1-2. Ncinzi mukwesu umwi ncaakaiya kujatikizya kupa lulayo?

 MYAKA minji yainda, baalu bobilo bakaswaya mucizyi iwatakali kujanika kumiswaangano kwaciindi cili mbocibede. Mwaalu umbi wakatondezya mucizyi magwalo aali mbwaabede aamba zyakujanika kumuswaangano. Mukwesu ooyu wakayeeya kuti mubandi weenda kabotu, pele nobakali kulaya mucizyi wakaamba kuti, “Bakwesu kunyina ncomuzyi naaceya kujatikizya mapenzi ngondijisi.” Bakwesu bakaile kupa buyo lulayo kakunyina kumubuzya mucizyi kujatikizya mapenzi ngaakajisi. Akaambo kaceeci, wakalimvwa kuti lulayo lwabo kunyina nolwamugwasya.

² Mwaalu iwakatondezya mucizyi magwalo wakaamba kuti: “Kumatalikilo, ndakali kuyeeya kuti mucizyi ooyu unyina bulemu. Pele ndakabona kuti ndakasaanguna kubikkila maano kumagwalo aakubelesya muciindi cakusaanguna kuzyiba bukkale bwamucizyi. Ndakeelede kusoleka kuzyiba mapenzi ngaakajisi mucizyi alimwi akubona mbondikonzya kumugwasya.” Eeci cakapa kuti mwaalu aiye ciiyo ciyandika kapati. Mazuba aano mweembezi uuli aalubomba alimwi uubikkila maano.

3. Ino mbaani mumbungano ibakonzya kupa lulayo?

 ³ Mbwaanga mbeembezi, baalu bajisi mukuli wakupa lulayo ciindi nokuyandika kucita boobo. Nokuba boobo, kuli ziindi bamwi mumbungano nobanga bayandika kupa lulayo. Mucikozyanyo, mukwesu naa mucizyi ulakonzya kupa mweenzinyina lulayo lwamu Bbaibbele. (Int. 141:5; Tus. 25:12) Naa  mucizyi mupati ulakonzya kwaambila “bakaintu bacili bana-bana” kujatikizya zintu mbuli zyeezyo zyaambidwe kulugwalo lwa Tito 2:3-5. Abalo bazyali beelede kubapa lulayo bana babo ciindi aciindi. Nokuba kuti cibalo eeci cigamikidwe kubaalu bambungano, toonse tulakonzya kugwasyigwa kwiinda mukulanga-langa nzila mbotukonzya kupa lulayo lugwasya, lukulwaizya alimwi ilupa ‘moyo kukondwa.’—Tus. 27:9.

4. Ncinzi ncotutiibandike mucibalo eeci?

⁴ Mucibalo eeci, tulabandika mibuzyo yone iijatikizya kupa lulayo: (1) Nkaambo nzi kalimvwisya ikamupa kupa lulayo? (2) Sena lulayo lulayandika ncobeni? (3) Ino mbaani ibeelede kupa lulayo? (4) Mbuti mbomukonzya kupa lulayo lugwasya?

5. Ncinzi cikonzya kugwasya mwaalu kupa lulayo munzila yaluyando? (1 Bakorinto 13:4, 7)

⁵ Baalu balabayanda bakwesu abacizyi. Zimwi ziindi balalutondezya luyando oolo, kwiinda mukupa muntu umwi lulayo uuyanda kuleya. (Gal. 6:1) Nokuba boobo, katanabandika amuntu ooyo, mwaalu weelede kusaanguna kuyeeya zintu zimwi mwaapostolo Paulo nzyaakaamba kujatikizya luyando. Wakati, “Luyando lulakkazika moyo alimwi lulaaluzyalo. . . . Lulajatila zintu zyoonse, lulasyoma zintu zyoonse, lulalangila zintu zyoonse, lulaliyumya muzintu zyoonse.” (Amubale 1 Bakorinto 13:4, 7.) Kuzinzibala kuyeeya tupango twamu Bbaibbele ootu kuyoomugwasya mwaalu kulanga-langa twaambo itumupa kupa lulayo alimwi ambwakonzya kulupa munzila iiluzi. Ikuti sikupegwa lulayo wabona kuti mwaalu ulamubikkila maano, ulalangilwa kulutambula.—Rom. 12:10.

6. Ncikozyanyo nzi cibotu ncaakatondezya mwaapostolo Paulo?

⁶ Mwaapostolo Paulo wakapa cikozyanyo cibotu kali mwaalu. Mucikozyanyo, ciindi bakwesu baku Tesalonika nobakali kuyandika lulayo, Paulo kunyina naakawayawaya kubapa. Nokuba boobo, mulugwalo ndwaakabalembela, wakasaanguna kubalumba akaambo kamulimo wabo walusyomo, kubeleka kwabo kwaluyando alimwi akuliyumya kwabo. Kuyungizya waawo, wakalibuzyi bukkale bwabo, wakabaambila kuti wakalizyi kuti buumi bwabo tabuli buuba-uba alimwi akuti bakali kuliyumya kukupenzyegwa. (1Tes. 1:3; 2Tes. 1:4) Mane buya wakabaambila bakwesu aaba kuti bakali cikozyanyo cibotu ku Banakristo bamwi. (1Tes. 1:8, 9) Eelo kaka bakakulwaizyigwa kapati amajwi aa Paulo aakubalumbaizya! Tacidoonekwi buya kuti Paulo wakali kubayanda kapati bakwesu aaba. Nkakaambo kaako wakacikonzya kupa lulayo lugwasya mumagwalo ngaakabalembela.—1Tes. 4:1, 3-5, 11; 2Tes. 3:11, 12.

7. Ncinzi cikonzya kupa kuti umwi alukake lulayo?

⁷ Ncinzi cikonzya kucitika ikuti tiitwapa lulayo munzila iiluzi? Mwaalu iwabeleka kwaciindi cilamfwu wakaamba kuti, “Bamwi balalukaka lulayo ikutali akaambo kakuti lulilubide, pele akaambo kakuti tiilwapegwa munzila yaluyando.” Ncinzi ncotwiiya kuli ceeci? Ncuuba-uba kulutambula lulayo ikuti lwapegwa caluyando ikutali akaambo kakunyema.

8. Mibuzyo nzi njayeelede kulibuzya mwaalu ciindi nalanga-langa naa uleelede kupa muntu umwi lulayo?

⁸ Baalu tabeelede kufwambaana kupa lulayo. Katanapa lulayo, mwaalu weelede kulibuzya kuti: ‘Sena mubwini kuli ncondeelede kwaamba? Sena ndili masimpe kuti ncacita  muntu ooyu cililubide? Sena kuli mulawo wamu Bbaibbele ngwaatyola? Naa nkwiindana buyo kwambotuzibona zintu?’ Baalu ‘tabaingani mukwaambaula.’ (Tus. 29:20) Ikuti mwaalu katasinizyide naa uleelede kupa muntu umwi lulayo, weelede kubonana amwaalu umbi, kutegwa babandike naa kuli lulayo lwamu Magwalo ndwayelede kupegwa muntu ooyo.—2Tim. 3:16, 17.

9. Ncinzi ncotwiiya kuli Paulo kujatikizya kupa lulayo mumakani aansamino alimwi akulibamba? (1 Timoteyo 2:9, 10)

⁹ Amubone cikozyanyo eeci. Mbuti kuti mwaalu kalibilika kujatikizya nsamino alimwi akulibamba kwamusyominyina? Mwaalu weelede kulibuzya kuti, ‘Sena kuli kaambo kamu Magwalo ikeelede kundipa kuti ndaambe cintu cimwi?’ Mbwaanga mwaalu tayandi kwaamba buyo nzyayeeya, ulakonzya kulomba mwaalu naa sikumwaya umwi uusimide kutegwa amugwasye. Antoomwe balakonzya kulanga-langa lulayo lwa Paulo lujatikizya nsamino alimwi akulibamba. (Amubale 1 Timoteyo 2:9, 10.) Paulo wakaamba njiisyo zikonzya kubeleka mubukkale busiyene-siyene, ikutondezya kuti Munakristo weelede kusama kabotu alimwi cabulemu. Paulo kunyina naakalemba mulongo wazintu nzyayelede kucita muntu naa nzyateelede. Wakalizyi kuti Banakristo balakonzya kusama munzila iili yoonse njobayanda kufwumbwa buyo kuti kaitatyoli milawo yamu Bbaibbele. Aboobo nobalanga-langa naa lulayo lulayandika, baalu beelede kubona naa muntu nzyasala kusama zilatondezya bulemu akulibombya.

10. Ncinzi cikonzya kutugwasya kukulemeka kusala kwabamwi?

¹⁰ Tweelede kuyeeya kuti Banakristo bobilo basimide balakonzya kusala munzila ziindene, pele zyoonse zyobilo inga kaziluzi. Tatweelede kusungilizya bakwesu abacizyi kucita zintu swebo nzyotubona kuti nzeziluzi.—Rom. 14:10.

11-12. Ikuti lulayo kaluyandika, mibuzyo nzi njayeelede kulibuzya mwaalu alimwi nkaambo nzi?

¹¹ Kuti calibonya kuti lulayo lulayandika, mubuzyo uutobela ngwakuti, Ino mbaani ibeelede kulupa? Katanapa lulayo kumucizyi uukwetwe naa kumwana, mwaalu weelede kubandika asilutwe wamukwasyi walo ambweni inga wasala kuti aalanganye makani aaya. * Naa silutwe wamukwasyi ulakonzya kusala kuti kaliko ciindi mwaalu napa lulayo. Alimwi mbubwenya mbokwaambwa  mumuncali 3, zimwi ziindi inga cabota kuti mucizyi mupati wamupa lulayo mucizyi uucili mwana.

¹² Kuli kaambo akambi mwaalu nkayelede kuyeeya. Mwaalu ulakonzya kulibuzya kuti, ‘Sena ndime ndeelede kupa lulayo naa  inga cabota kuti lwapegwa amuntu uumbi?’ Mucikozyanyo, muntu uujisi penzi lyakulimvwa kubula mpindu cilakonzya kumuubila-ubila kutambula lulayo kumwaalu iwakajisi penzi likozyenye alyakwe. Mwaalu iwakali mubukkale oobu ulakonzya kumumvwisya kapati muntu ooyo alimwi akwaamba zintu izikonzya kumusika amoyo. Nokuba boobo, baalu boonse balijisi mukuli wakayumya alimwi akukulwaizya bakwesu abacizyi kucinca bukkale bwabo kweelana ancaamba Magwalo. Aboobo ikuti lulayo kaluyandika, luleelede kupegwa nokuba kuti mwaalu uupa lulayo oolo tanaakali mubukkale bukonzyenye abwamuntu ooyo.

13-14. Nkaambo nzi ncociyandika kapati kumwaalu kuswiilila?

¹³ Amube bantu baswiilila. Ciindi mwaalu nalibambila kupa lulayo, weelede kulibuzya kuti: ‘Makani nzi ngondizyi kujatikizya bukkale bwamukwesu? Nzintu nzi izimucitikila mubuumi? Sena kuli buyumuyumu mbwajisi mbonditazyi? Ndugwasyo nzi ndwayandika kapati calino?’

¹⁴ Njiisyo iili kulugwalo lwa Jakobo 1:19 ilagwasya kapati kuli baabo ibapa lulayo. Jakobo wakalemba kuti: “Muntu woonse weelede kufwambaana kuswiilila, kumuka kwaambaula, kumuka kukalala.” Mwaalu ulakonzya kuyeeya kuti ulituzyi twaambo toonse tujatikizyidwe, pele sena masimpe aayo? Tusimpi 18:13 ituyeezya kuti: “Ikuti muntu wavwiila katanaamvwisya kabotu makani, mbufwubafwuba alimwi nkulijazya nsoni.” Inga cabota kumubuzya muntu cacigaminina kutegwa apandulule bukkale bwakwe. Aboobo mwaalu weelede kuswiilila katanaambaula. Kamuyeeya ciiyo ncaakaiya mwaalu iwaambwa kumatalikilo aacibalo eeci. Wakaiya kuti muciindi cakusaanguna kwaamba makani ngaakalibambilide wakeelede kusaanguna kubuzya mucizyi mibuzyo mbuli yakuti: “Ino zyali kumweendela buti zintu mubuumi?” “Ino inga ndamugwasya buti?” Ikuti baalu kababikkila maano kubukkale bwabakwesu abacizyi balakonzya kubagwasya alimwi akubakulwaizya.

15. Mbuti baalu mbobakonzya kubelesya lulayo luli ku Tusimpi 27:23?

¹⁵ Amuzizyibe mbelele. Kweelana ambokwaambwa kumatalikilo, kupa lulayo lugwasya kubikkilizya zinji kunze buyo lyakubala magwalo naa kupa muzeezo. Bakwesu abacizyi beelede kuzyiba kuti tulababikkila maano, tulabamvwisya alimwi akuti tulayanda kubagwasya. (Amubale Tusimpi 27:23.) Baalu beelede kubeleka canguzu kutegwa babe azilongwe ziyumu abakwesu abacizyi.

16. Ncinzi ciyoobagwasya baalu kupa lulayo lugwasya?

¹⁶ Baalu tabeelede kupa bakwesu abacizyi kuyeeya kuti lilikke buyo nobabandika ambabo ndileelyo nobayanda kubapa lulayo. Muciindi caboobo, beelede kubandika ambabo lyoonse, kutondezya kuti balababikkila maano ciindi nobajisi buyumuyumu.  Mwaalu umwi iwabeleka kwaciindi cilamfwu wakaamba kuti, “Ikuti mwacita oobo, muyooba acilongwe cibotu ambabo. Mpoonya kwaakuyandika kupa lulayo, ciyoomubila kucita boobo.” Mpoonya awalo sikupegwa lulayo ciyoomubila kulutambula.

17. Ndilili mwaalu nayelede kukkazyika moyo alimwi akuba aluzyalo?

¹⁷ Amukkazyike moyo akuba aluzyalo. Kukkazyika moyo akuba aluzyalo kulayandika kapati, kwaambisya ciindi muntu kumatalikilo natayandi kutobela lulayo lwamu Bbaibbele. Mwaalu tayelede kunyema ikuti mukwesu naa mucizyi iwapegwa lulayo tanaalutambula naa kulubesya mpoonya-mpoonya. Kujatikizya Jesu, Bbaibbele lyaamba kuti: “Takatyoli tete lipwayikide, alimwi takakazimi katambo kalambe kasuka busi.” (Mt. 12:20) Aboobo mumipailo yakwe, mwaalu weelede kumulomba Jehova kuti amugwasye sikupegwa lulayo ikumvwisya kaambo ncaapedwa lulayo alimwi ancayelede kulubelesya. Sikupegwa lulayo uyandika ciindi kutegwa ayeeye nzyaambilwa. Ikuti mwaalu kakkazyika moyo akwaambaula caluzyalo, ciyoomubila sikupegwa lulayo kulutambula. Nokuba boobo lulayo lyoonse lweelede kuzwa mu Jwi lya Leza.

18. (a) Ciindi notupa lulayo, ncinzi ncotweelede kuyeeya? (b) Kweelana ambotwabona mucifwanikiso icili mukabbokesi, ncinzi bazyali ncobabandika?

¹⁸ Amwiiye kukulubizya kwanu. Akaambo kakuti tatulondokede, tatukonzyi kwiitobela cakulondoka mizeezo iyaambwa mucibalo eeci. (Jak. 3:2) Tunoolubizya, pele ikuti eeco cacitika, tweelede kwiiya kukulubizya ooko. Ikuti bakwesu abacizyi bazyiba kuti tulabayanda, ciyoobaubila kutulekelela ciindi notwabalubizyila muzintu nzyotwaamba akucita.—Amubone akabbokesi kakuti “ Majwi Kubazyali.”

19. Mbuti mbotukonzya kupa moyo wabakwesu abacizyi kukondwa?

¹⁹ Mbubonya mbotwabona, tacili cuuba-uba kupa lulayo lugwasya. Tatulondokede alimwi abaabo ibatupa lulayo tabalondokede. Amuyeeye  njiisyo nzyotwabandika mucibalo eeci. Amubone kuti lulayo lwapegwa amakanze mabotu. Alimwi amusinizye kuti lulayo lulayandika ncobeni alimwi akuti ndinywe mweelela kulupa. Kamutanapa lulayo, amubuzye mibuzyo akuswiilila kabotu-kabotu kutegwa mubuzyibe bukkale bwamuntu. Amusole kubona zintu mbuli mbwazibona. Amube alubomba alimwi acilongwe ciyumu abakwesu abacizyi. Kamuyeeya makanze eesu: Tuyanda kuti lulayo lwesu kalugwasya alimwi akupa ‘moyo kukondwa.’—Tus. 27:9.