1-2. Ncinzi bazyali ncobeelede kucita ciindi bana babo nobatalika kubuzya mibuzyo kujatikizya nzyobasyoma?

 BANJI balakonzya kuzumina kuti, ikukomezya bana tacili cintu cuuba-uba, pele kuyandika kubeleka canguzu. Ikuti naa muli muzyali, tacidoonekwi buya kuti mulabeleka canguzu kuyumya lusyomo lwabana banu alimwi eeco cilamukkomanisya kapati Jehova. (Dt. 6:​6, 7) Aboobo mbobayaabukomena bana banu, balakonzya kutalika kubuzya mibuzyo kujatikizya kaambo Jehova ncatukasyila kucita zintu zimwi.

² Kumatalikilo, mulakonzya kuyeeya kuti bana banu babuzya mibuzyo eeyo akaambo kakuti tabajisi lusyomo luyumu muli Leza alimwi tabalisyomi Bbaibbele. Pele bwini mbwakuti mbobayaabukomena bana, beelede kubuzya mibuzyo kutegwa basinizye zintu nzyobasyoma. (1Kor. 13:11) Aboobo tamweelede kulibilika pe. Ciindi nobamubuzya mibuzyo, mulakonzya kubelesya ciindi eeco kubagwasya kuzinzibala kuyeeya, calo cikonzya kubagwasya kuyumya lusyomo lwabo muli Leza alimwi a Bbaibbele.

3. Ncinzi ncotutiibandike mucibalo eeci?

³ Mucibalo eeci, tulabandika kujatikizya bazyali mbobakonzya kugwasya bana babo (1) kuyumya lusyomo lwabo muli Leza alimwi a Bbaibbele, (2) kumvwisya kaambo kutobela zyeelelo zyamu Bbaibbele ncokugwasya, mpoonya (3) kwiiminina nzyobasyoma. Kuyungizya waawo, tulabandika kaambo ncocili kabotu kubana kubuzya mibuzyo alimwi azintu zimwi nzyomukonzya kucita antoomwe abana banu zyalo izikonzya kumupa coolwe cakubandika nzyomusyoma.

AMUBAGWASYE BANA BANU KUYUMYA LUSYOMO LWABO

4. Mibuzyo nzi njobakonzya kuba anjiyo bana? Nkaambo nzi?

⁴ Bazyali Banakristo beelede kuzyiba kuti kuba alusyomo muli Leza tacili cintu bana ncobazyalwa aancico. Kayi andinywe tiimwakazyalwa  kamujisi lusyomo muli Jehova. Oobo mbocibede akubana banu. Aboobo mukuya kwaciindi, bana banu balakonzya kukatazyigwa amibuzyo mbuli yakuti: ‘Ino inga ndazyiba buti kuti Leza nkwali? Sena ncobeni inga ndacisyoma ncolyaamba Bbaibbele?’ Mubwini Bbaibbele litukulwaizya ‘kubelesya maano’ alimwi ‘akusinizya zintu zyoonse.’ (Rom. 12:1; 1Tes. 5:21) Pele mbuti mbomukonzya kugwasya bana banu kuyumya lusyomo lwabo?

5. Ncinzi bazyali ncobakonzya kucita kutegwa bagwasye bana babo kulisyoma Bbaibbele? (Baroma 12:2)

⁵ Amubakulwaizye bana banu kujana bumboni bwakuti nzyolyaamba Bbaibbele zililuzi. (Amubale Baroma 12:2.) Ciindi bana banu nobabuzya mibuzyo, amubelesye coolwe eeci kubatondezya mbobakonzya kujana bwiinguzi kwiinda mukubelesya zibelesyo mbuli Watch Tower Publications Index alimwi a Bbuku Ligwasya Kuvwuntauzya lya Bakamboni ba Jehova. Mubbuku Ligwasya Kuvwuntauzya, ansi aamutwe wakuti “Ibbaibbele,” balakonzya kulanga aakatwe kakuti “Lyakasololelwa Amuuya wa Leza” kutegwa bajane bumboni bwakuti Bbaibbele talili buyo bbuku libotu ilyakalembwa abantu, pele “majwi aa Leza.” (1Tes. 2:13) Mucikozyanyo, balakonzya kuvwuntauzya kujatikizya munzi wansiku wabana Asuri wa Nineve. Kaindi, basikwiiya zyamu Bbaibbele bamwi bakali kwaamba kuti munzi ooyu kunyina nowakaliko. Pele cakuma 1850, basikuvwukkula zyakaindi bakaajana matongo aa munzi wa Nineve calo icakatondezya kuti cibalo camu Bbaibbele cililuzi. (Zef. 2:​13-15) Kutegwa bazyibe kunyonyoonwa kwamunzi wa Nineve mbokwakazuzikizya businsimi bwamu Bbaibbele, balakonzya kubona cibalo cakuti “Sena Mulizyi?” mu Ngazi Yamulindizi ya November 2021. Kwiinda mukweezyanisya zintu nzyobaiya mumabbuku eesu alimwi azeezyo nzyobabala muma encyclopedia amumabbuku aambi aasyomeka, ciyoobagwasya bana banu kuba alusyomo luyumu lwakuti nzyolyaamba Bbaibbele nzyamasimpe.

6. Mbuti bazyali mbobakonzya kugwasya bana babo kubona bumboni bwakuti Bbaibbele lililuzi? Amupe cikozyanyo. (Amubone acifwanikiso.)

⁶ Amubagwasye bana banu kubona bumboni bwakuti Bbaibbele lililuzi. Bazyali balijisi zyoolwe zinji zyakuba amibandi iikulwaizya abana babo kujatikizya Bbaibbele naa lusyomo muli Leza. Balakonzya kuba azyoolwe zili boobu ciindi nobaswaya kumiziyamu, kumasena aayebeka kapati (botanical garden) naa kuofesi yamutabi ya Bakamboni ba Jehova. Mucikozyanyo, ciindi nomuswaya kumiziyamu, mulakonzya kubelesya zintu zyakaindi iziswaangene amakani amwi aamu Bbaibbele. Eeci cilakonzya kugwasya bana banu kubona kuti nzyolyaamba Bbaibbele nzyamasimpe. Naa ambweni mulakonzya kubayiisya bana banu kujatikizya Bbwe Lyaku Moabu. Bbwe eeli lyaliko kwamyaka iili 3,000 alimwi alindilyo kuli zina lyakuti Jehova. Bbwe Lyaku Moabu lyakusaanguna, nkolili mu Louvre Museum ku France. Kunze lyaboobo, mulakonzya kulanga zifwanikiso izitondezya zintu zyakaindi  mbuli Bbwe Lyaku Moabu a Intaneti naa muzyakumwaya zyesu. Alimwi citondezyo cabbwe eeli nkocili mumiziyamu yiitwa kuti “The Bible and the Divine Name (Bbaibbele a Zina lya Leza)” iili ku Maofesi Mapati aa Bakamboni ba Jehova ku Warwick, New York. Bbwe eeli litondezya kuti Mwami Mesa wa Moabu wakazangila Israyeli. Eeci cileendelana ancolyaamba Bbaibbele. (2Bam. 3:​4, 5) Ciindi bana banu nobalibonena buya ameso bumboni butondezya kuti Bbaibbele lilasyomeka alimwi ndyamasimpe, lusyomo lwabo luyooyuma kapati.—Amweezyanisye a 2 Makani 9:6.

7-8. (a) Ncinzi ncotukonzya kwiiya kujatikizya zilenge mbozipangidwe? Amupe cikozyanyo. (Amubone acifwanikiso.) (b) Mibuzyo nzi iikonzya kugwasya bana banu kuyumya lusyomo lwabo mu Mulengi?

⁷ Amubakulwaizye bana banu kuzinzibala kuyeeya zintu zigambya nzyaakalenga Jehova. Ciindi nomweendeenda musyokwe naa nomubeleka mugaadeni, amubagwasye bana banu kubona zilenge mbozilengedwe munzila iigambya. Nkaambo nzi? Nkaambo zitondezya kuti kuli muntu musongo kapati iwakazilenga. Mucikozyanyo, kupombana naa kuzambana kwazilenge zinji kwali kuyiigwa abasayaansi kwamyaka minji. Syaazibwene umwi mumakani aasayaansi wazina lya Nicola Fameli wakaamba kuti, ikuti naa mwabala ziindi zyakupombana kwacilenge cimwi, muyoojana kuti kutantaana kwazibeela zyancico kulikozyenye. Manamba aaya ayitwa kuti Fibonacci sequence. Tulakonzya kukubona kupombana ooku muzintu zinji, mbuli mumilalabungu iimwi, muzikwa zyankumba-kumba zimwi, mumatewo alimwi amalangazuba. a

⁸ Kucikolo, bana banu balakonzya kwiiya nzila azimbi zijatikizya mbozipangidwe zilenge zimwi. Mucikozyanyo, bunji bwamasamu alapanga cintu cilibonya mbuli kuti cilaliinduluka. Cisamu catalika kukomena, cilapanga mpanda mpoonya mpanda eezyo zilapanga mitabi akuzumanana kuyaabucita mbubweenya oobo canoyaabulampa. Eeci ciitwa kuti fractal (cintu ciliinduluka-induluka). Tazili buyo zisamu zilikke izicita boobu, pele azilenge zimbi. Ino nguni wakapa kuti zilenge eezyi kazicikonzya kucita boobu? Ciindi bana banu nobazinzibala kuyeeya kujatikizya zintu eezyi zikkomanisya nzyaakalenga Jehova, balakonzya kuba alusyomo luyumu. (Heb. 3:4) Mpoonya mbobayaabukomena, mulakonzya kubabuzya kuti, “Mbwaanga Leza nguwakatulenga, sena muyeeya kuti inga kazyi ncotweelede kucita kutegwa tukkomane?” Kumane mulakonzya kwaamba kuti wakatupa Bbaibbele kututondezya mbotukonzya kukkomana.

AMUBAGWASYE BANA BANU KUMVWISYA MBOZIGWASYA ZYEELELO ZYAMU BBAIBBELE

9. Nkaambo nzi bana banu ncobakonzya kubuzya mibuzyo kujatikizya zyeelelo zyamu Bbaibbele?

⁹ Zimwi ziindi, bana banu balakonzya kubuzya mibuzyo kujatikizya kaambo Bbaibbele ncolyaambila  kuti zintu zimwi nzibi. Amusole kuzyiba kaambo bana banu ncobabuzyila boobo. Sena penzi ndyakuti tabasyomi kuti nzyolyaamba Bbaibbele nzyamasimpe? Naa sena nkaambo kakuti tabazyi mbobakonzya kupandulwida bamwi nzyobasyoma? Mubukkale boonse bobilo, mulakonzya kubagwasya bana banu kumvwisya kaambo kutobela zyeelelo zyamu Bbaibbele ncokugwasya, kwiinda mukwiiya ambabo mubbuku lya Amupone Kukabe Kutamani! b

10. Mbuti mbomukonzya kubagwasya bana banu kuba acilongwe ciyumu a Jehova?

¹⁰ Amubagwasye bana banu kuba acilongwe ciyumu a Jehova. Ciindi nomwiiya Bbaibbele abana banu, amubelesye mibuzyo alimwi azikozyanyo zijanika mubbuku lya Amupone Kukabe Kutamani! kutegwa muzyibe mbobalimvwa kujatikizya zintu ziindene-indene. (Tus. 20:5) Mucikozyanyo, ciiyo 8 cikozyanisya Jehova kumulongwe uutubikkila maano walo uutwaambila zintu zikonzya kutukwabilila alimwi akutugwasya. Mwamana kubandika lugwalo lwa 1 Johane 5:​3, mulakonzya kubabuzya bana banu kuti, “Kuzyiba kuti Jehova mulongwe mubotu, ino kweelede kumupa kulimvwa buti kujatikizya nzyatwaambila kuti tucite?” Ooyu ulakonzya kulibonya kuba mubuzyo muubauba, pele kubabuzya kulakonzya kubagwasya bana banu kubona kuti milawo njatupa Jehova ncitondezyo cakuti ulatuyanda.—Is. 48:​17, 18.

11. Mbuti mbomukonzya kugwasya bana banu kubona bubotu bwakutobela njiisyo zyamu Bbaibbele? (Tusimpi 2:​10, 11)

¹¹ Amubandike ambabo kujatikizya mbotugwasyigwa kwiinda mukutobela njiisyo zyamu Bbaibbele. Ciindi nomubala Bbaibbele naa kulingaula lugwalo lwabuzuba abuzuba antoomwe, amubandike njiisyo zyamu Bbaibbele mbozyaugwasya mukwasyi wanu. Mucikozyanyo, Sena bana banu balizyi mbocigwasya kusyomeka alimwi akubeleka canguzu? (Heb. 13:18) Kunze lyaboobo, mulakonzya kubapandulwida kutobela njiisyo zyamu Bbaibbele, mbokukonzya kutugwasya kupona kabotu alimwi akukkomana mubuumi. (Tus. 14:​29, 30) Ikuti bana banu bazyiba mbocigwasya kutobela njiisyo zyamu Bbaibbele, balalangilwa kunooyanda kuzitobela mubuumi bwabo.—Amubale Tusimpi 2:​10, 11.

12. Mbuti ba Steve abakaintu babo mbobagwasya mwanaakwe kubona mbociyandika kutobela milawo yamu Bbaibbele?

¹² Ba Steve, imuzyali umwi waku France bakapandulula mbobamugwasya mwanaabo Ethan, balo abakaintu babo ikubona kuti Jehova wakatupa milawo akaambo kakuti ulatuyanda. Bakaamba kuti: “Inga tulamubuzya mibuzyo mbuli yakuti, ‘Nkaambo nzi Jehova ncayanda kuti katuutobela mulawo wakwe ooyu? Mbuti mboutondezya kuti ulatuyanda? Ncinzi cikonzya kucitika ikuti tiiwautobela?’” Mibandi iili boobu yamugwasya Ethan kuba alusyomo luyumu lwakuti nzyaamba Jehova zililuzi. Ba Steve bakayungizya kuti: “Makanze eesu ngakugwasya Ethan kubona kuti Bbaibbele lilijisi busongo bugwasya kapati kwiinda busongo bwabantu.”

13. Mbuti bazyali mbobakonzya kuyiisya bana babo kubelesya njiisyo zyamu Bbaibbele? Amupe cikozyanyo.

¹³ Amubayiisye bana banu kubelesya njiisyo zyamu Bbaibbele. Mulakonzya kucita oobo ciindi bana banu nobapegwa bbuku limwi lyakucikolo lyakuti bakabale. Bantu baambidwe mubbuku eelyo inga kabacita zintu Jehova nzyaamba kuti nzibi. Mucikozyanyo, balakonzya kuti kabali basibwaamu alimwi kabali basinkondo. Pele bbuku inga kalilembedwe munzila yakuti zintu eezyi kazilibonya mbuli kuti zili buyo kabotu. Aboobo mulakonzya kubaambila bana banu kuyeeya mbwalimvwa Jehova kujatikizya micito iili boobu. (Tus. 22:​24, 25; 1Kor. 15:33; Flp. 4:8) Eeci cilakonzya kubagwasya bana banu kubona kaambo ncocili cabusongo kumvwida Jehova. Mpoonya ikuti bayi babo naa basicikolonyina bababuzya  mbobayeeya kujatikizya bbuku eelyo, bayoocikonzya kwaamba nzyobasyoma.

AMUBAGWASYE BANA BANU KWIIMININA NZYOBASYOMA

14. Makani nzi aakonzya kubapa kuyoowa bakubusi Banakristo? Nkaambo nzi?

¹⁴ Zimwi ziindi, bakubusi balakonzya kuyoowa kwaambila bamwi kujatizya nzyobasyoma. Mucikozyanyo, balakonzya kuyoowa kupandulula kaambo ncobatasyomi munjiisyo yakusanduka kwazintu. Nkaambo nzi? Nkaambo kakuti bamayi balakonzya kwaamba kuti njiisyo eeyi njamasimpe, tacili cintu cakuyeeyela buyo. Ikuti kamuli muzyali, mbuti mbomukonzya kubagwasya bana banu kusinizya kuti nzyobasyoma nzyamasimpe?

15. Ncinzi cikonzya kugwasya bana banu kusinizya nzyobasyoma?

¹⁵ Amubagwasye bana banu kusinizya nzyobasyoma. Bana banu tabeelede kufwa nsoni akaambo kakusyoma kuti kuli Mulengi. (2Tim. 1:8) Nkaambo nobaba basayaansi banji balasyoma kuti zintu tiizyakaile kusanduka buyo zilikke. Basayaansi aaba, balabubona bumboni bwakuti kuli muntu umwi musongo iwakalenga zintu eezyi zijisi bumpiyompiyo. Akaambo kaceeci, tabaisyomi njiisyo yakusanduka yalo iyiisyigwa muzikolo zinji nyika yoonse. Cintu cimwi cikonzya kugwasya bana banu kuba alusyomo luyumu abusicamba, nkuzyiba cakapa kuti bakwesu abacizyi bamwi basinizye kuti zintu zyakalengwa buya. c

16. Mbuti bazyali mbobakonzya kugwasya bana babo kucikonzya kupandulwida bamwi kaambo ncobasyoma kuti kuli Mulengi? (1 Petro 3:15) (Amubone acifwanikiso.)

¹⁶ Amubagwasye bana banu kucikonzya kupandulwida bamwi kaambo ncobasyoma kuti kuli Mulengi. (Amubale 1 Petro 3:15.) Mulakonzya kwiinduluka ambabo zibalo zili a jw.org zijisi mutwe wakuti “Bakubusi Balabuzya—Kulenga naa Kusanduka?” Kumane bana banu balakonzya kusala bupanduluzi mbobalimvwa kuti inga bwabagwasya bamwi kumvwisya kuti kuli Mulengi. Mweelede kubayeezya kuti tabeelede kukazyanya abasicikolonyina. Muciindi caboobo, amubakulwaizye kubandika munzila ngubauba alimwi iitobeleka, ikuti umwi kalibambilide kubandika kujatikizya makani aayo. Mucikozyanyo, sicikolonyina ulakonzya kwaamba kuti: “Mebo ndisyoma buyo zintu nzyondikonzya kubona pele tandinamubwene Leza.” Mukubusi Munakristo ulakonzya kwiingula kuti: “Koyezeezya kuti uyabweenda mucisaka cili kulamfwu akujanika bantu mpoonya wajana mugoti uubambidwe kabotu.  Ino inga wayeeya nzi? Inga wayeeya kuti kuli muntu umwi iwakausya, tee kayi? Oobo mbocibede akuzintu zyoonse nzyotubona, kuli wakazilenga.

17. Mbuti bazyali mbobakonzya kugwasya bana babo kujana zyoolwe zyakubandika makani aamu Bbaibbele abamwi? Amupe cikozyanyo.

¹⁷ Amubagwasye bana banu kujana zyoolwe zyakubandika makani aamu Bbaibbele abamwi. (Rom. 10:10) Mulakonzya kukozyanisya kusolekesya nkobacita kwaambila bamwi makani aamu Bbaibbele, kukusolekesya nkwacita mwana musyoonto ciindi naiya kweenda. Kumatalikilo, ulaiya kwiimikila, kumane ulatalika kubbatula naa kubbansa ntaamu. Mbubwenya buyo, mukubusi ulakonzya kutalika kukambauka kwiinda mukubelesya nzila ngubauba. Mucikozyanyo, ulakonzya kubuzya sicikolonyina kuti: “Sena ulizyi kuti basyaazibwene bakakkopela zilenge kupanga zintu zimwi? Andikutondezye kavidiyo kamwi kakkomanisya.” Amana kumutondezya kavidiyo kuzwa mumulongo watuvidiyo twakuti Sena Cakalengwa Buya? ulakozya kwaamba kuti: “Ikuti basayaansi kabalumbaizyigwa akaambo kazintu nzyobapanga kwiinda mukukkopela kuzwa kuzilenge, ino mubwini nguni weelede kwiinda kulumbaizyigwa akaambo kazintu nzyotubona?” Kwiinda mukubelesya nzila eeyi ngubauba, cilakonzya kupa kuti sicikolonyina ayande kwiiya zinji kujatikizya Jehova.

AMUZUMANANE KUBAGWASYA BANA BANU KUYUMYA LUSYOMO LWABO

18. Mbuti bazyali mbobakonzya kuzumanana kugwasya bana babo kuyumya lusyomo lwabo muli Leza?

¹⁸ Tupona munyika iizwide bantu batajisi lusyomo muli Jehova. (2Pet. 3:3) Aboobo nobazyali, ciindi nomwiiya Bbaibbele abana banu, amubagwasye kuvwuntauzya zibalo zinji zyalo iziyoobagwasya kulemeka Jwi lya Leza alimwi azyeelelo zyakwe. Amubagwasye kuzinzibala kuyeeya alimwi akuyumya lusyomo lwabo muli Jehova kwiinda mukubandika ambabo kujatikizya zilenge zya Jehova. Kunze lyaboobo, amubagwasye kumvwisya businsimi bwamu Bbaibbele ibwakazuzikizyigwa kale. Kumane kwiinda zyoonse, amupaile abana banu alimwi akubapailila. Ikuti mwacita oobo, mulakonzya kuba masimpe kuti Jehova uyoomulongezya akaambo kakubeleka canguzu kugwasya bana banu kuyumya lusyomo lwabo.—2Mak. 15:7.