Sena mwakazibala cakulomya zibalo zili mumamagazini aa Ngazi Yamulindizi aamwaka uuno? Amubone naa inga mwayiingula mibuzyo eeyi iitobela:

Ino Jehova upa cikozyanyo nzi caboola kukweendelezya bamakaintu?

Ulabeendelezya cakutasalulula, kunyina nabona bamaalumi kuti balayandika kwiinda bamakaintu. Leza ulabaswiilila bamakaintu, ulabikkila maano kujatikizya mbobalimvwa azibalibilisya. Alimwi ulatondezya kuti ulabasyoma kwiinda mukubapa kuti babeleke mulimo wakwe.—w24.01, pp. 15-16.

Mbuti mbotukonzya kulubelesya lugwalo lwa Baefeso 5:​7, ilwaamba kuti: “Mutani kuyanzani ambabo”?

Mwaapostolo Paulo wakali kutucenjezya kujatikizya kuyanzana abantu bakonzya kupa kuti cituyumine kukakatila kuzyeelelo zya Leza. Kuyanzana ooku kwaamba kubandika abantu cacigaminina naa aabo mbotubandika limwi a Intaneti.—w24.03, pp. 22-23.

Makani aali buti aakubeja ngotweelede kucenjelela?

Tweelede kwaacenjelela makani aatasinizyidwe aazwa kubakwesu abacizyi, mutugwalo ntobatutumina bantu mbotutazyi alimwi akuli basiluleyo.—w24.04, p. 12.

Ncinzi ncotuzyi alimwi ancotutazyi kujatikizya Jehova mbwayoomubeteka Mwami Solomoni kubikkilizya abaabo ibakafwa mu Sodoma a Gomora alimwi aciindi ca Zambangulwe?

Tatuzyi bwini naa Jehova wakababeteka kuti beelela kunyonyoonwa cakumaninina. Nokuba boobo, tulizyi kuti ulituzyi twaambo toonse twamasimpe alimwi ulaaluse kapati.—w24.05, pp. 3-4.

Ino kuzyiba kuti Leza “Nindomba” kutugwasya buti? (Dt. 32:4)

Tulakonzya kujana mayubilo muli Jehova. Ulasyomeka, lyoonse ulazuzikizya zisyomezyo zyakwe. Alimwi tacinci, kunyina nacinca bube bwakwe amakanze aakwe.—w24.06, pp. 26-28.

Ncinzi cikonzya kumugwasya kuzyibila kumbungano mpya?

Amusyome Jehova, walo uuyoomugwasya mbubwenya mbwaakabagwasya babelesi bakwe kaindi. Muteezyanisyi mbungano mpya ambungano nkomwakabede. Amujate bubi mumbungano mpya alimwi akusolekesya kujana balongwe bapya.—w24.07, pp. 26-28.

Nziiyo nzi nzyotujana muzikozyanyo zyotatwe izijanika kulugwalo lwa Matayo caandaano 25?

Cikozyanyo cambelele ampongo cikankaizya kusyomeka. Cikozyanyo cabanakalindu bacenjede alimwi abafwubafwuba cituyiisya kuba bantu balibambilide alimwi bapakamene. Kumane cikozyanyo camatalenta citondezya mbociyandika kapati kuba bankutwe.—w24.09, pp. 20-24.

Ino kkoce lyatempele lya Solomoni lyakali lilamfwu buti?

Kulugwalo lwa 2 Makani 3:​4, malembe amwi aakaindi kulembedwe “tukokola tuli 120,” calo cipa kuti kkoce kalilampa mamita aali 53 kuya mujulu. Pele malembe aambi aamba “tukokola tuli 20,” calo cipa kuti kalilampa mamita aali 9 kuya mujulu. Makani aaya aakajanwa alibonya kweendelana abupati bwabwaanda bwatempele.—w24.10, p. 31.

Ino caamba nzi kumukutausi kuba ‘mulumi uukwete mukaintu omwe’? (1Tim. 3:12)

Caamba kuti ukwete buyo mukaintu omwe alimwi teelede kucita bwaamu. Kuyungizya waawo, tayelede kumenena mate bamakaintu bambi.—w24.11, p. 19.

Nkaambo nzi ncotukonzya kwaamba kuti lugwalo lwa Johane 6:53 tiilwakali kwaamba mboweelede kunoocitwa Mulalilo wa Mwami?

Lugwalo lwa Johane 6:53 lwaamba kaambo ncociyandika kulya mubili wa Jesu akunywa bulowa bwakwe. Jesu wakaamba majwi aaya mu 32 C.E., ku Galilaya kuba Juda balo ibakacili kuyandika kumusyoma. Nokuba boobo, Mulalilo wa Mwami wakatalisyigwa nokwakainda mwaka omwe mu Jerusalemu. Okuya Jesu wakali kubandika abaabo mbayoolela limwi kujulu.—w24.12, pp. 10-11.