi. Pele ulatukkomanina akaambo kakuliyumya kwesu cakusyomeka. Alimwi toonse tulakonzya kuliyumya tacikwe makani aciimo cesu, bukkale naa nzyotukonzya kucita. Sena kuli penzi ndyomuliyumya calino akuzumanana kusyomeka kuli Jehova? Ikuti kacili boobu, amuzyibe kuti mupa kuti Jehova akkomane. Ikuzyiba kaambo aaka kulakonzya kuyumya bulangizi bwesu muzilongezyo nzyatusyomezyede kumbele.

15. Ncinzi Paulo ncaakaamba ku Baroma 5:​4, 5? Mubuzyo nzi bamwi ngobakonzya kulibuzya?

¹⁵ Mbubwenya mbwaakaamba Paulo, tulakkomaninwa a Jehova ciindi notuzumanana  kusyomeka kulinguwe akuliyumya kumapenzi. Amubone Paulo mbwaakaamba: “Kuliyumya kutupa kuba abukkale mbwakkomanina Leza; kumane bukkale buli boobu butupa bulangizi, lino bulangizi oobu tabusololeli kukutyompwa.” (Rom. 5:​4, 5) Aaya makani alakonzya kubakatazya bamwi. Nkaambo nzi? Nkaambo kumatalikilo, Paulo ku Baroma 5:​2, wakaamba Banakristo baku Roma kuti bakalijisi kale bulangizi, nkokuti ‘bulangizi bwakutambula bulemu bwa Leza.’ Aboobo umwi ulakonzya kubuzya kuti, ‘Kuti naa Banakristo aabo bakalijisi kale bulangizi, nkaambo nzi Paulo kumbele ncaakaamba kujatikizya bulangizi?’

16. Mbuti bulangizi mbwajisi muntu mbobukonzya kuyuma? (Amubone azifwanikiso)

¹⁶ Tulakonzya kucimvwisya Paulo ncaakali kwaamba ciindi notuzyiba kuti bulangizi bulakonzya kuyuma. Mucikozyanyo: Sena mulayeeya ciindi cakusaanguna nomwakamvwa bulangizi bujanika mu Jwi lya Leza? Ambweni aciindi eeco mwakayeeya kuti bulangizi bwakupona kukabe kutamani muparadaiso anyika, makani akuyeeyela buyo. Nokuba boobo, nomwakatalika kwiiya kujatikizya Jehova alimwi akuzizyiba zisyomezyo zyamu Bbaibbele, mwakasinizya kuti bulangizi oobu buyoozuzikizyigwa ncobeni.

17. Ino bulangizi bwanu inga bwazumanana buti kuyuma noliba leelyo nomwamana kubbapatizyigwa?

¹⁷ Noliba leelyo nomwakamana kubbapatizyigwa, mwakazumanana kwiiya zinji kujatikizya Jehova calo cakapa kuti mumuyande kapati. Akaambo kaceeci, bulangizi bwanu bwakazumanana kuyuma. (Heb. 5:13–6:1) Kweelede kuti mwakalibonena mbwaali aamasimpe majwi aali ku Baroma 5:​2-4. Mwakasunkwa munzila ziindene-indene, pele mwakaliyumya calo cakapa kuti mukkomaninwe a Leza. Mbwaanga mulizyi kuti ulamuyanda akumukkomanina, lino mulijisi kaambo kamvwika kamupa kuyanda kutambula zintu nzyaakasyomezya. Kweelede kuti bulangizi bwanu mulabukkomanina kapati kwiinda kaindi. Tabucili bwakuyeeyela buyo. Ncintu cini-cini kulindinywe. Amana buya, bulangizi oobu bulakonzya kubujatikizya buumi bwanu boonse, nzyomusala, mbomubeendelezya banamukwasyi alimwi ambomucibelesya ciindi.

18. Ino Jehova utusyomezya nzi?

 ¹⁸ Mwaapostolo Paulo ulaamba akambi kaambo kayandika kapati kujatikizya bulangizi bwanu nomwamana kukkomaninwa a Leza. Umusyomezya kuti bulangizi bwanu, buyoozuzikizyigwa ncobeni.  Nkaambo nzi ncomukonzya kucisyoma eeci? Nkaambo Paulo wakaamba kaambo Banakristo ncobakonzya kucisyoma cisyomezyo eeci ca Leza naakati: “Bulangizi oobu tabusololeli kukutyompwa; nkaambo Leza wazuzya luyando lwakwe mumyoyo yesu kwiinda mumuuya uusalala ngotwakapegwa.” (Rom. 5:5) Eelo kaka mulijisi twaambo tunji tweelede kumupa kubusyoma bulangizi mbwatupede Jehova!

19. Ndusinizyo nzi ndotujisi kujatikizya bulangizi bwesu?

¹⁹ Amubone cisyomezyo ca Jehova kuli Abrahamu, mbwaakamukkomanina alimwi ambwaakamubona kuti mulongwe wakwe. Cisyomezyo ca Abrahamu cakazuzikizyigwa ncobeni. Bbaibbele lyaamba kuti: “Abrahamu naakatondezya kukkazika moyo, wakatambula cisyomezyo eeci.” (Heb. 6:15; 11:​9, 18; Rom. 4:​20-22) Alimwi kunyina naakatyompwa pe. Andinywe mulakonzya kuba alusinizyo luli boobo ikuti mwazumanana kusyomeka, kayi bulangizi bwanu buyoozuzikizyigwa ncobeni. Eelo kaka mulijisi twaambo tunji tweelede kumupa kukkomana, nkaambo mulizyi kuti bulangizi bwanu buyoozuzikizyigwa ncobeni alimwi tamukatyompwi pe! (Rom. 12:12) Paulo wakalemba kuti: “Aboobo Leza uupa bulangizi amuzuzye kukondwa koonse alimwi aluumuno eelyo nomumusyoma, ikutegwa mwiindile kuba abulangizi munguzu zyamuuya uusalala.”—Rom. 15:13.