Mwaapostolo Paulo wakalembela Timoteyo mwaalunyina kuti: “Ndakulailila canguzu kumbele lya Leza a Kristo Jesu alimwi abangelo basalidwe kuti waatobele malailile aaya kakunyina kulanga ciwa camuntu naa kusalulula.”

Cakusaanguna, amuleke tubandike kujatikizya ibatakonzyi kubikkilizyigwa munkamu yabangelo eeyi. Cilisalede kuti, bangelo aaba tabali baabo ba 144,000. Kayi ciindi Paulo naakalembela Timoteyo, kunyina munanike iwakabusyidwe kale akuunka kujulu. Baapostolo abananike bambi tiibakalinaba zilenge zyamuuya, aboobo tabakonzyi kuba “bangelo basalidwe.”—1Kor. 15:​50-54; 1Tes. 4:​13-17; 1Joh. 3:2.

Kunze lyaboobo, “bangelo basalidwe” aaba tabakonzyi kuba bangelo ibakazanga ciindi ca Zambangulwe. Kayi bangelo aaba ibakazanga, bakatobela Saatani akuba madaimona alimwi bakaba basinkondonyina a Jesu. (Matl. 6:2; Lk. 8:​30, 31; 2Pet. 2:4) Kumbele, Jesu uyoobawaalila mumulindi uutagoli mwalo mobayookkala kwamyaka iili 1,000. Kumane bayoonyonyoonwa antoomwe a Saatani.—Jud. 6; Ciy. 20:​1-3, 10.

Kweelede kuti “bangelo basalidwe” mbaakaamba Paulo, mbangelo bakujulu ibasyomeka kuli “Leza a Jesu Kristo.”

Kuli zyuulu-zyuulu zyabangelo basyomeka. (Heb. 12:​22, 23) Alimwi kulibonya kuti Jehova tabapi milimo iikozyenye bangelo aaba. (Ciy. 14:​17, 18) Mucikozyanyo, Jehova wakaambila buyo mungelo omwe kujaya basikalumamba bana Asuri bali 185,000. (2Bam. 19:35) Mpoonya bangelo bamwi banji ambweni bakapegwa mulimo ‘wakugusya mu Bwami bwa [Jesu] zintu zyoonse zilebya abantu bacita bubi.’ (Mt. 13:​39-41) Bamwi ambweni bakali ‘kunoobunganya basale bakwe antoomwe’ kujulu. (Mt. 24:31) Kumane bangelo bamwi ‘balatukwabilila munzila zyesu zyoonse.’—Int. 91:11; Mt. 18:10; amweezyanisye a Matayo 4:11; Luka 22:43.

“Bangelo basalidwe” ibaambidwe kulugwalo lwa 1 Timoteyo 5:21 kweelede kuti mbangelo ibakapedwe mulimo wakulanganya mbungano. Mutupango tweengelede, Paulo wakapa lulayo lujatikizya baalu mbobeelede kulanganya mikuli yabo, alimwi akuti aabo bali mumbungano beelede kubalemeka baalu. Paulo wakaamba kuti baalu tabeelede “kulanga ciwa camuntu naa kusalulula” alimwi tabeelede kupanga zyakusala kakunyina kusaanguna kuyeeya. Kumane Paulo wakaamba kaambo kayandika kapati ncobeelede kutobela lulayo lwakwe. Wakaamba kuti baalu babelekela banyina “kumbele lya Leza a Kristo Jesu alimwi abangelo basalidwe.” Aboobo cilisalede kuti bangelo bamwi bapedwe mulimo wakulanganya mbungano, mbuli kwiikwabilila, kulanganya mulimo wakukambauka alimwi akulipoota kuli Jehova kujatikizya nzyobabona.—Mt. 18:10; Ciy. 14:6.