CIBALO CAKWIIYA 4
Icitupa Kujanika ku Ciibalusyo
“Kamucita oobu lyoonse kutegwa kamundiyeeya.”—LK. 22:19.
LWIIMBO 20 Wakaaba Mwanaako Simuzyalwaalikke
IZILI MUCIBALO *
1-2. (a) Ndilili notumuyeeya kapati muyandwa wesu iwakafwa? (b) Ncinzi Jesu ncaakatalisya busiku katanafwa?
TACIKWE makani naa kwainda ciindi cilamfwu buti kuzwa bayandwa besu nobakafwa, inga tucibayeeya. Kanji-kanji bwasika buzuba mbobakafwa tulabayeeya.
2 Mwaka amwaka, inga tuli akati kamamiliyoni aabantu nyika yoonse ibabungana kuyeeya lufwu lwamuntu ngotuyanda kapati, nkokuti Jesu Kristo. (1Pet. 1:8) Tulabungana kuyeeya yooyo iwakaaba buumi bwakwe kacili cinunuzyo kutegwa atufwutule kucibi alimwi alufwu. (Mt. 20:28) Alimwi buya, Jesu wakali kuyanda kuti basikumutobela kabaluyeeya lufwu lwakwe. Busiku katanafwa, wakatalisya mulalilo uulibedelede akulailila kuti: “Kamucita oobu lyoonse kutegwa kamundiyeeya.”—Lk. 22:19.
3. Ncinzi ncotutiilange-lange mucibalo eeci?
3 Mweelwe musyoonto wabaabo ibajanika ku Ciibalusyo calufwu lwa Kristo mbabajisi bulangizi bwakujulu. Pele mamiliyoni aabaabo ibajisi bulangizi bwakupona anyika abalo balajanika. Mucibalo eeci, tulalanga-langa twaambo tupa nkamu eezyi zyobilo kukkomana kujanika ku Ciibalusyo mwaka amwaka. Alimwi tulabona mbotugwasyigwa kwiinda mukujanika. Lino atusaangune kulanga-langa twaambo bananike ncobajanikila ku Ciibalusyo.
CIBAPA KUJANIKA KU CIIBALUSYO BANANIKE
4. Nkaambo nzi bananike ncobalya cinkwa akunywa waini lya Ciibalusyo?
4 Mwaka amwaka, bananike ibajanika ku Ciibalusyo balalya cinkwa akunywa waini. Nkaambo nzi ncobalya cinkwa akunywa waini? Kutegwa twiingule mubuzyo ooyu, atubone icakacitika mubusiku bwamamanino aabuumi bwa Jesu bwaanyika. Nolyakainda Pobwe Lyakwiindilila, Jesu wakatalisya ceeco ciitwa kuti Mulalilo wa Mwami. Wakainzya cinkwa alimwi awaini kubaapostolo bakwe basyomeka ibali 11 akubaambila kuti balye akunywa. Jesu wakabandika ambabo kujatikizya zizuminano zyobilo, nkokuti cizuminano cipya alimwi acizuminano ca Bwami. * (Lk. 22:19, 20, 28-30) Zizuminano zyobilo eezyi zyakajalula nzila kubaapostolo aabo alimwi akuli bamwi basyoonto kuti bakabe bami abapaizi kujulu. (Ciy. 5:10; 14:1) Balikke bananike basyeede, * ibali muzizuminano eezyi zyobilo, mbobakonzya kulya cinkwa akunywa waini lya Ciibalusyo.
5. Ncinzi ncobazyi bananike kujatikizya bulangizi mbobakapegwa?
5 Nkaaka kaambo kambi bananike ncobakkomana kujanika ku Ciibalusyo: bubambe oobu bubapa coolwe cakuzinzibala kuyeeya bulangizi bwabo. Jehova wakabapa bulangizi bubotu kapati, nkokuti kuyooba abuumi butaboli alimwi butafwi kujulu, kubeleka antoomwe a Jesu Kristo iwakalemekwa alimwi abamwi ibali 144,000, kwiinda zyoonse, kuyooba antoomwe a Jehova Leza! (1Kor. 15:51-53; 1Joh. 3:2) Bananike balizyi kuti bakatambwa kuyooba azyoolwe eezyi kujulu. Pele kutegwa bakaunke kujulu, beelede kuzumanana kusyomeka kusikila kulufwu. (2Tim. 4:7, 8) Cilabakkomanisya kapati bananike kuyeeya bulangizi bwabo bwakujulu. (Tit. 2:13) Mbuti kujatikizya ‘bambelele zimbi’? (Joh. 10:16) Nkaambo nzi ncobajanika ku Ciibalusyo?
CIBAPA KUJANIKA KU CIIBALUSYO BAMBELELE ZIMBI
6. Nkaambo nzi bambelele zimbi ncobajanika ku Ciibalusyo mwaka amwaka?
6 Bambelele zimbi balajanika ku Ciibalusyo, pele tabalyi cinkwa naa kunywa waini, balangilila buyo. Mu 1938, aabo bajisi bulangizi bwakuyoopona anyika bakatambwa kujanika ku Ciibalusyo ciindi cakusaanguna. Ngazi Yamulindizi yamu March 1, 1938, yakati: “Cilayandika kapati alimwi akweelela kuti [bambelele zimbi] kabajanika kumuswaangano ooyu akulangilila cicitika. . . . Alimwi ceelede kuba ciindi cikkomanisya akulimbabo.” Mbubwenya basikutambwa mbobakkomana kweebelela zicitika kumucado, abalo bambelele zimbi balakkomana kujanika ku Ciibalusyo kabali basikulangilila.
7. Nkaambo nzi bambelele zimbi ncobaba abulangizi bwakuswiilila makani aa Ciibalusyo?
7 Bambelele zimbi abalo balazinzibala kuyeeya bulangizi bwabo. Balaba abulangizi bwakuswiilila makani aa Ciibalusyo, mbwaanga cibeela cipati camakani aaya caamba Kristo abaabo mbayoolela limwi ibali 144,000, kujatikizya ncobayoobacitila bantu basyomeka lya Bulelo bwa Myaka Iili 1,000. Ansi aabweendelezi bwa Mwami wabo Jesu Kristo, aabo bayoolela kujulu bayoogwasyilizya kucinca nyika kuba paradaiso alimwi akugwasya bantu bamvwida kuti bakalondoke. Eelo kaka cilakkomanisya kumamiliyoni aabaabo basikulangilila lya Ciibalusyo kweezyeezya kuzuzikizyigwa kwabusinsimi bwamu Bbaibbele bwakumbele, mbuli boobo bujanika ku Isaya 35:5, 6; 65:21-23; alimwi aku Ciyubunuzyo 21:3, 4! Kwiinda mukweezyeezya kuti balo alimwi abayandwa babo bali munyika mpya, bayumya bulangizi bwabo bwakumbele alimwi amakanze aabo akutaleka kubelekela Jehova.—Mt. 24:13; Gal. 6:9.
8. Nkaambo nzi kambi ikapa bambelele zimbi kujanika ku Ciibalusyo?
8 Atulange-lange kaambo kambi ikapa bambelele zimbi kujanika ku Ciibalusyo. Bayanda kutondezya luyando alimwi alugwasyo kubananike. Ijwi lya Leza lyakasinsima kuti luyando luyumu lwakali kuyooba akati kabananike alimwi abaabo ibajisi bulangizi bwakuyoopona anyika. Mubuti? Atubandike zikozyanyo zisyoonto buyo.
9. Mbuti businsimi ibuli kuli Zekariya 8:23 mbobutondezya mbobalimvwa bambelele zimbi kujatikizya bananike?
9 Amubale Zekariya 8:23. Businsimi oobu bulapandulula kabotu-kabotu bambelele zimbi mbobalimvwa kujatikizya bakwesu abacizyi bananike. Mabala aakuti “mu Juda” alimwi aakuti “Leza ulaandinywe” aamba nkamu yomwe, nkokuti bananike basyeede. (Rom. 2:28, 29) Mpoonya “bantu bali kkumi bazwa mumyaambo yoonse yamasi” baiminina bambelele zimbi. ‘Balajatisya’ nkokuti cakusyomeka balakakatila kubananike, kubasangana mubukombi busalala. Aboobo mubuzuba bwa Ciibalusyo, bambelele zimbi balatondezya kukakatila kwabo kubananike kwiinda mukubasangana.
10. Ncinzi Jehova ncaacita kuzuzikizya businsimi ibuli kuli Ezekieli 37:15-19, 24, 25?
10 Amubale Ezekieli 37:15-19, 24, 25. Jehova wabuzuzikizya businsimi oobu kwiinda mukupa bananike alimwi abambelele zimbi kubeleka antoomwe calukamantano. Businsimi bwaamba zyatusamu tobilo. Aabo bajisi bulangizi bwakujulu bali mbuli kasamu “ka Juda” (musyobo bami ba Israyeli mobakasalwa), mpoonya aabo bajisi bulangizi bwaanyika bali mbuli kasamu “ka Efraimu.” * Jehova wakali kuyookamantanya nkamu zyobilo eezyi kutegwa zibe “kasamu komwe.” Eeci caamba kuti balabeleka calukamantano kabeendelezyegwa a Mwami wabo omwe, Kristo Jesu. Mwaka amwaka, bananike alimwi abambelele zimbi balajanika ku Ciibalusyo, kabali nkamu yomwe, “tanga lyomwe,” akweendelezyegwa “amweembezi omwe.”—Joh. 10:16.
11. Mbuti “mbelele” zyaambidwe kuli Matayo 25:31-36, 40 mbozigwasyilizya banabokwabo Kristo?
11 Amubale Matayo 25:31-36, 40. “Mbelele” mucikozyanyo eeci ziiminina baluleme muciindi ecino camamanino ibajisi bulangizi bwaanyika, nkokuti bambelele zimbi. Cakusyomeka balabagwasyilizya banabokwabo Kristo bananikidwe amuuya kuzuzikizya mukuli wabo mupati, nkokuti mulimo wanyika yoonse wakukambauka akugwasya bantu kuba basikwiiya.—Mt. 24:14; 28:19, 20.
12-13. Muunzila nzi zimbi bambelele zimbi mobatondezya kuti balabagwasya banabokwabo Kristo?
12 Mwaka amwaka kakucili nsondo zili mbozibede kacitanacitika Ciibalusyo, bambelele zimbi balatondezya kuti balabagwasyilizya banabokwabo Kristo kwiinda mukutola lubazu cabusungu mumulimo uucitwa nyika yoonse wakutamba bantu bajisi luyandisisyo ku Ciibalusyo. (Amubone kabbokesi kakuti “ Sena Mulibambilila Limwi Kujatikizya Ciindi ca Ciibalusyo?”) Alimwi balagwasyilizya mububambe boonse buyandika kutegwa Ciibalusyo cikacitwe mumbungano zyoonse nyika yoonse, nokuba kuti mumbungano zinji kunyina balya cinkwa naa kunywa waini. Bambelele zimbi balakkomana kapati kugwasyilizya banabokwabo Kristo munzila eezyi. Bambelele zimbi balizyi kuti Jesu ubona zintu nzyobacitila banabokwabo bananike mbuli kuti bacitila nguwe kumugama.—Mt. 25:37-40.
13 Ntwaambo nzi tumbi itupa kuti toonse, tacikwe makani abulangizi mbotujisi, katujanika ku Ciibalusyo?
ICITUPA KUJANIKA KU CIIBALUSYO TOONSE
14. Muunzila nzi Jehova alimwi a Jesu mobakatondezya luyando kulindiswe?
14 Tulalumba kuluyando Jehova alimwi a Jesu ndobakatutondezya. Jehova wakalutondezya luyando lwakwe kulindiswe munzila zinji, pele nzila yomwe ilaziinda zyoonse. Leza wesu wakatondezya luyando lwakulyaaba kwiinda mukutuma Mwanaakwe uuyandwa kuzoopenga alimwi akutufwida. (Joh. 3:16) Alimwi tulizyi kuti Jesu awalo wakatondezya luyando lupati kwiinda mukwaaba buumi bwakwe akaambo kandiswe. (Joh. 15:13) Kunyina ncotukonzya kumupa Jehova alimwi a Jesu akaambo kaluyando ndobakatondezya kulindiswe. Pele tulakonzya kutondezya kulumba kwiinda munzila mbotupona buzuba abuzuba. (Kol. 3:15) Aboobo tulajanika ku Ciibalusyo kutegwa katuyeeya luyando Jehova a Jesu ndobakatutondezya alimwi akutondezya luyando lwesu kulimbabo.
15. Nkaambo nzi bananike alimwi abambelele zimbi ncobatondezya kulumba kapati kucipego cacinunuzyo?
15 Tulalumba kapati kucipego cacinunuzyo. (Mt. 20:28) Bananike balacibikkila maano kapati cinunuzyo nkaambo cipa kuti bulangizi bwabo bukonzyeke. Akaambo kalusyomo lwabo mucipaizyo ca Kristo, Jehova ubaamba kuti baliluleme alimwi wakabatambula kuba bana bakwe. (Rom. 5:1; 8:15-17, 23) Abalo bambelele zimbi balalumba kapati akaambo kacinunuzyo. Kwiinda mulusyomo lwabo mubulowa bwa Kristo, balasalala kuli Leza, balakonzya kubeleka mulimo uusetekene, alimwi balijisi bulangizi ‘bwakuzwa mumapenzi mapati.’ (Ciy. 7:13-15) Nzila imwi bananike alimwi abambelele zimbi mobatondezya kuti balalumba kucinunuzyo nkwiinda mukujanika ku Ciibalusyo mwaka amwaka.
16. Nkaambo nzi kambi ikatupa kujanika ku Ciibalusyo?
16 Kaambo kambi ikatupa kujanika ku Ciibalusyo nkakuti, tuyanda kumvwida Jesu. Tacikwe makani abulangizi bwakumbele mbotujisi, umwi aumwi wesu uyanda kutobela mulawo ngwaakapa Jesu busiku mbwaakatalisya Ciibalusyo wakuti: “Kamucita oobu lyoonse kutegwa kamundiyeeya.”—1Kor. 11:23, 24.
MBOTUGWASYIGWA TOONSE KWIINDA MUKUJANIKA KU CIIBALUSYO
17. Mbuti Ciibalusyo mbocitugwasya kuyumya cilongwe cesu a Jehova?
17 Tuyumya cilongwe cesu a Jehova. (Jak. 4:8) Mbubwenya mbotwaiya, Ciibalusyo citupa coolwe cakuyeeya bulangizi mbwaakatupa Jehova alimwi akuzinzibala kuyeeya kujatikizya luyando lupati ndwaakatutondezya. (Jer. 29:11; 1Joh. 4:8-10) Ciindi notuyeeya bulangizi bwesu bwakumbele businizyide aluyando lwa Leza lutamani kulindiswe, tuyumya luyando lwesu kuli Jehova alimwi cilongwe cesu anguwe cilayuma.—Rom. 8:38, 39.
18. Ino kuzinzibala kuyeeya cikozyanyo ca Jesu kutupa kucita nzi?
18 Tulakulwaizyigwa kwiiya cikozyanyo ca Jesu. (1Pet. 2:21) Mumazuba nobuyaabuswena buzuba bwa Ciibalusyo, tweelede kubikkila maano kuzibalo zyamu Bbaibbele zijatikizya nsondo yamamanino ya Jesu anyika, lufwu lwakwe alimwi abubuke. Mpoonya buzuba bwa Ciibalusyo kumazuba, makani aayootuyeezya luyando lwa Jesu kulindiswe. (Ef. 5:2; 1Joh. 3:16) Ciindi notubala kujatikizya cikozyanyo ca Jesu cakulyaaba akuzinzibala kuyeeya alincico, tulimvwa kuti tuleelede “kuzumanana kweenda mbubonya mbwaakeenda walo.”—1Joh. 2:6.
19. Mbuti mbotukonzya kuzumanana kukkala muluyando lwa Leza?
19 Tulikanzide kuzumanana kukkala muluyando lwa Leza. (Jud. 20, 21) Tulazumanana kukkala muluyando lwa Leza kwiinda mukucita zyoonse nzyotukonzya kutegwa katumumvwida, kusalazya zina lyakwe alimwi akumukkomanisya. (Tus. 27:11; Mt. 6:9; 1Joh. 5:3) Kucita Ciibalusyo kuyumya makanze eesu aakuti buzuba abuzuba katupona munzila iitondezya kuti twaambila Jehova kuti, ‘Ndiyanda kuzumanana kukkala muluyando lwako mane kukabe kutamani!’
20. Ntwaambo nzi tulimvwisya itutupa kujanika ku Ciibalusyo?
20 Kufwumbwa naa bulangizi bwesu mbwakuyoopona kukabe kutamani kujulu naa anyika, tulijisi twaambo tulimvwisya ncotweelede kujanika ku Ciibalusyo. Mwaka amwaka ciindi notubungana antoomwe mubuzuba bwa Ciibalusyo, tuyeeya lufwu lwamuntu umwi ngotuyanda kapati, nkokuti Jesu Kristo. Kwiinda zyoonse, tuyeeya luyando lupati ndwaakatondezya kulindiswe, luyando oolo Jehova ndwaakatondezya kwiinda mukupa Mwanaakwe kacili cinunuzyo. Mwaka uuno, Ciibalusyo ciyoocitwa kumangolezya muli Bwasanu, mu April 15, 2022. Tulamuyanda Jehova alimwi a Mwanaakwe, aboobo buzuba notuyeeya lufwu lwa Jesu, kunyina cintu ciyandika kapati ncotukonzya kuyoocita kunze buyo lyakujanika ku Ciibalusyo.
LWIIMBO 16 Atumutembaule Ja Akaambo ka Mwanaakwe Uunanikidwe
^ munc. 5 Kufwumbwa naa bulangizi bwesu mbwakuyoopona kujulu naa muparadaiso anyika, tulakkomana kujanika ku Ciibalusyo mwaka amwaka. Mucibalo eeci tulabandika twaambo twamu Magwalo itugwasya kujatikizya kaambo ncotweelede kujanika ku Ciibalusyo, alimwi ambotugwasyigwa kwiinda mukucita boobo.
^ munc. 4 Kutegwa muzyibe zinji kujatikizya cizuminano cipya alimwi acizuminano ca Bwami, amubone cibalo cakuti “Muyakuba ‘Cisi Cabapaizi’” mu Ngazi Yamulindizi yamu October 15, 2014, peeji 15-17.
^ munc. 4 BUPANDULUZI BWAMABALA: Mabala aakuti bananike basyeede aamba Banakristo bananike ibacipona anyika.
^ munc. 10 Kutegwa muzyibe zinji kujatikizya businsimi bwatusamu tobilo ibuli mucaandaano 37 cabbuku lya Ezekieli, amubone bbuku lya Bukombi Busalala—Bwabukulusyigwa!, peeji 130-135, muncali 3-17.
