1. Ino Davida wakalijana mubukkale nzi bukatazya?

DAVIDA wakali kutija kujaigwa. Saulo, mwami singuzu wa Israyeli, wakakanzide kumujaya. Ciindi Davida naakali kuyanda cakulya, wakaunka ku Nobi, akulomba buyo zinkwa zyosanwe. (1Sam. 21:1, 3) Mpoonya walo abaalumi bakwe bakaakuyuba mumpangala. (1Sam. 22:1) Mbuti Davida mbwaakalijana mubukkale oobu?

2. Mbuti Saulo mbwaakali kulibikka muntenda? (1 Samuele 23:16, 17)

² Saulo wakali kumufwida munyono kapati Davida akaambo kakuti bantu banji bakali kumuyanda Davida alimwi akumutembaula akaambo kakuzunda munkondo zinji. Kuyungizya waawo, Saulo wakalizyi kuti kutamvwida kwakwe nkokwakapa kuti Jehova amukake kuba mwami wa Israyeli akuti Jehova wakasala Davida kuba mwami. (Amubale 1 Samuele 23:16, 17.) Pele mbwaanga wakacili mwami wa Israyeli, Saulo wakajisi nkamu mpati yabasikalumamba abasikumugwasyilizya banji, aboobo Davida wakeelede kutija kutegwa atajaigwi. Sena Saulo wakali kuyeeya kuti wakali kukonzya kunyonganya makanze aa Leza kujatikizya Davida? (Is. 55:11) Bbaibbele talyaambi pe, pele tulakonzya kuba masimpe kujatikizya kaambo aaka: Saulo wakali kulibikka muntenda. Aabo balwana Leza lyoonse tabazwidilili.

3. Ino Davida wakali kulimvwa buti nokuba kuti wakali mubukkale bukatazya?

³ Davida wakali muntu uulicesya. Tanaakalisalila kuba mwami wa Israyeli. Jehova ngonguwe wakamusala kuba mwami. (1Sam. 16:1, 12, 13) Saulo wakamusulaika kapati Davida. Pele Davida kunyina naakapa Jehova mulandu akaambo kabukkale  bukatazya mwaakabede; kunyina naakatongooka akaambo kakubula cakulya cinji alimwi akuti wakeelede kuyuba mumpangala. Muciindi caboobo, kweelede kuti ciindi naakayubide mumpangala eeyo, ndendilyo naakalemba lwiimbo lubotu lwantembauzyo ilubikkilizya majwi aali mulugwalo aayeeme mutwe wacibalo aaya aakuti: “Aabo bayandaula Jehova tabakabuli cintu cibotu niciba comwe.”—Int. 34:10.

4. Ino mibuzyo nzi njotutiingule, alimwi nkaambo nzi ncoiyandika kapati?

⁴ Mazuba aano babelesi ba Jehova banji tabajisi cakulya cinji naa zintu zimwi nzyobayandika mubuumi. * Eeci cabacitikila babelesi ba Jehova banji, ikapati muciindi cabulwazi bujaya bwa COVID-19. Alimwi zintu ziyakwiindila kukatazya mbotuyaabuswena ‘kumapenzi mapati.’ (Mt. 24:21) Katutuyeeyede twaambo ootu, atwiingule mibuzyo eeyi yone: Munzila nzi Davida ‘mwaatakabula cintu cibotu niciba comwe’? Nkaambo nzi ncotweelede kwiiya kukkutila? Nkaambo nzi ncotukonzya kusyoma kuti Jehova uyootulanganya? Alimwi mbuti mbotukonzya kulibambila lino zintu zilangilwa kumbele?

5-6. Mbuti Intembauzyo 23:1-6 mboitugwasya kumvwisya ncaakali kupandulula Davida naakaamba kuti babelesi ba Leza “tabakabuli cintu cibotu niciba comwe”?

⁵ Ncinzi Davida ncaakali kupandulula naakaamba kuti babelesi ba Jehova “tabakabuli cintu cibotu niciba comwe”? Ciindi Davida naakalemba Intembauzyo 23, wakabelesya majwi aakozyenye ayaaya. Aboobo ntembauzyo eeyo ilakonzya kutugwasya kumvwisya ncaakali kupandulula. (Amubale Intembauzyo 23:1-6.) Davida wakatalika ntembauzyo eeyo amajwi aakuti: “Jehova Mweembezi wangu. Kunyina ncondiyoobula pe.” Mpoonya mutupango tutobela, Davida wakaamba zintu ziyandika kapati, mbuli zilongezyo zinji zyakumuuya nzyaakajana kwiinda mukuzumina Jehova kuba Mweembezi wakwe. Jehova wakali kumusololela “munzila zyabululami” alimwi cakusyomeka  wakamugwasyilizya kapati Davida muziindi zibotu azyamapenzi. Davida wakazumina kuti buumi bwakwe “mumacelelo aamweemvwe” aa Jehova bwakali kuyooba amapenzi. Zimwi ziindi, wakali kutyompwa mbuli kuti weenda “mukkuti lisiya mbi,” alimwi wakali kuyooba abasinkondonyina. Pele mbwaanga Jehova wakali mweembezi wakwe, Davida ‘kunyina cintu cibi ncaakali kuyooyoowa.’

⁶ Aboobo aawa twabujana bwiinguzi kumubuzyo wesu wakuti: Munzila nzi Davida ‘mwaatakabula cintu cibotu niciba comwe’? Munzila yakumuuya, wakalijisi zyoonse nzyaakali kuyandika. Lukkomano lwakwe tiilwakayeeme azintu zyakumubili. Davida wakakkutila azintu Jehova nzyaakamupede. Zintu izyakali kuyandika kapati kulinguwe nzilongezyo alimwi alukwabililo lwa Leza.

7. Kweelana alugwalo lwa Luka 21:20-24, mapenzi nzi ngobakajana Banakristo bamwi bamumwaanda wamyaka wakusaanguna ibakali kukkala mu Judaya?

⁷ Kumajwi aa Davida tulakonzya kubona mbociyandika kapati kulindiswe kuzilanga munzila iili kabotu zintu zyakumubili. Masimpe tulakonzya kukkomana azintu zyakumubili zili zyoonse nzyotujisi, pele tatweelede kuzibona kuba zintu ziyandika kapati mubuumi bwesu. Aaka nkakasimpe kayandika kapati nkobakeelede kumvwisya Banakristo bamumwaanda wamyaka wakusaanguna ibakali kukkala mu Judaya. (Amubale Luka 21:20-24.) Jesu wakali bacenjezyede kuti cakali kuyoosika ciindi munzi wa Jerusalemu nowakali ‘kuyoozingulukwa ampi.’ Nocakali kuyoocitika eeco, bakeelede ‘kutalika kutijila kumalundu.’ Kutija kwakali kuyoosololela kulufwutuko lwabo, pele kwakali kuyoobapa kusweekelwa zintu zinji kapati. Myaka minji yainda, Ngazi Yamulindizi yakaamba kuti: “Bakasiya myuunda amaanda, kakunyinaa kuyobolola mpasya zyabo mumaanda aabo. Kabasyomede kuti Jehova ulabakwabilila akubagwasilizya, ikukomba nguwe cakaba cintu cipati kapati kwiinda zimwi zyoonse zyakali kunga zyalibonya kuti zilayandika.”

8. Nciiyo nzi cipa kukkala ansi kuyeeya ncotukonzya kwiiya kuli ceeco cakacitikila Banakristo bamumwaanda wamyaka wakusaanguna ibakali kukkala mu Judaya?

⁸ Nciiyo nzi cipa kukkala ansi kuyeeya ncotukonzya kwiiya kuli ceeco cakacitikila Banakristo bamumwaanda wamyaka wakusaanguna ibakali kukkala mu Judaya? Ngazi Yamulindizi iyazubululwa yakati: “Kulakonzya kuba masunko kujatikizya mbotuzilanga zintu zyakumubili; sena tuzibona kuti nzintu iziyandika kapati kwiinda zyoonse, naa sena ilufwutuko luyoosikila baabo bali kulubazu lwa Leza ncecintu ciinda kukomena kulindiswe? Inzya, ikuloboka kwesu kulakonzya kujatikizya makataazyo amwi akuliimya. Tweelede kuti katulibambilide kucita kufwumbwa ciyandika, mbubwena beenzuma bamumwaanda wakusaanguna mbobakacita aabo ibakatija kuzwa mu Judaya.” *

9. Mbuti lulayo lwamwaapostolo Paulo kubana Hebrayo mbolumukulwaizya?

⁹ Sena inga mweezyeezya mbocakali kukatazya ku Banakristo aabo kusiya zintu zinji nzyobakajisi akuyootalika buumi bupya kubusena bumbi? Bakali kuyandika lusyomo kutegwa basinizye kuti Jehova wakali kuyoobapa nzyobakali kuyandika. Pele kuli cintu cimwi icakali kuyoobagwasya. Kakucili myaka yosanwe bana Roma kabatanazinguluka Jerusalemu, mwaapostolo Paulo wakapa bana Hebrayo lulayo oolu luyandika lwakuti: “Ibukkale bwanu butabi bwakuyandisya mali pe, pele amukkutile azintu nzyomujisi lino. Nkaambo wakaamba kuti: ‘Ziyume zitete, tandikakusiyi pe alimwi tandikakulekelezyi pe.’ Aboobo tulakonzya kuba basicamba akwaamba kuti: ‘Jehova ngomugwasyi wangu; tandikooyoowa pe.  Ino muntu inga wandityani?’” (Heb. 13:5, 6) Cakutadooneka, aabo ibakalutobela lulayo lwa Paulo bana Roma kabatanasaala, cakabaubila-ubila kukkutila azintu zisyoonto nzyobakajisi mubusena bwabo bupya. Bakali masimpe kuti Jehova uyoobalanganya muzintu nzyobakali kuyandika. Majwi aa Paulo atusyomezya kuti andiswe tulakonzya kuba alusyomo luli boobu.

10. Ino ncinzi ncaakaiya Paulo?

¹⁰ Paulo wakapa lulayo lukozyenye kuli Timoteyo, alimwi buya akulindiswe. Wakalemba kuti: “Aboobo twanoojisi cakulya azisani, tunookkutila azintu eezyi.” (1Tim. 6:8) Sena eeci caamba kuti zimwi ziindi tatukonzyi kukkomana kulya cakulya cibotu, kuba aŋanda mbotu naa kuula zyakusama zipya? Paulo taambi boobo pe. Waamba kuti tweelede kukkutila azintu zyakumubili zili zyoonse nzyotujisi. (Flp. 4:12) Eeco ncaakaiya Paulo kuti cilakonzya ‘kumugwasya.’ Cintu ciyandika kapati ncotujisi ncilongwe cesu a Leza, ikutali cintu cili coonse cakumubili ncotujisi.—Hab. 3:17, 18.

11. Nciiyo nzi cijatikizya kukkutila ncotwiiya kumajwi aa Musa kubana Israyeli?

¹¹ Inga kakuli kwiindana akati kambotuzibona zintu alimwi a Jehova mbwazibona eezyo nzyotuyandika. Amubone Musa ncaakaambila bana Israyeli nobakakkala myaka iili 40 munkanda: “Jehova Leza wanu wamulongezya mumilimo yanu yoonse. Ulikuzyi kabotu kweenda nkomweenda munkanda eeyi iitalikomeneni. Jehova Leza wanu walaandinywe mumyaka yoonse eeyi iili 40 alimwi tiimwabula cintu  cili coonse pe.” (Dt. 2:7) Mumyaka eeyo iili 40, Jehova wakapa bana Israyeli cakulya, nkokuti mana. Zisani zyabo nzyoonya nzyobakajisi nobakazwa mu Egepita, tiizyakazakala. (Dt. 8:3, 4) Nokuba kuti ambweni bamwi zintu eezyi bakazibona kuti tiizyakali zinji, Musa wakabayeezya bana Israyeli kuti bakalijisi zyoonse nzyobakali kuyandika. Jehova ulakkomana notwiiya kukkutila akulumba kuzintu nzyatupa noziceya buti alimwi anotuzibona kuti nzilongezyo kuzwa kulinguwe.

12. Ncinzi citondezya kuti Davida wakali kusyoma Jehova, ikutali kulisyoma mwini?

¹² Davida wakalizyi kuti Jehova ulasyomeka alimwi ulababikkila maano kapati aabo ibamuyanda. Nokuba kuti buumi bwakwe bwakali muntenda ciindi naakalemba Intembauzyo 34, kajisi meso aakumuuya Davida wakabona “mungelo wa Jehova” ‘kamukwabilide kumabazu oonse.’ (Int. 34:7) Ambweni Davida wakali kukozyanisya mungelo wa Jehova kuli sikalumamba uuli musyokwe, uupakamene lyoonse kuli basinkondonyina. Nokuba kuti walo kumugama wakali mwaalumi singuzu munkondo alimwi Jehova wakamusyomezyede bwami, Davida tanaakasyoma nguzu zyakwe zyakucikonzya kubelesya nkwisyo naa panga kuzunda sinkondonyina. (1Sam. 16:13; 24:12) Davida wakali kusyoma Leza, kasinizyide kuti mungelo wa Jehova ‘ulabavwuna aabo bamuyoowa Leza.’ Masimpe ngakuti, mazuba aano tatulangili kukwabililwa munzila yamaleele. Pele tulizyi kuti boonse ibamusyoma Jehova bayoopegwa buumi butamani nokuba kuti bafwa lino.

13. Ciindi Gogo waku Magogo aakutulwana, nkaambo nzi ncotuyoolibonya mbuli kuti tatukwabilidwe, pele nkaambo nzi ikayootupa kuba alusyomo? (Amubone cifwanikiso icili aacivwumbyo.)

¹³ Lino-lino buyo, lusyomo lwesu munguzu zya Jehova zyakutukwabilila luyoosunkwa. Ciindi Gogo waku Magogo, nkokuti nkamu yazisi, aakulwana bantu ba Leza, tuyoolibonya kuba muntenda. Tuyooyandika kuba alusyomo lwakuti Jehova ulakonzya kutuvwuna alimwi uyoocita oobo. Kumasi, tuyoolibonya mbuli mbelele zitajisi wakuzikwabilila. (Ezk. 38:10-12) Tatunoojisi zilwanyo alimwi aluzyibo lwakulwana nkondo. Masi ayootubona kuti tatukatazyi kuzunda. Taakaziboni nzyotubona ameso eesu aakumuuya, nkokuti bangelo ibazingulikide bantu ba Leza alimwi ibalibambilide kutukwabilila. Mbuti masi mbwaakonzya kubabona bangelo? Taakonzyi, kayi taajisi meso aakumuuya. Eelo kaka ayoogambwa citaambiki ciindi basikalumamba bakujulu baakutulwanina nkondo!—Ciy. 19:11, 14, 15.

14. Nintaamu nzi nzyotukonzya kubweza lino kulibambila zyakumbele?

¹⁴ Ncinzi ncotukonzya kucita lino kulibambila zyakumbele? Cakusaanguna, tweelede kuzilanga munzila yeelede zintu zyakumubili, katuyeeyede kuti bumwi buzuba tuyoozisiya zintu eezyi. Alimwi tuyandika kukkutila akuba alukkomano kapati mucilongwe cesu a Jehova. Ikuti twamuzyiba kabotu Leza, tunoojisi lusyomo luyumu kapati munguzu zyakwe zyakutukwabilila ciindi Gogo waku Magogo aakutulwana.

15. Nzintu nzi zyakamucitikila Davida naakacili mukubusi izyakamuyiisya kuti Jehova kunyina naakali kuyoomulekelezya?

¹⁵ Amubone acimbi cakagwasya Davida alimwi cikonzya kutugwasya andiswe kulibambila masunko. Davida wakati: “Amulabile mubone kuti Jehova mubotu; ulikkomene muntu uuyubila mulinguwe.” (Int. 34:8) Majwi aaya atondezya kaambo Davida ncaakali kukonzya kusyoma kuti Jehova uyoomugwasya. Kanji-kanji  Davida wakali kusyoma Jehova, alimwi Leza wakwe kunyina naakamulekelezya. Ciindi naakali mukubusi, Davida wakaunka kuli singuzu muna Filisiti Goliati akumwaambila sikalumamba ooyu uuyoosya kuti: “Sunu Jehova ulakwaaba mumaanza aangu.” (1Sam. 17:46) Kumbele, Davida wakali kubelekela mwami Saulo, ooyo iwakasoleka ziindi zinji kuti amujaye. Pele “Jehova wakali” aa Davida. (1Sam. 18:12) Mbwaanga Davida wakagwasyigwa a Jehova musyule, wakalizyi kuti Jehova wakali kuyoomugwasya mumapenzi ngaakajisi aciindi eeco.

16. Ino muunzila nzi motukonzya ‘kulabila’ bubotu bwa Jehova?

¹⁶ Ikuti katubusyoma kapati busolozi bwa Jehova lino, tunoojisi lusyomo luyumu munguzu zyakwe zyakutukwabilila kumbele. Kuyandika kulyaaba akusyoma Jehova kutegwa tubalombe basikutulemba mulimo kutupa ciindi cakujanika kumuswaangano wabbazu, wacooko naa kubalomba kuti batucince mbotubeleka mulimo wesu kutegwa katucikonzya kujanika kumiswaangano yoonse alimwi akuba aciindi cinji cakutola lubazu mumulimo wamumuunda. Amweezyeezye kuti basikutulemba mulimo tiibakuzumina kulomba kwesu aboobo twasweekelwa mulimo. Sena tulijisi lusyomo lwakuti Jehova takatusiyi naa kutulekelezya alimwi akuti lyoonse unootupa nzyotuyandika? (Heb. 13:5) Banji ibali mumulimo waciindi coonse balakonzya kwaamba zyakuluula izitondezya mbwaakabagwasya Jehova ciindi nobakali mumapenzi. Jehova ulasyomeka.

17. Ino lugwalo lwamwaka wa 2022 ndugwalo nzi, alimwi nkaambo nzi ncolweelela?

¹⁷ Mbwaanga Jehova uli kulubazu lwesu, tatweelede kuyoowa ziboola kumbele naaceya. Leza wesu kunyina nayootulekelezya kufwumbwa buyo kuti twabikka nzyayanda mubusena bwakusaanguna mubuumi bwesu. Kutegwa batuyeezye mbociyandika kulibambila lino zintu zikatazya ziboola kumbele alimwi akusyoma kuti Jehova takatulekelezyi, bamu Kabunga Keendelezya basala Intembauzyo 34:10 kuba lugwalo lwesu lwamwaka wa 2022: “Aabo bayandaula Jehova tabakabuli cintu cibotu niciba comwe.”