1-2. Ino nzintu nzi zikonzya kutupa kulila?

 TOONSE aciindi cimwi twakalila kale. Zimwi ziindi tulalila akaambo kakukkomana. Mucikozyanyo, ambweni mwakalila ciindi cintu cimwi cikkomanisya nocakacitika mbuli kuzyalwa kwamwanaanu, nomwakayeeya cintu cimwi cikkomanisya kapati naa nomwakabonana amulongwe wanu ngomwakabwenene kaindi.

² Nokuba boobo, bunji bwaziindi tulalila akaambo kakuti tuluuside alimwi tulipengede. Mucikozyanyo, tulakonzya kulila ciindi muntu umwi ngotusyoma naatutyompya. Kunze lyaboobo, tulakonzya kulila ciindi notucisidwe alimwi anotwapenga kwaciindi cilamfwu naa notwafwidwa muyandwa wesu. Muziindi zili boobo, tulakonzya kulimvwa mbuli Jeremiya ciindi bana Babuloni nobakanyonyoona munzi wa Jerusalemu. Aciindi eeci Jeremiya wakaamba kuti: “Misozi iluujisi kweenda kuzwa mumeso aangu . . . Meso aangu taaleki kulila, taayozyi pe.”—Malo. 3:​48, 49.

3. Ino Jehova ulimvwa buti ciindi nabona babelesi bakwe kabapenga? (Isaya 63:9)

³ Jehova ulizizyi ziindi zigaminide nzyotwakalila mubuumi akaambo kamapenzi. Bbaibbele litusyomezya kuti ulizyi ciindi umwi aumwi wesu napenga alimwi ulamvwa ciindi notulomba kuti atugwasye. (Int. 34:15) Pele kuli azimbi zinji nzyacita Jehova. Mbubwenya mbuli muzyali siluyando, uleetezyegwa kapati ciindi nabona bana bakwe kabalila alimwi ulilibambilide kubagwasya.—Amubale Isaya 63:9.

4. Ncinzi ncotukonzya kwiiya kuzikozyanyo zyamu Bbaibbele zimwi kujatikizya Jehova?

⁴ Jehova ulatwaambila mu Jwi lyakwe ciindi babelesi bakwe nobakalila alimwi ambwaakabagwasya. Tulakonzya kucibona eeci kwiinda mukulanga-langa cikozyanyo ca Hana, Davida alimwi a Mwami Hezekiya. Ncinzi cakabapa kuti balile? Ino Jehova wakacita buti ciindi nobakamulilila kuti abagwasye? Alimwi  mbuti zikozyanyo zyabo mbozikonzya kutuumbulizya ciindi notulila akaambo kakutyompwa, kuteendelezyegwa kabotu naa kuciswa?

KULILA AKAAMBO KAKUTYOMPWA

5. Ino Hana wakalimvwa buti akaambo kabukkale bwakwe?

⁵ Hana wakajana mapenzi aali mbwaabede alo aakali kumupa kulila kapati. Penzi limwi ndyakuti, wakakwetwe mumaali mpoonya Penina iwakali mukazinyina wakali kumusampaula. Kunze lyaboobo, Hana tanaakali kuzyala, kakuli Penina walo wakajisi bana bali mbobabede. (1Sam. 1:​1, 2) Aboobo lyoonse Penina wakali kumusampaula Hana akaambo kakutazyala. Ikuti nomwakali ndinywe nomwakali mubukkale oobu, ino nomwakalimvwa buti? Hana wakatyompwa kapati cakuti “wakali kulila akutalya,” alimwi “wakaluuside kapati” mumoyo.—1Sam. 1:​6, 7, 10.

6. Ncinzi ncaakacita Hana kutegwa ajane luumbulizyo?

⁶ Ino Hana wakacita buti kutegwa ajane luumbulizyo? Cintu cimwi ncaakacita nkuunka kuyookomba Jehova kutente lyakukombela. Naakasika okuya, ambweni afwaafwi akumanjililo aalubuwa lwatente lyakukombela, “wakatalika kupaila kuli Jehova kumwi kalila citaambiki.” Wakakombelezya Jehova kuti: ‘Ndigwasye mumapenzi aangu akundiyeeya ndemubelesi wako, alimwi utandilubi.’ (1Sam. 1:10b, 11) Hana wakamwaambila Jehova mumupailo kujatikizya mbwaakalimvwide. Eelo kaka kweelede kuti Jehova cakamucisa kapati kubona mwanaakwe uuyandwa kalila!

7. Ino Hana wakalimvwa buti naakamana kwaambila Jehova kujatikizya penzi lyakwe?

⁷ Ino Hana wakalimvwa buti naakamana kwaambila Jehova bwini mbwaakalimvwide, mpoonya akumvwa majwi aakulwaizya kuzwa ku Mupaizi Mupati Eli? Bbaibbele lyaamba kuti: “Mukaintu ooyu wakaunka akuyoolya, tanaakacuuside alimwi pe.” (1Sam. 1:​17, 18) Nokuba kuti penzi lyakwe eeli tiilyakalinamana, Hana wakalimvwa kukkalwa moyo. Nkaambo wakali masimpe kuti Jehova wakalaazyi mapenzi aakwe ambwaakalimvwide alimwi akuti wakali kukonzya kumugwasya. Masimpe, Jehova wakalibona penzi lya Hana, wakakumvwa kulila kwakwe alimwi mukuya kwaciindi wakamugwasya kwiinda mukumupa kuba abana.—1Sam. 1:​19, 20; 2:21.

8-9. Kweelana alugwalo lwa Bahebrayo 10:​24, 25, nkaambo nzi ncociyandika kapati kujanika kumiswaangano? (Amubone acifwanikiso.)

⁸ Ncotwiiya. Sena muli mubukkale bukatazya ibumupa kulila? Ambweni mwakafwidwa munamukwasyi naa mulongwe. Mubukkale buli boobu, mulakonzya kuyanda kuti kamuli buyo nyolikke, alimwi eeci cilalimvwisya. Pele amuyeeye cikozyanyo ca Hana. Wakaunka kutente lyakukombela mpoonya okuya Jehova wakamuumbulizya. Mbubwenya buyo, Jehova uyoomuumbulizya akumukulwaizya ciindi nomujanika kumiswaangano, nokuba kuti mulikatede naa kuusa. (Amubale Bahebrayo 10:​24, 25.) Kumiswaangano, tulaswiilila tupango  twamu Bbaibbele itukulwaizya kapati. Eeyi nenzila imwi Jehova njabelesya kutugwasya kuleka kuyeeya zintu izitupa kuusa. Akaambo kaceeci, tulakonzya kulimvwa kabotu nokuba kuti penzi tiilyamana mpoonya aawo.

⁹ Kunze lyaboobo, kumiswaangano yesu tulaba acoolwe cakuyanzana abakombima balo ibakonzya kutukulwaizya akutondezya kuti balatuyanda kapati. Alimwi tulakonzya kulimvwa kabotu ciindi notuli aambabo. (1Tes. 5:​11, 14) Amumvwe cakuluula camukwesu umwi painiya waalubazu iwakafwidwa bakaintu. Wakaamba kuti: “Ndicilila asunu. Zimwi ziindi inga ndiyanda kuba buyo ndelikke nkaambo inga ndilaalilwa kuleka kulila. Pele ndaunka kumuswaangano inga ndilakulwaizyigwa kapati. Majwi mabotu ngobandaambila bakwesu abacizyi alimwi abwiinguzi mbobapa lyamiswaangano, zilanduumbulizya kapati. Tacikwe makani ambondilimvwide kanditanaunka, lyoonse inga ndilimvwa kabotu ndasika nkuko.” Twanooli kumiswaangano, Jehova ulakonzya kubelesya bakwesu abacizyi kutugwasya.

10. Mbuti mbotukonzya kwiiya cikozyanyo ca Hana ciindi notuuside kapati?

¹⁰ Hana alimwi wakajana luumbulizyo kwiinda mukupaila kuli Jehova akumwaambila mbwaakalimvwide. Andinywe mulakonzya ‘kuwaala makatazyo aanu oonse kuli Jehova,’ kamusinizyide kuti ulamugwasya. (1Pet. 5:7) Mucizyi umwi uujisi mulumi wakajaigwa abakabwalala wakaamba kuti: “Ndakalimvwa mbuli kuti moyo wangu wazapaulwa mutubeela tusyoonto-syoonto alimwi tiiwakali kulangilwa kupona. Cakandicisa kapati. Pele ndakali kulimvwa kabotu kufwumbwa ndapaila kuli Jehova, Taata siluyando. Zimwi ziindi ndakali kubula amajwi aakwaamba kupandulula mbondakalimvwide, pele wakali kundimvwisya. Ciindi nondakali kulimvwa kuusa akulibilika kapati, ndakali kupaila kuti andipe luumumo lwamumizeezo. Ndamana buyo kupaila, ndakali kulimvwa kukkalwa moyo alimwi ndakali kukonzya kuzumanana kucita ncondakali kuyanda kucita buzuba oobo.” Ciindi nomumulilila Jehova akumwaambila cintu icimupa kuusa, awalo ulausa alimwi inga ulizyi bwini mbomulimvwa. Nokuba kuti penzi inga tiilyamana mpoonya aawo, Jehova uyoomuumbulizya alimwi akumugwasya kutegwa mube aluumuno lwamumizeezo. (Int. 94:19; Flp. 4:​6, 7) Kunze lyaboobo, uyoomulumbula akaambo kakuzumanana kuliyumya cakusyomeka.—Heb. 11:6.

KULILA AKAAMBO KAKUTEENDELEZYEGWA KABOTU

11. Ino Davida wakalimvwa buti ciindi bamwi nobatakamweendelezya kabotu?

¹¹ Mubuumi bwakwe, Davida wakaliyumya kumapenzi aakatazya kapati alo aakali kumupa kulila. Mucikozyanyo, kuli bantu banji ibakamusulide. Nobaba balongwe bakwe bamwi abanamukwasyi tiibakali kusyomeka kulinguwe alimwi bakali kuyanda kumujaya. (1Sam. 19:​10, 11; 2Sam. 15:​10-14, 30) Aciindi cimwi wakalemba kuti: “Ndakatala akaambo kakutongela kwangu; busiku boonse nditesya bulo bwangu amisozi; ndipa kuti bulo bwangu bubombe akaambo kakulila.” Nkaambo nzi Davida ncaakalimvwide boobu? Wakaamba kuti: “Akaambo kabaabo boonse bandipenzya.” (Int. 6:​6, 7) Ciindi bamwi nobatakamweendelezya kabotu Davida, wakatyompwa kapati cakuti wakali kulila citaambiki.

12. Kweelana ambolutondezya lugwalo lwa Intembauzyo 56:​8, ncinzi Davida ncaakasinizyide?

¹² Nokuba kuti Davida wakajana mapenzi manji mubuumi, wakalisinizyide kuti Jehova wakali kumuyanda. Wakalemba kuti: “Jehova ulalimvwa jwi lyangu nendilila.” (Int. 6:8) Aciindi cimwi, Davida wakalemba majwi aakkomanisya ngotujana kulugwalo lwa Intembauzyo 56:8. (Amubale.) Majwi aaya alacisalazya kuti Jehova ulatuyanda kapati alimwi ulabikkila maano kujatikizya mbotulimvwa. Davida wakaamba  kuti cakali mbuli kuti Jehova wakali kubikka misozi yakwe munkomo yacikutu naa kwiilemba mubbuku. Wakalisinizyide kuti Jehova wakakubona kupenga kwakwe alimwi wakali kukuyeeya. Wakali masimpe kuti Usyi wakujulu siluyando wakalaazyi mapenzi aakwe alimwi ambwaakali kumupa kulimvwa.

13. Ciindi bamwi nobatutyompya, ncinzi ncotweelede kuyeeya? (Amubone acifwanikiso.)

¹³ Ncotwiiya. Sena muluuside kapati akaambo kakuti muntu umwi ngomusyoma wakamutyompya? Ambweni muluuside akaambo kakuti muntu umwi ngomwakali kweebana limwi naa ngomwakakwetene limwi wakamusiya cakutayeeyela, naa ambweni muntu umwi ngomuyanda wakaleka kubelekela Jehova. Mukwesu umwi uujisi mukaintu iwakacita bumambe alimwi akumusiya wakaamba kuti: “Ndakatyompwa kapati alimwi ndakaalilwa kusyoma. Ndakalimvwa kubula mpindu, kuusa alimwi ndakanyema.” Ikuti naa muntu umwi tanaakasyomeka kulindinywe naa wakamutyompya kapati, amujane luumbulizyo kwiinda mukuzyiba kuti walo Jehova kunyina nayoomulekelezya pe. Mukwesu wakayungizya kwaamba kuti: “Bantu talili lyoonse nobanoosyomeka kulindiswe, pele walo Jehova unoosyomeka lyoonse. Aboobo tacikwe makani acikonzya kumucitikila, Jehova unoomugwasya lyoonse. Kunyina nayoobalekelezya bantu bakwe basyomeka.” (Int. 37:28) Kuyungizya waawo, lyoonse kamuyeeya kuti Jehova ulamuyanda kapati kwiinda mbwakonzya kumuyanda muntu uuli woonse. Ciindi muntu umwi ngomusyoma naaleka kusyomeka kulindinywe, cilacisa kapati. Pele Jehova kunyina nacinca mbwalimvwa kujatikizya ndinywe, mulayandika kapati kulinguwe. (Rom. 8:​38, 39) Aboobo, tacikwe makani amuntu umwi mbwaamweendelezya, Uso wanu wakujulu ulamuyanda kapati.

14. Ncisyomezyo nzi ncotujana kulugwalo lwa Intembauzyo 34:18?

¹⁴ Ciindi notutyompedwe akaambo kakuti muntu umwi tanaakasyomeka kulindiswe, tulakonzya kuumbulizyigwa amajwi aa Davida aajanika kulugwalo lwa Intembauzyo 34:18. (Amubale.) Bbuku limwi lyakaamba kuti aabo “bapengede mumizeezo” balakonzya kuba “baabo ibalimvwa kubula bulangizi buli boonse.” Ino Jehova ubagwasya buti aabo ibalimvwa boobu? Mbubwenya mbuli muzyali siluyando uujatilila mwanaakwe uuli mumapenzi akumuumbulizya, Jehova “ulaafwaafwi” andiswe. Ciindi notupenga akaambo kakuti muntu umwi tanaakasyomeka kulindiswe naa wakatulekelezya, Jehova cilamucisa awalo alimwi ulilibambilide kutugwasya mpoonya-mpoonya. Ulilibambilide kutuumbulizya ciindi notutyompedwe alimwi anotulimvwa kuti tunyina mpindu. Kunze lyaboobo, watusyomezya zintu zinji nzyotukonzya kulangila kumbele zyalo izikonzya  kutugwasya kuliyumya kumapenzi ngotujisi.—Is. 65:17.

KULILA AKAAMBO KAKUCISWA

15. Nkaambo nzi Hezekiya ncaakatyompwa akutalika kulila?

¹⁵ Naakajisi myaka iili 39 yakuzwalwa, Mwami Hezekiya wa Juda wakaciswa kapati. Mpoonya musinsimi Isaya wakamwaambila mulumbe wakazwa kuli Jehova wakuti ulafwa akaambo kakuciswa ooku. (2Bam. 20:1) Naakamvwa boobu, Hezekiya wakatyompwa kapati cakuti wakalila citaambiki. Kumane wakapaila kuli Jehova kulomba lugwasyo.—2Bam. 20:​2, 3.

16. Ino Jehova wakamucitila nzi Hezekiya?

¹⁶ Ciindi Jehova naakamvwa mupailo wa Hezekiya akubona mbwaakali kulila, wakamufwida lubomba akumwaambila kuti: “Ndaumvwa mupailo wako. Ndaibona misozi yako. Ndilakuponya.” Kwiinda mukubelesya Isaya, Jehova wakamusyomezya kuti ulamuyungizyila myaka yakupona alimwi akuvwuna munzi wa Jerusalemu mumaanza aamwami wa Asuri.—2Bam. 20:​4-6.

17. Mbuti Jehova mbwatugwasya ciindi notujisi penzi lyakuciswa? (Intembauzyo 41:3) (Amubone acifwanikiso.)

¹⁷ Ncotwiiya. Ncinzi ncomukonzya kucita kuti kamuciswa bulwazi bulibonya mbuli kuti bunyina busilisi? Amumwaambile Jehova mbomulimvwa mumupailo, nokuba kumulilila buya. Bbaibbele litusyomezya kuti “Taata siluse a Leza siluumbulizyo loonse” unootuumbulizya mumapenzi eesu oonse. (2Kor. 1:​3, 4) Mazuba aano, tatukonzyi kulangila kuti Jehova ulakonzya kwaamana mapenzi eesu oonse, pele tulakonzya kulanga kulinguwe kutegwa atugwasye. (Amubale Intembauzyo 41:3.) Kwiinda mukubelesya muuya wakwe uusalala, Jehova ulakonzya kutupa nguzu, busongo alimwi aluumuno lwamumizeezo kutegwa tucikonzye kuliyumya. (Tus. 18:14; Flp. 4:13) Kunze lyaboobo, ulatugwasya kwiinda mukutupa bulangizi bwakuti kumbele kunyina uuyakwaamba kuti ndaciswa.—Is. 33:24.

18. Ndugwalo nzi ndomwakajana lumuumbulizya ciindi nomwalijana mubukkale bukatazya? (Amubone kabbokesi kakuti, “ Magwalo Aakonzya Kutuumbulizya Ciindi Notulila.”

¹⁸ Hezekiya wakaumbulizyigwa amajwi aa Jehova. Mbubwenya buyo, andiswe tulakonzya kuumbulizyigwa kwiinda mukuswiilila ncatwaambila Jehova mu Jwi lyakwe. Ciindi notutyompedwe, majwi aakwe aali mu Bbaibbele alakonzya kutuumbulizya alimwi akutugwasya kuba aluumuno lwamumizeezo. (Rom. 15:4) Ciindi mucizyi umwi waku West Africa naakajanwa abulwazi bwakkansa, wakali kulila kapati. Wakaamba kuti: “Lugwalo lumwi ilunduumbulizya kapati ndwa Isaya 26:3. Nokuba kuti zimwi ziindi tatukonzyi kubucinca bukkale bwesu, lugwalo oolu lusyomezya kuti Jehova inga watugwasya kuba aluumuno lwamumizeezo alimwi akutugwasya kuliyumya mumapenzi aali  woonse.” Sena kuli lugwalo ndomwakajana lumuumbulizya kapati ciindi nomwalijana mubukkale bukatazya, ambweni ibumupa kubula bulangizi?

19. Ncintu nzi cibotu ncotukonzya kulangila kumbele?

¹⁹ Mbwaayaabuswena afwaafwi mamanino aabweende bwazintu oobu, mapenzi aapa kuti katulila anooyaabuvwula buya. Pele kweelana ambotwabona kucikozyanyo ca Hana, Davida a Mwami Hezekiya, Jehova ulakubona kulila kwesu alimwi cilamucisa kapati. Ulatuyanda akaambo kakuzumanana kusyomeka kulinguwe nokuba kuti tulapenga alimwi takailubi misozi yesu. Aboobo ciindi notwalijana mubukkale bukatazya, tweelede kumwaambila Jehova mbotulimvwa mumupailo. Tatweelede kulizandula kubakwesu abacizyi mumbungano balo ibatuyanda kapati. Alimwi atuzumanane kuumbulizyigwa amajwi mabotu aalembedwe mu Bbaibbele. Tulakonzya kuba masimpe kuti, ikuti twazumanana kuliyumya cakusyomeka, Jehova uyootulumbula. Eeci cilabikkilizya akuyoobona cisyomezyo citaliboteli kacizuzikizyigwa icakusindula misozi yoonse iiboola akaambo kabuumba, kucitilwa cakutasyomeka alimwi akuciswa. (Ciy. 21:4) Mpoonya tuyootalika buyo kulila akaambo kakukkomana.