Sena mwakazibala cakulomya zibalo zili mu Ngazi Yamulindizi yamwaka uuno? Amubone naa inga mwayiingula mibuzyo eeyi iitobela:

Ino ‘kucinca mizeezo yanu’ caamba nzi? (Rom. 12:2)

Tacaambi kwiile kucita buyo zintu zibotu. Pele cilabikkilizya akulilingula mukati kamyoyo yesu akupanga kucinca kuyandika kutegwa katupona kweelana azyeelelo zya Jehova kusikila mpotugolela.—w23.01, pp. 8-9.

Mbuti mbotukonzya kuzilanga kabotu zintu ciindi notubona zicitika munyika?

Tulayandisisya kubona zintu zicitika munyika, mbozizuzikizya businsimi bwamu Bbaibbele. Pele muciindi cakuyeeyela buyo zintu, calo icikonzya kunyonganya lukamantano lwesu, tweelede kwaamba makani aakamwaigwa ambunga ya Jehova. (1Kor. 1:10)—w23.02, p. 16.

Ino lubbapatizyo lwa Jesu lwakaindene buti alwabasikumutobela?

Mbwaanga wakazyalilwa mucisi cakalyaabide kuli Leza, Jesu tanaakali kuyandika kulyaaba kuli Jehova mbuli mbotucita. Jesu wakali muntu uulondokede, uunyina kampenda. Aboobo tanaakali kuyandika kweempwa kuzibi.—w23.03, p. 5.

Mbuti mbotukonzya kupa kuti banji babe acoolwe cakwiingula lyamiswaangano?

Tulakonzya kupa bwiinguzi bufwaafwi kutegwa abamwi babe acoolwe cakutola lubazu. Alimwi tweelede kweeleba kwaamba twaambo tunji. Kuti twacita oobo abamwi bayootola lubazu.—w23.04, p. 23.

Ino “Nzila ya Busalali” yaambidwe kuli Isaya 35:8 yaamba nzi?

Kaindi, ooyu wakali mugwagwa mupati ngobakabelesya ba Juda kuzwa ku Babuloni kuya kumunzi okwabo. Ino mbuti kujatikizya mazuba aano? Mumyaanda yamyaka yakasololela kumwaka wa 1919, milimo imwi yakulibambila yakatalika kucitwa, mbuli kusandulula akusimba ma Bbaibbele. Kuzwa leelyo bantu ba Leza bali kweendela mu “Nzila ya Busalali” kuya kuparadaiso yakumuuya yalo iisololela kuzilongezyo zya Bwami.—w23.05, pp. 15-19.

Ino lugwalo lwa Tusimpi caandaano 9 lupa lulayo nzi kujatikizya bamakaintu bobilo bacikozyanyo?

Ku Tusimpi tubala mukaintu “mufwubafwuba” walo uujisi kwiita ikusololela “ku Cuumbwe” alimwi amukaintu iwiimininwa ‘abusongo bwini-bwini,’ walo uujisi kwiita ikusololela kubuumi nkokuti “munzila yamaano.” (Tus. 9:​1, 6, 13, 18)—w23.06, pp. 22-24.

Ino mbuti Leza mbwaakatondezya kulicesya akunyoneka twalanga mbwaakamweendelezya Loti?

Jehova wakalailila Loti kuti azwe mumunzi wa Sodoma akutijila kumalundu. Ciindi Loti naakalomba kuti atijile ku Zoari, Leza wakakumvwa kulomba kwakwe akumuzumizya.—w23.07, p. 21.

Ncinzi mukaintu ncakonzya kucita ikuti ngobakwetene limwi keebelela zintu ziletela muzeezo wakoonana?

Tayelede kulipa mulandu. Muciindi caboobo, weelede kubikkila maano kucilongwe cakwe a Jehova alimwi akuzinzibala kuyeeya zibalo zyamu Bbaibbele zyabamakaintu bakatyompedwe mbobakaumbulizyigwa. Ulakonzya kumugwasya ngobakwetene limwi kutantamuka bukkale bukonzya kumupa kweebelela zintu ziletela muzeezo wakoonana.—w23.08, pp. 14-17.

Ciindi notubuzyigwa kujatikizya nzyotusyoma, mbuti bupampu mbobukonzya kutugwasya kwiingula cabubombe?

Tulakonzya kuzyiba muntu mbwayeeya naa mbwalimvwa kwiinda mumubuzyo ngwabuzya. Aboobo tulakonzya kumugwasya kuti twamwiingula cabubombe.—w23.09, p. 17.

Ncinzi ncotukonzya kwiiya kuli Mariya caboola kumakani aakuyumizyigwa?

Mariya wakayumizyigwa abamwi ciindi naakazyiba kuti wakali kuyooba banyina Mesiya. Mungelo Gabriyeli alimwi a Elizabeta bakamuyumya-yumya Mariya kuzwa mu Magwalo. Mbubwenya buyo andiswe tulakonzya kuyumizyigwa abakombima.—w23.10, p. 15.

Mbuti Jehova mbwakonzya kwiingula mipailo yesu?

Utusyomezya kuti unooyiingula mipailo yesu alimwi ulabona mboyeendelana amakanze aakwe. (Jer. 29:12) Ulakonzya kwiindanya mbwayingula mipailo yesu, pele usyomezya kunootugwasya lyoonse.—w23.11, pp. 21-22.

Lugwalo lwa Baroma 5:2 lwaamba kujatikizya “bulangizi,” aboobo nkaambo nzi ncobwaambwa alimwi mukapango 4?

Mbwaamvwida buyo makani mabotu, muntu ulakonzya kuba abulangizi bwakuyoopona buumi butamani munyika yaparadaiso. Pele ciindi napenzyegwa, naliyumya alimwi akubona kuti ulakkomaninwa a Leza, bulangizi mbwajisi bulayuma kapati akuba bwini-bwini kulinguwe.—w23.12, pp. 12-13.