1. Ncinzi ncayelede kucita mwaalumi Munakristo kutegwa azwidilile?

 MWAAPOSTOLO Paulo wakakulwaizya Banakristo baku Efeso kuti: ‘Amube bantu bapati, mukasike aciimo cizulide ica Kristo.’ (Ef. 4:13) Lulayo oolu lulayandika kubaalumi Banakristo boonse. Kutegwa bacite oobo, beelede kutobela milawo ya Leza alimwi akubelesya njiisyo zyamu Bbaibbele mubuumi bwabo boonse. (Lk. 2:52) Nkaambo nzi ncociyandika kubakwesu bana-bana kuba Banakristo basimide?

2-3. Nkaambo nzi ncociyandika kapati kubakwesu bacili bana-bana kusima kumuuya?

² Mwaalumi Munakristo ulijisi mikuli minji iiyandika kapati njayelede kuzuzikizya mumukwasyi alimwi amumbungano. Nobakwesu bacili bana-bana, kweelede kuti mulaakuyeeya mikuli njomulangilwa kuyooba anjiyo kumbele. Ambweni mujisi mbaakani yakuyooba mupainiya, mukutausi mpoonya akuba mwaalu mumbungano. Alimwi andiza muyanda kuyookwata akuba abana. (Ef. 6:4; 1Tim. 3:1) Kutegwa mukazizuzikizye mbaakani eezyi alimwi akuzwidilila, mweelede kuba Munakristo uusimide. b

³ Ncinzi cikonzya kumugwasya kutegwa mube Munakristo uusimide? Kuli bube buyandika kapati mbomweelede kuba ambubo. Aboobo, ncinzi ncomweelede kucita lino kutegwa mulibambile kuzuzikizya mikuli iili yoonse njomuyooba anjiyo kumbele alimwi akuzwidilila?

4. Nkookuli nkomukonzya kujana zikozyanyo zibotu zyakwiiya? (Amubone acifwanikiso.)

⁴ Amwiiye zikozyanyo zibotu. Bbaibbele lilijisi zikozyanyo zinji nzyobakonzya kwiiya bakwesu bakubusi. Bamaalumi ibaambidwe  mu Bbaibbele bakali kumuyanda kapati Jehova alimwi bakajisi mikuli iisiyene-siyene yakulanganya bantu bakwe. Kunze lyaboobo, mulakonzya kujana zikozyanyo zibotu akati kabamaalumi Banakristo basimide mumukwasyi wanu amumbungano yanu. (Heb. 13:7) Alimwi mulijisi cikozyanyo ciinda kubota ca Jesu Kristo. (1Pet. 2:21) Aboobo, ciindi nomulanga-langa zikozyanyo eezyi cakulomya, amusole kuyeeya bube bwabo bukkomanisya. (Heb. 12:​1, 2) Mpoonya amubone mbomukonzya kubwiiya.

5. Mbuti mbomukonzya kuba abube bwakuyeeya kabotu? Nkaambo nzi bube oobu ncobuyandika kapati? (Intembauzyo 119:9)

⁵ Amube abube ‘bwakuyeeya kabotu.’ (Tus. 3:21) Muntu uuyeeya kabotu ulasaanguna kukkala ansi akuyeeya katanabweza ntaamu. Aboobo amubeleke canguzu kutegwa mube abube oobu akunoobubelesya lyoonse. Nkaambo nzi? Nkaambo kakuti bunji bwabakubusi mazuba aano, batobela buyo mizeezo yabo alimwi akucita zintu kweelana ambobalimvwa. (Tus. 7:7; 29:11) Kunze lyaboobo, mapulogilamu aa TV, mafilimu alimwi a Intaneti zilakonzya kumujatikizya kapati. Pele mbuti mbomukonzya kuba abube bwakuyeeya kabotu? Amutalike kwiinda mukwiiya njiisyo zyamu Bbaibbele alimwi akuyeeya kaambo ncozigwasya kapati. Mpoonya amuzibelesye njiisyo eezyo kutegwa mucikonzye kusala zintu zimukkomanisya Jehova. (Amubale Intembauzyo 119:9.) Ikuti naa mwaba abube oobu buyandika kapati, buyoomugwasya kuba mwaalumi Munakristo uusimide. (Tus. 2:​11, 12; Heb. 5:14) Amubone kuyeeya kabotu mbokukonzya kumugwasya mumbazu eezyi zyobilo: (1) ciindi nomuyanzana abacizyi alimwi (2) nomusala zisani ambomweelede kulibonya.

6. Ino kuyeeya kabotu inga kwamugwasya buti mukwesu mukubusi kubalemeka bacizyi?

⁶ Bube bwakuyeeya kabotu bulakonzya kumugwasya kubalemeka bamakaintu. Mucikozyanyo, cili buyo kabotu kumukwesu mukubusi kutalika kuyanda mucizyi uumwi. Nokuba boobo, mukwesu uuyeeya kabotu tayelede kwaamba, kulemba naa kucita cintu cili coonse cikonzya kupa mucizyi kutalika kuyeeya kuti mukwesu ooyo uyanda kumusyaba, ccita kuti kalibambilide kumukwata. (1Tim. 5:​1, 2) Pele  kuti naa balisyabene amucizyi, takamunyonganizyili mpuwo mucizyi ooyo kwiinda mukuba balikke ccita kuti kakuli sikubasindikila.—1Kor. 6:18.

7. Mbuti kuyeeya kabotu mbokukonzya kugwasya mukwesu mukubusi mumakani aansamino akulibamba?

⁷ Nzila aimwi mukwesu mukubusi mbwakonzya kutondezya kuti uyeeya kabotu nkwiinda mukusala zisani zili kabotu akulibamba kabotu. Bunji bwabantu ibapanga mafasyoni abasikwaambilizya tabamulemeki Jehova alimwi tabalilemeki pe. Aboobo balakonzya kupanga zisani zijata kapati naa izikonzya kupa bamaalumi kulibonya mbuli kuti mbaamakaintu. Ciindi nasala zyakusama, mukwesu mukubusi uuyanda kuba Munakristo uusimide uyootobela njiisyo zyamu Bbaibbele alimwi azikozyanyo zibotu zyabakwesu mumbungano. Aboobo ulakonzya kulibuzya kuti: ‘Sena zintu nzyondisala zitondezya kuti ndiyeeya kabotu akuti ndilababikkila maano bamwi? Sena nsamino yangu ipa kuti cibaubile bamwi kusyoma kuti ndili mubelesi wa Leza uulyaabide?’ (1Kor. 10:​31-33; Tit. 2:6) Mukwesu uyeeya kabotu takalemekwi buyo abakwesu abacizyi pele alimwi uyookkomaninwa a Usyi wakujulu.

8. Ncinzi cikonzya kugwasya mukwesu mukubusi kuba muntu uusyomeka?

⁸ Amusyomeke. Muntu uusyomeka ulailanganya cabunkutwe mikuli yakwe yoonse. (Lk. 16:10) Amubone cikozyanyo ca Jesu. Tanaakali muyamba naa muntu uutabikkili maano. Muciindi caboobo, wakazicita zintu zyoonse Jehova nzyaakamwaambila kucita, noliba leelyo nocakali kukatazya kucita boobo. Wakali kubayanda bantu, kwaambisya basikwiiya bakwe mane wakaaba buumi bwakwe akaambo kambabo. (Joh. 13:1) Aboobo, amumwiiye Jesu kwiinda mukubeleka canguzu kuzuzikizya mulimo uuli woonse ngomwapegwa. Ikuti naa tamuzyi kabotu mbomweelede kuucita, amulicesye akulomba lugwasyo kubakwesu basimide. Mutaubeleki cakwiizya buyo mulawo. (Rom. 12:11) Muciindi caboobo, amuumanizye kuubeleka mulimo wanu nkaambo “mubelekela Jehova ikutali bantu pe.” (Kol. 3:23) Bwini mbwakuti, tamulondokede aboobo mweelede kulicesya akuzumina kulubizya kuli koonse nkomukonzya kucita.—Tus. 11:2.

9. Nkaambo nzi mukwesu mukubusi ncayelede kwiiya zintu zikonzya kumugwasya?

⁹ Kutegwa mube Munakristo uusimide, mweelede kwiiya zintu zimwi zikonzya kumugwasya. Kwiiya zintu eezyi kuyoomugwasya kulanganya mikuli yamumbungano, kubeleka mulimo wakumubili kutegwa kamujana mali aakuligwasya naa kugwasya mukwasyi alimwi akumvwana abamwi. Amubone zikozyanyo zimwi.

10-11. Mbuti mukwesu mukubusi mbwakonzya kugwasyigwa lwakwe akugwasya mbungano akaambo kakwiiya kubala akulemba kabotu? (Intembauzyo 1:​1-3) (Amubone acifwanikiso.)

¹⁰ Amwiiye kubala akulemba kabotu. Bbaibbele lyaamba kuti muntu uukkomene alimwi uukonzya kuzwidilila ulajana ciindi cakubala Jwi lya Leza buzuba abuzuba alimwi akuzinzibala  kuyeeya ncabala. (Amubale Intembauzyo 1:​1-3.) Kwiinda mukubala Bbaibbele buzuba abuzuba, ulakonzya kuzyiba mbwayeeya Jehova, calo icikonzya kumugwasya kuyeeya kabotu alimwi akuzyiba mbwakonzya kwaabelesya Magwalo. (Tus. 1:​3, 4) Bamaalumi bacita boobu balayandika kapati mumbungano. Nkaambo nzi?

¹¹ Bakwesu abacizyi bayandika lugwasyo lwabamaalumi ibakonzya kuyiisya kabotu akupa lulayo lwamu Bbaibbele. (Tit. 1:9) Ikuti kamucikonzya kubala akulemba kabotu, muyoocikonzya kulibambila makani alimwi abwiinguzi bukonzya kugwasya bamwi akuyumya lusyomo lwabo. Kunze lyaboobo, muyoocikonzya kulemba twaambo tugwasya ciindi nomwiiya, nomuswiilila makani kumiswaangano yambungano, yabbazu alimwi ayacooko. Twaambo ootu tuyoomugwasya kuyumya lusyomo lwanu alimwi akukulwaizya bamwi.

12. Ncinzi ciyoomugwasya kubandika kabotu abantu?

¹² Amwiiye kubandika kabotu. Mwaalumi Munakristo weelede kwiiya kubandika kabotu abantu. Eeci caamba kuti weelede kuswiilila akuzyiba mbobalimvwa bamwi. (Tus. 20:5) Ulakonzya kuzyiba mbwalimvwa muntu kwiinda mukuswiilila mbolilimvwisya jwi, mbwalibonya kumeso alimwi ambwanyanyaasya mubili. Pele tamukonzyi kuzyiba mbobalimvwa bantu kuti kamutajani ciindi cakubandika ambabo cantongolameso. Ikuti lyoonse kamubandika abantu kubelesya ma email, tugwalo twaafooni alimwi anzila zimbi zyakulembelana tugwalo, ciyoomuyumina kapati kubandika abantu cacigaminina. Aboobo, amusolekesye kujana nzila zyakubandika abantu camulomo mpande.—2Joh. 12.

13. Ncinzi acimbi ncayelede kwiiya mukwesu uucili mwana-mwana? (1 Timoteyo 5:8) (Amubone acifwanikiso.)

¹³ Amwiiye kulijanina mali aakuligwasya. Mwaalumi Munakristo uusimide weelede kuti kacikonzya kulijanina mali aakuligwasya akugwasya mukwasyi wakwe. (Amubale 1 Timoteyo 5:8.) Muzisi zimwi, bakwesu bacili bana-bana balakonzya kwiiya milimo imwi kuli bausyi naa kuli wacibbululu umwi. Mpoonya mumasena aambi, mukwesu uucili mwana-mwana ulakonzya kwiiya mulimo umwi nacili kucikolo casekondali. Kufwumbwa mbocibede, cilayandika kapati kwiiya zintu zimwi izikonzya kumugwasya kujana mulimo. (Mil. 18:​2, 3; 20:34; Ef. 4:28) Amube ampuwo yakuba muntu uubeleka canguzu alimwi uumanizya mulimo ngwaatalika. Ikuti mwacita oobo, muyooba acoolwe cakujana mulimo akuzumanana kubeleka. Bube alimwi azintu nzyotwabandika zilayandika kapati kumukubusi Munakristo, kutegwa akacikonzye kulanganya mikuli yakwe yakumbele. Lino amuleke tubandike mikuli imwi.

14. Ncinzi cikonzya kugwasya mukwesu mukubusi kuba mubelesi waciindi coonse?

¹⁴ Mubelesi waciindi coonse. Bunji bwabamaalumi Banakristo basimide, bakatalika mulimo waciindi coonse ciindi nobakacili bana. Kubeleka mulimo wabupainiya, kulakonzya kugwasya mukwesu mukubusi kubeleka kabotu abantu baindene-indene. Alimwi kulakonzya kumugwasya kwaabelesya kabotu mali. (Flp. 4:​11-13) Nzila mbotu yakutalika mulimo waciindi coonse, nkucita bupainiya bwakugwasyilizya. Banji balacita mulimo wabupainiya bwakugwasyilizya kwaciindi cili mbocibede, calo icibagwasya kutalika bupainiya bwaciindi coonse. Kucita bupainiya kulakonzya kujalula zyoolwe zyakubeleka mumbazu zimwi zyamulimo waciindi coonse, mbuli kubeleka mumulimo wamayake naa ku Beteli.

15-16. Mbuti mukwesu mukubusi mbwakonzya kweelela kubeleka kali mukutausi naa mwaalu mumbungano?

¹⁵ Mukutausi naa mwaalu. Bakwesu boonse beelede kuba ambaakani yakweelela kubelekela Banakristonyina kabali baalu mumbungano. Bbaibbele lyaamba kuti bamaalumi ibauyanda mukuli ooyu ‘bayanda mulimo mubotu.’ (1Tim. 3:1) Mukwesu katanaba mwaalu, weelede kweelela kuba mukutausi. Bakutausi balabagwasyilizya baalu mumbazu zinji. Cakulicesya, baalu abakutausi balababelekela bakwesu abacizyi alimwi balatola lubazu cabusungu mumulimo wakukambauka. Bakwesu bakubusi balakonzya kweelela kubeleka kabali bakutausi nokuba kuti bajisi myaka iili akati ka 17 a 19. Mpoonya mukutausi weelela ulakonzya kusalwa kuba mwaalu nokuba kuti ujisi buyo myaka iili 20 yakuzyalwa.

¹⁶ Ncinzi ncomukonzya kucita kutegwa mweelele kuba mukutausi naa mwaalu? Kunyina nzila iini iigaminide. Pele Bbaibbele lilaamba mulongo wabube mbomweelede kuba ambubo alimwi bube oobu boonse buyeeme aluyando ndomujisi kuli Jehova, kumukwasyi wanu alimwi akumbungano. (1Tim. 3:​1-13; Tit. 1:​6-9; 1Pet. 5:​2, 3) Aboobo amusolekesye kubumvwisya bube bumwi abumwi. Amupaile kuli Jehova kutegwa amugwasye kuba abube oobu. c

17. Ino mukwesu mukubusi inga walibambila buti kuba mulumi alimwi asilutwe wamukwasyi? (Amubone acifwanikiso.)

¹⁷ Mulumi alimwi asilutwe wamukwasyi. Mbubwenya mbuli Jesu mbwaakaamba, Banakristo bamwi basimide balazumanana kukkala kabatakwete. (Mt. 19:12) Nokuba boobo, ikuti mwasala kukwata, muyooba amikuli imwi iiyungizyidwe yakuba mulumi asilutwe wamukwasyi. (1Kor. 11:3) Jehova ulangila mulumi kuti kamuyanda mukaintu wakwe alimwi akumupa  nzyayandika kumubili, kuba mulongwe wakwe mubotu alimwi akumugwasya kuba acilongwe ciyumu a Jehova. (Ef. 5:​28, 29) Kwiiya zintu zikonzya kumugwasya nzyotwabandika mumincali yainda alimwi akuba abube mbuli bwakuyeeya kabotu, kubalemeka bamakaintu alimwi akusyomeka, kuyoomugwasya kuba mulumi uuli kabotu. Muyoocikonzya kuuzuzikizya mukuli wanu wakuba mulumi alimwi asilutwe wamukwasyi.

18. Mbuti mukwesu mukubusi mbwakonzya kulibambila kuyooba usyi?

¹⁸ Usyi. Mwaakukwata, mulakonzya kuyooba abana. Ino ncinzi ncomukonzya kwiiya kuli Jehova kujatikizya kuba usyi mubotu? Kuli ziiyo zinji. (Ef. 6:4) Caantangalala, Jehova wakaambila Mwanakwe Jesu kuti wakali kumuyanda alimwi akumukkomanina. (Mt. 3:17) Ikuti naa mwaakuba abana, amukabe masimpe kuti lyoonse mulabaambila kuti mulabayanda. Mweelede kunoobalumbaizya ciindi aciindi akaambo kazintu zibotu nzyobacita. Bamausyi ibaiya cikozyanyo ca Jehova balabagwasya bana babo kuba bamaalumi abamakaintu Banakristo basimide. Aboobo, mulakonzya kulibambila lino kuyooba usyi mubotu kwiinda mukubayanda akubalanganya banamukwasyi alimwi abakwesu abacizyi mumbungano. Amwiiye kubaambila kuti mulabayanda akubalumbaizya. (Joh. 15:9) Ikuti mwacita oobo, ciyoomugwasya kuba mulumi alimwi ausyi mubotu. Calino, munooli muntu uuyandika kapati kuli Jehova, mumukwasyi wanu alimwi amumbungano.

19-20. Ncinzi ciyoogwasya bakwesu bacili bana-bana kuba Banakristo basimide? (Amubone cifwanikiso cili aacivwumbyo.)

¹⁹ Nobakwesu bacili bana-bana, tamukonzyi kuba Banakristo basimide ikuti kamukkede buyo taandabale. Mweelede kwiiya zikozyanyo zibotu, kuba abube bwakuyeeya kabotu, kusyomeka, kwiiya zintu ziyoomugwasya mubuumi alimwi akulibambila mikuli yakumbele.

²⁰ Zimwi ziindi, mulakonzya kulibilika mwayeeya zintu nzyomulangila kumbele. Pele mulakonzya kuzwidilila. Kamuyeeya kuti Jehova uliyandide kumugwasya. (Is. 41:​10, 13) Abalo bakwesu abacizyi mumbungano bayoomugwasya. Ikuti mwazwidilila akuba Munakristo uusimide, buumi bwanu bunookkomanisya kapati. Nobakwesu bacili bana-bana, tulamuyanda kapati! Jehova aamulongezye ciindi nomubeleka canguzu kutegwa mube Banakristo basimide.—Tus. 22:4.